كنت جالسًا مع المفعوص نشاهد سويًا استقلال دولة "المحلة" الكبرى، عن الأراضى المصرية، ورفع العلم "المحلاوي، فوق أرض "المحلة" الطاهرة، من قلب ميدان "الشون" أكبر ميادين "الدولة، والذي انطلقت منه شرارات ثورة المحلاوية الأولى في عهد المخلوع مبارك، وأيضا في عهد الرئيس الحالي "مرسي".. وفجأة سألنى "أبو نص لسان".. - عاجبك اللى بيعملوا "مرثى" في مثر؟ - طبعًا مش عاجبني.. وأكيد الريس كمان مش عاجبه.. لأنه أقسم اليمين الدستورية بأن يحافظ على سلامة الوطن ووحدة أراضيه.. - ثلامة الوطن ووحدة أراضيه!!.. مش باين أبدًا.. وشكله حالف على تقثيم الوطن وتفتيت أراضيه.. - متبقاش مفترى.. وتتجنى على الراجل اللى بقاله في السلطة ست شهور بس.. ولازم نديله فرصة لغاية ما مدته تخلص. - ما هو يا خوفي بعد ما مدته تخلث تكون مثر خلثت هيا كمان.. وبعد ما كان اثمها جمهورية مثر العربية.. تبقى الولايات المنفثلة المثرية..!! - مش للدرجة دي..! - لأ للدرجة دي وأكتر.. إذا كان هيفضل ماشي بالثياثة دي مثر هتتفتت.. وكل محافظة هتعلن اثتقلالها زي المحلة.. وهيبقى عندنا 27 دولة.. وخد عندك بقى.. اللى عاوز يروح دولة "المنوفية" لازم ياخد تأشيرة.. وأكيد هيكون فيه تمثيل دبلوماثى بين الولايات المنفثلة دي.. يعنى دولة "الفيوم" تعين ثفير ليها في دولة "البحيرة".. ولو حدثت خلافات بين دولة "دمياط" مع دولة "قنا" تثحب ثفيرها من هناك.. و"القليوبية" تفتح قنثلية ليها في "الغربية".. و"كفر الشيخ" تفتح ثفارة ليها في القاهرة.. وكده..!! - لأ مش كده.. إنت اللى قلبك إسود.. وشكلك حاقد على "مرثى".. - حاقد إيه وبتاع إيه يا بابا.. دا من أول ما مثك الحكم وكل قرار بياخده بيعمل كارثة في البلد.. وآخرها الإعلان الدثتورى التالت.. وتثميمه على إجراء الاثتفتاء على مثودة الدثتور، رغم الناث اللى ماتت وهتموت بثببه.. ورغم رفض القضاة الإشراف عليه.. ورغم اعتراض القوى المدنية والأقباط عليه.. يعنى الدثتور ده بدل ما نعمله فرح ونحتفل بيه كلنا.. هنعمل له "مأتم" ونعيط فيه على ضياع البلد. - خلينا فى المهم.. إنت هتصوت ب"نعم" ولّا ب"لأ" للدستور..؟! - أنا هلطم على وشى.. وهحثبن على اللى كان الثبب!!