كاد أن يعتذر بكار عن لقاء حمزاوى هذا الأسبوع عبر اتصال هاتفى بينهما إلا أن حمزاوى أصر على هذا اللقاء لما لمسه من ألم وحزن وأسى فى نبرة صوت بكار ورغم أن حمزاوى لم يرض يومًا عن أفكار بكار إلا أنه يحبه ويكن له كل احترام وتقدير حيث آلمه أن يحزن بكار .. وبالفعل التقيا بعد ضغط حمزاوى وإصراره على اللقاء.. حمزاوى : مالك يابكار صوتك مش عاجبنى مش عوايدك؟ بكار: ناس كتير بقت ضدى ياحمزاوى بيقولوا عليا إنى وقعت فى الضلال لما انتقدت توغل النظام الحالى فى البلد وسيطرته على كل الوزارات . حمزاوى : ماهو يابكار هما كانوا منتظرين إنك تقف معاهم مش ضدهم وخاصة انهم بيعتبروا فصيلك ابن عمهم وأقرب الفصايل إليهم ؟ بكار : بس أنا قلت الحق . حمزاوى : طيب لو كان فصيلك هو اللى وصل لسدة الحكم وتوغل كده فى البلد كنت برضه حتنتقده وتقول نفس الكلام ؟ بكار : ماكنتش حقبل ياحمزاوى الحق ماينفعش يتجزأ بس اللى مزعلنى إن هما بيهددونى إنى مش حاخد أى منصب فى الدولة زى ماتكون بقت دولة أبوهم المناصب بقت وفق أهوائهم ومزاجهم مش بالخبرة والإمكانيات . حمزاوى : خلاص يابكار اترفع الستار وكل واحد بان على حقيقته، ماتزعلش نفسك وقوللى حلمت بإيه إمبارح؟ بكار : حلمت حلم غريب أوى ياحمزاوى مش عارف أفسره ؛حلمت اللهم اجعله خير إنى ضابط فى الجيش فى جماعة اسمها الضباط الأحرار وإن احنا قمنا بانقلاب وثورة على الحكم وأسقطنا النظام وحطينا إيدنا على مقاليد الحكم فى البلد وإنى خرجت على الشعب فى بيان قلت فيه لقد انتهى عهد الإخوان وانتقل الحكم إلى الضباط الأحرار . حمزاوى : طيب يابكار قوللى ف "الحلم" كنت بدقن ولا من غير دقن ؟ بكار : كنت بدقن ياحمزاوى حمزاوى : يبقى كده أقدر أقولك إن وجود دقنك فى الحلم أفسدته لإن الضباط الأحرار ماكانوش بدقون ومحمد أنور السادات اللى ذاع البيان أيام انقلاب الجيش على الملك ماكانش بدقن، عمومًا حلمك المرة دى فيه بشرة خير بتقول إنك اقتنعت بأن حكم النظام الحالى لايصلح لبلدنا وإنك من جوة ومن قرارة نفسك بتتمنى إن النظام يرحل حتى لو بقينا تحت حكم العسكر، انت شايف إن حكم العسكر أفضل من حكم الإخوان كدة أنا ابتديت اطمن عليك يابكار.
بكار : مش عيب إن الواحد يعترف إنه غلطان ويقول إنه اندفع ورا حلم كاذب بس كان لازم من التجربة واحنا خضنا التجربة وعرفنا إنها فاشلة وإن البلد أكبر من أن يحكمها الإخوان أو فصيل لوحده ويغلب مصالحه ومصالح جماعته على مصلحة البلد . حمزاوى : أحييك يابكار الاعتراف بالحق فضيلة وده عهدى بيك، الحساب عندى النهاردة يابكار وحطلبلك كابتشينو وسيبك م القرفة أم جنزبيل اللى بتشربها على طول دى . بكار : ماشى ياصاحبى وأنا موافق حديها معاك كابتشينو .
وابتسم الاثنان ونهض حمزاوى واحتضن بكار وهو يقول له : عود أحمد ياصديقى !!
