"رايات النور" من قصائد الشاعر "جمال عرفة"، وهى ضمن ديوان يحمل اسم "يوميات الريس مرسى"، جارى التجهيز فيه، وهى تعبر عن أحداث الأيام الماضية. يقول الشاعر: شايف رايات النور ماليه الطرق والدور والحق صوته بيعلا لما الوطن بيثور ملايين مع ملايين للظلم ده رافضين ماتقولش دول قله أو شله م الحاقدين كل البشر رافضينك بينادوا مش عايزينك والقله هى جماعتك ع الظلم ده مساعدينك اعقل وسيبها لناسها عمرك ما كنت فارسها مصر عفية عليك فرسة مش انت سايسها ارحل وخد إخوانك خنت ومحدش خانك مدينا الإيدين بالحب عضيت الإيدين بسنانك إوعى تاخدها عناد وتمسك سلاح وعتاد وتحارب بهم شعبك وتعيش ف دور جلاد الظلم مش طبعك وتكوينك لكن جماعتك هيخسّروك دينك وتبقى كبش الفدا وينهشوا ف مصارينك ارجع لشعبك تانى حقق آمال وأمانى واخشى الإله ربنا وكون رئيس إنسانى يا تسيبنا نرجّع مصر زينة الزمان والعصر مصر صابها العطب وصابها الألم والعسر