كنباوي: ده كان نكته مش خطاب كنباوية: والله حتوحشنا خطاباته بعد ما يمشي كنا بنتندر بيها وبنضحك عليها يلا كل حاجة ولها وقتها كنباوي: توحشنا إيه هي حتروح فين يعني دي حتفضل على اليوتيوب العيال حيقعدوا سنين يضحكوا عليها بس هو يمشي يرحل يخلع كنباوية: مش بالساهل يا كنباوي بعد الخطاب ده إنه يخلع بسهولة ده مش حيطلع غير بالطبل البلدي وبزفة حسب الله ده مش ناوي يجيبها لبر بعد تهديداته إنت شوفته وهو بيسجد السيسي والداخلية عاوز يألوظ لهم العمة ويلبسهم السلطانية لكن على مين كل واحد فاهم دماغ الشاطر ما هو اللي كان بيتكلم ده مش مرسي ده مرسي لسان بس والشاطر هو اللي كان بيتكلم كنباوي: بس كان مهزوز وخايف ومرعوب كان باين عليه كنباوية: أخدت بالك من حكاية أنا القائد الأعلى للقوات المسلحة وأنا القائد الأعلى للشرطة؟ كنباوي: أيوه أخدت دي كان بيقولها للسيسي والحدق يفهم كنباوية: بحكم إني بعرف أقرأ وجوه الناس السيسي ما كانش مبسوط من القعدة ولا الليلة ولا الخطاب كله وتحس إنه كان قاعد مغصوب على أمره بس الصابرين بخير بكره حتحصل حاجه كبيرة أوي وحبقى أفكرك وقول كنباوية قالت كنباوي: قصدك يعني اللي في بالي؟ كنباويه: أيوه يا كنباوي اللي في بالك هو اللي حيحصل كنباوي: ده يبقى راجل من ضهر راجل ويحللنا المشكلة ويدخل التاريخ من أوسع أبوابه وحيبقى زعيم وبيني وبينك هو له طلة وهيبة وكاريزما وراجل عاقل وواعي وسياسي ومحنك وربنا يجيب العواقب سليمة يارب كنباوية: حيجيب بس إنت اصبر واتمنى معايا إن اللي بنفكر فيه ده هو اللي يحصل كنباوي: يا ريت يا كنباوية، يا ريت كنباوية: بإذن واحد أحد هو ده اللي بكره حيحصل وبكره تشوف ناقص على مرسي دقة واحدة بس كنباوي: ناقص الميادين تتملي بالناس في تظاهر سلمي والإعلام يشتغل له في الأزرق والقضاة يقوموا عليه كنباوية: ما الإعلام شغال لمرسي في الأزرق من زمان والقضاء مش حيرحمه ولا حيسيبه في حاله أبدا بعد ما هانه والدنيا كلها حتتقلب عليه وحتبقى ضده من بكره الصبح كنباوي: بس هو قرفان أوي من الإعلام ومن القضاء ومن حركة تمرد ومن البلطجية ومن مكرم محمد أحمد ومن شفيق ومن فتحي سرور وصفوت الشريف ومن لميس الحديدي ومن وائل الإبراشي وغيرهم وغيرهم كنباوية: ما جابش سيرة باسم يوسف رغم ذكره لأسماء بعينها وفين المؤامرات اللي قال إنه حيكشفها لنا والدسائس والمتسببين في إشعال نار الفتن كنباوي: ما هو قال البلطجي بتاع المعادي وبتاع الشرقية وبتاع المحلة كان ناقص يقول عم رمضان بتاع الفول اللي أول حارتنا كمان بلطجي وفلول علشان بياكل عنده البلطجية كنباوية: ده هرتل جامد وما ريحش الشعب ولا المعارضة خالص خطاب زي قلته كانت قلته أحسن منه بس هو نام الضهر كويس واداها تعسيلة حلوهة وقال لما يقوم يصدع دماغنا شوية كنباوي: خطاب 3 ساعات ده إيه ده؟ هو احنا فاضيين للكلام الفاضي ده؟.. ده كده بيعطل عجلة الإنتاج كنباوية: إنتاج إيه يا كنباوي بالليل؟ كنباوي: إنتاج العيال انتي مش عارفه إن المصريين بالليل بينتجوا عيالهم؟ كنباوية: يا حظك يا كنباوي إنت بتهزر؟ كنباوي: ماهزرش ليه؟ ما مرسي كمان بيهزر لما يهددنا بالمحاكم العسكرية هو ده مش هزار؟ ولا هو كان بيتكلم جد؟ كنباوية: اللي يسمعله.. السيسي أعقل من تهور مرسي كنباوي: سيبك من وجع الدماغ ده وقومي اغرفيلي آكل لإني جعان ولا مفيش أكل النهارده وإنتي انشغلتي بخطاب سي مرسي؟ كنباوية: كان ده ممكن يحصل لو اللي بيخطب جمال عبد الناصر أو أنور السادات أو الشيخ الشعراوي لكن مرسي هيهات يا كنباوي هيهات كنباوي: يعني أفهم من كده إن فيه أكل؟ كنباوية: طبعا يا كنباوي فيه أكل وأحلى أكل كمان لما أقوم أحضرلك الأكل كنباوي: تسلميلي يا أم عيالي، تسلميلي يا كوكو كنباوية: أيوه كده طالما دلعتني يبقى مزاجك رايق وعنب كنباوي: أنا طول ما بطل في وشك وأنا مزاجي دايما حيفضل رايق كنباوية: يا رب دايما رايق المزاج والبال يا كنباوي!
