فى بيتى ومرتاحة ومشغلة المروحة السقف والجو آخر طراوة قلت أعمل حاجة مفيدة.. قررت أعمل ماسك للبشرة وقلت أجرب الخلطات الرهيبة اللى بتبقى موز على فراولة على خيار وبتنجان عشان يطلع وشى فى الآخر زى البدر.. وعملت الخلطة ونص ساعة ولقيت وشى زرع.. وفى دخلة بنت خالتى الفلحوسة عليا.. ولقيتها بتقولى: الفلحوسة: مش قلت لك مليون مرة إن كده غلط ولما تحبى تعملى ماسك للبشرة اسألينى ده أنا خبيرة أوى فى الحاجات دى. أنا: مش باين يعنى.. قال على وشك يبان يا أبو ماسك جنان. الفلحوسة: طيب بصى بقى هعلمك طريقة حلوة أوى لماسك جديد. أنا: وماله يا بنت خالتى أهه منك نستفيد. الفلحوسة: طيب هاتى بقى نص طماطماية ونص راس ثوم وحطى عليهم برطمان العسل وشوية دقيق وشوية نشا وشوية لبن. أنا: ده إيه ده يا أختى انتى هتعملى كيكة شم النسيم ولا ماسك للبشرة؟ الفلحوسة: بطلى بقى ما دام انتى مش فاهمة حاجة اسكتى وسلمينى وشك وبس. أنا: لا.. أسكت آه.. لكن أسلمك وشى لا.. كله إلا كده.. شرف المُزة مننا فى وشها ولو خسرته فاضلها إيه تانى؟؟ وبعد ما خلطت كل الخلطة شميت ريحة عجيبة وقلت فى نفسى معقولة برضه أنا هسلم وشى كده للخلطة دى من غير ما أفهم نتيجتها إيه؟!.. لا المُزة ما تعملش كده. وبعد تفكير عميق.. قلت لطباخ الماسك لازم يدوقه وقلت لبنت خالتى وشك قبل وشى.. وعينكم ما تشوف إلا النور.. حطت الماسك الأول من هنا وقعدنا نتصل بالمطافى والنجدة والإسعاف لحد ما لحقوها عمال الصرف الصحى والحمد لله قدرنا نرجع المناخير مكانها.. والخسائر كانت محدودة.. وساعتها قلت فى عقل بالى.. كل شىء يهون كى أبقى مزة دائما.
