نظرًا لأن الذوق العام بقى زى وش اسمه ايه حلو الزمان الهمزانى والبنات ما بقتش عارفة اللي ليها واللى عليها فأنا قررت إنى أعمل مبادرة -اشمعنى أنا يعني - وأديكم دروس في الاتيكيت والذوق عشان يفضل شكل مصر ومزز مصر حلو على طول ولا سورية تخطف منك جوزك ولا لبنانية تعملك فتوش في سندوتش وانتي تأكليه زي البالوظة ..قلت اديكي نصيحة وأجري على الله ولا هما يعني اللي قاعدين يفتوا في التليفزيون ليل ونهار هيخافوا عليكم أكتر مني.. الدرس الأول للمزز لما تبقى ماشية في الشارع لابسة الحتة اللي ع الحبل واعدتي ساعتين تلزقي القصة على وشك ونص ساعة تلوني ظوافرك اشي أصفر وأخضر وفوشيا وساعتين كمان بتحاولي تقفلي البنطلون من كرشك اللي كبر ومش عارفة ..ويجي واحد يعاكسك يقولك يا جميل يا حلو أنت ياللي ماشي ..يا مشمش ياغزال .. رنة كعبك دي ولا رنة خلخال. ويحاول يديكي رقمه..طبعا أنتي هتقومي رامية الرقم في وشه أو مقطعه الورقة وتقعدي 3 أيام تعيطي وتقولي يا ريتني كلمت الواد الأمور ده و طبعا ده لأنك ما تعرفيش الاتيكيت بيقول إيه .. بيقول ما يصحش تعملي كدة وتكسفيه وأنتي أصلا هتموتي علي عريس المزة ما تعملش كدة .. المزة تأخد الرقم وتكلميه وتقوليله بصراحة أنت لطيف اوي وكيوت بس مشكلتك نك بلدي اوي اوي ومعاكستك قفلتني.. وتقفلي السكة في وشه..والمزة هي اللي تعمل كدة.