"كنباوية" فى الحمام تدير غسالتها الفول أتوماتيك وهى تدندن أغنية الراحلة حديثًا شهرزاد (ضحكه مبارك عسل، عسل وسكر عسل، ضحكة حبيبى عسل)، يسمعها "كنباوى" فيبتسم ويذهب إليها لمداعبتها. "كنباوى": بقى كده!! بقالك حبيب غيرى؟!! "كنباوية": مبارك ده حبيبنا كلنا. "كنباوى": من إمته إن شاء الله؟ مش ده مبارك اللى كنتى فى التحرير بتقولى لازم يرحل؟!! "كنباوية": كل وقت وله أدانه، واللى مايعرفش يقول عدس. "كنباوى": ما انتى قولتى عدس. "كنباوية": أيوه قلت، بس ربنا يسامحنى بقى، ماكنتش اعرف واتخدعت زى ما كلنا اتخدعنا. "كنباوى": هو خد براءة؟ "كنباوية": لأ، بس حياخدها، النهاردة المحكمة اتنحت عن الحكم فى القضية. "كنباوى": ليه إن شاء الله؟ "كنباوية": بتقول إنها اتحرجت، بس الحقيقة ماحدش عارفها فين، بيقولوا إن وزير العدل والنائب العام أجبروا القضاة على التنحى عن الحكم لأسباب لا يعلمها إلا ربنا. "كنباوى": والإخوان ليهم دخل فى التنحى ده؟ "كنباوية": لما النائب العام ووزير العدل يتدخلوا فى شىء يبقى أكيد الإخوان ليهم دخل فيه، وخاصة إن براءة مبارك فى الوقت ده وخروجه فيه خطر عليهم. "كنباوى": ده واحد مريض، لا حول ولا قوة إلا بالله. "كنباوية": بيقولوا إن أتباعه ومؤيديه حيلتفوا حواليه أكتر، وممكن ده يعمل لهم بلبلة أكتر، وبيقولوا إن أعوانه وأصحابه بالخارج ممكن يقفوا جنبه، ماتنساش يا "كنباوى" إن فيه ناس كتير عايزه مبارك يرجع يحكم من تانى، وخصوصًا إن حكم الإخوان ودّانا فى داهية، وبيجرنا للخراب المستعجل. "كنباوى": وأى خراب؟ ده خراب مسوجر. "كنباوية": النهاردة مبارك كان سعيد ومبتسم وفرحان، وشاور للناس، المحللين بيقولوا إن مبارك واثق من براءته، وناس بتقول إنه شمتان فينا وفى الإخوان، وناس بتقول إنه كان بيوصل رسالة إنه خارج تانى، وإنه بيقول للشعب المصرى: شوفتوا زمنى من زمن غيرى!! "كنباوى": والإخوان عملوا إيه؟ "كنباوية": الإخوان عندهم مغص وإسهال ومرتبكين، والبلتاجى بيقول إن وصول مبارك فى طيارة بيقتل الثورة. "كنباوى": همه لسه بيتكلموا عن الثورة؟ "كنباوية": أيوه يا سيدى، زى مايكون همه اللى قاموا بيها، بجاحة بعيد عنك وسفالة وقلة أدب. "كنباوى": أنا كل ما افتكر همه نطوا على الثورة ازاى كل ما حيجينى جنان. "كنباوية": دول فيران وخرجوا من جحورهم يقرفوا فينا ويرازونا، الله ينتقم منهم ويخرب بيوتهم زى ما سمّموا حياتنا وخلّوها غم فى غم. "كنباوى": أمين يا رب، ويسمع منك ربنا يا "كنباوية"، بقى قولتيلى علشان كده إنتى مبسوطة وبتغنى لمبارك؟ "كنباوية": طبعًا مبسوطة وشمتانة فى الإخوان ولاد ستين فى تسعين دول. "كنباوى": ربنا يبسطك كمان وكمان، مفيش أكل النهاردة؟ "كنباوية": ودى تيجى، أنا عملالكم صينية مسقعة باللحمة المفرومة تستاهل بؤكم. "كنباوى": قدامك كتير على الغسيل ده؟ "كنباوية": لأ، دقيقتين واشطف إيديا واحضر لكم الأكل. "كنباوى": أيوه وحياة ولادك أحسن أنا واقع وسقطان من الجوع. "كنباوية": من عنيّا. "كنباوى": تسلم عيونك يا "كنباوية".
