فى منتصف صالة المنزل التقانى ابنى أبو نص لسان وجذبنى من تيشرتى وأخذ يصيح: - بابا بابا. -نعم يا أبو نص لسان. - أنا خلاص زهت وقرفت وقرّبت أطق من جنابى من اللى بيحصل وبشوفه وبسمعه كل شوية.. - يا فتاح يا عليم يا رزّاق يا كريم على الضهر.. فيه إيه يا مفعوص يا أبو نص لسان؟ - هو إحنا مسلمين موحدين بالله، ومؤمنين بالنبى، ولّا كفار ومشركين وموحدين باللات والعزى.. ومؤمنين بأبو لهب وبمسيلمة الكداب..؟ - حيلك حيلك.. طبعا مسلمين وموحدين بالله، ومؤمنين بالرسول، صلى الله عليه وسلم.. أمال إنت نطقت الشهادتين ليه؟ وبتصلى الخمس صلوات ليه؟ وبتصوم ليه؟ وبتزكى ليه؟ وإن شاء الله لما تكبر هتحج لبيت الله الحرام ليه، إلا إذا كنت مسلم؟ - يعنى أنا مسلم، ثح؟ - صح يا أبو نص لسان.. لكن إيه اللى خلاك تسأل السؤال ده؟ هو حد قالك إنك من أحفاد أبو جهل وأبو لهب والوليد بن المغيرة..؟ - لأ.. محدش قاللى كده.. لكن كل شوية نلاقى الإخوان المسلمين والسلفيين بيقولوا عاوزين نطبق الشريعة الإسلامية.. فقلت يمكن يكون ليهم شريعة غير شريعتنا.. وجايز نكون إحنا بقينا كفار ومش واخدين بالنا.. زى ما الناس صحيت من النوم فى عهد "المخلوع" لقت نفسها تبع محافظة حلوان و6 أكتوبر بعد ما كانت تبع محافظة القاهرة والجيزة.. - هههههههه.. الله يجازى شيطانك يا مفعوص.. هو ده اللى مزعلك.. ومخليك شايط كده؟! - لأ يا بابا.. اللى مزعلنى بجد إن الأستاذ سيد كان بيقول للأستاذ أحمد لازم تشارك فى مليونية تطبيق الشريعة.. فدخلت فى الحوار وقولتله هو إحنا مش بنطبقها يا أستاذ..؟ قاللى لأ يا أبو نص لسان .. قولتله زى إيه اللى مش بنطبقه؟.. قاللى زى حاجات كتير.. قولتله ممكن تقوللى تلت أو أربع حاجات.. قاللى عندك الحدود مثلا.. قولتله ودى مش ليها شروط؟ ما علينا.. وإيه تانى؟ - قاللى إنت لِمِض قوى كده ليه.. باين عليك علمانى أو ليبرالى إنت وأبوك.. فقولتله يعنى إيه علمانى وليبرالى؟ قام ضاربنى وشايلنى ورامينى بره الفصل وطردنى من الحصة !!
