حكالنا حنفي بن تامر وقال :- رحت أسأل عم بهاء , ف مساكن الإيواء , عن (تطبيق شرع الله) , رد : شرع الله , بقا مسألة سياسية , وإقتصادية وحربية , بقا فكل المجالات , بقا مادة إعلام , بقا محور كلام , في كل المجلات !! بقت دلوقتي البنت , لازم تدخل ع النت , وهي معاها محرم , وكأنها رايحة تحرم !! , وقبل الدخول ع النت , فيه دعاء دخول النت !!! , قولتله : وماله يا فت ؟ , الناس الملتزمين , المتدينين , بيتقوا (الشبهات) , و( المتشابهات ) , وانت عارف النت , بقا مليان حكاوي , وفضايح وبلاوي , بين الشباب والبنات !! , قال : هات يا اخويا هات , النت حلال وحرام ؟ , ومحرم وإحرام ؟ , هو اللي نقول له يا حج , لازم يعني يكون حج ؟ , واللى نقول له يا مقدس , لازم يعني يكون قدس ؟ , أكم ناس بنسميها , بأسامي ماهياش فيها , أمال المنافقين , والإخوة النصابين , ومستغلي الدين , هيشتغلوا على مين ؟!!! , دولا مش ملتزمين , لا دول متذمتين , والحق بيبان , لو ورا تسع بيبان , تعرف فلان ؟ عاشرته , عاملك ؟ وانت عاملته؟ , تبقى ما تعرفوش , اللى انت ما تعرفوش , دول (متدنيين) , دول ولا (متدينين) , ولا (متمدينين) , دولا رقصوا ع السلم , واللى رقصوا ع السلم , لا اللى تحت شافوهم, ولا اللى فوق سمعوهم !! , والحق لا فيه مجاملات , ولا فيه أبو جمالات !! , الدنيا ما تسواش , قولتله : ماشي يا ألاش , شرع الله مش يطبق ؟ , قال لي ( بوشه المطبق ) , : لو شرع الله اتطبق , هنبقى دولة قوية , , (خلافة إسلامية) , هنبقى (جسد حي) , هنبقى بالظبط زي , (الدولة الأموية) , و(الدولة العباسية) , و(الدولة العثمانية) , وهنعمل توسعات , في العالم بالغزوات , لكن إحنا مش بنطبق , شرع الله لأ بنطبق , ( الهوس والهوى ) !!! ( أرأيت من إتخذ ألهه هواه فأضله الله على علم ) ..يعني شخص ذو علم , ربنا خصه بالعلم , ويوظف شرع الله , فيما يخدم هواه , معي انت (مثاب) ....فلقد أصبت الطريق ضدي أنت (آثم) .....و(فاسق) و(زنديق) ولهذا النتيجة , على رأي الحجة ( خديجة ) , في كتابها (ياريتني جريت , ورا بيتزا مارجريت ) :- العرب ( بالإسم ) مسلمين ...والغرب ( بالفعل ) مسلمين عندنا الإسلام , عامل زي الإعلام , بينافقوا بيه الحكام , أه وكأن الحكام , (أنصاب ) و(أزلام ) , بنعبدها من دون , الله..طبع دون !! , قولت : استغفر ربنا , قال لي: وربنا , إسلامنا (تبرير كساد) , أو (تمرير فساد) , في عصب المجتمع , واللى بيشوف المنكر , ما بيغيرش المنكر , بيغمض عينه عنه , وكأنه موافق إنه , يكون في المجتمع !! , عندنا هنا تغيير سلبي , يعني أغير ب قلبي , الشيء اللى مش كويس , ودة طبعا مش كويس , دة أضعف الإيمان ( ومن لم يستطع فبقلبه وذلك أضعف الإيمان ) مين بيغير بإيمانه , وبإيده وبلسانه , ليه بقا كله جبان ؟ , يا مين يعمل معروف , ويأمر بالمعروف , والعدل والإحسان ؟؟ , ... دي الدعوة الى الله , بقت (بيزنس) و(مكسب) , و(شهرة) و(قناة) و(مكتب) , و(موقع).. لنا الله . وكمان (ولى الأمر) , بيمشي الناس بالأمر , ويا ويل اللى يتأمر , نافق وطبل وزمر , كلها كدة ( طبل وزمر ) !!! قولتله : طب العيب في مين؟ , قال لي: العيب فينا احنا , أي والله احنا , مع بعض ( وحشين ) , على بعض ( متوحشين ) , بناكل بعضنا أكل , وكل يوم كارثة شكل !! ..ولاحد في دماغه , كله مهوي دماغه , مقفلين عيوننا , ومغفلين عقولنا !! ياض فيه قاعدة أساسية , وللأسف منسية , :- ( العدل أساس الملك ) , ربك صاحب الملك , أمر عباده بالعدل , وسمى نفسه (العدل) , قولتله : طب ما فيه عدل , مش فيه (وزارة العدل) , قال : دي وزارة الظلم , إحنا مرتع للظلم , والسكوت عن الحق , احنا يا ابني للحق , عندنا (روح الندالة) , ....ودي غير (روح العدالة) , دي زي (روح الخل) , ( الإسفين هو الحل ) , دة يعمل مع دة نمرة , ودة يفقع في دة إبرة , ودة يضرب فيك إسفين , ويقول لك احنا آسفين , أيوة علاقاتنا ببعض , مش قايمة على (الودية) , لأ قايمة على (الندية ) , ند ب ند صد رد , بقت الفضيحة فضيلة , والقبيحة جميلة , على راي سميرة سمير , ف كتابها الشهير , (قر واعترف , بعد ما اتظرف , كام قفا ف القسم) :- آدي حال الناس انبارح كان بينهم ..........ألفة وخير وسلام وود والنهاردة بينهم .......كولفة وغيرة وحسد وحقد عن نفسي أعرف ناس انبارح كان بينهم ....حب وعشرة وعيش وملح والنهاردة بينهم ............تار ودم وذم وجرح !!! قولتله : مش كلنا كدة , قال : لا كلنا كدة سايق عليك النبي..... ما تسوق عليا العبط والشيطنة والنبي... ما تسوقش فيها انا لبط قال حنفي بن تامر :- قولتله : كلامك زبالة , بس أنا مش عايز أسمع , راجل ( مبقع مفقع ) , صحيح وهدومك بالة !! , قال لي : الفقر مش عيب , قولتله : العيب ف الجيب , قال لي :فيه غيري أفقر , مني قولتله : هتفقر ؟ , الناس معاك على أيه , يا عم الفقري بيه , إقفل بقك بس , دة الواحد وياك حس , إنه معادشي فيه خير , ف الدنيا.. لسه الخير , موجود حتى الرسول , في أحاديثه بيقول :- ( الخير في أمتى إلى يوم القيامة ) و ( تفائلوا بالخير تجدوه ) مد إيده فجيبه , خوفت ألا يطلع مطوة , ويعمل عليا سطوة , قولت فسري : آدي عيبه !! , قال لي: كلامك زيهم , شكلك واحد منهم ؟ , اه لو انت منهم ياريت , تبقى لقضاك هنا جيت , أخدت بعضي وجريت , من قدامه ما انا خوفت , يعمل معايا الغلط , وخصوصا إنه لبط , زي ما حسيت وشوفت ....والختام