الحاجه أطاطا: أنت يا واد يا عوكل أنت حتفضل قاعد لى كدة زى العمل الردى؟ أنت يا واد لازم يكون لك موقف. عوكل: موقف إيه يا ستى؟ موقف حتة واحدة.. طيب قولى يبقى عندى ميكروباص أو حتى توك توك لكن موقف ده أجيبه منين؟ الحاجه أطاطا: موقف إيه يا منيل يا سبب وكستى؛ موقف يا حيلة أمك وأبوك يعنى فعل ورد فعل مش موقف الميكروباص اللى فى دماغك اللى عاملة زى الكورة الكفر دى. عوكل: وده أجيبه منين الفعل والموقف ده؟ أنا ما بقتش فاهمك يا ستى إنتى كل ما بتكبرى مش بفهمك أكتر وبيبقى كلامك غامض كده وكله ألغاز. الحاجه أطاطا: غامض مين يا ابن الكلب أنت عاوز تشتمنى وتقول إنى كبرت وإنى كل ما بكبر بخرف وعقلى بيخف ده أنا أعقل واحدة فى القلعة كلها. عوكل: مش قصدى يا ستى. الحاجة أطاطا: ولا قصدك ما أنت وسخ زى أبوك الله يرحمه بقى القصد أنت ما ينفعش تفضل قاعد كده لا شغلة ولا مشغلة حاطط لى إيدك على خدك زى الولايا أنت لازم تشوف لك شغلانة. عوكل: ودى حجيبها منين الشغلانة دى؟ حشتريها من عم حسين بتاع الكبدة؟ الحاجة أطاطا: كبدة مين وحسين مين يا وسخ يابن الكلب هو ده اللى أنت فالح فيه التريقة والنقورة. عوكل: هو كل حاجة شتيمه يا ستى؟ ما أنت وسخ وما تستاهلش غير الشتيمة وقلة القيمة أنت يا واد ياعوكل تشتغل رئيس حزب عوكل: إيه الحزب ده؟ إيه الحزب ده؟ أنا مش فاهم. الحاجة أطاطا: ولا عمرك حتفهم ما أنا عرفاك غبى، حزب يا منيل يعنى تشكيل. عوكل: عوزانى أكون تشكيل عصابى يا ستى، وابقى رئيس عصابة؟ فكرة يا ستى أنا طول عمرى كان نفسى أبقى رئيس عصابة. الحاجه أطاطا: والله ما أنت فالح يا موكوس يا اللى بينضحك عليك والعيال بيقلبوك وبياخدوا فلوسك فى الشارع أنت ما تعرفش حتى تكون بلطجى، ده أنت أهبل وبريالة أنا أقصد حزب سياسى زى حزب سى عمرو موسى كده وحزب سى أيمن نور والحزب المخفى ده بتاع الحرية والعدالة الله يحرقه بجاز وسخ. عوكل: وده حنبيع فيه إيه؟ الحاجة أطاطا؟ حنبيع فيه كلام. عوكل: هو الكلام بيتباع يا ستى؟ الحاجة أطاطا: أيوه بيتباع اصبر يا واد على رزقك مش كل حاجة الفلوس الفلوس، حتيجى بعدين المهم نكون الحزب الأول. عوكل: طيب أنتى مش غريبة عنى ومش تايهة عنى ده أنا ابن بنت بنتك يعنى عارفة وحافظة إنى تور الله فى برسيمه فهمينى حنعمل إيه؟ الحاجة أطاطا: أنت ما تعملش حاجة، أنا اللى حعمل حنجيب محامى وهو اللى حيتصرف حبيع حتتين صيغة من صيغتى ونلم ناسنا وحبايبنا فى القلعة، ونعمل حزب ونشهره كمان وأنت تبقى رئيس الحزب «سبوبة» يا واد وصيت وبرستيج ده اللى بيقولوا عليه. عوكل: ونعمله فين الحزب ده؟ الحاجه أطاطا: نعمله على السطح أهه واسع وشرح وبرح ويساع من الحبايب ألف ونفرشه ونقفله ويبقى مقر للحزب ونلبسك كمان بدلة ونبعت للتليفزيون يجى يصورك سى معتز الدمرداش أو سى وائل الأبراشى أو سى عمرو أديب أو ريم ماجد الأمورة دى. عوكل: أنا حطلع فى التليفزيون؟ أنا حطلع فى التليفزيون؟ الحاجة أطاطا: هو ده كل اللى همك حلوف من يومك ما الكلاب بتطلع فى التليفزيون جات عليك أنت يا حيوان. عوكل: ونسميه إيه الحزب ده يا ستى ايجبشن سمكرى؟ الحاجة أطاطا: انسى بقى أنك كنت سمكرى زى مرسى ما نسى أنه كان حبسجى حنسميه حزب عوكل وأطاطا عوكل: ومين حيخش فى الحزب ده؟ الحاجة أطاطا: السمكرية والميكانيكية وبتوع الدوكو والنجارين والفرانين وسواقين التكاتك والميكروباص والسباكين وكل الصنايعية يا «وله» وكمان البوابين والزبالين، كل المهمشين وبتوع العشوائيات ده يا «وله» حيبقى حزب مصر الحقيقى حزب الناس الغلابة دول اللى حينفعوك يا «وله» وحيكسبوك مجلس الشعب. عوكل: إيه ده هو أنا حدخل مجلس الشعب؟ الحاجة أطاطا: ما هى دى المصيبة أنا مش عارفة لما تنجح وحتنجح حتطلع تقول إيه تحت قبة البرلمان: أنت لازمك علام كتير بس أنا حتصرف وحفضل وراك كدة لحد ما تبقى رئيس جمهورية مش عضو برلمان. عوكل: انتى كدة كبرتى بجد وخرفتى رئيس جمهورية إيه ده أنا ما عرفتش أكون سمكرى حبقى رئيس جمهورية. الحاجة أطاطا: رئاسة الجمهورية أسهل يا «وله» ما أديك شايف مرسى أهه ما بيعملش حاجة واللى حواليه همه اللى بيفكروا له وياريتهم عارفين يفكروله دول «وحلة» ونهايته قربت خلاص على أيدهم، ما تخافش يا موكوس أنا حكون فى ضهرك وبعدين كفاية القلعة كلها حتقف وراك ده أنا مرضعة بصدرى ده القلعة كلها، وهمه حيردوا الجميل ده فيك يا «وله» عوكل: أحلامك وسعت منك كتير يا أطاطا بس مش مشكلة فى الآخر حناكل لحمة وأبطل السجاير الفرط. الحاجة أطاطا: هو ده اللى همك عليه بطنك ودماغك أنت شوفت أهه «مرات مرسى» صرفت كام فى رحلة طابا 2مليون جنيه وقبل ما يبقى جوزها رئيس كان كبيرها تسافر جمصة ولا رأس البر، اطمن يا عوكل حتاكل لحمة وتشرب سجاير مارلورو أحمر كمان بس اصبر على رزقك، ودلوقتى قوم انده لى الواد سعيد العرة المحامى حتصرف معاه إحنا لازم نبتدى من دلوقتى الحزب الأول وبعدين الرئاسة، أنا حنافس بيك عمرو موسى والسيد البدوى وحياتك والبرادعى كمان وحورى أبو إسماعيل أن أنصارى وأنصارك البيئة بتوع العشوائيات قد أنصاره وأنصار الحرية والعدالة 100 مرة أنا أهه وأنتوا أهه يا إخوان يا مسلمين إذا كانت المعارضة ماعرفتش تشيلكم هى وجبهة الإنقاذ الحاجة أطاطا حتعملها وكله بأوانه انزل يا عوكل انده المحامى وتعالى بسرعة عوكل: حاضر يا ستى أطاطا فريرة.........