ماذا تفعل الحكومة، اللي واقفة علي بوابة الوطن زي شيخ المنسر، وفي ايدها السنج والمطاوي، تقلب اللي داخل واللي خارج، وتاخد كل اللي في جيوبه، حتي لو كان قرطاس لب، أو سوداني، أهه رئيس الوزراء يتسلي شوية، ويطلع غله فيه، واللي ما يدفعش، أو جيوبه فاضية، تغزه في كرشه، تجيب مصارينه الأرض، وبعدين تبيعها لبتوع الفشة والممبار، واللي ييجي من الشعب الفقري ده.. أحسن من عينيه؟! وأين تذهب تلك المليارات، التي يجمعها وزير الضرايب والتفليسة، من الغلابة اللي لوطال يبيعهم في سوق العبيد مش هايتأخر، لأن اللي تحتاجه الحكومة.. يحرم علي الناس؟! أين تذهب زكايب الأموال التي يجمعها سيادته، إذا كانت كل حاجة بتتعمل في مصر شحاتة وصدقة، وتبرع يا أخي المؤمن للحكومة عشان متكسحة، وعاوزه تعمل عملية فرد وش، ومش لاقيه حق النشوق؟! أين تذهب كل تلك الأموال؟! إذا كانت كل إعلانات التليفزيون حتي المحطات الفضائية، تدعو الناس للتبرع لمستشفي 57357 ومستشفي الأورام الجديد في أكتوبر، ومستشفي الكبد بالمنصورة، ومستشفي مجدي يعقوب في أسوان، واكفل قرية فقيرة بجاموسة عشر، أو حتي عاقر، وما تعرفش ليه جاموسة بالذات، يعني ليه مش بقرة ولا معزتين، وتبرعوا بملابسكم المستعملة لكساء مليون محتاج، وتبرعوا لبنك الطعام عشان الناس تلاقي تاكل، بدل ما تقف تشحت في الشارع، أو تطفح من الزبالة. طيب الحكومة بقي لازمتها ايه، وفلوسنا اللي بيلهفوها بالحنجل والمنجل بتروح فين؟! أوسيادة الرئيس اللي كل ما تحصل كارثة في أي بلد في العالم، بيبعتلهم كام طيارة مليانة رز وسكر ومكرونة، وشوية حقن وفيتامينات، ما يبعت كام لوري أو حتي توك توك بلاش طيارة، للناس اللي مش لاقية تطفح ولا تتعالج في مصر. محمد الرفاعي