- السلام عليكم - سلام ورحمة الله وبركاته.. اتفضل - يزيد فضلك.. قلت أعدى عليك.. مادام أنت ما بتسألش.. كلمتك فى التليفون ما ردتش - مش ممكن.. إمتى الكلام ده؟!. - إمبارح بعد ما قيلت شوية الضهرية - غريبة كنت بتتكلم منين؟!. - (ضاحكاً وساخراً).. من بُقى. - معلش.. الدنيا تلاهى.. مسرح كبير. - قصدك الدنيا فيسبوك كبير - على العموم أنا تحت النظر - خليك فوق النظر.. واسأل.. وإزى المدام والأولاد؟. - الحمد لله.. بيبوسوا الأيادى.. والله زمان. - أنت حاتقول لى.. فعلاً كان زمن جميل - مش الزمن اللى كان جميل.. الناس همه اللى كانوا جمال.. ياللا .. لا شيء يهم.. على رأى صديقنا الزميل إحسان عبدالقدوس.. تشرب إيه؟!. - شكراً.. مالوش لزوم . - مفيش هنا مشروب اسمه ملوش لزوم.. فيه شاى.. قهوة.. ينسون.. حاجة ساقعة. - يبقى قهوة على الريحة. - حاجيب لك حاجة ساقعة. - عندك حق.. البُن غلى. - البنى آدم هو اللى بيرخص - فعلاً.. أقسم بالله طول عمرك حكيم.. نهايته .. أنا جاى لك فى كلمتين وماشى على طول.. عاجبك اللى عمله معايا صاحبك؟!. - صاحبى مين ؟!. - يعنى حايكون مين؟. أنت عامل مش واخد بالك والا إيه؟!. - ده كلام برضه تقوله؟!. - على العموم .. أنا ما باشلش من حد - ولا أنا - لكن ده ما يمنعش أنى زعلان - ربنا ما يجبش زعل.. مفيش حاجة تستاهل - فعلاً.. اللهم اختم حياتنا أحسن الخواتيم - آمين يارب - طيب .. استأذن أنا . - شرفت على الشوية الصغيرين دول.. ولو أننا ما بنشبعش من قاعدتك الحلوة. - الله يخليك.. ربنا يديم المحبة.. السلام عليكم. - بس أنت ما قلتليش.. مين صاحبى اللى مزعلك.. ومزعلك ليه؟. - الحلقة اللى جاية بقى.. وعليك خير (موسيقى تصويرية وتيترات نهاية الحلقة).