أيوه.. أنا السنة دى خارجة منها راس بصل.. عارف المقولة المعروفة بتاعة «ده وقع زرع بصل» أنا راس البصل اللى وقعت دخلت جوة الأرض.. سنة مليانة حزن.. ألم فراق.. وجع قلب. البصل يعنى دموع.. حرقان فى العين.. عطس أحيانا.. لكن رغم كل ده لا غنى عنه.. هكذا أنا.. دموع كتير حرقان فى القلب.. لكن لا غنى عنى وهذا لأننى دائما أحاول.. أحاول ألا أيأس.. أحاول ألا تهزمنى الدنيا بقساوتها ولؤمها وشرها.. أحاول أن أقف مرة تانية رغم السقوط المروع هذه السنة ولكن مازلت قادرة على المحاولة. وزى رأس البصل ما تتزرع جوه الأرض وتختفى.. تخرج فروع خضرا.. طويلة.. والبصلة تبقى عشرة. أنا برضه رغم الألم.. رغم كم الخذلان اللى مريت به هذه السنة.. حتى من أقرب الناس ليا.. رغم الإحباط.. والفشل فى أشياء ظننت أنى اقتربت من النجاح فيها.. رغم كل هذا الحزن من فقدان أعز وأغلى الناس لقلبى.. ورغم أنها أخذت البقية الباقية من روحى.. إلا أنى استطعت.. وحدى.. المقاومة.. استطعت علاج جزء من روحى.. وزى رأس البصل.. بدأت فروعى تزهر من جديد. لا أنكر أننى أسقط مرات عديدة.. أيأس مرات.. أفكر فى الانتحار أحيانا! أقول لنفسى.. نكتفى بهذا القدر من الوخز العميق جوة القلب.. أقول لنفسى ما اجمل الراحة الأبدية.. ما أجمل الاستسلام والدخول داخل الأرض بسلام.. والانتهاء نهائيا وأبدًا من كل هذا الهراء! زى ترجمة المسلسلات الأجنبية! لكن كأى رأس بصل محترمة.. تخرج منى أوراقى الخضراء تخترق العتمة وتنثر الطين يمين وشمال وتتجه للضب.. تتحدى الأسى والحرمان.. تتحدى الحزن وتخرج شامخة قوية تسخر من كل الأذى.. وتكمل. ادخل هذه السنة.. وأتمنى أن أطرح الكثير من الثمار حتى لو كانت بصل.. بصل أخضر.. أحمر.. أبيض.. مش مهم.. المهم أن الثمار تطرح. والحقيقة وبغض النظر عن ريحة البصل.. البصل ده حمول ومهم وثماره فى النهاية متعددة الاستخدامات. بصل أخضر للسمك وشم النسيم.. بصل أحمر للحوم.. بصل ابيض للدواجن.. بصل لصناعة الخمور.. بصل مهم لبعض علاج الشعر وسقوطه. أحيانا. واحنا جوه الأزمة مدفونين.. محاصرين بالواقع الأسود فى وقتها.. بنقول خلاص إحنا غرقانين لا محالة، حاسين إننا ضحية.. لا حول لنا ولا قوة.. لكن الحقيقة أننا أقوى مما نتخيل.. إحنا أقوى من الظروف.. والأحداث اللى بتحصل حولنا ومانقدرش نتحكم فيها، أقوى من كل اللى بيحاول يحبطنا ويحسسنا أننا ولا حاجة.. هم اللى ولا حاجة، كل ده هو اللى ولا حاجة، لكن.. أنا حاجة.. حتى لو الحاجة دي هي رأس بصل. كل سنة وأنتم مزرعين أخضر من كل حتة.
