بمناسبة عيد الحب.. تحب البنت تكرفك.. تكرف البنت تحبك هو ده مبدأ تامر حسنى فى الحب زى ما قال فى الفيلم.. قال يعنى هو كده البنات هتحب وهتتحب.. بمعنى لما الولد يحب البنت ويخلص فى حبه البنت بقى هتتقل عليه وتقوله معطلكش ومش هتعبره وتديله الكارت الأحمر ولما الولد يتقل على البنت ويقولها سكتك خضره هى بقى هتموت عليه وتجرى وراه. يا ترى ده مبدأ ممكن فعلا الناس تمشى عليه؟ مش لازم فى الحب بين بنت وولد لا لا فى الحب بين الناس كلها.. الحب بين أهلك وأصحابك ومعارفك. يعنى لازم الأول نعمل نفسنا تقال ومش هاممنا اهتمام الاخرين ونفس المعاملة اللى بنتعامل بيها لازم اللى قدامنا يتعاملوا بيها معانا برضه عشان تعرف قد ايه بنحب بعض؟! طب ليه مش كل اتنين بيحبوا بعض بجد محدش فيهم يتقل على التانى ولا يديله ضهره. ليه دايما اللى الحبيب بيحب يخلى اللى بيحبه بيجرى وراه. ليه ميبقاش فيه توازن فى تبادل العلاقة وتبادل الحب الحقيقى؟! ونخلى حب البنت زى حب الولد وحب الخطيب زى حبه لخطيبته وحب الزوج دى حب الزوجة له واهتمام البنت بالولد زى اهتمامه هو بيها. ولا تتقل عليها عشان هى تجرى وراك ولا هى تتقل عليك عشان انت تجرى وراها ليه الاهتمام ميكونش متبادل بين الطرفين. وبيقولوا التقل صنعة.. صنعة ايه بقى ده طلع مصيبة. وبمناسبة عيد الحب ليه بنقعد نحب فى بعض أول ما يقولك ده عيد الحب النهاردة ولا بكره؟ تلاقى بقى كل اتنين مخطوبين يكون هو لسه مبهدلها وماسح بكرامتها الأرض وموريها النجوم فى عز الظهر ويجى تانى يوم يقعد يحب فيها.. خير ايه اللى حصل.. اصل النهاردة عيد الحب وهى بقى خلاص تنسى اللى فات واللى مضى وتموت فيه. ولا تلاقى اتنين متجوزين وعن حب برضه وبينهم مشكلة جامدة حبتين وفجأة تلاقيه بيحب فيها.. مالك يا بنى انت عيان.. لا اصل النهاردة عيد الحب. وهى عمالة تنكد عليه وعلى اللى جابوه وعاوزاه يمشى على العجين ميلخبطوش.. تلاقيها تيجى تقعد تحب فيه فى يوم الحب وتقولوا انت مبقتش تحبنى زى الأول. ما هو انتى اصلا مبقتيش زى الأول.. بقيتى صاحبه أو اخوه لكن مش زوجته اتحولتى من زوجة كانت بتحب جوزها الأول ورقيقة معاه لواحدة بتشخط وتنتطر وعاوزاه يطيع الأوامر.. وييجى عيد الحب تقوليله انت مبقتش تحبنى يا وحش وكلام من هذا القبيل ليه منبقاش بنحب بعض طول أيام السنة والا لازم يعنى يجى يوم فى السنة نقول لبعض اننا بنحب فيه بعض ولو هو زعلك روحى وقوليله أنا زعلت منك عشان كذا وكذا بمنتهى العقل ولو هى غلطانه غلطها بالراحة ووضح وجهة نظرك والا لازم الأمور كلها تبقى عليا وعلى اعدائى ولازم اربيها واعرفها انها متجوزة سبع ولازم ادبحلها القطة والكلام اللى ملهوش لازمه ده وأنت كمان لما تكون زعلان من حبيبتك أو خطيبتك أو مراتك روح قولها أنا زعلان من كذا واوعى تركبى انتى بقى دماغك وتعملى نفسك زعلانه وكله إلا كرامتى ومش هاكلمه غير اما يعمل ويسوى ويتحايل.. ليه معانى الحب بقيت بتضيع ما بينا ومبنعرفش تقدرها صح. حبوا بعض وحبوا الناس ومتنسوش ان احنا بشر يعنى اكيد محتاجين للحب فى كل وقت. يلا نقول بعض اننا بنحب بعض ومش هنستنى ليوم عيد الحب عشان نعبر عن مشاعرنا يارب طول السنة نكون فى حب على طول.. وكل عيد حب وانتم بخير Happy Valentin e For All