الحب شىء جميل لو صادفناه، لكن المشكلة أننا صعب نلاقيه فى الوقت الحالى بسبب ظروف الحياة «إللى مش ولابد»، فتجد الشاب بيقول لك أنا محتاج لإنسانة تحبنى وتتحدى معى الظروف، وتقف إلى جانبى، وطبعا دا هيكون موجود لو الحب حقيقى، لكن هو فين الحب الحقيقى، ونلاقى واحد تانى بيقول لك دلوقت البنات مش بتقدر الظروف الصعبة إللى إحنا بنعيشها وكمان طلباتهم كتير، وعشان نقدر نحقق الطلبت دى مش بنلاقى وقت للحب، يعنى الحياة أصبحت بالنسبة للشباب شغل فى شغل وضاعت فى زحامها أوقات الحب. ويؤكد ذلك معتز حسن 26 سنة، محاسب قائلاً: إن الحب زى الورد، فإذا كان الورد محتاج لميه عشان يعيش، فالحب أيضا محتاج لفلوس وإمكانيات عشان يستمر، وعشان كده الوقت كله بيكون فى الشغل، عشان نعيش كويس ونكسب كويس، والبنت عايزة إللى يكلمها، ويخرج معها، وطبعا الوقت لا يسمح لهذه الخروجات فتذهب لواحد ثانى ولما سألنا معتز عايز تحب إزاى، قال أهم حاجة أن إللى هتحبنى لازم تقدر ظروفى، يعنى أياً كانت ظروفى معى فلوس ولا لأ، باشتغل إيه، والمستوى الاجتماعى إللى أنا عايش فيه، يعنى إللى بتحبنى لازم تساعدنى على الظروف وتصبر معايا شوية مش تسيبنى فى أول مطب. «مفيش فالنتين» أما سامى مبروك 27 سنة خاطب وعلى وش جواز فيقول أنا عايز إنسانة تفهمنى وماتصدمنيش فى مشاعرى مش عارف هأقضى يوم الفالنتين إزاى، فأنا أشعر أننى فى واد وخطيبتى فى واد آخر، لا أجلس معها إلا وتنشب الخلافات على أهون الأسباب، فأنا خاطب من سنة ونصف، ومع ذلك أشعر أنها لا تفهمنى، وبالنسبة لها الحب والمشاعر، والأحاسيس والرومانسية أشياء تافهة أو بمعنى أصح أشياء مش مفهومة، فهى لا تعرف إلا الحب المادى ولا تعرف من الهدايا إلا ما تستفيد به، نعم أنا مؤمن بقانون احسبها صح، لكن ليس لهذه الدرجة، حتى أننى عندما أهديت إليها دبدوب ووردة حمراء فى الفالنتين الماضى قامت الدنيا، كأننى ارتكبت ذنبا لا يغتفر، ومن يومها وأنا لا أذهب إلى زيارتها إلا مرة كل شهرين، ولا أقدم لها هدايا إلا فى العيدين «الفطر والأضحى» وهدية عيد الأم لأمها، هتحبنى إزاى، مش عارف لكن يمكن ييجى حب العشرة بعد الزواج. كيميا الحب ويقول شريف صبرى -26 سنة - حاصل على بكالوريوس صيدلة: الحب أحلى حاجة فى الدنيا، فأنا عايز إللى تحبنى يكون فيه بيننا كيميا متبادلة يعنى إعجاب وانجذاب متبادل، وتفاهم كبير، دا لو حصل بالتأكيد هيحصل التوفيق والجواز، عايز إللى تحبنى تتمسك بى، ويكون فيه وفاء وتنازل عن الهفوات والحاجات الصغيرة اللى بتموت الحب، وأهم حاجة أنها لازم يكون عندها القدرة على الاحتواء، تحتوينى بمميزاتى وعيوبى تتقبلنى كما أنا بعيدا عن المعادلات الحسابية، التى قتلت الحب فى الفترة الأخيرة، وجعلت منه مسخاً، فالحب أصبح مسخاً أو شبحاً لا وجود له بدون الحسابات المادية، بس طبيعى أن أى شاب فى بداية حياته يكون عنده بعض الصعاب المادية، والبنات مش بتقدر ده، نلاقيها بتضحى بالحب مع أول طارق على باب بيتها ومعه الإمكانيات. لست ملاكا.. ولا شيطانا ويضيف أحمد أبو العينين طالب بكلية التجارة أن أهم شىء فى الحب أن يكون هناك شفافية فى الحب، يعنى تكون القصة اللى بنعيشها قصة حقيقية، وليست شيئاً عابراً ينكسر مع مرور أول عاصفة عليه، وأن تعلم أننى إنسان ولست ملاكا، لى خطايا وذنوب، ولا تبحث عن الكمال فى شخصى، لأنها لن تجد ووقتها حتقول أننى خدعتها، أحتاج منها الاهتمام بى، والتقدير والاحترام لى، وأهم شىء أنها تقدر تحبنى عشانها، وتفهم أنى مش لغيرها، ودا هيحصل بعد الحب ما ييجى مش قبله، وعن عيد الحب يقول أن كل يوم سعيد عيد حب، بشرط أن يكون هناك تكافؤ بين الطرفين فيعبر كل منهما عن مشاعره ورغباته بصدق. خجولة ورقيقة عمر صفوت : 20 سنة أنا بحب الفتاة تحبنى على طريقتى عشان كده بحاول أغير من تصرفاتها وشخصيتها للأشياء التى أريدها أن تفعلها، وأنا شايف أن ده مش تحكم بس ده عشان نقرب من بعض أكثر وأنا برضه ممكن لو فيه حاجة شايفانى أتغير فيها بتغير لو أقنعتى بكده. بيتر ناجى : 22 سنة أنا أفضلها شخصية تقبل الجدال وتتناقش معى فى كل تفاصيل حياتنا وليست شيئاً جامداً أتحدث معه. مصطفى ماهر : 22 سنة نفسى فى البنت إللى بحبها تكون مقدرة لظروفى الشخصية التى أمر بها وأن تكون متفهمة لأنى أرى أن أهم شىء لنكمل العلاقة هو التفاهم المتبادل. أحمد عبد المنعم : 21 سنة أفضل أن يكون الحب متبادلا طبعا بنفس القدر، وأفضل البنت الهادئة التى مازالت فيها الرقة والخجل وأهم شىء أن تكون على خلق فلو وجدت هذه الفتاة بهذه المواصفات سوف تكون فتاة أحلامى بلا شك. إزاى تخلى البنات تحبك «بجد!!» مبدئيا مافيش حاجة اسمها «ازاى تخلى البنات تحبك» فالقبول ده هبة من عند الله.. لكن فيه بعض النقاط ستجعل الناس كلها تحبك مش البنات بس منها شوية النصائح ديه وجرب وادعى لنا !! 1- إيمانك بربنا وطاعتك له وأداؤك فروضك مثل الصلاة فى وقتها والصوم «الرضا الداخلى هيفرق معاك قوى فى التعامل مع الناس». 2- لازم تكون شخص شيك فى لبسك وروش ومهذب فى تصرفاتك «لأن مظهرك أول شىء يجذبها» 3- ما فيش واحدة تقولك أعمل كذا وما تعملش كذا وتسمع كلامها، حتى لو كان كلامها صح يبقى نفذه بس بطريقتك مش بالطريقة التى تقولك عليها «يا جامد». 4- البنت أيا كانت شخصيتها تحب الشخصية القوية وليست الضعيفة يعنى تكون أنت المسيطر «خليك حمش». 5- لو عاوز تتعرف على بنت الحلال حاول أن تكون جرىء بلاش خجل زيادة عن اللزوم ولا تتردد فالبنت تحب الشخص الجرىء «حقيقة علمية!!» 6- أهم حاجة أنك تخليك على طبيعتك لأن إللى هيحبك وأنت على طبيعتك هيفضل يحبك عالطول لأنه عارفك وفاهمك وإلا ما كانش حبك من الأول «الطبيعى يكسب».