الحب وجهات نظر، تختلف من البنت للولد، فالبنت لما بتحب.. بتعيش فى عالم الخيال، وتفضل تزن ولا النحلة الدايخة:حبيبى قمر، حبيبى رقيق، وتشوفه تلاقيه شكل رغيف العيش المحروق.. وصوته جعورة ملوش علاقة بالرقة نهائى.. وتفضل تحلم باليوم اللى هتقابله فيه وكل ما يقرب اليوم، دقات قلبها تزيد ووشها يصفر ولا اللى عندها بلهارسيا وتتسد نفسها عن الأكل لأنها بتاكل حب وتشرب حب وتتنفس حب!! وعندما يأتى اليوم الموعود تفضل تبربش وتسبل وكأنه أصابها الحول، وتبقى داخلة فى بعضها ولا السلحفاة. وإذا لاقته متضايق تقوم بدور الأراجوز والبلياتشو عشان تشوف ضحكة حبيب القلب، ويبقى جاى يقابلها بجينز مقطع وتيشيرت مبهدل وشبشب بصباع وهى شايفاه أحلى وأشيك شاب فى روكسى، حتى تصطدم بالواقع وتتجوز وتتكسر كل ميادين الخيال اللى خططت لها ورسمتها طول الفترة السابقة. أما الرجل فعندما يحب يكون أكثر واقعية.. وأكثر تركيز عشان دى اللى هتقع فى أرابيزه لآخر العمر.. يعنى ما يقعدش يقولها كلام حب كتير عشان متخدش على كده.. ولو فى يوم كلمته بطريقة مش عجباه يقولها إنتى بتزعقى ليه؟!! وهى تكون بتتكلم عادى، بس ده اسمه «ترويض» واللبس ده موضوع كبير قوى لازم تبقى خارجة معاه على سنجة عشرة والابتسامة من الودن اليمين إلى الشمال ومش مهم إنها لسه خارجة من علقة بإيد المقشة من الست الوالدة، وإذا عملت حاجة فى شغلها حلوة واترقت مثلا.. يقولها عادى يعنى خدتى «نوبل»، ولذلك يصطدم الخيال بالواقع.. فتراه البنت «اتغير» وهو يراها مش هى دى اللى أنا حبيتها ولكن الحقيقية أن وجهة النظر فى الحب مختلفة.؟