بلا شيله بلا حطه عم بهلول راح على جمل ورجع على قطه.. !! معلهش يا عم بهلول .. الأمر أمر الله ياسيدنا .. ألف رحمه ونور عليك ده شىء مقدر ماهو فى ايدنا .. ليه بقى راح نبكى ليه ..!! والله العظيم يا عم بهلول أنت هاتجننى وها تخلينى أشد الشوية اللى بقين من شعرى .. علشان أنت بتفكرنى بعفريت العلبة كل ما دخله جوا العلبه يطلعلك تانى ويغيظك ويعملك دوشة ..!! أنا شخصيا احترت واحتار معاك كل الناس اللى بيقولوا عم بهلول عاوز ايه ..؟! وموت نفسه على رئاسة الجمهورية ليه ..؟! يا عم بهلول خلاص زمن البهاليل انتهى حتى أصحاب الطريقة البهلوليه بتاعة دراويش "الست" انتهت وطوروا من أنفسهم وبيلعبوا اكروبات سياسيه ما حصلتش وعلى كل لون يا بتسطه تلاقيهم ..!! ياعم بهلول ياراجل يا طيب يابتاع ربنا ايه اللى بيحصل اليومين دول من أتباعك يقطعون الطرق ويعطلوا أرزاق الناس ويهددوا بعظائم الأمور..؟! ما يصحش كده.. للصبر حدود ..!! وأعلم أن طالب الولاية لايولى ..!! أنت وأتباعك خليت الحجر ينطق ويتكلم ..خليته يشاور ويبكى يتألم ..!! يا عم الحاج ما هذا الظلام الذى تحاول أن تغرقنا فيه ..؟! ما هذا الجحيم الذى تحاول أن تدفعنا إليه ..؟! ماذا بك يامصر.. ؟! ألم تلد " مصر " رجلا يعشق هذا الوطن وليس عاشقا للجاه ..؟! ألم تلد "مصر " رجلا يبيت ليله قلقا عليها ويقبل ترابها بدل من أن ينتظر من يقبل يده .؟! ألم تلد "مصر " رجلا يدخل الثعابين والعقارب فى جحورهم ويحتمى بحب الناس ويخاف الله فى شعبه ..؟! الناس جرى ليها ايه ..؟!كلنا نحب مصر ولكن لا نريد أن نضحى من أجل مصر..؟! يا جماعة عيب دى الجنازة حارة والميت كرسى رئاسة لامؤخذة لايسمن ولا يغنى من جوع من يجلس علية يصاب بفوران الدم وشيل الهم اللى ما يتلم ومش بعيد تصيبه لوسه عقليه ينتهى به الطريق بلبس جازروله وبيجامة مقلمه ويقول انا نيرون ..!! ناس ما فيش فى قلوبهم رحمة بصحيح ..!! ياريت شوية السياسين على المثقفين وشوية فنجرية البق على الفاضى والمليان يبدأو فورا فى عمل حملة ثقافيه جاده لتوعية الناس بخطر أنفلونزا الرئاسة وقلاعية كرسى الحكم والهجوم الشرس من فيروسات المحكومين .. بس ياريت الحملة ما تبقاش على طريقة حملات وزارة الصحة والطب البيطرى ..! فالاصابة بالامراض الرئاسية خطيرة ومزمنة وربنا يكفينا الشر ..!! أرجوكم ..اعملوا مرة حملة بجد لأن الخطر قادم وداهم وها يبهدل الشعب ..!! عشان كده أنا عندى خطة متخرش الميه بمليون جنيه لكى نختار رئيس الجمهورية القادم اللى عليه العين وبايع نفسه لامؤخذة وطولها عنده ذى عرضها وما بتفرقش معاه ..!! بالصلاة على النبى كده رئيس جمهورية يقدر يستحمل الشعب ده أربع سنوات وأنا اعتقد انه لن يكمل الفترة الاولى..!! وبعدين احنا بينا وبين كل المرشحين لرئاسة الجمهورية عيش وملح وعشرة مره وسوده ..يكفى ان نجدهم فى كل القنوات وعبر وسائل الاعلام والصحف وكمان بيجوا فى الاحلام علشان ينكدوا علينا ..!! ودول بقى لما تيجى تختار واحد منهم ها يظهر عليك بعض الامراض النفسيه لأنهم يحملوا رقم 13 وهذا الرقم النحس له مفعول ولا مفعول السحر يعنى باختصار اللى ها يختار منهم رئيس هو الرقم الشؤم ويتفضل 12 معارضا ها ينكدوا عليه عيشته فى الرايحة والجاية ..!! أما كيف تختار هذا الرئيس فيمكن أن نستعين بالخالة نوسة من فيلم "يا أنا يا خالتى " وتحضر لنا العفريت " جمايكة" وهو اللى ها يقولنا مين الرئيس الضحية اللى ها يجيب السعد والوعد " لمصر" فى زمن الأعاجيب والألاعيب وقليل البخت يلاقى العضم فى الكرسى ..والمنحوس منحوس ولو خرجلوا مليون ملحوس.!! فتكم بعافيه