الرئيس الأمريكي السابق جورج بنيو بنيو بوش كمبونيشن الله لا يصبحه ولا يمسيه بالخير بعد ما العالم شد عليه السيفون وانصرف مع تسليكة في أول بلاعة...!!! جاي اليومين دول علشان يعيد امجاده في الصرف الصحي ويقول إن مصركان ليها دور فعال في ضرب العراق...!!! يا أخي ما كفاية ضرب الجزمة اللي خدته علي دماغك في العراق...!! مش كفاية عليك ولعت الدنيا وخربتها وقعدت علي تلها..! عاوز ايه تاني النهارده من كلامك الفارغ عن مصر والمصريين ولا هي الحكاية تلويش وتضبيش في مخاليق ربنا وبس...!!! يا عم بوش يا موكوس هو انت لسه ها تعملهم علينا وعاوز تبيع المية في حارة السقايين ولا تعرج تاني في حارة المكسحين...!!! كان زمان وجبر روح شفلك دار مسنين ولا دار عبادة يمكن ربنا يقبل منك بعد المذابح اللي عملتها في أطفال ونساء وشيوخ العراق ومش كده وبس ذنبهم ايه الجنود الامريكان الشباب اللي راحوا ضحية جهلك وغبائك... منهم اللي مات ومنهم اللي معاق ومشوة وخليت حياتهم اسود من قرن الخروب عشان جهلك وغرورك اللي ملهومش مثيل..!! ياموكوس ضحكوا عليك ولاد الافاعي بأكاذيب وخرافات وضعتها في دماغك انت وشوية الشكحلية سواء كان رامسفيلد وزير الدفاع ولا الست كونداليزا رايس ملكة جمال العوانس بعيد عنكم حول اسلحة الدمار الشامل بالعراق..!!للأسف أكاذيب يهود مخلصين يستمعون إلي مزامير داود.!! فعلا زمن الاعاجيب والألاعيب الدولية...!! مش كفاية بلاويك يا موكوس.. كمان عاوز تقلب العالم علي مصر وتحطها في زاوية الغباء والجهل المحكم اللي انت عايش فيه..! ساب الدنيا كلها وساب الناس الأرزقية اللي كانوا معه سواء بتاع اسبانيا ولا انجلترا ولا بعض دول الجوار اللي بالت علي روحها أثناء الغزو وسلمت كل ما لديها للتحالف..!! وقال ايه مصر كانت لها دور مؤثر في عملية الغزو وكأن أمريكا بجلالة قدرها مستنية ان مصر تاخذ لها القرار لغزو العراق..!! وحياة النبي ياعالم يا هووه ده رئيس اكبر دولة في العالم..؟ معقولة هذا الغباء المحكم...!يا متعوس يا منحوس دي عندنا بنسميها حركات قرعة ومكشوفة وقديمة..! ولما انت فتك أوي كده وبتفهم في الألاعيب الدولية كما تفهم خالتي .نفيسة. في عالم الفضائيات! ليه بقي ما أعلنتش الكلام ده أثناء حكمك الفاشل..!! يا عم بوش انسي واعرف ان أقبلت الدنيا باض الحمام علي الوتد وان ادبرت بال الحمار علي للي كان عامل فيها أسد... وسلملي علي السفاح رامسفيلد والحاجة أم العوانس كوندليزا...!! وبطل شغل التلات ورقات وأوعي تاني تدخل مصر في أي كلام فاضي من بتوع اليومين دول.! وان كنت لسه بتبحث عن عمل في دول البترول....كفاية عليك شوية السيوف الذهب اللي خدتها من الغلابة بتوع الخليج..!! أصل المشرحة مش ناقصة قتلة ياعم الحاج يا سفاح..!! واوعي الزمن يغرك يا جورج يا ابن عم بوش وتتخيل ان مصر اللي وقفت ضدك وضد اسلوب البلطجة والقتلة المحترفين اللي انت عملته في العالم يمكن ان تسكت عن حقها في أي اتهامات باطلة من بتوعك يا ملك الكذب والكذابين..!! يا راجل دانت غلبت مسيلمة الكذاب في زمانه...!! يا راجل انكسف علي دمك مش كفاية اكذوبة أسلحة الدمار واللعب بالنار وركوب الحمار...!!! والله ينكد عليك وعلي عمرك.
