-مين الزفت ده اللي انت مرشحهولي يمسك مشروع البلاعات!! انا بقا لي ساعة باقرا الملف بتاعه، ومش شايف ولا غلطة!!! -فعلا سعادتك مش ح تلاقي على ظاظا بيه ولا ملحوظة!! ده راجل نضيف ومحترم،ومن البيت للشغل ومن الشغل للبيت!! لا بيشرب ولا بيدخن ولا بيشم ولا بيلعب قمار ولا بيهلس ولا بيسرق!!! فقذف السنتريسي بيه الملف في آخر الغرفة وهو في قمة الغضب وقال: -روح يا محترم "وسخه وهاته"!!! انت ايه البعيد مستجد والا مش فاهم الشغلانة والا عامل عبيط؟؟ -أبدا وشرف سعادتك!! انا رشحت الزبون ده لأنه أنضف واحد!!! -عشان كده يا غبي ماينفعش!! انا عايز واحد أمشيه ع العجين ما يلخبطوش!!! اضربة بالجزمة يقولي متشكرين يا باشا!! أفقع له عين يقوللي يا ريت الاتنين!!! مش واحد يطلع عينيا ومايسمعش الكلام ويعمل لي فيها خضرة الشريفة!! -بس مشروع البلاعات بالشكل ده سعادتك ح يمسكه واحد جربان وأي كلام!!! -مايتحرق المشروع بجاز!!! انت ح توريني شغلي؟؟؟؟ والا اقولك ما تيجي تقعد على مكتبي أحسن !!!اتفضل يا عنتر غور من وشي ونفذ اللي قلتلك عليه!! فخرج عنتر بيه شايل سيفه من مكتب السنتريسي بيه في حالة انعدام وزن وفور وصوله الى مكتبه قال لأم بهلول السكرتيرة: -هاتي لي ملفات البهايم اللي مترشحين يمسكوا مشروع البلاعات !!! -خير يا افندم!! مش جنابك استقريت خلاص على ظاظا بيه!!! -قطع وقطعت سيرته !!!جاب لي الكلام والبهدلة وقلة القيمة!!! باقولك ايه ياولية هاتي لي الملفات واطلبي لي العربية بتاعتي!!!انا مش ناقصك!!! وفور وصوله الي البيت تناول عنتر بيه طعام الغداء ع السريع ثم أخذ الملفات معه الى الصالون: -عملتيلي المدعوق الشاي بالنعناع يا زكية؟؟؟؟؟ -ما الكوباية قدامك اهي يا اخويا والشاي قرب يبرد!! مالك النهاردة "متزرزر" ومش على بعضك؟؟؟ -السنتريسي يا ستي قطع وقطعت سيرته!!! مكلفني اختار له واحد يمسك مشروع البلاعات!! ولما اخترت له أنضف واحد هزأني وطردني من مكتبه وكان ح يضربني بالشلوت!!!!! -الناقص الواطي عديم الضمير!! هوه نسي اللي انت عملتهوله!! ده من غيرك يا اخويا كان زمانه غار في ستين داهية!! -ح نقول ايه!! سافل وواطي زي عوايده!!! المهم ان جنابه عايزني اختار له أسخم واحد عشان يمسكه المشروع!! -طيب ما تريحه يا اخويا وتربط الحمار مطرح ما السنتريسي عايز!!! -المشكلة ان باقي المرشحين كلهم أنيل من بعض!!!!!وانا محتار اختار مين ولا مين!؟؟؟؟ -طيب هات الملفات كده نشوفها مع بعض يمكن أقدر أساعدك!! وهكذا أخذ عنتر بيه وحرمه يستعرضان ملفات المرشحين، وعقب الانتهاء من كل ملف كانت الست حرمه تذهب الى دورة المية لتقذف ما في بطنها !! -انتي ح تقرفيني في عيشتي يا وليه!!! ماتمسكي روحك شوية!! ح تبقي انتي والملفات الهباب دي عليا !!! -اعمل ايه يا اخويا مش قادرة استحمل الريحة الوحشة !! انتو بتجيبو البلاوي دول منين؟؟!! -الجماعة دول موجودين يا ولية في كل حتة.... بس انتي اللي انطسيتي في نظرك ومش شايفاهم!! -بصراحة كدة انا مش شايفة غير مجاري طافحة ومقالب زبالة! -عادي جدا ياولية!! المهم اننا قدرنا في الآخر نختار أنيل اربع مرشحين!!!! وفي صباح اليوم التالي طلب عنتر بيه مقابلة السنتريسي بيه: -خير يا هباب البرك!! انشا الله تكون اخترت لي اللي عليه النية!!!! -والله يا افندم كل المرشحين أسخم من بعض!! بس انا سهرت الليل كله لغاية ما اخترت أزفت أربعة!! وبصراحة كده همه فعلا الخلاصة!! وفي النهاية سعادتك طبعا صاحب القرار!!!!!!!!! -طيب قول واشجيني!! -شوف جنابك!! ده ملف الشنشلاموني بيه وزي ما سعادتك ملاحظ الملف مبطرخ ومتضخم ع الآخر لأن جنابه لهف لغاية النهاردة تلاتين مليون جنية !!!! -عادي خالص ما فيه ناس كتيرة بتسرق!!! يعني جات ع الشنشلاموني!! انا عايز صفات قيادية!! فاهم يعني ايه قيادية!! -الشنشلاموني بيه حط الست والدته في دار المسنين!! ورفع قضية حجر على والده عشان يستولى منه ع البيت والارض وبعدين رماه في مستشفى المجانين!!! ولما ابوه وامه ماتوا بحسرتهم لهف ميراث اخواته الولاد والبنات اللي دايرين دلوقتي يشحتوا مع عيالهم ومش لاقيين حتة يتاووا فيها!! -دا راجل هايف واللي عمله شيء عادي وبيحصل كل يوم!! واضح ان الشنشلاموني ده راجل مقطف ومش ح ينفع يمسك مشروع البلاعات!! -خلاص سعادتك نركنه على جنب ونشوف اللي بعده!! دا سعادتك ملف ابو لبدة بيه وزي ما جنابك شايف ملفه مبطرخ هوه راخر ومليان بلاوي!! -ياريت يكون مشروع البلاعات من نصيبه !! -ابولبدة سعادتك ناضورجي قديم من ايام الجامعة!! سجن اخواته وولاد عمه وخاله وولاد خاله وجده!! وكان ح يسجن الست والدته لولا ان السر الالهي خرج قبل ما تتمسك!!!وده راجل غاوي نسوان!! يعني ينصب ع الست المتريشة من دول وياخد اللي وراها واللي قدامها وبعدين يرميها رمية الكلاب!! والتقارير بتقول انه كمان بيتاجر في المخدرات وبيزرعها وسط الخضار والفاكهة في العزبة بتاعته !! -ايه الهيافة دي؟؟؟؟؟؟؟؟؟؟؟؟ واضح انه ولامؤاخذة راجل أهطل وبريالة ومخه على قده!! -حلم سعادتك شوية!! وفيه كمان تقرير بيقول انه غرقان في الديون لشوشته مع انه هابش لغاية النهاردة أربعين مليون جنية صرفها ع الهلس والقمار!!!! -عليا النعمة يا عنتر انت راجل قفة!!! ده كلام فارغ ومالوش اي لازمة وما يلزمنيش!!! -ازاي بس سعادتك!! باقولك ابولبدة بيه ناضورجي وقمرتي وبتاع نسوان وحرامي وتاجر مخدرات!!! -اللي بعده ما توجعش دماغي!!! انا دماغي متكلفة ومش ناقص دوشة ! يا حيوان باقولك عايز واحد يمسك مشروع البلاعات!!!!!!!!!!! -خلاص جنابك!!! وده بقا ملف الزلنطحي بيه!! وباختصار كده ده راجل لومانجي عتيد الاجرام !! يعني اتمسك خمسميت مرة في قضايا رشوة واختلاس وسرقة ودعارة ونصب وتزوير وابتزاز وضرب افضى الى موت !!! وفي كل قضية كان بيطلع منها زي الشعرة من العجينة!!وبعدين يرجع موقعه ويرفع قضايا تعويض يهبش من وراها الملايين!!! -ده راجل بلطجي وتافه!!!وفيه زيه كتير مالهمش تمن في السوق بتاعنا!!! -حيرتني سعادتك!! أنا خلاص ما عدش قدامي غير ملف الدهل بيه!!! وزي ما سعادتك شايف اهه!! غريبة هوه الملف ماله كده فاضي وما فيهوش ولا ورقة!!! ده كان أكبر ملف فيهم !!! الله امال الورق اللي كان هنا راح فين؟؟؟؟؟؟؟؟ -مش ده الدهل بتاع واقعة الشيك أبو عشرين مليون دولار!!!؟؟؟ -هوه بعينه سعادتك!!! بس المشكلة زي ما جنابك شايف ان ملفه ابيض !!مع انه امبارح كان مبطرخ ومليان بلاوي!! انا مش عارف الورق اللي في الملف راح في انهي مصيبة!! الظاهر ام بهلول لعبت في الملف من ورايا !!! انا لازم اوديها في ستين داهية!!وشرف ابويا لأحولها للتحقيق!!!! -ولا تحقيق ولا ديالو!! انا اللي طلبت من ام بهلول تجيب لي ورق الدهل!! ده عليه توصية جامدة من بلاد برة!!! -عايز تقول جنابك انه.............!؟؟ -مظبوط هوه كده اللي في بالك!!! الدهل ده انقح واحد فيهم!! ومع ذلك ملفه دايما ابيض وزي الفل لأنه بيفضيه اول باول عن طريق اصحابة وحبايبه !!! -واضح ان سعادته من العفاريت الزرق ومحترف آخر احتراف !! -ده الدهل يا عنتر يا حبيبي !! الظاهر انك ما تعرفش يبقا مين الدهل؟؟؟!!! -والله يا افندم منك نستفيد !!! واضح ان جنابه فعلا راجل واصل ومتصل وحكايته حكاية!!!!! -بكرة تكمل تعليمك يا عنتر وتتودك وتفهم الدنيا ماشية ازاي؟؟!! انا عايزك تطلع قرار للدهل يمسك من بكرة مشروع البلاعات!! بس تابعه من بعيد لبعيد وبلغني!! -بس لازم سعادتك تكون عارف ان مشروع البلاعات كده راح في ستين داهية!!! -تاني ح تقولي مشروع الزفت البلاعات!!! ماقلتلك يتحرق المشروع باللي فيه!!! المهم الدهل يلاقي حتة يتاوى فيها ويبعد عن طريقي!!!! -تمام سعادتك!!! وبعد ستة أشهر بالتمام والكمال حمل عنتر بيه الملف الذي أعده عن الدهل بيه الي مكتب السنتريسي بيه وهناك فوجيء بزفة وهيصة وزيطة وحشود من المهنئين وحين سأل قالوا له: -ما تدخل تبارك يا راجل والا انت مكسوف!! مش خلاص الدهل بيه طير السنتريسي بيه ووداه في ستين داهية !! وقعد مطرحه!!!