لما تشوفه بتحس إنه أخوك, أو صاحبك وإبن حتتك, كان شقي قوي وهو صغير, بس لما كبر, بقى واقعي في حياته واختياراته, دخل بقوة في مصاف النجوم الشباب, وعرف يحجز لنفسه مكان على الخريطة, وبعد ما خرج من "عمارة يعقوبيان", وعاش فترة في "الجزيرة", إدانا "الوعد" عشان نقابلة, وعملنا معاه الحوار الجامد ده.. 3 مسلسلات، 7 أفلام... حاسس بإيه؟ راضي جدًا، وإيماني بموهبتي وثقتي بربنا بتزيد، خصوصًا إني كنت بعتبر الفترة اللي فاتت مخاطرة، ومكنتش عايز أبدأ تجاري، وأمشي على حسب ما السوق عايز وخلاص، والحمد لله قدرت أثبت وجودي، دلوقتي عايز أشتغل أكتر على نفسي عشان أكون جاهز للمرحلة الجاية، وخصوصًا إن نفسي أقدم رسالة من أعمالي، بس اللي اتأكدت منه إن البني آدم لو دخل في مشروع أو حلم بخطوات ايجابية وحماس، ربنا هيوفقه. إيه أكتر تجربة حاسس إنها الأهم فيهم كلهم؟ مفيش ولا واحدة مش مهمة، والحمد لله كل تجربة كانت بتأهلني للي بعدها، زي مثلًا فيلم "رسائل البحر"، يمكن لو مكنتش عملت "الوعد" مكنتش بقيت مؤهل لإني أشيل فيلم بقوته، لإنك عشان تمسك فيلم من أوله وتفهم المخرج وأسلوبه وتعرف السينارست عايز يقول إيه وتبقى مُلِم بالموضوع كله، العملية دي صعبة ومحتاجة خبرة معينة، بحمد ربنا إن التجارب كلها جت بالترتيب ده، عشان أبقى مؤهل في الآخر لفيلم بقيمة "رسائل البحر". مين أكتر نجم من اللي اتعاونت معاهم مأثر فيك... وحسيت إنه أضاف لك حاجة؟ بص.. السنة اللي فاتت دي أنا حسيت إني عجّزت فيها، يعني اشتغلت فيها أعمال كتير مع كل الأجيال من المخرجين والمؤلفين زي "شريف عرفة، مروان حامد، وسعيد حامد، وعمرو سلامة – اللي من الجيل الجديد- والسينارست وحيد حامد" كمان أكتر من نجم اشتغلت معاه، وأضاف لشخصيتي ولخبرتي كتير، وبسبب كمية الخبرات اللي اكتسبتها، بقيت بعتبر نفسي دخلت مرحلة الاحتراف وخصوصًا إني اشتغلت مع أسامي كبيرة، أقدر من بعدهم أختار أعمالي. طيب إيه شعورك وإنت بتعمل دور كان مرشح ليه الراحل الرائع "أحمد زكي"؟ "أحمد زكي" في حد ذاته مدرسة تحترم جدًا، وأنا أدّعي إني من محبيها والمنتمين ليها وفخور جدًا بكده، ومعنى إني أعمل الدور ده إن أ.داوود عبد السيد واثق فيا، وعشان كده أنا قبلت التحدي، وهحاول أنجح فيه، وأعمل لنفسي بصمة من خلاله، خصوصًا إن الدور اللي بعمله ما اتعملش بقى له كتير جدًا في السينما المصرية ويعتبر جديد ومختلف. النجوم اللي سبقوك في الوسط الفني زي "السقا وكريم عبد العزيز وأحمد حلمي".. علاقتك بيهم إيه؟... (أصدقاء – بتقابلهم صدفة – ملكش علاقة بيهم). "حلمي" ما اشتغلتش معاه، وماصادفش إني قابلته في أي موقف قبل كده عشان يبقى فيه بيننا أي علاقة، "السقا" أخ كبير، وأتمنى أشتغل معاه تاني وتالت وبنتقابل من فترة للتانية، إنما فيه ناس كتير من جوّه الوسط أصحابي وعلى علاقة قريبة جدًا ببعض، خصوصًا اللي اشتغلت معاهم وجمعني بيهم عمل واحد، علاقتنا مابتقفش عند مجرد شغل وخلاص، "فتحي عبد الوهاب" أنا وهو أصحاب جدًا "أحمد عزمي"، "محمد يس" المخرج و"أستاذ محمود يس" بعتبره أب ليا وبرجع له دايمًا في حاجات كتير و"نيللي كريم" أخت وصديقة عزيزة جدًا. نفسك تشتغل مع مين من النجوم الشباب ما اشتغلتش معاه قبل كده؟ نفسي أشتغل مع كل الناس مادام فيه حاجة جديدة نفسي أقدمها وهتبقى إضافة. مين مثلك الأعلى في الحياة؟ وفي التمثيل؟ والدي.. بالنسبة لي حد ناجح جدًا وأتمنى أحقق نص اللي عمله في حياته، لكن الخبرات الحياتية بتكتسبها في كل مرحلة من حياتك، من التعامل والشغل والاحتكاك بالناس، وفخور إنه بتجمعني صداقة بالرائع "خيري بشارة" لأنه علمني وأضاف ليا حاجات كتير، إنما في التمثيل: لو هيبقى ليا مثل أعلى، يبقى أنا بقلّد، لكن ممكن أقول لك إن فيه علامات بتعلّم منهم، وبحاول آخد من كل واحد الحاجة الكويسة اللي عنده زي "أحمد زكي، محمود عبد العزيز، محمود حميدة، صلاح ذو الفقار" وكل المدارس القديمة في التمثيل. إنت من النجوم اللي صعب الوصول ليهم؟ لا خالص، بالعكس، بس أوقات ببقى مشغول أو عامل حادثة مثلاً، إنما أنا بحاول أبقى على اتصال دايمًا بالناس، ولازم يبقى فيه تواصل عمومًا، بالميل أو التليفون أو الويب سايت، لكن الفيس بوك أنا مش عليه أصلاً. ليك مدير أعمال؟ وإيه رأيك في بعض الفنانين اللي مديري أعمالهم بيستفزوا المتعاملين معاهم، ولو عندك هتتجنب إزاي إنه يبقى كده؟ أنا معنديش مدير أعمال، وضد إن يكون فيه بينك وبين جمهورك حاجز، لكن لو لزم الأمر، وكان هيبقى عندي، يبقى أول حاجة أحب أعرفها عنه قبل اسمه حتى "هو ودود مع الناس وبسيط ولاّ لأ، كمان حِنْكته وذكاءه في الصفقات أو الاتفاق على الشغل لأن الجزء ده مهم جدًا برضه. الإنتاج بيأثر عليك في اختيار أدوارك؟ فيه تلات حاجات لاختيار الدور "السيناريو، المخرج، المنتج" لو سيناريو كويس ومنتج كويس ومخرج ما بثقش فيه، مش هشتغل معاه، لكن لو الورق كويس والمخرج أنا واثق فيه وفي شغله، ففي الحالة دي إن شاء الله لو بخمسة جنيه إنتاج.. هعمل الفيلم، لإني هبقى واثق إن المخرج هيطلع الشغل صح، وبصراحة أنا بعتبر نفسي old fashion (موضة قديمة) شوية، عشان أكتر حاجة بهتم بيها هي المخرج، وبحب الأمور تاخد خطواتها التقليدية، إني أقرأ الورق وأتأكد إن المخرج كويس وبعدين أبص للإنتاج. بعد تحولك من الهندسة للتمثيل والشهرة.. علاقتك بالناس اتغيرت؟ علاقتي بالناس مباشرة جدًا، وكمان أي صحفي أو مصور بقابله عادي جدًا وبترحاب. إنت ليه مُقلّ في لقاءاتك التليفزيونية؟ الفترة الأخيرة بس، بسبب انشغالي وكمان مابحبش أبقى فارض نفسي على الناس على طول، لأني قبل كده كنت بظهر كتير. نفسك تختار بنفسك الرواية اللي تمثلها، وتديها لسيناريست يكتبها لك؟ لسه مقدرش أروح للحتة دي، لإني مابقتش بالنجومية أو الخبرة اللي تأهلني لده، لكن اقدر أقول لك لما خبرتي تكتمل، أتمنى أقدر أعمل كده، المهم في شغلي الثقة بيني وبين المخرج والسيناريست. بدأت التمثيل من إمتى... وإيه أول دور عملته؟ بدأت من وأنا في تانية جامعة على مسرح الجامعة الأمريكية، واشتغلت بعدها كتير، مسرح هواة وأفلام روائية قصيرة، وقبل التخرج، كنت واخد قراري إني هكمل في الاتجاه ده، ومش هبقى مهندس، ورغم كده اتعينت معيد فترة، واشتغلت في شركة لمدة معينة عشان بس أقدر أعمل حاجة لغاية ما أحقق حاجة في التمثيل، أول دور.. كان دور بلطجي، قلت فيه كلمة واحدة "إجمد" وأنا بلف سيجارة على المسرح... بلطجي بقى. نفسك ترجع للمسرح تاني؟ ومين العمالقة اللي بتحبهم فيه؟ أنا ما سيبتوش، بس يمكن محتاج تفرّغ، وكمان هو الفترة دي مش في أقوى أحواله، وبحب لغاية دلوقتي "نجيب الريحاني، فؤد المهندس، عادل إمام، محمد صبحي، يحي الفخراني". إيه الفرق بين التمثيل والهندسة، وكل حاجة منهم أضافت لك إيه؟ دي مهنة ودي مهنة تانية... والهندسة مش مجرد تعليم وبس لأنها كمان بترتب حياتك وتفكيرك، بحاول أستفيد منها وأوظفها في شغلي، أنا بعتبر كل دور بعمله مشروع ويخلص في وقت معين، وبعرف هيضيف إيه وهياخد وقت قد إيه، وهينقلني لفين. أما التمثيل، فطريقة لاكتشاف نفسك، لأنه بيعيشك تجربة عمرك ما تتخيل إنك تمر بيها، زي إنك تنط من فوق كوبري أو تعمل دور شحّات.. بيخليك تحس أحاسيس ومشاعر ممكن لو عشت عمرك كله ما تحسهاش. هل فعلاً الوسط الفني مليان بالمشاكل ولا كلها إشاعات؟ الوسط الفني زي أي مجال في الدنيا، معقد ومعقرب ومليان بلاوي.. لكنه عشان تحت الميكروسكوب، متشاف أكتر، وبتطلع عليه إشاعات أكبر، وكل مجال عمومًا وليه طريقة تعامل. تقول إيه لكل شاب نفسه يمثل؟ أقول له راجع نفسك الأول واعرف عايز تمثل ليه، وحط لنفسك مبادئ واتمسك بيها، ولازم تتفانى عشان تحقق حلمك، وربنا إن شاء الله هيوفقك، كمان لازم يقيّم نفسه من وقت للتاني، عشان يخلّي موهبته مميزة، المشكلة إن فيه ناس بتبقى عايزة تمثل للشهرة وخلاص، ومن السهل يقع تحت إيدين ناس توهمهم إنهم نجوم، لكن في الآخر لا يصح إلا الصحيح! حاسس إنك ناجح؟ الحمد لله أتمنى كده، بس موضوع النجاح والفشل ده نسبي، وليه حسابات لكل مرحلة، بس بالنسبة للمرحلة دي، أنا بعتبر نفسي نجحت نجاح راضي عنه. Message Board ل والدي ووالدتي.. وأقول لهم شكرًا ليكو إن إنتم أهلي. ليه سيبت الفيس بوك؟ وهل شايف إنه ممكن يكون تأريخ لحياة البني آدمين؟ أنا كنت عليه بالفعل، بس زهقت منه.. إنما حكاية إنه يكون تأريخ، دي صعبة شوية، لأن زيه زي أي موقع تعارف في الدنيا، بتحط عليه حالتك وصورتك اللي الناس شايفاك فيها حلو، وكمان مش واقعي (بتخلي الناس تشوفك زي ما إنت عايز) فما أعتقدش وأبدًا إنه تاريخ ولا حاجة، هو هياخد وقته ويجي غيره. أخبار السواقة معك إيه؟... حصل لك مواقف غريبة قبل كده؟ دي الحادثة التانية ليا، والأولى كانت أعنف واتبهدلت فيها، إنما بالنسبة للحاجات الغريبة اللي بتحصل في المرور دي، ما بتضحكنيش وبتجنّب إني أشوفها عشان ميجيليش السكر أو الضغط وبحاول أتأقلم معاها! وإنت صغير كنت شقي؟ وإيه الكوارث اللي كنت بتعملها؟ أنا كنت شقي جدًا، وبعمل حاجات غريبة.. مثلاً كنت بستخبى منهم في البيت في الفرن، أو أنام على سور البلكونة، وبسببي بابا عمل حديد عشان يعلّي السور وما أنامش عليه تاني. مريت بتجربة حب وفشلت؟ أكيد.. بس الحمد لله أنا لسَّه خاطب. حاسس بإيه بعد الخطوبة؟ إحساس جميل.. ومسئولية كبيرة، ومرحلة مختلفة من حياتي بدعي ربنا سبحانه وتعالى يوفقني فيها. هتدّي مصروف البيت لابنك في يوم من الأيام؟ ممكن، بس ده لو حبيت أعوِّده على المسئولية، أو لو حبيت أختبر فيه حاجة معينة. علاقتك إيه بأخوك الصغير إسلام؟ قوية جدًا وأصحاب بجد. مين أقرب أصحابك؟ محمود وصياد وسيف وصفوت، وناس كتير، فعلاً مبسوط إنهم كلهم حوليا. إيه أول حاجة بتحطّها في شنطة سفرك؟ المايوه لو رايح البحر. بتقضي وقت فراغك إزاي؟ في القراءة، أو لو عندي مواعيد بقعد أظبطها، لو عندي دور أتمرّن عليه، أو أروح أشوف عيلتي وأصحابي. يعني إيه "آسر"؟ هي جاية من كلمة يأسر القلوب، بمعنى يمتلكهم أو يخطفهم. بتقرأ كلمتنا؟ ورأيك فيها إيه؟ آه... مجلة لطيفة جدًا، ومحافظة على شريحة السن الموجهة ليها، وبتزيد يوم عن يوم وبتتقدم دايمًا. تقول إيه لشباب كلمتنا؟ قبل ما تبقوا معجبين بيا، أنا كمان معجب بيكم، وبحييكم على إصدار مجلة زي دي، من الشباب وللشباب بجد، روحكم حلوة ويا رب تستمروا في التقدم للأمام. نشر في مجلة كلمتنا مايو 2009
