في الفترة الأخيرة لاحظنا وجود أخبار وتقارير عديدة تتحدث عن وجود "أزمة عمالة " في مصر وأن العديد من المصانع بدأت تستعين بعمال أجانب لعزوف المصريين على الالتحاق بهذه الوظائف. قد يكون هذا غير لافت للنظر لكن الغريب هو أن يكون هناك "أزمة عمالة " مع "أزمة البطالة" التي نعاني منها، لذلك قررنا ننزل الشارع وناخد معانا "إعلان وظيفة " من أحد الجرائد يطلب عمال للعمل بأحد المصانع بسعر مغرى + مكافأت + حوافز " و كانت الاجابه مفاجأه بالنسبه للظروف اللى احنا عايشين فيها ، تعالوا نشوف قالوا ايه: اول واحده قابلناها كانت رضوى و لما سألنها قالت "أنا خريجه معهد فنى صناعى سنه 2006 و عارفه انه مش قد كده بس انا مش هوافق ان اشتغل عاملة في مصنع لأن انا حاليا باخد كورسات عشان اشتغل بيها في اماكن أطبق اللى اتعلمته" و كملت و قالت "أنا عايزه اشتغل في حدود امكانياتى و انا مش بدور على البرستيج أنا عايزة أشتغل في حاجه بحبها علشان أنجح فيها" بابا مش هيوافق ! بعد كده قابلنا محمد زين خريج كلية أداب فارسي سنة 2010 و لما سألناه قال "بصراحة أنا مش هوافق لأنى عايز اشتغل في مجالي و حتى و لو وفقت إنى أشتغل الشغلانه دي مؤقتاً أهلى مش هيرضوا و خصوصاً بابا لأنه ضابط". وقال لنا كمان "أنا جالى أكتر من شغلانه أحسن من شغلانة العامل و بابا رفض علشان المستوى الاجتماعى". لا عشان البرستيج ! تالت واحد اتكلمنا معاه كان محمد الليثي و قال "أنا خريج كليه علوم سنه 2010 و لسه بدور على شغل لكن عمرى ما هتشتغل عامل. انا عندى اشتغل في صيديلة أحسن لأنه مينفعش علشان البرستيج". والسبب الثانى اللى قاله محمد "ثانيا علشان مينفعش انى اتساوى بواحد مش مخلص تعليمه و يبقي زيه زي أمال احنا بنتعلم ليه ؟ علشان بعد كده نشتغل اى شغلانه و السلام"!! هسافر بره أحسن ! أما رابع واحد قابلناه فكان أحمد طه خريج كليه حقوق سنه 2008 و جاوب على سؤالنا و قال "أنا بحاول اشتغل مع كذا محامي علشان أكتسب خبرة و قليل قليل بس أنا صابر لحد ما أحقق هدفي و عمرى ما هرضي انى اشتغل مجرد عامل في مصنع حتى لو بقبض مغرى لأن طموحاتي أكبر من كده بكتير ؛ و قال "لو معرفتش أخد فرصتى في بلدي هسافر بره احسن لى. وكمل كلامه وهو بيقول "كمان انا مش ببص على البرستيج انا لو هضمن ان شغلانه عامل هتضيف ليا كنت هشتغلها بس هى مش مناسبه ليا و لا لطموحاتى". اما بالنسبه لفاطمه كامل خريجه اداب اعلام 2007 لما سألناها كان رأيها "أولا شغلانه عامل تناسب ناس مش مكملين تعلمهم او ما اتعلموش أصلا و ثانيا أنا واحده خريجة إعلام و بتدرب في كذا صحيفه صحيح مش متثبته و مش باخد فلوس بس أنا مبسوطه لاني حاسه إنى ناجحه في المجال ده و كل واحد لازم يشوف الحاجه اللى بيجبها و يعملها و يصبر لحد ما ينجح فيها". اما رأى أميره محمد خريجه اداب لغات شرقيه سنه 2010 وكان رأيها انها مش هتوافق مش بس علشان خاطر البرستيج الإجتماعى و لكن "برستيجى قدام نفسى". * اما الرأى الأخير هو رأي شيماء هانى حاصله على معهد سنه 2007 و قالت لنا (أنا بالنسبه الى صعب و صعب لأى بنت انها تشتغل عامله لكن ممكن يبقي الموضوع أسهل شويه للشباب لان احنا لسه عايشين في مجتمع ذكورى فهما بيبصوا نظره مختلفه للبنت حتى و لو كانت بتشتغل شغلانه عاديه زى الراجل و ده بيأثر على نفسيه البنت ) و ده كان رأى معظم الشباب اللى سألناهم يا ترى انتم رأيكم ايه؟؟؟؟
