ہہ لقيت حركة المحافظين الأخيرة ارتياحا نفسيا لدي المواطنين خاصة في المواقع التي لم يتم تغيير محافظيها وأولهم اللواء خالد فودة في جنوبسيناء حيث قامت القبائل بالتعبير عن فرحتهم كل بطريقته وكذلك اللواء أحمد عبدالله بالبحر الأحمر.. ناهيكم عن المحافظات التي تولاها لواءات قوات مسلحة والناس تنتظر محافظي الشوارع لأنهم تعبوا من بتوع المكاتب..!! ہہ ماذا ننتظر من سكان الجبلاية سوي إحداث هيصه وزمبليطه.. بقي العالم كله بيتنشق يشوف محمد صلاح واحنا نبهدله ونشتمه ونتطاول عليه من ناس ما تعرفش المسئولية.. والله العظيم اللي بيتبتر علي النعمة بتزول من وشه.. وإذا واحد واللا اتنين مجانين وحاقدين وغلاويه مانعلمهم الاحترام زي مالعالم كله بيحترم رموزنا.. وكفايه بلاويكم وفضايحكم اللي بتطلع كل يوم انكسفوا علي دمكم شويه.. الشعب والعالم اللي هايج عليكم..!! ہہ بالذمه الجدع اللي اسمه حمدين صباحي ده مش مكسوف ولسه عامل فيها "ديل وزه".. يا أخينا هي الوطنية انك تشتم وتتطاول علي اللي شايلين البلد بطينها.. وبعدين مينفعش تجاهد كل ليلة في فندق علي النيل بجاردن سيتي وتخرج الفجر.. ومتبقاش عارف تعدي الشارع إنت واللي تحت دراعك.. خلاص يا ضنايا.. الناس ما بتاكلش من البكش والأونطة.. وماتفكرش إن الشعب المحترم هايسيبك تهرتل.. ومسيرك تيجي تحت المخرطة..!! ہہ فضيحة جديدة بماسبيرو.. فوجئ طاقم عمل برنامج "أصداء الملاعب" بقناة نايل سبورت الأربعاء الماضي برئيس القناة محمد عفيفي يبلغهم بإلغاء الحلقة وعندما سألوا أسامة البهنسي رئيس قطاع المتخصصة عن السبب اتصل بسكرتير رئيس الهيئة الوطنية للإعلام واسمه "مدحت" فقال له: مفيش أسباب وخلاص.. والمثير للدهشة أن الضيف كان اللاعب طارق مصطفي وهدان"!!" بطل مصر الحاصل علي ذهبيتين في رفع الأثقال ببطولة أفريقيا للألعاب البارالمبية الأخيرة بالجزائر والذي كرمته الدولة علي أعلي مستوي وفضَّل البطل الظهور في إعلام الدولة أولاً ولكنهم رفضوه بلا أسباب.. ويتردد أن أحد مسئولي البرنامج تقدم بشكاوي إلي جهات سيادية ضد مخالفات لبعض المسئولين.. فهل تصل تصفية الحسابات لهذه الدرجة من عدم المسئولية.. ياريت حد من المحترمين يقولنا الأسباب.. والله يعوض عليك يا خواجة..!! ہہ إيقاف برنامج "العاشرة مساء" بتاع وائل البراشي.. خبر حلو ومفرح للناس اللي بتحب البلد وبتكره المسخناتية والمولعاتية.. لكن اللي مش حلو لو ظهر "وائل حريقة" علي قناة تانية زي "أون" مثلاً.. هاتبقي وقعه هباب وساعتها لازم حد يفهمنا فيه إيه.. مين بيسند اللي بيسخنوا البشر.. واللا المولعاتية دول بتم مكافآتهم علي حاجه عملوها ومنعرفهاش.. والله العظيم تلاته الحاجات دي اللي بتضيع ثقة الناس في الحكاية.. وهانستني ونشوف!! ہہ تصوروا محمد رمضان بيقول إنه بيقدم قدوة للشباب بأغنياته المستفزة.. مش كفايه الناس مش طايقه تمثيله وفيلمه الأخير انضرب في ترتيبه وايراداته يقوم يتحفنا بصوته الفظيع ده ويغني.. وكمان مش عاوز حد زي وليد منصور يقوله أنت فاشل.. يا عم ارحمنا بقي وورينا عرض كتفاك.. وعلي فكره فيه جزيره عاوزه مليونيرات أنصحك تسافر وتحرمنا من استفزازك..! ہہ والله.. كل التحية إلي سميح ساويرس.. راجل بيفهم صح لما حط اسم القديرة يسرا علي شارع في الجونة.. يا أخي الجونة دي بتاعتهم ويعملوا فيها اللي هما عاوزينه يعني بفلوسهم.. ايه بقي اللي يزعلنا.. ويا "آل ساويرس" عاوزين شوارع كمان بأسماء نبيلة عبيد ونادية الجندي ورشدي أباظة وفريد شوقي.. واللي يزعل يعمل زينا..!! ** إلهام أبوالفتح: دينامو وطنية وشعلة نشاط وذكاء ومفهوميه.. يا بخت محمد أبوالعينين وصدي البلد بيكي.. برافو. ** محمود البنا: أنت حكم كوره شريف جدااا.. والحدق يفهم!!