طظ في اللي يقول كلمة وحشة عن شعب مصر.. اللي يشوف جمهور مصر العظيم في ستاد برج العرب أول إمبارح لازم يفتخر بالشعب ده بغض النظر عن نتيجة المباراة بين الزمالك و"صن داونز".. عشان تعرفوا ان المصريين وقت الشدة والأزمة رجالة قد إيه وعلي قلب رجل واحد.. يبقي كل جحش يتكلم عن أزمة كيلو سكر وإزازة زيت وشوية أرز يحط لسانه في بقه ويبطل نهيق. والحكاية خلاص بانت لبتها وعرفنا انها مفتعلة وللأسف شارك فيها شركات حكومية لإنتاج السكر حطت إنتاجها في المخازن عشان حيتان الاستيراد يسترزقوا من دم الناس وكمان الناس بتوع الشركات دي يستنفعوا.. وبصراحة وبدون زعل الحكاية محتاجة حكومة بجد.. حكومة تخرج من المكاتب المكيفة أو حتي تتعب نفسها وتفكر في حل أي أزمة.. مش تستني رئيس الجمهورية يفكر ويؤمر وينفذ بنفسه.. وصدقوني.. والله العظيم تلاتة.. لو تم تحويل تبعية كام وزارة خدمية للقوات المسلحة هاينعدل حال بقية الوزارات والناس مش هاتشتكي من حاجة.. صدقوني لوجه الله.. بدل ما شوية خونة وعملاء "معرضين" الحكاية عشان بيقبضوا من بره ومن جوه.. والحكاية مش ناقصة..!! وأسرح بخيالي قليلاً.. وأقول "مش الجيش زيه زي أي مؤسسة في البلد.. تفتكروا أي مؤسسة غيره مع الشرطة ممكن يسقط فيها شهداء فداء للبلد".. يعني ممكن نسمع عن وزارة ما يسقط فيها شهداء.. لا أظن أن ذلك سيحدث لأن كل فرد في القوات المسلحة من أول وزير الدفاع إلي أحدث وأصغر مجند يضع حياته علي كفيه فداء لمصر.. أما في الوزارات الأخري.. كل سنة وأنت طيب.. المهم المرتب والحوافز والذي منه!! وإذا كان المسخناتية والمولعاتية واجعين دماغنا ليل نهار بالفساد.. وهم زعماء الفاسدين في الأرض.. لابد ان أذكر بالخير نموذجاً مضيئاً في قطاع التليفزيون بماسبيرو وهي نهلة عبدالعزيز رئيسة القناة الثانية حيث اكتشفت زيادة في ميزانية برنامج "مصر الأهم" ما يقرب من 200 ألف جنيه وراحت عاملة بيهم 4 برامج جديدة هاتنور شاشة الثانية أول الشهر وقامت بتوزيع المحترمين بس من فريق عمل "مصر الأهم" علي البرامج الجديدة.. لتضرب بذلك المدعو خالد مصطفي في شريان رقبته.. ولتضع بذلك صوابعها في عش الدبابير والنحل والبراغيث وأهمس في أذنها ان تحترس حتي لا تكرر ما حدث مع هويدا فتحي.. لأن هناك مصالح مشتركة بين عصابة "خوخة" وبين كبار القيادات بالتليفزيون حيث سمعت والله أعلم أن الفلوس دي كانت بتتقسم.. وعلي رأي المثل "ما شافهمش وهمه.... شافوهم وهمه بيتقاسموا"!! وإلي "عبده مشتاق" ماسبيرو.. وحياة الغالية ما هاتشوفها.. هاتمشي هاتمشي.. وصفاء حجازي لا هاتسافر ولا هاتعتذر.. وهاترجع بإذن الله وهاتكمل تنفيض السجادة ونظافة ماسبيرو من الإخوان والطابور الخامس والفاسدين والفاشلين.. وولاد ال "......"!! أما ما حدث من المذيعة مني شكري في نشرة الأخبار من يومين.. لم أندهش منه لأنني أنتظر ما هو أفظع وأكبر لأن بعض القيادات للأسف مالهاش في الشغلانة.. وربنا يرجعك بالسلامة يا صفاء..!! وإلي "الناصح الفاهم" محمد هلال: مينفعش المذيع طارق حسن يتوقف عن العمل لأنه رفض رغبة المعد ناصر فرغل في الهجوم علي البلد وتقطيعها في برنامج "العاصمة والناس" الاربعاء الماضي.. إحنا عمالين نصرخ عشان نخلص من أعداء البلد..!! أعود بقي لنادي الزمالك وأقول كأهلاوي: مرتضي منصور.. والجمهور.. ومؤمن سليمان.. عملتوا اللي عليكوا.. ومعظم اللاعبين ما ينفعوش بتعريفة.. وده كلام لاعيب كورة قديم..!!