«البلد مفيهاش شغل»، جملة تتردد على ألسنة كثير من الشباب المحبط، ممن يملأون المقاهى بأحاديث الحظ العثر، لكن «ضياء نصار»، الشاب السكندرى، الذى يبلغ من العمر 25 عاماً، رفض أن يلقى نفس المصير، وقرر أن يخترع «شغلانة» من وحى خياله، تكون بالنسبة له مشروعاً خاصاً، أطلق عليه «مشاويرجى إسكندرية». «تحت بيتنا كان بيعدى بياع خضار كل يوم وقت العصر، سمعته مرة بيقول لواحدة معترضة إن الخضار أغلى من الموجود فى السوق، إنه مخلهاش تروح السوق وجاب الخضار لحد عندها، وده له تمن، وهنا خطر فى بالى فكرة المشاويرجى، إنى أقضى مشاوير للناس اللى مش قادرة تنزل من بيتها»، حسب «ضياء». رحلة الشاب السكندرى فى العمل بدأت مبكراً منذ تخرجه فى الثانوية العامة، فيقول: «بدأت أشتغل من سن 17 سنة، دخلت معهد أبوقير للكومبيوتر وحصلت على بكالوريوس نظم معلومات إدارية باللغة الإنجليزية، كنت بشتغل وأدرس فى نفس الوقت، اشتغلت 3 سنين فى مركز كمبيوتر، كنت باخد 600 جنيه، وبعدها فى شركة إسكندرية للغزل والنسيج كمنسق استيراد مقابل 300 جنيه، بعد كده أخدت كورسات لغة وحاولت ألاقى فرصة فى شركات متعددة الجنسيات لحد ما اشتغلت فعلاً فى شركة كبيرة، بمرتب يبدأ من ألفين و200 جنيه ووصل ل4 آلاف ونص، لكن سبتها فى النهاية»، المرتب المرضى لم يقنع الشاب بالاستمرار فى وظيفة رآها لا تلبى أحلامه وطموحاته. 10 أشهر قضاها «ضياء» بلا عمل، حتى تفتق ذهنه فى النهاية عن مشروعه «مشاويرجى إسكندرية»، وللدعاية لنفسه قام ب: «جبت ورق فلوسكاب، وكتبت عليه بخط إيدى عن نفسى، كل ده حصل يوم 23 يونيو اللى فات، جاتلى الفكرة ونفذتها وجالى أول مشوار مع أول يوم». شهر واحد فقط هو عمر المشروع، حيث يقضى «ضياء» مختلف أنواع المشاوير، سواء كانت لشراء كارت شحن، زجاجة طلاء أظافر، تنزيه كلب أو شراء الخضار من السوق.
