عندما يخون الزوج زوجته يتسبب لها فى جرح عميق بكرامتها، قد يقضى عليها ويجعلها تفقد الثقة فى جميع من حولها ويتسبب لها فى مشاكل نفسية، قد يدفعها لتفضيل الوحدة، ولكن عندما تكون خيانة الزوج مع أقرب المقربين، فتلك كارثة أكبر.. «أميرة.ج - 27 سنة » واحدة من تلك الزوجات، فقد اكتشفت خيانة زوجها لها مع أقرب الناس إليها، أختها الكبيرة، بعدما شكت فى وجود علاقة بينهما واكتشفت رسائل خادشة للحياء بينهما على الهاتف الخاص بزوجها، مما جعلها تلجأ إلى محكمة الأسرة لخلع زوجها. وتقول فى دعوى الخلع «خلاص مابقتش واثقة فى أى حد بعد اللى حصل معايا أنا لحد دلوقتى، مش مصدقة اللى جرى لى، ياريتنى ما كنتش اتجوزته ولا عرفته، أنا مش خسرت زوجى وحياتى وبيتى بس، لا كمان خسرت أختى .» وأضافت «أختى الكبيرة اللى كانت بالنسبة لى فى مقام والدتى وكنت طول عمرى بتعامل معاها على الأساس ده، وكانت دائمًا بتنصحنى،تعمل فيا كده، أنا مش مصدقة، اللى حصل معايا ده أنا مش مستوعباه، ده فوق طاقة تحمل البشر، إزاى جوزى يخونى مع أختى الكبيرة، إزاى بعد اللى حصل لى أثق فى حد بعد كده، إذا كانت أقرب الناس لى خانتنى مع زوجى وخربت بيتى بأيدها .» وأكملت «أول ما حسيت أنى معجبة به، وأنه كمان معجب بى، جريت عليها أحكيلها، وكانت شايفة الفرحة فى عينيا، وقد إيه كنت مبسوطة بأنه هيتقدم لى وأتزوجه، إزاى هنت عليها تجرحنى وتوجعنى بخيانتها لى، إزاى ده أنا طول عمرى بحبها، وكانت بالنسبة لى أختى وأمى فى وقت واحد، إزاى تعمل فيا كده ». واستطردت أميرة «أنا عارفة إن أختى بتعانى نفسيًا بعدما أطلقت من زوجها، لأنها كانت بتحب جوزها أوى، بس ده مش مبرر يخليها تطعنى فى ظهرى وتخونى مع جوزى وتخرب بيتى، من بعد ما تزوجت بفترة وأنا بلاحظ أنها بتتعامل مع زوجى بطريقة غريبة شوية، وبتهزر معاه كتير قدامى وحتى على الفيس، ولكنى مكنتش أتخيل أو حتى أسمح لنفسى إنها تشك إن فيه علاقة غير شرعية بين أختى الكبيرة وزوجى، وكنت دايمًا بكدب نفسى، رغم أن حديثهم مع بعض كان بيضايقنى، وساعات كان بيخلينى أغير على زوجى وأتعصب وأتخانق معاه، لكنه كان بيتهمنى بالجنون وأنى إزاى أفكر إن فيه حاجة بينه وبين أختى الكبيرة ». واختتمت قررت إنى أمسك تليفون زوجى وأفتش فيه فاكتشفت ما صدمنى وخلانى مش قادرة أصدق وجود أكثر من محادثة بين زوجى وأختى الكبيرة، وفيها كلام جنسى خادش للحياء مبقتش مصدقة اللى عينى شايفاه، أختى الكبيرة بتخونى مع زوجى بالطريقة دى، وفيه بينهم كلام بالشكل ده، إيه اللى خلاها تعمل كده فى نفسها وفيا، أنا خلاص مش عارفة إزاى أقدر أعيش فى دنيا الأخت بتخون فيها أختها الصغيرة وبتخرب بيتها .