دكتور/ إيمان بسطويسي اخصائية أمراض نساء وتوليد وعلاج العقم بجامعة عين شمس
يوم الولاده مش ممكن يتتسي، هتفضلى فاكره كل كبيرة وصغيرة حصلت فيه طول حياتك. كل مره هتحكي قصته، هتتحسي انك فاكراه كإنه امبارح. أولادك هيسألوا عن اليوم ده وهيقفوا عند بعض المواقف ويضحكوا معاكي أويندهشوا من تصرف أو كلمه حصلت أو سمعتيها. المهم أن البوم ده من الأيام اللي هيحمل علامة خاصة جدا في حياتك وحياة أولادك. وزي ما هتحضري لليوم ده كل سنة للإحتفال بذكرى يوم ميلاد ابنك أو بنتك قبله بشهر، العادى انك تحضري لليوم نفسه قبله بتسع شهور. ويمكن قبل كده كمان، مثلا اختيار الوالد العطوف المتعاون المرن الحنون المسئول.
جسمك نفسه بيحضر نفسه لمدة 9 أشهر لليوم ده
من أول يوم تلقيح البويضة بيبدأ هرمون اسمه البروجيستيرون يسيطر على جسمك. ربنا سبحانه و تعالى بيأمر الجسم بإفراز كميات كبيرة من الهرمون ده اللي بيلف في الدم و يوصل للأربطة اللي بين عظم الحوض علشان يسبب ليونة فى الاربطة، ويسمح بمرور هاديء وآمن لرأس الطفل أثناء الولادة.
كمان الرحم شخصيا بيبدأ يتمرن من الشهر الرابع على الإنقباض بشكل تدريجي غير محسوس فى أول الحمل ثم بشكل ضاغط فى أوسط الحمل ثم بشكل محسوس غير منتظم فى الأشهر الثلاثه الأخيرة من الحمل استعدادا ليوم الولادة. يعني الرحم بيستعد لليوم ده لمدة ستة أشهر تقريبا. طبعا دى امثله بسيطه للإعجاز الإلهي في استعداد الجسم لليوم المميز جدا اللي هتولدى فيه بالسلامة إن شاء الله.
خطة الولادة
حاجات بتشتريها وشنطة بتحضريها ولبس وببرونات (لأ ممنوع الببرونه)! فيه حاجة تانية مهمة، أهم من شنطة المستشفى! أهم ترتيب لليوم ده، إنك تحضري خطة لليوم ده.. خطة الولادة. يعنى إيه خطة الولادة؟ يعني عايزه ايه يحصل يوم الولادة.. يعنى عايزه ايه ما يحصلش. إكتبي خطة للولادة وناقشيها مع دكتورتك قبل الولادة بفترة كافية. هتساعدك تتصورى بعض المراحل اللي هتقابليها وهتتفقي مع دكتورتك على خطوة خطوة. هتسأليها و هتجاوبك وهتبعد عنك مخاوف وهتوضح لك نقاط ممكن تكون مش واضحة.
رتبي معاها مكان الولادة وطريقتها.. ايوه.. ما هو خطة الولادة مش بس للولادة الطبيعية، حتى لو حالتك تستدعي ولادة قيصرية برضه فيه ترتيبات واسئلة مهمة لازم تكتبيها وترتيبها مع دكتورتك.
لو عملتي بحث على شبكة الإنترنت تحت عنوان "خطة الولادة" أو "birth plan" هتلاقي نماذج كتير جاهزة. ممكن طبعا تطلعي عليها وتناقشي بعض نقاطها اللي مش واضحة مع دكتورتك. لكن الأصل انك تكتبي مع زوجك خطة خاصة. كمان ضروري تزوري المستشفى اللي قررتى تولدي فيها وتقابلي طاقم الولادة اذا كان ممكن. اعملي كل خطوة ممكن تخليكي يوم الولادة هادية وفي حالة استرخاء ذهني و بدني. مهم نفكر بإيجابية واحنا بنحضر لليوم ده.. مهم نثق في ربنا.. قال رب العالمين "انا عند ظن عبدي بي" وقال "كل أمر المؤمن خير" إن شاء الله ربنا يتمم لكن جميعا بالخير و السعاده و يكون يوم ولادتك أسعد أيام حياتكم وافتكروا شعارنا "الحامل لازم تتدلع" و اللي بتولد كمان.