مساء الخير عليكو .. ما جربتش مرة تكون مستغل ؟؟ و لما تتحكم تتعامل بِغِل ؟ أو تكون مسئول و ضامن وظيفتك و لأدبك تقِل ؟ قُلت أسأل عينة من البشر يمكن تدل .. سألت عاملة في حضانة أخبار المديرة معاكي إيه يا فلانة ؟ ردت و قالت هاتقطعي عيشي خليني كدة أحسن جبانة .. قلتلها ياشيخة قولي و عليكي الأمان .. قالتلي : مديرتنا ست الستات لاجل ما ترضى عني في العلاوات أروح السوق أشتريلها الحاجات و اروح بيتها أكنُس و أمسح أرض و بلكونات ، و لأني قنوعة لايمكن أقول هات .. يا سلام و نعم الإستغلال . مديرة تمام ضميرها راضي و تفكيرها عال .. و قيس يا عمنا على أي شغل فيه عامل تحت إيدك يتعامل كما العبيد لازم يفيدك جوة شغلك برة شغلك مش مهم المهم نستغل ناس سخرها سيدك .. يا عمنا العامل جوة شغله عامل و برة الشغل زيه زينا ..
نشوف حد تاني و خلال ثواني شُفت بوكس شرطة فيه عسكري و( باشا تلميذ ) إبن ( باشا عميد ) عملت بطلة و قلت أصور لقيت عسكري مبتسم و سعيد قالي ما تصوريش هاقولك على كل حاجة و ما خبيش . الباشا عندنا راجل همام نخدمه بعنينا لأن شالوت سيادته دفعة للأمام وغير كدة أتنفى أو اتعلق و آخد عالقفا و اسمع ألفاظ مش تمام ده الباشا لو يحب أوصل الفاميليا كلها ، أوصلهم و حبايبهم و قرايبهم كمان و غمزلي بعينه إحنا مالناش بركة غير الباشا الكبير و الباشا الصغير و الهانم المدام و عشان انا بخاف من التعليق في الحالة دي بالذات لا تعليق ..
نشوف عينة تانية .. أيوة ده تاجر و موظف في مصلحة مش أزمة يعني حبة لرزقك و حبة لشغلك .. يطلع البضاعة و يلَقط رزقه من ( زباينه ) عفواً قصدي ( زمايله ) .. و أول الشهر يهل الهلال و يوم القبض صاحبنا شغال يلم القسط من الزمايل يا صاحبي شُغلك .. يا حبيبي شُغلك يرد عليا : طيب يا ختي يعني هانهد الجبال هاركن شغلي شوية مش مشكلة دي حسابات القسط عاوزة جدولة .. يا ستي باب رزق مفتوح و مصلحة و بالمرة نحلل الساعتين بتوع شغل المصلحة .. خفة يعني و فهلوة و نعم الإستغلال بالذمة ده مال حلال ؟؟ .. عاوزة فتوى .. هابعت لبرنامج ( أنت تسأل و الشيخ يجيب ) سؤال !!
يا عيناتك يا مصر .. و ده مدرس ينده على طالب مميز مش بعلمه لأ بوظيفة الوالد مكرم معزز يسأله أخبار الوالد إيه ؟؟ عجبته درجات الشهر ؟؟ و مش بيسأل بقية الطلبة ليه ؟؟ أصل والد الطالب مش اي حد موظف في الجهاز المركزي منصبه حساس بجد و المدرس يا حرام إبنه إتخرج بقاله كام سنة و الأبواب اتقفلت و الحيطة سد يعمل إيه المدرس ؟ يلاطف في الواد شوية يبحبح إيده في الدرجات شوية و لو راقب عليه في الإمتحان يهويله اللجنة شوية و لو وصلنا للدروس يلاغي الفصل كله علشان الفلوس و الله يرحمك يا مبادئ و يبشبش الطوبة إللي تحت راسك يا قيم أصل العلم لا يُكَيَل بالبتنجان يا حلاوته بالكوسة و الواسطة و فوقيها بوسة هو المدرس ضاعت هيبته من قليل .. إستغلال يا صاحبي و لعب على كل الحبال .. إيه رأيكم في العينات بذمتكم مش عاوزة معمل فكر معايا يا اخويا و حاول تحلل نشوف فين الخلل و يا ترى فيه أمل ولا دي مشاكل للأزل
زمان درسنا الإستغلال في الجامعة بس مش بالشكل ده علمونا إزاي نستفيد من مواردنا و لو كانت قليلة و كانت الظروف صعبة و البيئة بخيلة لكن ماتعلمناش ياصاحبي نستغل إنسان أو مكان أو وظيفة تبقى وسيلة ..
يعني ياختي ماسكة في الغلابة و سايبة الكبار .. ماهمه ياما هبشوا و استغلوا و بعدين يا سيدي ما نابهم غير الخراب و كل واحد قعد على تله .. و إللي ما طاله إيد القانون فيه رب دنيا و آخرة يذله ..
