ايه ده معقول !!!!! ده لسه في ناس مش مصدقة أن إلي حصل في مصر ده ثورة من أجل التغيير والقضاء علي الفساد أيه ده معقول !!!!! ده لسه في ناس بتشكك في شباب 25 يناير وتقول أن دول عملاء لدول تانية .. لأن المصريين مايعملوش كدة المصري إلي بجد هو إلي ياخد بالجزمة ويتسرق ويتنهب وينزل يتأسف للي بيعمل فيه كل ده أيه ده معقول !!!!! ده لسه في ناس حتسكت علي رموز الفساد من قيادتها علشان خايفيين علي نفسهم وتولع البلد .. علي أساس أنه طول ما هما سايبين قيادتهم الفاسدة ده مش بيضرهم شخصياً يعني ماهو بينوبه من الحب جانب بقي ايه ده معقول !!!!! ده لسه في ناس مقتنعة أن قناة الجزيرة فعلاً كانت كاتبة علي الموقع بتاعها معاً لأسقاط مصر .. علي أساس انهم حتي لو عايزين يسقطونا حيكتبوا كده علي الموقع بتاعهم عادي وعلي أساس أنهم كمان ماقالوش أن تم أختراق الموقع الألكتروني لقناة الجزيرة والله أنا لا مع القناة ولا ضدها بس ده أحقاقاً للحق لأن أنا مع مصلحة بلدي في الأول وفي الأخر ايه ده معقول !!!!! ده لسه في ناس بتدافع عن اللي بيسرقوهم لأ وخايفيين أوووي علي صحتهم .. ضحكني أوي المواطن اللي طلع قال والنبي يا ريس ما تنسي تاخد الدواء عشان خاطري ايه ده معقول !!!!! ده لسه في ناس مش عايزة تنزل شغلها وقالك ثورة بثورة بقا أهو يزودو الأجور دلوقتي مالناش دعوة يا كدة يا مش حنمشيلكم البلد .. يا عم والله لو البلد دي أستقرت ومبقاش فيها فساد والله حنعيش ملوك كلنا ومحدش حيشتكي من حاجة ايه ده معقول !!!!! ده لسه في ناس مش عايزة الشرطة ترجع البلد أساساً ولا بحسن المعاملة ولا بسوء المعاملة مش عايزينهم أصلاً .. أتنيل علي خيبتك ما هما الشرفاء منهم هما إلي كانو حامينك ومخلينك نايم في أمان ومش ناعي هم أمن أهل بيتك طول ما أنت مش موجود فيه ايه ده معقول !!!!! ده لسه في ضباط شرطة مش عايزة تنزل شغلها إلا بنفس الهيبة بتاعة زمان .. يا مصري والله الثورة دي عرفت الناس قيمة مهنتكم جداً بس أنت اللي حيرجعلك هيبتك فعلاً أحترامك للناس وعقلك في شغلك مش مجرد آلات بتنفذ أوامر وخلاص ايه ده معقول !!!!! ده لسه في ناس بتقول علي الشهداء دي عيال سيس ربنا خدهم علشان كانو عايزين يضيعو البلد ,,,,, ياعم اتقي الله دول شباب زي الورد ضحت بحياتهم علشان كانو عايزين يشوفو البلد دي في احسن حال ودافعو عن حقك وانت قاعد في بيتك كل همك حتتغدي ايه النهاردة والعيال دي حتمشي امتي من الميدان عايز انزل اروح اشيش ع القهوة ايه ده معقول !!!!! ده لسه في ناس مش فاهمة أن رئيس الولاياتالمتحدةالامريكية يقول أن لازم نعلم شبابنا ما فعله شباب المصريين في ثورة 25 يناير .. الناس دي مش فاهمة يعني أيه شعب بعد ما كان فاكر أن لسة وسيلة المواصلات عندهم الجمل والخيل دلوقتي عايزين يعلمو ولادهم إلي أنتوا عملتوه في بلدكم ايه ده معقول !!!!! ده لسه في ناس لما بتشوف الشباب اللي يفرح بينضفو الشوارع بيقوللهم تعالو والنبي أمسحو هنا تحت البيت واللي يرمي عليهم زبالته من فوق ايه ده معقول !!!!! ده لسه في ناس بتقول مسلم ومسيحي .. ياعم وربنا اسمها مصري ايه ده معقول أنتم مصريين أنتم معقول أنتم عندكم عقل تفكرو بيه وتشغلوه !! ايه ده معقول أنت بني آدم طبيعي يالي بتفكر كده ! ايه ده معقول أنت لسة أناني ومش عايز إلا مصلحتك بعد كل الشهداء إلي ضحت بحياتها في سبيل إنك تعيش حر من غير فساد ولا قهر ولا نصب ولا ظلم !! ايه معقول أنا ضيعت وقتي في الحديث مع أشخاص أقل ما يقال عليها أنها تيييييييييييييت وده عشان أنا مؤدب بس أنا عن نفسي كمصري مش حسكت ومش لوحدي علي فكرة لأ مصريين كتير والله مش حتسكت تاني أبداً علي أي مظهر من مظاهر الفساد إلي كنا عايشين فيه وحنعمر البلد دي ونطورها ونعيش في خيرها مصريين علي حق علشان مش حيبقا عندنا فساد فاهمين يعني أيه مش حيبقي عندنا فساد يعني أنت يالي بتفكر بالطريقة السلبية دي مش حيكون ليك مكان فيها ألحق نفسك وفكر شوية خلينا نعلي وننهض بالبلد ... البلد اللي بقي يتعمل لها ألف حساب من بره يا أخي بلاش نرجع تاني نبوظها من جوة بسبب قلة العقل والأطماع الشخصية أرجوووووووووووووك أرتقي إلي أخلاق شباب الثورة والله العظيم مش عيب أنك تبقي محترم ومثقف دي حاجة كويسة والله حتلاقي ناس كتير حتحترمك من قدامك ومن وراك مش زي جروب المنافقين إلي حواليك اللي أنت فرحان دلوقتي أنهم بيشاركوك في رأيك والله لو دورت وراهم حتلاقيهم مطلعين عينك كلام عليك وعلي خيبتك من ورا ضهرك بس فكر أنت بس شوية وخليك مصري بجد مرة واحدة في حياتك .. ساعتها بجد عيالك وأحفادك حيفتخرو بيك قدام أي حد في العالم مواطن مصري / حسن الزكي
