أخشي بعد كتابة هذا المقال أن أجد بعض القارئات وليس القارئين ( مستنيني خارج العالم الإفتراضي الإلكتروني علي باب العمارة ) خاصة وأن هذا المقال يأتي علي الوتر الحساس لمعظم الفتيات. ربما يستشعر البعض عقب قراءة هذا المقال تحيزي للشباب علي حساب الفتيات ولاسيما وأن الفتيات هن الأكثر رومانسية بصورة تفوق الشباب بأشواط بحسب العديد من الإحصائيات وبحسب طبعا الواقع العملي ، وكم تصيبني الرومانسية المفرطة لدي بعض الشابات بالحساسية ( مش طفح جلدي ولا غيرة ولاحسد بس القضية إن الرومانسية كما أراها ليست ورودا وشيكولاتة ودبدوب وهدايا فالنتاين بل مشاعر صادقة راقية ونبيلة وفي إطار أخلاقي محترم .)
الرومانسية ليست حكرا أو حصريا بين الشباب والشابات بل هي مشاعر وأحاسيس بين ذاتك وبين أهلك أو أقاربك أو أصدقائك وأيضا مع المجتمع ..فأنا أري أن أي مشاعر بالحب أو بالإعجاب أو التقدير أو الإحترام أو ود هي أيضا تندرج ضمن نطاق الرومانسية.
لن أخفي عليكم ما دفعني لكتابة هذا المقال كالمعتاد المواقف الشخصية والصفحات أو الجروبات علي الفيس بوك و التي أجد صديقاتي يطلبون مني الإنضمام إليها أو أجدهن مشتركات بها حتي وإن لم يكن لهن نشاط بها ولكنهن يحببن سماع القصص الرومانسية – حيث قدر الله أن يكون أغلب صديقاتي الفتيات رومانسيات حبة .. حبتين ..تلاتة.. قول علبة حبوب كاملة - وهذا لا يعني إنني لا أقدر رومانسيتهن بل علي العكس إنني احترم كثيرا مشاعرهن المفرطة ولا أقصد الإهانة من أحاسيسهن ولكن كما تعلمون كم أحب كثيرا أن أكون شريرة أحيانا أو من أجل الصدق في كثير من الأحيان ...
ولنبدأ سويا أيها القراء الأعزاء في الحديث عن الكليشيهات الرومانسية – من وجهة نظري – التي تتعلق برومانسية لن أقول " كل "ولكن " معظم " الفتيات ( وطبعا ربنا يُسترعليَ من التعليقات القاسية من جانب الفتيات ويا رب الشباب يكونوا أكثر رحمة. )
· باحلم بفارس علي حصان أبيض يخطفني : ( يعني أنتِ يا بنتي عاوزة واحد من قريش ! ويخطفك إيه هو بلطجي ؟؟ إيه الإنفلات الأمني ده ؟ وبعدين يعني هو إذا جاء بالمرسيدس بدل الحصان هيحصل حاجة؟؟) · أعيش مع من احبه علي جزيرة لوحدنا : يا شيخة ده حتي هتزهقوا من بعض وغير كده انتِ مش خايفة من الأعاصير اللي بتغرق الجزر مش كافية تسونامي وإعصار كاترينا وإعصار إيرين ..مش خايفة لا تكون الجزيرة تحت مستوي خط البحر ساعتها بقي هتعيشوا مع الأسماك .) · يجيبلي دباديب وهدايا في كل عيد : ( طبعا سواء في الأعياد والمناسبات الرسمية لازم دبدوب ويكون يا إما لونه أحمر أو أحمر في أبيض ويكون مكتوب عليه كلمات الحب والعشق والغرام بس بالإنجليزي عشان البريستيج وعشان تقدر تقول لأصحابها " ده بيحبني وميت في دباديبي " ) · ضوء الشموع : ( أغلب الفتيات يحلمن بفتي وسيم يطلب منهن الزواج علي ضوء الشموع ، أو حتي في أثناء الخطوبة أو بعد الزواج يحلمن بأن يقوم هذا الوسيم بدعوتهن في مطعم فاخر علي ضوء الشموع وصوت الموسيقي يصدح في الأرجاء ....ستوب فوقي يا بنتي من تلك الأوهام أنتِ عايشة في فيلم "الوسادة الخالية".. خليكِ عملية مفيش شموع دلوقتي عشان كده خليها لمبات موفرة للكهرباء وشغلوا أغنية علي "الدي في دي " والعملية هتمشي ) · الرسائل الغرامية: ( خلص بقي جو عبد الحليم ده انتهي ..دلوقتي في شات ياهو أو هوت ميل أو الرسائل الهاتفية القصيرة.. وبعدين محدش فاضي يكتب شِعر .. وخلاص انتهي زمن الثرثرة بسبب سرعة الحياة...دلوقتي إحنا هنمشي بقانون التويتر كافية اوي علي البنت 140 حرف وتحمد ربنا .) · يكون صوته حلو : ده علي أساس إن حضرتِك بتشتغلي في روتانا موسيقي وهتعمليله ألبوم ( كان هذا ردي علي إحدي صديقاتي التي أخبرتني بأن من مواصفات " قريش أحلامها" أنه يكون صوته عذب رنان وهادئ مش بيجعر – علي حد تعبيرها- ) وطبعا كان ردها عليَ : " سارة انتِ سخيفة أوي." · يؤلف قصصا أو أشعارا تكون هي بطلتها : بجد طفح كيلي افرضي يا فتاة أن الأخ الرومانسي أو خطيبك مش بيعرف يكتب قصص ؛ يعني يعمل ايه؟ ياخد كورس قبل ما يتعرف عليكِ عند عمرو قطامش ولا علاء الأسواني... · نفسي ألف العالم دولة دولة مع فارس أحلامي : يا سلام علي الأحلام ؛ اكيد تلك الفتاة تحلم بأن تتزوج من ابن دونالد ترامب ( وهو رجل أعمال أمريكي من أثري أثرياء العالم .) علي فكرة ممكن تلاقي واحد يديكي لفة بالتوك توك .. · ظواهر فيسبكاوية دالة علي الرومانسية : علي طول تلاقيها شغالة جو الأغاني الرومانسية زيادة عن اللزوم وطبعا تلاقي حالتها الإجتماعية علي الفيس بوك (في علاقة ) وتلاقي إستايوهاتها عن الحب والحنين والشوق، وتلاقي بتعمل شير لأي مقال أو اي كتابات رومانسية عشان تغيظ صديقاتها..وطبعا لو الشاب الوسيم ( حلق لها ) تلاقيها قلبت جراح وعذاب و شقاء وبؤس وألم وحسبي ونعم الوكيل وأغاني إليسا وشيرين عبد الوهاب تشتغل... · سارة !علي فكرة أنتِ مش رومانسية خالص : قالتها صديقتي في وجهي وطبعا دي الحقيقة ؛ لأني فعلا مش رومانسية علي الإطلاق ..إنني احترم الرومانسية ولا أطيقها ..إنني في علاقة معقدة مع الرومانسية كما أنها ليست من أولوياتي ..وإزاي بصراحة فتاة مثلي كانت بتعلب كورة قدم و بتلعب دلوقتي بلاي ستايشن و بتحب المصارعة وأفلام الأكشن والرعب و أمنية حياتها كانت تطلع ظابط بوليس تبقي رومانسية...أشك
وفي الختام الرومانسية مشاعر وحالة جميلة لا تحتاج لأموال أو سيارات أو شموع حتي تظهر بين الناس جميعا بل تحتاج لأحاسيس صادقة مخلصة..وبرضه الرومانسية بتجيبلي حساسية..
