دائما ما انتظر يوم الجمعة والسبت بفارغ الصبر من اجل تعويض أيام الأسبوع من المشاوير رايح جاي من ندوة الي ندوة وأحيانا من نجع الي نجع ومن قرية الي قرية في محافظات مصر غيران يوم الجمعة الماضي لم اهنأ بالنوم خاصة انني اقوم بتوصيل الفتاتين الجميلتين تسنيم وروان الي مدرستهم كل صباح يعني كله شقاء في الداخل والخارج والحمد الله .. المهم هذه الجمعة ليست كاي جمعة فجاة صحيت علي صوت الجميلة تسنيم وبعنفها الصعيدي المعروف بابا بابا' بيسمان ' اصحي بابا صحيت مخضوض قلت يانهار زي بعضه هو المدرسة راحت علي الامورتين وراحت علي نومه سألتها هو انتي وأختك جاهزين للمدرسة ؟ ردت بابا النهاردة الجمعة مفيش مدرسة قلت لها طيب سيبني ابوس ايد ك ياست تسنيم انام وروحي اسمعي تومي وجيري الا أنها لم تتركني وراحت تقول بابا 'بيسمان ' في نبرة تحمل استفهام قلت لتسنيم معلش خلي ماما تفتح باب الشقة وتطلعها بره فانا اعتقدت أن هناك قطة دخلت من البلكونة او اثناء فتح الباب وأن البنت الصغير محافظة علي عاداتنا وموروثنا و حفظت كام كلمة من لهجتنا في صعيد مصر فنحن نطلق لفظ 'البسة ' علي القطة ضحكت تسنيم وقالتلي امشي أيه بابا ..قلتلها القطة.. قالتلي مفيش قطة ولا حاجة ..قلت امال 'بيس' ايه دي قالتلي يابابا أنا سمعت 'البت الكبيرة اوي في الشارع بتقول لصاحبتها بيسمان ' المهم تسنيم' راسها وألف سيف 'عايزة تعرف معني الكلمة .. فضلت أترجي فيها وحياة دادي الباشا اوغلو لاظوغلو ونينة جلفدان هانم الشركسي معرف معناها ولا عدت علي في كل الكتب التي تحت السرير ولا فوق السرير ولا حتي الندوات اللي حضرتها طوال السنوات الماضية 'سبيني ياعم أنام 'وشوفي أمك يمكن تكون كلمة انجليزي غير متداولة الا أنه مامتها حلفت بتربة أمها ورحمة الميتين والحيين ما تعرفها زي ولا حتي وردت عليها في الفضائيات الدينية المهم وعدت تسنيم انني سوف اسأل كل المعارف والأصدقاء عن معني' بيسمان ' دخت السبع دوخات علشان اعرف من زملائي في الأسبوع لكنهم طلعوا اجهل مني سالت جار قالي ده ممكن تكون فاكهة صينية وصلت مصر المهم خطر في بالي الاتصال بصديقة لي خبيرة مصطلحات شبابية تواعدنا في مقهي شهير بوسط البلد طلبت الشيشة اصل هي بت حريقه معسل مثل 'قمينة طوب' قلت لها 'محدش شايفك ' .. قالتلي مشغولة مع' الموز' .. هو عندكم جني موز اليومين دول ما إنا عارف انها من أرياف مصر.. صححت لي الكلمة مع الموز 'الانتيم بتاعي' قلت ماعلينا .وأضافت بس ياحبيبي صديقي ده ' خالتو خالص ' قلت صلاة النبي اعوذ بالله .. قالتلي ماتفهمنيش غلط.. قلت لها لاسامح الله .. قالت اقصد انه دلوعة مامتة بس انا 'كبرت دماغي' .ده ما ينفعش معاه 'غير أتوبيس راجع لورا ' ..قلت لها حرام عليكي يمكن وحيد أمه ..قالتلي وحياة مامي انا مش بحب ليه الشر بس يستاهل ' واحدة وحشة ' لأنه الموضوع اللي بنا طلع ' امبالايز ' بدون فائدة يعني ..'قلت يامنجي يارب ' دا ربنا لايرضي بالخراب وبنوع من الخجل بعد ان وضعت نفسي موضع الغباء والجهل خشيت أن اسأل عن كلمة' يبسمان ' يمكن تكون كلمة مش ولابد تشجعت وجبت فلب فوق قلبي وغرقت نفسي بجردل تلج قلت لها بقولك ياجميل هو 'بيسمان ' معناها أيه فرنسية ولا ايطالية ولا هندية ولا مشروب طبيعي ولا روحاني لقيتها بتقهق بصوت عالي وكانها اصابتها هيستريا لدرجة اصابني الشك في نفسي وردت علي بكلمة اصعب منها"...' كنت فاكراك ولد روش أمال سايب شعرك منكوش ومفلفلة قلت لها الشعر ده من قرف الدنيا والعيال وبعدين الحلاق الصيني ليه فترة لم يمر علي وخايف يكون حدث له مكروه وقلبي وكلني عليه . قائلا لها يا بنت الناس هو انا عرفت الأولي لما اعرف التانية .. ردت دي لغة العيال الروشة.طحن . قلت ليها اها 'الروشة طحن ' دي ربوة في لبنان هي الحكومة قررت تبطل استيراد القمح الفاسد من روسيا وذل امريكا وقررت تعمل طاحونة في كل قرية للفلاحين .. ضحكت وواصلت كلامها 'الروشنة' يعني العيال والبنات اللي 'منفضة ' قلت اقطع دراعي لو فاهم حاجة .. قالتلي 'ماتفك بقي' وخليك 'باترينا ' قلت لها ح يعرضوا في هدوم قالتلي يعني تلبس نضارة وتبقي ' اشطه ياعم ' .. قلت ليها الأسبوع اللي فات عزمني صديق لي علي سندوتشين حلاوة بالاشطة زهقت البنت ولقيتها بتقولي ' انزل بقي من ودني ' ..قلت لها انا قاعد علي الكرسي ..قالت لي يعني بطل كلام واسئلة كتير ..قلت ليها طيب' بيسمان' .. قالتلي يعني الحياة اخر جمال وتمام وروقان وكله في 'السكلانس ' يامعلم . قلت لها سؤال اخير 'و".." ' قالت لي انت صعيدي ممكن تضربني بالكرسي في النهاية طلبت الكمبيوتر مني وهات ياشات وكلام لاهو عربي ولا انجليزي وبفضول شديد بصيت في كلمة بصعوبة وفكيت شفرتها azak' ' وكاني لقيت لقية وكدت اقفز من علي الكرسي فرحا بعد ان عرفت كلمة بعد عذاب .. قلت ليها عرفتها 'ازيك' ضحكت وشربنا الشاي وهي شغالة سحب في الشيشة وقبل ان تنصرف شاورت لي وقالت لي باي ' شالوم ' .. قلت لها يانهار ابوكي اسود يا بنت المطبعة مع الصهاينة .. ردت وقالتلي خليك ' كول ' قلت مش بحب اغير الشاي ابو نشارة وبرادة .. قالتلي ماتشوفلك مزة تعلمك لغة الروشنة..قلت لها انا متجوز ثلاثة تسنيم وروان وأمهم وبعدين لي صديق عملتلة انا والاصدقاء قائمة بالمزز المحلية ة والدولية من اجل الزواج لكنه 'ركبته' عقده وقرر عدم الزواج خشيت من شطحات المزز اللي مش 'قديها ' تاني يوم كعادتي اجلس علي مقهي يرتاده رفاق السوفيت واحفاد لينين وستالين والحاج كارل ماركس سالت صديقي لي يعني ايه كلمة ".." رد ' ....' قالي بس اوعي تفتكر اني من العيال الروشة ' دي كلمة عرفتها علي الطاير ' .. قلت في نفسي يا بنت المجنونة ' طلعت الكلمة قبيحة' قلت لاصحابي ياجماعة في بنت طلعت عيني 'اللي خلفوني' رسائل علي الفيس بوك لا هو انجليزي ولا تتاري ولا حتي سوفيتي فيها ارقام ورموز غريبة اموت واعرف عايزه ايه يمكن تكون بنت كلينتون ولا اميرة موناكو اوحتي بنت مالديف يبقي الواحد اتفتحت ليه طاقة القدر وسافر والخير ح يعم . ولا اقولكم يمكن تكون بنت من بنات عمامنا الفراعنة فرعونية متاصلة ومسجلة اسمها علي الفيس بوك وحبت التواصل معي لتاخدني الي مملكتها حيث العز والخدم والحشم والمقابر الممتلئة بالذهب والتماثيل وعندما انتقل الي العالم الاخر سوف تضع ما لذ وطاب من المؤكلات والمشروبات علشان كل ما استيقظ اكل وارجع اموت تاني وبرضه انتم لن أنساكم معاي ح اخدكم من ضمن الحراس بتوعي تطوع صديقي لكي يفهمني علي أمل منه ان افهم في اللوغاريتمات ال ' ح ' رقم ' 7 ' و حرف ال 'ع' إلي ' 3 ' وحرف ال ' خ ' إلي '`7 ` ' ، رقم 7 إضافة إلي فصله عليا ، و حرف ال 'غ' عبارة عن 3 وعليها فتحة ' 3 ` ' فإذا أردنا كتابة كلمة مثل حبيبي تكون 7ABIBI او antafank ' انت فين ' . yooooooom el arb3a2 33 fe saket elsawy elzamalek يوم الاربعاء بساقية الصاوي لمهم اصابني الدوار و احسست اننا مستهدفون حتي في اللغة تحت مسمي لغة العربي لاتيني او اللغة السرية المخترعة في التفاهم بين الشباب من الجنسين التي بدات تحتل مرتبة متقدمة يعني بعد 15 سنة ح نحتاج مترجمين لكي نفهم اولادنا مادام اغلب جيلنا تحول لها وح يبقي في ندرة في المترجمين وبالتالي اذا لم نحافظ علي لهجتناو لغتنا عبر المراقبة الاسرية لما يتداوله الشباب من الفاظ فيما بينهم وعبر المراقبة المدرسية والجامعية فقل علي لغة لغتنا الجميلة السلام وهنااك احصائية لا اعرف مدي مصداقيتها تقول ان قرابة ال 25 مليون شاب وفتاة يستخدمون الشات من سن 18الي 35 وهم يتعاطون اللغة السرية المختصرة التي لا تحتاج الي رغي والفهم بكون فيها بالرمز 'وعند ها نقول كان هناك لغة اسمها العربية محتاجة لمتحف لزيارتها'وفك شفرتها.
