وراء الاحداث

د.عبد المنعم سعيد: مساء الخير.. بعد أسابيع قليلة سوف تبدأ الحملات الإنتخابية لإنتخاب أعضاء البرلمان للمجلس النيابى في مصر وسوف تدخله أحزاب وتدخله جماعات مستقلة سيجرى بالضرورة نوع من المساجلات الكثيرة النقاشات الحوارات من بينها الذى يؤيد الحزب الوطنى الديمقراطى أو ما يؤيد حزب الوفد أو ما يؤيد أي من الأحزاب الموجودة وسوف يكون هناك خلافات كثيرة – خلافات كثيرة حول سياسات الحكومة حول سياسات الدعم حول الحالة التعليمية في مصر حول الحالة الصحية في مصر .. أيا من كانت هذه الحوارات سوف تتطرق إلى موضوعات كثيرة .. أحد عيوبنا الموجودة في النقاش العام في مصر إنه في أحيان كثيرة يفتقر الى المعلومات الدقيقة أو حتى القريبة من الدقيقة لأنه كثيرا ما نركن الى إنه يكون الحوار قائم على فكرة إتهامات أو (ينبغيات) كثيرة ينبغى كذا وينبغى كذا وينبغى كذا أو يكون هناك طموحات وأحلام أكثر من اللازم لماذا لا نكون مثل كذا ومثل كذا ومثل كذا .. كل ذلك دون إستناد الى أرقام وحتى بدون الحملات الإنتخابية .. المعلومات تكاد تكون مفتقدة هناك صحف كثيرة لا تكاد تجد أرقاما فيها حول معلومات تخص مصر أكثر من التاريخ الموجود في هذه الصحيفة أو تلك أو عندما نستمع الى كثير من البرامج الفضائية نجد الأرقام بتتطاير بشدة والكل من الممكن جدا أن يستند في نهاية مقولة من المقولات بكلمة طبقا لمعلومات البنك الدولى أو صندوق النقد الدولى و هكذا و هكذا لا يحدث عادةً أن أحداً من الممكن يرجع الى أصول هذه المسألة بمعنى أن ينظر الى هذه التقارير بالفعل ثانيا أن يحاول يدققها بالمقارنة بالتقارير المصرية المقابلة وهكذا فإنه كثير مما نناقشه في مصر ينقصه الضبط الإحصائى- الضبط الرقمى- الضبط القائم على معلومات صحيحة .
من المدهش أن أول محاولة جرت للبحث عن المعلومات في مصر وتدقيقها قام بها 150 عالما فرنسيا أثناء الحملة الفرنسية على مصر في نهاية القرن ال 18 وفى أوائل القرن ال19 ونتح عنها عمل شامل ضخم عُرف بإسم وصف مصر هذا الكتاب كان تدقيق في المعلومات أو الحصول على المعلومات الدقيقة عن مصر من أول السكان وساكنين فين والأرض الزراعية وحتى الطيور اللى موجودة في مصر وأنواع الزراعات رغم إن ده ظهر في مجلدات كثيرة إلا أن مصر كانت بسيطة في ذلك الوقت عجز السكان كان حوالى 2,5 أو 3 مليون كانت الحياة في مصر كلها مزدحمة في زقاق صغير حول نهر النيل كانت مصر بشكل عام بسيطة اداريا بسيطة سكانيا بسيطة جغرافيا بشكلٍ أو بآخر مع زيادة عدد السكان بدأت مصر في إنها تحول ذلك الى عملية مستمرة الى قوانين وبعد القوانين أصبحت هناك مؤسسات تسعى الى أن تضع المعلومات عن مصر بشكل منتظم لها علاقة بعدد السكان عدد المدارس بعدد الجامعات الى آخره من كل ما يتعلق بالتعليم والصحة والإدارة والتنظيم والغذاء والسكن كل الأمور التى تخص حياة المصريين , الجهاز المركزى للتعبئة والإحصاء يُعد هو المؤسسة المصرية الرئيسية المنوط بها أن تقوم بمهمة وصف مصر ليس بشكل كما حدث على طريقة الحملة الفرنسية إنه مستعمر جاء إلى بلد يريد أن يعرف جميع ما لديها من ثروات وجميع ما لديها من إمكانيات وجميع ما لديها من بشر وإنما هو مراقبة مستمرة للحالة المصرية تقريبا نستطيع أن نقول أنها تتم على مدار الساعة لأنها تبحث أسبوعيا في أسعار سلع معينة تبحث أسبوعيا عن عدد العاطلين تبحث سنويا أو كل عشرة سنوات عن عدد السكان تراقب بعد ذلك أشكال الإنفاق المختلفة ، تتابع بشكلٍ أو بآخر جميع المعلومات الأساسية التى تشكل وصفا حقيقيا لحياة المصريين الغريب أننا نجد لدينا في مصر نقاشا حول الفقر نقاشا حول الدعم نقاشا حول البطالة نقاشا حول حال التعليم الى آخره دون أن يستند إىٍ منها الى المعلومات الموجودة والمتوافرة لدينا بالفعل سواء اللى بيقدمها الجهاز المركزى للتعبئة والإحصاء أو المؤسسات الأخرى الإحصائية الموجودة في الوزارات المصرية المختلفة – بمعنى آخر أن الذين يتحدثون دائما عن المعلومات يتحدثون دائما عن الشفافية يتحدثون دائما عن المنطق العلمى بشكلٍ أو بآخر في التعامل مع مشكلاتنا نادرا ما نجدهم ممسكين بناصية الحقائق الرئيسية .. هذه الحلقة من برنامج وراء الأحداث سوف نخصصها ونقدمها للمرشحين المقبلين ونقدمها للزملاء الذين يشاركون في برامج تليفزيونية شتى ونقدمها أيضا للعاملين في المجال الإعلامي ونقدمها أيضا للعاملين في المجال الاقتصادي والسياسي أي من الممكن أن نحصل على معلومات تصف مصر وهل من الممكن إن أنا أحصل على جميع المعلومات؟ وإذا كانت هناك معلومات ناقصة هل نستطيع أن نوفيها حقها ونطلبها بحيث يتم البحث في هذه المعلومات وتوفيرها وتصبح جزء من المعرفة العامة عن مصر ؟ بدون هذه المعرفة الدقيقة عن مصر لا نستطيع أن نتخذ قرارات جوهرية سواء على مستوى المجالس النيابية أو على مستوى الوزارات أو على مستوى حتى الناس العادية التى تريد أن تستثمر تريد أن تضع ما توفره في صندوق البريد أو تضعه في البنك او تستخدمه في استثمار عقاري أو تستخدمه في أمور مختلفة بدون المعرفة بدون المعلومات كثيرا ما نتخذ قرارات ليست على صواب أو عشوائية أو لا تعرف الإتجاه السائد الموجود بالنسبة لأى قطاع من القطاعات .. ضيفنا في هذه الحلقة معالي الوزير اللواء أبو بكر الجندى رئيس الجهاز المركزى للتعبئة والإحصاء ولكن قبل أن نلتقى مع ضيفنا الكريم تعالوا نستمع الى هذا التقرير .
فاصل " تقرير "
كثيرا ما يتناول الكُتاب والمهتمون بالشأن العام في مصر التطورات والتغيرات التى تحدث في مصر اقتصاديا وسياسيا واجتماعيا خاصةً في المجالات المتعلقة بالسكان والصحة والتعليم والسياحة والإستثمارات والزراعة والنقل والمواصلات إعتمادا على معلومات وتقارير تبدو في كثير من الأحيان متضاربة ولا تعكس الواقع الفعلى لحالة تلك المجالات على أرض الواقع .. كما يشيع في بعض الفترات الإعتماد على بعض التقارير الدولية خاصة في الأمور الاقتصادية وهى التقارير التى تبدوا مناقضة في كثير من الأحيان للتقارير المصرية ونتيجةً لتضارب أرقام ونتائج التقارير المختلفة في مصر ونتيجةً لغياب الكثير من المعلومات في بعض المجالات يصبح من السهل ان تنتشر الشائعات بشأن الأوضاع العامة في مصر بل إنه في كثير من الأحيان يتلقف البعض تقارير معينة رغم أنها غير موثوق فيها تماما وإعتمدوا على ما بها من أرقام لمجرد أنه لا توجد أية أرقام أخرى بشأن الموضوع الذى يتناوله – ويرجع تضارب المعلومات والبيانات في مصر عادةً الى سببين فهناك إختلاف التعريفات أو إختلاف الفترة الزمنية أو إختلاف الشريحة العمرية التى يجرى تطبيق التعريف عليها وهناك ثانيا التضارب الناشئ عن محاولة تسييس البيانات لمصالح خاصة أو لتدعيم وجهة نظر معينة . يعتبر الجهاز المركزى للتعبئة العامة والإحصاء بمقتضى قرار السيد رئيس الجمهورية رقم 2915 لعام 1964 المصدر الرسمى لجمع البيانات والمعلومات الإحصائية وإعدادها وتجهيزها ونشرها وإعطاء الطبيعة الرسمية للأرقام الإحصائية في مصر كما أنه الجهة المعنية بتنفيذ عمليات الإحصاء وجمع المعلومات بمختلف أنواعها وتخصصاتها ومستوياتها وينفذ الكثير من التعدادات العامة والمسوحات الإقتصادية ومن أهم ما يهدف إليه الجهاز إستكمال منظومة العمل الإحصائى الموحد والشامل لمواكبة كل التطورات في مختلف نواحى الحياة وتوحيد المعايير والمفاهيم والمسطلحات الإحصائية وتطوير نظام المعلومات الشامل الذى يساعد في أعمال التخطيط والتطوير والتقييم ورسم السياسات وإتخاذ القرار في كافة المجالات التنموية ، وخلال الأعوام الأخيرة تطور عمل الجهاز بشكلٍ لافت للنظر إذ أضاف تقارير ومجالاتٍ أخرى لمجال عمله وقدم تقارير ومعلومات تتسم بالدقة الى حدٍ بعيد وعمل على توفيرها بكل السُبل المتاحة للنشر ليسهل عملية الإتطلاع عليها وهو الأمر الذى من شأنه أن يضبط تداول المعلومات بشأن الأوضاع العامة والتغيرات التى يمر بها المجتمع المصرى على المستويات السياسية والإقتصادية والإجتماعية فما هى حقيقة التغيرات التى طرأت على عمل الجهاز المركزى للتعبئة العامة والإحصاء ؟ وما هى أهم المعلومات المتاحة عن الأوضاع الإقتصادية والإجتماعية المختلفة والتغيرات التى شاهدتها تلك الأوضاع خاصةً البطالة والتعليم والفقر والإستثمار والدور القطاع في مصر ؟ وما هى المؤشرات التى يعتمد عليها الجهاز في التعرف على حقيقة تلك الأوضاع ؟
هذه هى أهم التساؤلات التى تناقشها تلك الحلقة من برنامج وراء الأحداث
فاصل
د.عبد المنعم سعيد: وصف مصر 2010 وضيفنا معالى الوزير أبو بكر الجندى رئيس الجهاز المركزى للتعبئة والإحصاء .. أهلا بك معالى الوزير
معالى الوزير اللواء أبو بكر الجندى : أهلا بك وبالسادة المشاهدين
د.عبد المنعم سعيد: شاكرين جدا بوجودك معانا النهاردة
معالى الوزير اللواء أبو بكر الجندى : متشكر يا فندم
د.عبد المنعم سعيد:معالى الوزير إيه الفرق في الأول كده في عملية المعلومات من أول كتاب وصف مصر بتاع الحملة الفرنسية لغاية النهارده 2010 ؟
معالى الوزير اللواء أبو بكر الجندى : الحقيقة إن مصر الجانب الإحصائى بيبان قيمة هذه الدولة وإزَّاى هذه الدولة لها جذور ولها قيم كانت متابعة ومازالت متابعة ودا بينعكس في إن إحنا التعداد الأول بالمفهوم الحديث للتعدادات أجرى سنة 1846
د.عبد المنعم سعيد:يعنى لسه في عصر محمد على كان محمد على لسه موجود ؟
معالى الوزير اللواء أبو بكر الجندى : وموجود النتائج بتاعته في الوثائق الرسمية
د.عبد المنعم سعيد:1846 ؟
معالى الوزير اللواء أبو بكر الجندى : دا أو تعداد لكن التعداد اللى نقدر نقول بنأرخ به إحنا تعداد 1882 كان أيامها الإنجليز موجودين وهذا التعداد ما كانش فيه جهاز في مصر مسؤول عنه لكن كان لما ييجوا يعملوا التعداد يعملوا حاجه زى تاسك فور كده أو يعملوا مجموعة عمل عشان تجرى التعداد وبعدين تنفض لكن إبتدت يبقى يكون عندنا كيان إحصائى
د.عبد المنعم سعيد:يعنى في كتاب وصف مصر ما تمش عمل تعداد لسكان مصر ؟ الكتاب اللى هو وصف مصر .
معالى الوزير اللواء أبو بكر الجندى : أيام الحملة الفرنسية؟
د.عبد المنعم سعيد: أيام الحملة الفرنسية ما كانش فيه تعداد ؟
معالى الوزير اللواء أبو بكر الجندى : ما كانش فيه كان فيه تقديرات لكن لم يجري تعداد بمعنى تعداد شامل حصر شامل لكل الجمهورية لمصر في هذا التوقيت
د.عبد المنعم سعيد:كانت ولاية عثمانية ؟
معالى الوزير اللواء أبو بكر الجندى : آه لكن التعداد اللى هو تؤرخ به 1882 .
د.عبد المنعم سعيد:1882 ومن ساعتها بقي
معالى الوزير اللواء أبو بكر الجندى : دا زى ما قلت لحضرتك " task form" أو مجموعة عمل بتعمله لكن أو كيان إحصائى شُكِّل سنة 1914 لما إبتدى يبقى فيه كيان إحصائى له مكانه وله موظفينه وتنهم بقه موجودين يعملوا التعداد .
د.عبد المنعم سعيد:كان إسمه التعبئة والإحصاء برضه ؟
معالى الوزير اللواء أبو بكر الجندى : كان مصلحة الإحصاء
د.عبد المنعم سعيد: مصلحة الإحصاء
معالى الوزير اللواء أبو بكر الجندى : وإبتدينا نأخذ الإسم الجديد بتاعه سنة 1964 بس لما جابوا مصلحة الإحصاء وأضافوها على التعبئة وصدر قانون إنشاء الجهاز في سنة 64 مش معناه إن إحنا الإحصاء إبتدت 64 لأ إحنا مبتدين من القرن قبل الماضى وهذا هو عراقة مصر إحنا عندنا دول إحنا أجرينا لغاية دلوقت التعداد ال13 في سنة 2006 في دول كثيرة في أفريقيا لم تجرى التعداد الأول حتى الآن فهنا فرق مصر
د.عبد المنعم سعيد: بعض الدول العربية خائفة إنها تعمل تعداد يعنى العراق لا يوجد فيها تعداد رسمى لبنان لا يوجد فيها تعداد
معالى الوزير اللواء أبو بكر الجندى : لأ .. في الحقيقة العراق بعد كام شهر من دلوقت هيعملوا تعداد وهم كانوا بيجروا تعدادات قبل كده وعندهم نتائج موجوده قبل كده كما كانت في النظام السابق يعنى وكانوا ماشى بالدورية 10 سنين وهكذا
د.عبد المنعم سعيد: بس كانت معتمدة أظن على تعداد تم قبل ثورة 58 وبعدين بيضيفوا له – ما أعرفش حضرتك تعرف أكثر
معالى الوزير اللواء أبو بكر الجندى : لأ يا فندم بيجروا تعدادات كان بنفس المفاهيم بتاعة التعداد هنا عندهم جهاز محترم في العراق جهاز الإحصاء المركزى في العراق وإحنا كان لنا شرف إن إحنا دربنا الإخوة العراقيين على تجربتنا في تعداد 2006 في إستخدام تكنولوجيا المعلومات في إجراء التعداد وهم يعنى عملنا لهم حوالى 24 دورة دربنا لهم حوالى أكثر من 400 واحد علشان يجروا التعداد – نرجع لسؤال حضرتك الأساسى مصر وقيمة التعداد ومنهجية التعداد والإحصاء – عندنا منتجات إحصائية بتغطى القرن اللى فات بالكامل في جميع فتراته في جميع النواحى الإجتماعية والنواحى الإقتصادية هذه هى قيمة هذه الدولة في وسط المنطقة اللى إحنا موجودين فيها .
د.عبد المنعم سعيد:يعنى جزء من الدولة إنها تعرف عن نفسها أكثر كميه ممكنة .
معالى الوزير اللواء أبو بكر الجندى : طول عمل الدولة ديه كانت عارفة عن نفسها حاجة
د.عبد المنعم سعيد: عندنا طبعا المسألة مش تعداد بس إنتوا بتبقوا عارفين حاجات تانية عن المصانع عن المحلات التجارية يعنى فيه أشكال آخرى من المعلومات بعضها بيتم ملتصقا بالتعداد وبعضها منفصل ؟
معالى الوزير اللواء أبو بكر الجندى : تماما يا دكتور ة
د.عبد المنعم سعيد: أنا بس بأقول الكلام ده لإنه كل ما حد يتكلم يقول لك أصل ما فيش معلومات أصل البلد ما حدش بيقول لنا إحنا جايبين الحاجات ديه منين ؟
معالى الوزير اللواء أبو بكر الجندى : إنت هتفاجأ حضرتك دلوقت إن أولا البيانات اللى بنجمعها عشان برضه فيه كثير من السادة المشاهدين بيشوفونا دلوقت بيفتكروا إحنا لما بنعمل تعداد عشان نجيب عدد المواطنين ديه معلومة إحنا ممكن نعملها من غير التعديد لإنه عندنا تعداد سابق وعندنا إحصائية مواليد ووفيات دقيقة خلاص ما بنحتجش لكن إحنا بنعمل التعداد ليه عشان خصائص السكان اللى لا يمكن تيجى من أى دفتر موجود في أى وزارة ما نقدرش نجيبه غير لما نروح للأسرة ونسألهم على خصائص السكان
د.عبد المنعم سعيد: مين فيهم إتعلم مين دخل الجامعة
معالى الوزير اللواء أبو بكر الجندى : دا بنسألهم عن حالتهم العملية مين فيهم إشتغل ومين ما إشتغلش وإذا كان بيشتغل بيشتغل مهنته إيه؟ وبيشتغل في أى قطاع؟ عام والا خاص وفى أنهى حاجة في القطاع الخاص؟ نشاط تعدين ولا نشاط منسوجات ولا نشاط غذائى ولا نشاط إيه؟ خريطة كاملة حالته العملية حالته الزواجية حالته الصحية سليم ولا معاق وإذا كان معاق أيه سبب إعاقته 26 خاصية يا دكتور يجمعها عامل إنسان أو أفراد الأسرة- البشر- ثم نجمع أيضا عن ظروفهم السكنية عايشين فين شكل المكان اللى هم بيقيموا فيه اللى هم قاعدين فيه هل هى شقة ولا هى فيلا ولا جزء من حجرة وهكذا – المسكن دا شكله إيه متصل بمرافق والا من أى نوع من المرافق وغير متصل بأى نوع من المرافق - المرافق الداخلية اللى جواه إيه ؟
د.عبد المنعم سعيد: فيه حمام ما فيش حمام – مطبخ
معالى الوزير اللواء أبو بكر الجندى : يعنى معلومات قد الناس تستغرب يقول معقولة إنتوا بتسألوا – آه فيه بعض الناس بيسكنوا الحمام بتاعهم مشترك ودا لما ترجع لبيانات التعداد تلاقى هم دول قد إيه وساكنين فين وعلى أقل مستوى إدارى
د.عبد المنعم سعيد: معالى الوزير دي مهمة النقاش السياسى العام في مصر كيف يحصل الناس على المعلومات ؟ أنا بأتكلم على الناس اللى هى محتاجة هذه المعلومات
معالى الوزير اللواء أبو بكر الجندى : هتفاجأ يا د.عبد المنعم إن إحنا لا يوجد عندنا في الجهاز سر يعنى ما فيش عندنا معلومة نجمعها ونديها لبعض الناس أو ما نديهاش لحد ما فيش عندنا الكلام ده – المعلومة إحنا بنجمع البيانات بهدف واحد فقط هو نشرها لكن الفرق بين اللى حضرتك بتقوله واللى أنا بأقوله الوعى الإحصائى للأسف أنا بألاقى بعض السادة الأكاديميين اللى بأروح ساعات في الجامعات في اللقاءات ألاقى أحد السادة الدكاترة بيعمل بحث وبيعمل دراسة وبيقول لى أنا عايز إن أنا أجيلك عشان أجيب كذا رغم إن هو لو بعت أى حد لو أى مواطن جي الجهاز إحنا عندنا مكان مخصص عشان نلبى حاجة المواطنين منه إسمه مركز المعلومات القومى دا له مدخل غير مدخل الجهاز يدخل ويتعامل مع اللى موجودين فيه وهم ناس على أعلى مستوى من الكفاءة فيه إن هم عارفين إيه منتجات الجهاز
د.عبد المنعم سعيد: هل معالى الوزير بتحطوا المعلومات الأساسي على النت إن ممكن الواحد يدخل ؟
معالى الوزير اللواء أبو بكر الجندى : عندنا نوعين على شبكة المعلومات الدولي نوعين من المعلومات – المعلومات البسيطة أو المعلومات بتغطى كافة المناحى العامة للجهاز وغير متعمقة بمعنى لو إحنا مثلا بيانات التعداد 2006 موجودة على موقع الجهاز بس على مستوى المحافظة يعنى إنت عايز تعرف مين في المتعلمين معاهم مثلا مؤهلات عليا في محافظة كذا هتلاقى إجمالى المحافظة لكن عايز تعرف في مركز من المراكز ما تقدرش من على الموقع
د.عبد المنعم سعيد: لازم ييجى عندكوا بقه ؟
معالى الوزير اللواء أبو بكر الجندى : لازم فيه عندنا حاجة تانية مستوى بقي أعمق شوية وأشمل اللى عليه كل قواعد البيانات بتاعتنا إسمها شبكة مصر إنترنت دي بإشتراك للمشتركين ودي مش بدعة لأ معظم أجهزة الإحصاء بتعمل كده
د.عبد المنعم سعيد: لازم تعمل شوية فلوس عشان تقدر تصرف على جمع المعلومات
معالى الوزير اللواء أبو بكر الجندى : والله إحنا حتى الموارد اللى بتيجى لنا من هذه الموارد للجهاز بتروح لوزارة المالية مباشرة يعنى الجهاز لا يستفيد من هذا الكلام كجهاز يعنى ما لناش مصلحة في إن إحنا البيانات ديه بنعملها بثمن تكلفتها أو الثمن إن إنت تشترك في هذه الشبكة – الشبكة ديه لها مشتركين كتير جدا في مصر ومن القطاع الخاص بالدرجة الأولى كل السفارات اللى موجودة في مصر بتشترك في هذه إشتراكها في السنة 1300 جنيه وللأكاديميين في كل الجامعات الأشخاص يعنى الأكاديمى عشان يقدر يعمل دراسة أو حاجة يقدر يشترك بنص الكلام – كل الأجهزة الحكومية مجانا إذاً يقدر يشترك ويأخذ باس وورد ويخش على جميع قواعد بيانات الجهاز كنا بنتكلم على التعداد وإنك لو عايز معلومة هتأخذها على مستوى المحافظة هنا تقدر تخش وتأخذ على مستوى القسم أو المركز . كل بيانات التعداد موجودة على مستوى القسم والمركز وعندنا حاجة أعمق من كده أكثر على مستوى القرية أو التابع والشياخة بس دي بقى لإنها حجم كثير جدا من البيانات ما فيش أى حاجة تقدر تستوعبها فدي بقي مش ممكن واحد بيكون عايز كل القرى بتاعة مصر هو بيعمل دراسة في حتة معينة وعايز ييجى يطلب مننا وإحنا ندى له اللى على .. لإن ميزة التعداد إنه بيبتدى من أقل مستوى إدارى أنا هنا أقدر أجيب لك بيانات تفصيلية بال26 خاصية اللى قلنا عليهم للإنسان حوالى 15خاصية لمسكنه أيضا دا للسكان وللظروف السكنية عندنا للمنشآت – المنشآت العاملة في مصر
د.عبد المنعم سعيد: الخاصة؟ العامة؟
معالى الوزير اللواء أبو بكر الجندى : أى مكان يدار فيه نشاط
د.عبد المنعم سعيد: فيه أحد أصدقائى دائما يقول لك إحنا مش عندنا معلومات عن الخصخصة وإيه اللى تم خصخصته والحاجات اللى زى كده ؟ هل ممكن نعلن للناس الموقع بتاعنا ؟
معالى الوزير اللواء أبو بكر الجندى : الموقع بتاع الجهاز واضح أمام حضرتك . http://www.capmas.gov.eg/
د.عبد المنعم سعيد: دا فيه شيء عن كل شيء في الجهاز اللى عايز أعمق شوية يشترك في الشبكة أو ييجى الجهاز يطلب أو يبلغنا على هذا الموقع إن أنا عايز المعلومة الفلانية وإن شاء الله نتواصل معاه ونبعت له الحاجة اللى هو عايزها
د.عبد المنعم سعيد: معالى الوزير لإن عندنا فاصل بعد قليل عايز أسأل حضرتك هل إنت راضى على مستوى النقاش موجود في المجتمع من حيث إستخدامه للأرقام أو إستخدامه لما تتيحه أنت من معلومات يعنى فيه نقاش كتير عن الفقر عن البطالة عن – عن – عن كلها يقول لك رقم 1 – 42 هنييجى ليها 42% من المواطنين تحت دولار كلام زى كده هل إنت حاسس ؟
معالى الوزير اللواء أبو بكر الجندى : أنا إطلاقا غير راضى تماما وإن كنت هأبقى مش راضى على فئات كثيرة من الشعب ممكن ما يبقول متعلمين أو متعلمين مش تعليم لكن للأسف الشديد إن فيه من المتعلمين ومنهم متعلمين تعليم الوعى الإحصاء مش موجود وجزء من المشاكل بيسببها الإعلاميين غير متخصصين – يبقى غير متخصص يتكلم فيما لا يدرى أو هو المفروض قبل ما يتكلم يبحث في الموضوع اللى بيبحثه كويس
د.عبد المنعم سعيد: ما بيعملش الهوم وورك بتاعه
معالى الوزير اللواء أبو بكر الجندى : فبيعمل لنا تأثير سلبي أو تأثير مضاد عكسى يعنى قريب جدا أحد الجرائد المحترمة صفحة أولى كاتبة إن الجهاز بيجيب بيانات البطالة من الشركات أو بنروح على القهاوى ونشوف مين اللى قاعدين على القهاوى ما بيشتغلوش ناخد الإحصاءات ديه تبقى هى ديه بيانات البطالة وفى صفحة أولى من جرنال وطبعا إحنا ردينا والجرنال مشكورا قام بتصحيح هذا الكلام الحقيقة ونشره بعد كده – طيب الصحفى اللى عمل كده طيب ما تيجى دا إنت لو دخلت على الموقع البسيط ده هتلاقى إحصاءات البطالة وهتلاقى بنسميها الميكا ديتا أو منهجيتنا في إنتاج – دا موجود من غير ..
د.عبد المنعم سعيد: ما هو دائما يقول لك السؤال وماحناش عارفين جايبين المادة دي منين
معالى الوزير اللواء أبو بكر الجندى : ما فيش بيان يا دكتور بتصدره أو نشرة نصدرها أى منتج من الجهاز إن 4- 5 ورقات فيه المنهجية إحنا رحنا إمتي رحنا لمين جبنا البيان دا إزَّاى . للأسف الناس تتغاضى عن كل هذا وتبتدى تنعش نعوش كثيرا جدا وتبتدى تتكلم وإن اللى بيزعلنى المتخصصين وكثير ما يلصق فينا بيانات لا ننتجها إطلاقا .
د.عبد المنعم سعيد: عمرك ما قلتها .. معالى الوزير آسف هأقاطعك وسوف نخرج الى فاصل قصير ثم نرجع نتكلم في المعلومات نفسها نلتقى بعد فاصل قصير .
د.عبد المنعم سعيد: وصف مصر بالأرقام وضيفنا فى هذه الحلقة سعادة اللواء أبو بكر الجندى رئيس الجهاز المركزى للتعبئة والإحصاء معالى الوزير أنت ملتصق تقريبا بأكبر كتله من المعلومات عن مصر ولديك الآليات التى تتعامل بها مع المعلومات تقدر تقول لنا إيه أهم ملامح تغير الجاليه فى مصر دعنا زى ما بيقولوا فى الأمريكان الأخبار السيئة عشان الناس ماتقلش إن إحنا دائما بنقول الأخبار – نقول الأخبار السيئه ثم بعد ذلك الأخبار الجيده ؟
معالى الوزير اللواء أبو بكر الجندى: الله يا دكتور اللى أنا شايفه إن إحنا عندنا معدلات التضخم اللى عندنا فى مصر يعنى هى بالنسبة لدول فى حالة مصر هى تعتبر مرتفعة شويه الظاهرة ديه سببها رغم إن إحنا فى تحسن يعنى إحنا معدلات التضخم عندنا بعد ما وصلت نقطة عاليه جدا فى أغسطس 2008 عدة ال 20% الى إن إحنا وصلنا دلوقت 9،9بس ال9'9 فى حد ذاتها مازالت مرتفعه إحنا الظاهرة ديه سببها إن عندنا سلع وخدمات بترتفع أسعارها مع إرتفاعات يعنى لما وصلنا فوق ال20% .
د.عبد المنعم سعيد: كان بسبب الزياده فى الخارج .
معالى الوزير اللواء أبو بكر الجندى: تضخم مستورد نتيجه زيادة معظم المواد الغذائيه اللى إحنا مستوردين جزء كبير منها سواء حبوب أو منتجات ألبان .
د.عبد المنعم سعيد: فلما نزلت نزلنا معاها .
معالى الوزير اللواء أبو بكر الجندى: فلما نزلت معدل التضخم بيبتدى يتراجع وكمان بإجراءات كثيره قامت بها الدولة والحكومه الحقيقة .
د.عبد المنعم سعيد: لكن لسه إنت معتبر التضخم .
معالى الوزير اللواء أبو بكر الجندى: 9,9 دا يعتبر برضه معدل بالنسبة للدول اللى فى منطقتنا يعتبر نسبيا مرتفع .
د.عبد المنعم سعيد: دا أول خبر سيئ التضخم .
معالى الوزير اللواء أبو بكر الجندى: التضخم ولكن كويس إحنا كل شهر بنتراجع ولما نقول نتراجع فى التضخم مش معنى كده إن الأسعار بتقل لإن الساده المواطنين اللى بيسمعونا يفتكروا إن أنا بأقول معدل التضخم بيتراجع يعنى الأسعار بتقل لأ بدل ما كنا بنزيد ب20% إحنا دلوقت بنزيد برضه الأسعار بتزيد بس ب 9,9 سنوى دا المعدل السنوى لمعدلات .
د.عبد المنعم سعيد: يعنى السلعة اللى هى بجنيه تبقى بجنيه وتسع قروش .
معالى الوزير اللواء أبو بكر الجندى: بدل ما تبقى جنيه و20 قرش دا فى حد ذاته نتيجة جهود ونتيجة جهود كثيرة إشتركت فيها مؤسسات كثيرة فى الدولة الحقيقة
د.عبد المنعم سعيد: إنما معناها إن الطلب أزيد من العرض ؟
معالى الوزير اللواء أبو بكر الجندى: طبعا .
د.عبد المنعم سعيد: ودار راجع لأسباب كثيرة دا أول خبر إن التضخم لا يزال مرتفعا .
معالى الوزير اللواء أبو بكر الجندى: الحاجه التانيه اللى عندنا إحنا بنأمل إنها تبقى أحسن من كده معدلات البطاله – معدلات البطاله إحنا عندنا 9,12 الربع الأول من سنة 2010 9,12 لما نقول 9,12 يعنى من قوة العمل عشان فيه كثير جدا حتى من المتخصصين يفتكروا إن هى من السكان ويضربوا بقه إحنا عندنا النهارده فى الداخل يقول لك إحنا عندنا 8 مليون متعطل و12 مليون متعطل .
د.عبد المنعم سعيد: قوة العمل حضرتك كام ؟
معالى الوزير اللواء أبو بكر الجندى: قوة العمل عندنا دلوقت حوالى أقل بسيط من 26 مليون دول بشكلوا حوالى 33 % من السكان لإن عندنا قوة العمل ديه من 15 الى 64 سنه وفيه فئات جواها كتيره جدا بره قوة العمل زى 21 مليون تلميذ وطالب دول كلهم جوه الفئه السنية ديه لكنهم خارج قوة العمل وإحنا بنحصى هذه الإحصائية كل ربع سنه بننشر نتائجها .
د.عبد المنعم سعيد: يعنى إحنا عندنا عدد البطاله حوالى 2 مليون ونصف ؟
معالى الوزير اللواء أبو بكر الجندى: 2مليون وواحد من عشر إثنين من عشره وثلاثه من عشره حسب الربع اللى بنتكلم فيه آخر ربع كان 2 مليون و 2، هم دول المتعطلين وللأسف الشديد هم أكثر يعنى حوالى 47 % من دول ال 2,2 مليون من المؤهلات المتوسطة – الناس اللى مش متعلمين 2 % فقط من المتعطلين لكن المؤهلات المتوسطه حوالى 47 % من المتعطلين عشان فيه ناس بتاخد الكلام وتقول 47% من الشباب متعطلين لأ إحنا بنقول 47% من المتعطلين .
د.عبد المنعم سعيد: إنت حضرتك بتكرر كتير الناس ما تقلش معنى كده إن فيه عندنا مشكلة فى الصياغ ؟ فيه فهم للأرقام .
معالى الوزير اللواء أبو بكر الجندى: طبعا ويطلع مانشيتات وهى كلها عاريه عن الصحة وعاريه عن الحقيقة .
د.عبد المنعم سعيد: أنا بنتكلم على 2،3 أو 2,2 منهم 2% بس غير متعلمين .
معالى الوزير اللواء أبو بكر الجندى: 47% من المؤهلات المتوسطة – 21 % فقط من المؤهلات العليا هم دول المتعطلين اللي عندنا فى مصر فإحنا نسبة البطاله وإن كانت 9% برضه إحنا مش دا اللى نحبه لمصر وبرضه من أهم الأسباب الزياده السكانية وإحنا لما كنا بنيجى ننمى وكنا بنحقق معدلات نمو أكثر من 7% أكثر من 3 سنين قبل الأزمة الماليه ما إحنا واجهناها فى سنة 2008 – 2009 فى الحقيقة المعدلات ديه كانت أقل من كده فى أثناء النمو اللى كان بينمو لما جاءت الأزمة إحنا أقصى رغم وصلنا له 9,46 % دا كان فى الربع الثانى والثالث من سنة 2009 طبعا دول كتيره إتأثر بأكثر من النسبه ديه ودول عرفة البطاله ما كنتش تعرفها قبل كده أبدا أو كانت لما الدوله بتقول عندنا 5 % تقريبا ما عندهاش
د.عبد المنعم سعيد: فإحنا عندنا نسبة بطاله لاتزال يعنى 2 مليون وشويه دا قد شعب دوله .
بكر :بس دول من أكثر من 78 مليون .
د.عبد المنعم سعيد: الخبر الثالث اللى هو حضرتك مش مستريح له
معالى الوزير اللواء أبو بكر الجندى: الحقيقة المرأة ومشاركتها فى المجتمع وخاصة فى النواحى السياسية إن إحنا نسبة التمثيل فى المجلسين عندنا نسبه كانت لغاية المجلسين اللى إنتهو كانت نسبه محدوده للغايه يمكن التعديل التشريعى اللى حصل وماسيحدث فى الإنتخابات اللى جايه إن شاء الله وزيادة ال 64 دائره اللى هيخشوا يعدلو هذه النسبة شويه لكن المشاركة بتاعة المرأة عندنا إحنا بنرصد الموضوع بتاع مشاركة المرأة فى كافة المجالات عندنا فى الجهاز فى كل نشراتنا يعنى كل النشرات بيبقى الذكر والأنثى فيها يبقى محطوط تحت المراقبة .
د.عبد المنعم سعيد: يعنى المجالس المحليه مجالس المحافظات النقابات
معالى الوزير اللواء أبو بكر الجندى: المشاركه فى كل دا بالنسبة للمرأة كانت محدوده جدا أما فى العمل هم نسب مش وحشه يعنى بص حضرتك السيدات فى الجهاز الإدارى فى الدوله أو وظائف الإداره العليا نسب ما هياش بنفس نسب المنخفضه جدا بتاعة المشاركة السياسية فإن شاء الله باللى جاى دا وفى الفتره اللي جايه نلاقي أى مشاركة أكثر
د.عبد المنعم سعيد: إيه الأخبار الحسنه .. عايزين 3 أخبار حسنه أو ترى إنها تطورات إيجابية تجرى فى المجتمع المصرى وتشير لها الأرقام ؟
معالى الوزير اللواء أبو بكر الجندى: أولا النواحى الصحية إحنا عندنا تحسن مستمر فيها يكفى إن أنا أقول لحضرتك النهارده
د.عبد المنعم سعيد: رغم الناس بتتكلم عن إلتهاب الكبد الوبائى
معالى الوزير اللواء أبو بكر الجندى: الأرقام بتقول غير كده خالص الأرقام والرصد بيقولوا غير كده لما إحنا نقول متوسط السن المتوقع عند الميلاد الذكر النهارده 70 ،2 سنه متوسط عمر الإنسان فى مصر الذكر 70,2سنه والسيدات 47,4يبقي إحنا من 10 سنين كنا غير كده تماما ومن 20 سنه كنا غير كده إطلاقا فده نتيجة مؤشرين مؤشر الرعاية الصحية والوعى اللى عند المواطن وتوفر الخدمات الصحية وأيضا تحسن مستوى معيشى لإن دا وعى ومستوى معيشه إرتفع .
د.عبد المنعم سعيد: يبقي معناه إن عمر الإنسان المصري زاد 15 سنه من سنة 80 مثلا .
معالى الوزير اللواء أبو بكر الجندى: من 20 سنه دا تغير جذرى فى مجتمعنا الحقيقه وزى ما قلت دا مؤشر جيد جدا لتوفر الخدمة الصحية الوعى اللى عند المواطن وأيضا مستوى المعيشه دا مؤشر كويس نحب نتكلم عنه برضه المؤشرات الصحية بتاعة وفيات الأمهات عند الولاده وأيضا وفيات الأطفال الرضع سواء أقل من سنه أو أقل من 5 سنين برضه محققين فيها معدلات تقدم مبهره برضه دا نتيجة إن الخدمات الصحية بقة متوفره فى أماكن كثيرة جدا .
د.عبد المنعم سعيد: دا الخبر الأول اللي هو متعلق بمستويات الصحة العام .
معالى الوزير اللواء أبو بكر الجندى: تمام الخبر الجميل الثانى برضه نسبة الألتحاق للتعليم – نسبة الألتحاق بالمرحلة الأساسيه – نسبة الألتحاق عندنا النهارده عدة 96% من اللي هم مفروض فى سن المدارس الإلزاميه 96 وأكثر % بقوا النهارده بيبقوا فى المدارس .
د.عبد المنعم سعيد: إحنا كنا لغاية الثمانينات بتبقى كذا و70%
معالى الوزير اللواء أبو بكر الجندى: وخاصة فى الإناث زي الذكور تقريبا بنسبة الإلتحاق إحنا كان عندنا جات من الذكور والإناث ونسبه منخفضه عن كده جدا فده مؤشر جيد جدا بس المهم إن إحنا نسيطر على التسرب من التعليم يعنى الأسر الفقيره
د.عبد المنعم سعيد: هى الأسر بتودى المفروض إن هم ما تستحبهمش بعد كده
معالى الوزير اللواء أبو بكر الجندى: ما تستحبهمش ليه بقه لما بيكبروا شويه والأسره تكون فقيره بتحتاجهم يا إما بتبعتهم للعمل ويتسربوا من التعليم ودا اللي بيواجهه قانون الطفل النهارده وبتواجهه جهود وزارة الأسره والسكان وبتواجهه كل المجتمع والمحليات عشان نحافظ وزارة التضامن لها جهود أيضا في الكلام ده عشان تشجع الأسر بالدعم اللى بتديهولها أولادها اللى بيستمروا فى المدارس والقانون بيجرم الولاد اللى بيشتغلوا
د.عبد المنعم سعيد: معالى الوزير هنقف عن ديه وقفه وأنا عندى أسئله زياده فى هذه النقطه بس نطلع فاصل ونرجع تانى للنقطه ديه نلتقى بعد الفاصل قصير
فاصل إعلانى القراءه للجميع
د.عبد المنعم سعيد: وصف مصر بالأرقام ومعنا سعادة اللواء أبو بكر الجندى رئيس الجهاز المركزى للتعبئه والإحصاء .. معالى الوزير كنا نتحدث عن التعليم اللي موجود في مصر سن نسبة الإلتحاق زادت عن 96% كنت تخاف أو تخشى من ظاهرة التسرب وقلت كمان إن دا بقى فيه مساواه بين .. هل دا يحدث على الصعيد كما يحدث على الوجه البحرى أو القاهره ؟ يعنى دائما كان عندنا مشكلة بالنسبة لصعيد مصر ؟
معالى الوزير اللواء أبو بكر الجندى: لا شك إن فى صعيد مصر أقل دائما فى المؤشرات ديه يعنى هم الأقل دائما نتتيجة إن الخدمات قبل كده ما كنش بتوصل لهم بالشكل اللى فيه عدل أو فيه عدالة توزيع لهذه الخدمات لكن لما بنقول 96 معظمهم هتلاقى ال 4% دول جايين من الجنوب
د.عبد المنعم سعيد: لكن هل فيه إرتفاع في الجنوب ؟
معالى الوزير اللواء أبو بكر الجندى: طبعا مؤكد .. مؤكد طبعا ما إحنا وصلنا 96 إزَّاى مش هنوصل ل96 ببحرى بس إحنا بنتكلم على إجمالى الجمهورية فكل المؤشرات اللى جايه من الجنوب أو جايه من الصعيد سواء فى الإستثمار سواء فى الخدمات سواء فى الخدمات وخاصةً الخدمات الهامة زى الطرق النهارده الصعيد ما كنش فيه محافظه فى الصعيد فيه حاجه إسمها منطقة صناعية النهاده كل محافظات الصعيد تقريبا فيها مناطق صناعية ومناطق صناعية يقولوا منطقة صناعيه رقم 1 – منطقه صنلااعية رقم 2 وتشجيع الإستثمار وسياسة الدوله لتشجيع الإستثما ر فى هذه المناطق علشان هى ديه اللي كانت عملي لنا كثير من العشوائيات فى المدن الكبرى – موضوع العشوائيات ديه موضوع إقتصادى بحت الناس كانوا فى الصعيد أولا هم أكثر ناس منتجين للمواليد لإن هم أكثر فقرا ليس صدفه إن المجتمعات الفقيرة هى اللى بتنتج مواليد أكثر فهم عندهم مواليد أكثر وعايزين يشتغلوا ومش لاقيين فى المحيط المحلى فرص عمل .
د.عبد المنعم سعيد: فبيحصل هجره
معالى الوزير اللواء أبو بكر الجندى: يبتدى يروح فى مدن الكبرى اللى يعتقدوا إن فيها فرص العمل وفعلا إبتدوا يشتغلوا أشغال بسيطه ما عندوش إمكانيه إنه هو يروح يسكن فيعمل إيه بيروح يبتدوا يكونوا العشوائيات ويعملوا المشاكل اللي هىي ديه .. الدوله النهارده حريصه جدا على إنها بتعمل هذه الإستثمارات وفيه يا دكتور عبد المنعم حاجه مهمه جدا جايه خلال الفترات القريبه القادمة فيه إتجاه للإهتمام بالمشروعات الصغيره والمتوسطه .
د.عبد المنعم سعيد: نيجى ديه بعد شويه الخبر الجيد الثالث لإن إحنا قلنا ثلاث أخبار سيئه وثلاث أخبار
معالى الوزير اللواء أبو بكر الجندى: الجيد الثالث كنا لسه بنتكلم عليه من شويه الإستثمارات والمصانع اللى موجوده واللى منتشره واللى بتنعكس إحنا بنعمل الحسابات القومية – الحسابات القوميه ديه كل الإنتاج بنرصد وبنمد وزارة التنمية الإقتصاديه بكل المؤشرات وكل البيانات اللى تعمل منها الحسابات القوميه وبيطلع منها الناتج القومى إحنا اللى بنعمل معظم هذه النشرات أو هذه البيانات اللى بنوفرها للوزارة إحنا عندنا الناتج القومى
د.عبد المنعم سعيد: الإستثمارات ديه عايز أسأل حاجتين التوزيع الإقليمى بتاعها والتوزيع بتاعها خاص وعام .. التوزيع الإقليمى هل فيه محافظات أكثر إنطلاقا أكثر نشاطا من غيرها طبعا شمال مصر برضه وجنوبها والسؤال اللى هو الثانى إيه اللى فيها قطاع عام وإيه اللى فيها قطاع خاص
معالى الوزير اللواء أبو بكر الجندى : القطاع الخاص لا شك بيشارك مشاركة إيجابيه جدا وزى ما حضرتك تبقى عارف حوالى 70% من هذا الإنتاج جاى من القطاع الخاص فعلا هو بيشارك بجهد كبير جدا فى إستثمار هذه التنمية
د.عبد المنعم سعيد: الإستثمارات ديه بعضها إستثمارات صناعية عقاريه ؟
معالى الوزير اللواء أبو بكر الجندى : إحنا بنقول حسابات قومية يعنى كافة مناحى الإنتاج يادكتور يعنى فى الجانب الصناعى الجانب الزراعى جانب النقل والمواصلات فى جميع جوانب الإنتاج اللى إحنا بندى حوالى 24 إحصائية تغطى كل ما هو إنتاج فى مصر وتستكلم وزارة التنمية الإقتصاديه باقى البيانات وأيضا الجهه الإنفاق الإستهلاكى للأسرة لإن دا شيئ مهم جدا بيطلع من بحث الدخل والإنفاق اللى إحنا بنجريه وتستكمل به وزارة التنمية الإقتصادية هذه البلد مؤكد إن فيه مناطق إنتاجها أكثر من مناطق أخرى المناطق الحضرية نمره واحد – نمره واحد على الإطلاق والمناطق الحضرية بنقصد بها القاهره إسكندريه بورسعيد والسويس هم دول الأربع محافظات الحضرية اللى ما فيهمش ريف وهم دول وبالدرجه الأولى القاهرة نمره واحد على الإطلاق
د.عبد المنعم سعيد:حتى أكثر من بورسعيد لإن تقرير التنمية البشرية المصرى بيحط دائما بورسعيد أكثر تقدما من القاهره من ناحية التنمية البشرية
معالى الوزير اللواء أبو بكر الجندى : لإن هم عدد محدود أى مشروع عندهم بيبقى له مردود سريع وواضح وملموس القاهرة كبيرة نعم فيها كثير جدا من عناصر الإنتاج اللى بتشارك
د.عبد المنعم سعيد:عدد السكان كبير
معالى الوزير اللواء أبو بكر الجندى : عدد السكان كبير والمؤشرات كثيره جدا اللى بيطلع منها مؤشرات التنمية البشرية لازم نعرفها كلها نبص نلاقى عشان الأميين فى القاهره طبعا هيبقوا أكثر مؤكد بمراحل من بورسعيد لإن عددهم كبير دا بيأخر المؤشر كتير فزى ما كنت حضرتك بتسأل لى الإنتاج ديه مش زى بعضها دا اللى الدوله بتحاول دلوقت بالمشروعات البنيه التحتيه اللى بتتنفذ فى الصعيد وأيضا بالموضوع بتاع المشروعات الصغيرة والمتوسطة اللى بقه مش هيبقى محتاج إن إنت كمستثمر كبير عايز تحط مصنعك جنب وسائل الإنتاج بتاعتك أو جنب الطرق والمواصلات جنب هتصدر منين أو كده لأ ديه مشروعات صغيره ومتوسطه فى أى قرية تنفذ فى أى مدينة تنفذ هييجى منها تنمية حقيقية ودا إهتمام إحنا بنشارك به مع البنك المركزى الحقيقه فى رصد كافة المشاة الصغيرة والمتوسطة مشكور البنك المركزى بيعمل هذه الإحصائية معانا أو هذا الرصد معانا عملنا خلصنا محافظة الشرقيه( كبيلبروجيت) ووديناها للبنك البنك بيهدف إنه يأخذ قاعدة البيانات ديه ويديها لكل البنوك التجارية سيديها للصندوق الإجتماعى عشان يبتدوا هم يروحوا المشروعات الناجحه ديه ويبتدوا يعرضوا عليهم القروض ويقرضوهم عشان اللى بيشتغل ب10 يشتغل ب20
د.عبد المنعم سعيد:معالى الوزير أنا لاحظت كان دائما ما يتقال مصر فيها تغيرات إيجابية يتقال دا فيها 56 تليفون محمول إنت ما ذكرتش دا من ضمن الإيجابيات هل دا لإنه شايفه عنصر إستهلاكى والا إن الرقم مش صحيح
معالى الوزير اللواء أبو بكر الجندى : لأ الرقم عدى ال60 مليون مابايل خط موبايل فى مصر إحنا بنرصد الكلام ده لصالح وزارة الإتصالات وعم عدوا ال60 مليون مواطن بيستخدموا التليفونات وقطاع أيجابى جدا إن قطاع الإتصالات بقى يشارك فى
الناتح القومى بمشالاكة فعَّاله وإيجابيه جدا لا تقارن بمصر من 10 سنوات فديه من المجالات الإيجابيه جدا مشاركة هذا القطاع والقائمين عليه الحقيقه محققين إنجازات ملموسه جدا وأصبح بيشارك فى الناتج القومى مشاركة فعَّاله جدا
د.عبد المنعم سعيد: معالي الوزير قضيه كبيره جدا دائما بتتردد وبتقال بوسطة مشاركين فى الحياة السياسية المصريه حولين موضوع الفقر فى مصر أعتقد إن الجهاز بيتابع هذه الظاهره فسؤالي الأول هو كيف تقيسون موضوع الفقر الأمر الثاني إيه هو حجم الفقر إخيرا لإنه فى أرقام بيقولها البنك الدولى وفيه أرقام بيألفها الناس وبينسبوها للبنك الدولى ؟
معالى الوزير اللواء أبو بكر الجندى : حضرتك هتفاجأ دلوقت إن ما فيش رقم بتنشره منظمة دوليه وأهمها البنك الدولى إلا من واقع بيانات الجهاز
د.عبد المنعم سعيد: يعنى اللى بيقولوه هم إنتوا اللى قايلينه
معالى الوزير اللواء أبو بكر الجندى : ب 01, يعنى الرقم اللى بأنشره هى الذى يتداول ليه لإن ما فيش فى مصر ترمومتر يقيس الفقر غير من عند الجهاز المركزى للتعبئه والإحصاء من واقع بحض الدخل والإنفاق – المسح ده هو الترمومتر الوحيد اللى تقدر تقيس به معدلات الفقر او مستويات المعيشه ومن ضمنها مؤسسات الفقر – الفقر له تعاريف كثيره جدا لكن أبسطهم الفقر المادى للى إحنا بنتكلم عنه هو عدم قدرة الإنسان او الأسره إن ما يكنش عندها قدرة إنفاق عشان تحصل على إحتياجاتها الأساسيه – الإحتياجات الأساسيه بقة هى الموضوع دلوقت ما هى الإحتياجات الأساسيه الإحتياجات الأساسيه ديه هى مراحل فوق بعضها ولذلك تعدت خطوط الفقر تعدد مراحل نظرتنا للإحتياجات الأساسيه وتعارفت إحنا بنأخذ فى مصر هنا لإن مثلا حضرتك تعرف إن البنك الدولى يقول لك الدولار والدولارين – الدولار والدولارين هما مؤشر عشان نقدر نعمل مقارنات دوليه بين الدوله ديه والدوله ديه ولما نقول دولار ودولارين يعنى قيمة القوى الشرائية للدولار مش إحنا الدولار مثلا فى مصر ب5,5جنيه مش أقول 5,5 جنيه يجيبوا إيه لأ هو الدولار فى أمريكا لما بيصرفوه بيشتروا مواد إيه المواد ديه لما نيجى نجيبها هنا فى مصر نشتريها بكام إذا هى دا معنى القوى الشرائية للدولار فى بلده فده مؤشر إحنا لا نعتمد ويقول لك الدولار الواحد هو الفقر المتقع الدولارين هو الفقر فقط المطلق اللى إحنا بنأخذه فى مصر هى الإحتياجات لأساسية عدم قدرة الفرد أو الأسره إنها ما يبقاش عندها إنفاق ينفق لإن الفقر تقيسه بالإنفاق مش تقيسه بالدخل – بالدخل صعب حساب الدخل لكن تعارف الإحصائيين في العالم كل الإحصائيين في العالم تعارفوا إن الإنفاق هو مقياس الفقر .
د.عبد المنعم سعيد:وفقا لذلك النسبه كام فى مصر ؟
معالى الوزير اللواء أبو بكر الجندى : بس هأقول لحضرتك حاجه قبل ما أقول النسبه إن الإحتياجات الأساسيه اللى هى فيه خط فقر غذائى ودا مالناش دعوه به لإن ده اللى هم ما عندهمش القدرة على إن معاهم فلوس يجيبو الغذاء اللى يخليهم عايشين بس بنسميه تكلفة البقاء على قيد الحياه – تخيل حضرتك ديه نسبه معدومه جدا ما نبصش ليها لكن الخط اللى فوق على طول هو الخط الفاصل الأدنى اللى هو بنقول إن الإنسان يبقى عنده قدره على إنه يبقى بالغذاء وبعض الإحتياجات الأخرى اهمها سكن لإن مش ممكن الإنسان هيقعد من غير سكن ولازم يصرف على السكن وأيضا الملابس مش ممكن واحد هيعيش عريان لازم يلبس ولازم يبقى عنده مأوى دول الملتصقين جدا فى باكيدج واحده مع الغذاء بعد كده بتيجى إحتياجات – ما هو عشان يجيب الإنفاق دا اللى هينفقه لازم يشتغل لازم عشان يروح الشغل هيركب مواصلات فديه كلها حاجات بتتحسب أساتذة الإجتماع عملوا معدلات .
د.عبد المنعم سعيد:بحيث إن هو فيه شرائح معينه .
معالى الوزير اللواء أبو بكر الجندى : لكن اللووبابرتى لين دا أو خط الفقر الأدنى دا هو غذاء مسكن ملبس بالدرجه الأولى ثم إحتياجات بسيطه جدا أخرى للإنفاق على المواصلات – الناس دول بنعرفهم إزَّاى إحنا أولا عدد الناس ديه نسبة الناس ديه فى المجتمع طبقا لآخر مسح ما نقدرش نقول الفقر السنه اللى فاتت كام لإن إنت عملت السنه اللى فاتت بحث دخل وإنفاق لو إنت عملت نقدر نقول لك لكن ما عملناش يبقى ما نقدرش نقول غير مرتبطة النسبه ديه دائما بتنفيذ مسح دخل وإنفاق – والمسح دا كنا بنعمله فى مصر كل 5 سنوات دلوقت الحكومه لإنها حريصه على إنها تقيس تغير فى مستوى المعيشه بنعمله كل سنتين وإحنا من الدول البسيطه جدا فى العالم اللى متحمله هذه التكلفه
د.عبد المنعم سعيد: معلهش معالى الوزير لإن بيقولوا لى فاضل لى دقيقه واحده
معالى الوزير اللواء أبو بكر الجندى : الرقم دا أو نسبة الناس ديه من آخر مسح عملناه فى 8/ 9 – 21,56 % من السكان هو دا الخط بتاع بحث 2008 – 2009
د.عبد المنعم سعيد: من 84 مليون ولا من 78 مليار ؟
بكر : إحنا مالناش دعوه باللى فى الخارج اللى مش معانا إحنا ما أحصناهمش إحنا لما رحنا عملنا البحث وعملنا المسح رحنا للى فى الداخل بس للى هم ساعة ما عملنا هذا المسح السكان كانوا لا يزيدو عن مليون فى هذا التوقيف
د.عبد المنعم سعيد:هل عندكوا عن الفقر وعندوا أيضا عن الغنى – السلم الإجتماعى قد إيه ؟
معالى الوزير اللواء أبو بكر الجندى : المسح بقه يقول لحضرتك تماما إحنا عندنا الأسر اللى إحنا بنروحها البحث اللي فات كانوا 48 ألف أسره فال48 ألف أسره اللى إحنا رحناهم بعد ما خلصنا بنرتبهم من نمره واحد لغايه نمره 48 الف .
د.عبد المنعم سعيد:لأ إحنا عندنا تعريف للفقر حضرتك حددته هل عندنا تعريف للغنى ؟
معالى الوزير اللواء أبو بكر الجندى : لأ ما عندناش للغنى لكن إحنا نقدر نقول لك فى العينه مين اللى إنفاقهم العشر الأول فى المجتمع كام أسره ونسبتهم كام للباقيين ونسبة الأخرنيين من الأولنيين قد إيه ودول كلهم طالعين فى نتائج المسح ومعلن هذا الكلام
د.عبد المنعم سعيد: طيب طلعوا كام ال 10% الأولانيين ؟
معالى الوزير اللواء أبو بكر الجندى : ال 10% أو الشريحه الأولى فى السكان أن هأقول لحضرتك بعد الفاصل .
د.عبد المنعم سعيد:ما هو ما عدش عندنا فاصل ههههه إحنا خلصنا ههههه.
معالى الوزير اللواء أبو بكر الجندى : لكن إحنا عندنا يا دكتور التوزيع ده نسبة الشريحه الأولى مثلا على الشريحه الأخيره يطلع رقم فى المسوح النسبه ديه بتتحسن بتقل معناها إيه – معناها إن الشريحه الأولى نصيبها من الدخل قل والشريحه الأخيره نصيبها من الدخل إرتفع نسبة الأولى على الأخيره بتطلع نسبه أحسن ودا المؤشر اللى يهمنا كلنا لكن دول موجودين وموجودين على موقع الجهاز ونتائج المسح موجوده سواء في الخمس الأول أو العشر الأول أو الخمس الثانى أو العشر الثانى وهكذا الشرائح دول اللى إحنا لاجبناهم فى عينة هذه المسح .
د.عبد المنعم سعيد: معالى الوزير يبدو إن إحنا هنحتاج نأخذ من وقتك الثمين خلقه ثانيه لإنه لم نستكمل ربع الموضوع اللى كنا عايزين نسيرها مع حضرتك لكن وصف مصر بالأرقام وبالمعلومات فى الحقيقه مازال قضيه غنيه للغايه للمناقشه .. نشكرك شكرا جزيلا على و جودط معانا ونتمنى إن إحنا .
معالى الوزير اللواء أبو بكر الجندى : قبل ما نقفل الرقم 21،56 ده والرق اللى كان قبله والرقم اللى كان قبله هم فقط اللى فى جميع إصدارات المنظمات الدوليه .
د.عبد المنعم سعيد: يبقي اللي بيقول 40% و42% ده .
معالى الوزير اللواء أبو بكر الجندى : وكل مره يقولوا دا من مسح سنة كذا – دا من مسح سنة كذا لإن ده هو الترمومتر الوحيد يا دكتور لإن فيه كتير جدا ما يعرفوش هذا الكلام .
د.عبد المنعم سعيد:شكر معالي الوزير متشكرين جدا لوجودك معانا في البرنامج .
معالى الوزير اللواء أبو بكر الجندى : العفو يا فندم .
د.عبد المنعم سعيد:والي هنا تنتهي هذه الحلقه من برنامح وراء الأحداث ونلتقى فى حلقه قادمه بإذن الله .