كلام مسئول

محمد صلاح: يا مساء الخير .. السينما المصرية رغم الجزء الاقتصادي اللي فيها واللي خلاها هوليوود الشرق وكانت بتحتل المرتبة الثانية في صادرات مصر إلى الخارج بعد القطن مباشرة لغاية سنة 52 من ساعة ما بدأت لغاية دلوقت كانت حريصة على الإبداع والتطوروالنهوض بالفن وعلى الجماليات زي ما بيقول النقاد وحافظت اكترعلى صفة ما اتخلتش عنها لغاية النهاردة انها سينما مشاغبة دايما تشاغب الحكومة شغب السينما في السياسة والمجتمع خالد مش جرنان هيبقى في الارشيف تاني يوم لا ده منتج بيتعرض اسابيع اوشهور وبعدين يبقى شريط او cd وبعدها تشتغل عليه قنوات فضائية من امة لا اله الا الله والى اخر الزمان خلطة سحرية شريط سينمائي زي صندوق الدنيا بيعرض كل شيء بيناقش كل موضوع السينما المصرية قالت كلمتها في كل وقت وفي كل قضية وفي زمن كل حاكم واعترضت بكل جرأة من ايام فيلم لاشين سنة 38 يعني من اكتر من 70 سنة حتى الكرنك اهل القمة الى الراقصة والسياسي وعمارة يعقوبيان ودكان شحاتة السينما المصرية لما لقت ادب العظيم عند نجيب محفوظ عواماته قهاويه ولقت احسان عبد القدوس قاعد على مقهى في الشارع السياسي وفي قلب المراة وكان قد القعدة ولاقت طه حسين وكروانه وتوفيق الحكيم واياديه الناعمة يحي حقي وقناديله والشرقاوي وارضه وحرام يوسف ادريس ومواطن يوسف القعيد ودكات ابراهيم اصلان وعمارة الاسواني وغيرهم كتير ازدهرت الشاشة مكانتش الرقابة مشكلة كان السينمائي بيقدر يتحايل عليها وقت الشدة ويستفيد منها وقت الفرج دايما كنا بنشوف السينما المصرية وهي بتقتحم المناطق الصعبة المجالات السياسية الشائكة بتقول رايها في التاريخ القريب وفي الحاضر بتلاحق التطورات يمكن اتاخرت شوية في نقل خبراتها وهجومها للتليفزيون لكن لما نقلتهم شفنا مسلسلات ماتتنسيش طاقة متكاملة في الفن وانفتحت نجوم زاهرة من مخرجين منتجين كتاب مونترين مصورين ابطال وبطلات قدمت السينما المصرية احلى البطلات محدش عارف من غيرالبطلات اللي نورونا كان ممكن السينما عندنا تروح على فين السياسة وبطلات السينما هيكون لينا النهاردة كلام ..... مسئول
فاصل
محمد صلاح: الفيلم السياسي في مصر غاص بجراءة في موضوعات شائكة وحتى اللي ما كنش حد يتخيل انه ممكن انها تدخل فيها تجاوز السينمائيون رقابة مرة بالحوار ومرة بالصدام ومرة بالتحايل حتى رقابة التليفزيون اللي هي اشد شوية من منطق ان التليفزيون بيدخل كل بيت نجحت مسلسلات اتكلمت في السياسة انها تعدي من بوابتها وتقول رايها وكلمتها حتى لو كانت ملفوفة في اطاراجتماعي وانساني عن العمل الفني والسياسي فيلم او مسلسل رسالته مضمونة وقيمتة تأثيره ودوره هيكون لينا النهاردة مع الفنانة نبيلة عبيد كلام ... مسئول
من كلام الفنانة نبيلة عبيد
وجدت نفسي في شخصية ليلى الهواري في مسلسل البوابة التانية وارى انه عمل محترم يناقش اوضاع الفلسطينيين في غزة وكيف يعيشون تحت الاحتلال ,الحديث عن استغلال المسلسل للاحداث الاخيرة في غزة كلام غير صحيح فنحن نعمل في المسلسل منذ عامين ونناقش فكرة محددة تتمثل في علاقة ام بابنها ورحلتها في البحث عنه في السجون الاسرائيلية دون الدخول في تفاصيل الصراع العربي الاسرائيلى ,السينما الحالية يسيطر عليها الشباب وللاسف الشديد هناك ظلم كبيرللنجوم الكبار في الورق فلا نجد أي ادوار مناسبة للاجيال السابقة عكس السينما الامريكية مثلا التي نجد فيها ممثلين كبار يقدمون افلامهم بصفة مستمرة ,نحن بلد حر ومن حقق الفن الذي يتناول القضايا الجادة والهامة حتى لو كان لها بعد سياسي .
الفيلم السياسي وكمان المسلسل اللي ليه ابعاد سياسية ازاي الإبداع السينمائي والتليفزيوني بقوا منبر تنطرح من خلالهم قضايا سياسية خطيرة من غير ما نجورعلى أصول الفن, الأعمال السياسية في الفن اللي كانت اجرا في زمن الرقابة ولجأت للرمز وللتورية بقت فين دلوقت في زمن خفت فيه الرقابة وبقى مناقشة كل حاجة فيه ممكنة الخلطة السحرية في العمل الابداعي اللي فيه سياسة وفكر وقضية هيكون لينا عنها النهاردة مع الفنانة نبيلة عبيد كلام ...... مسئول
فاصل
محمد صلاح: نرحب بالفنانة الكبيرة نبيلة عبيد منورانا يا استاذة قوليلي الكاتب الكبيراحسان عبد القدوس وشهرته الواسعة في عالم الادب ورواياتة جذبك إلى عالمه وإنتي لما انجذبتي له في رواية طلعت فيلم وسقطت في بحرالعسل هل انت تاخرت شوية في ترجمة اعمال احسان عبد القدوس إلى السينما كنت محتاجة شوية خبرة ولاّ انجذبتي في الوقت المناسب
نبيلة عبيد: لا هو احسان عبد القدوس بالنسبة لي نقطة مهمة جدا جدا جدا في حياتي يعني من طفولتي وانا بتفرج على احسان لما بديت اتعلم واقرا قريت لاحسان في رواياته الطريق المسدود ، لا انام كل الموضوعات اللي هي قامت بيها فاتن حمامة دا في المخزون جوايا لكن الوصول ازاي الطريق ازاي كانت بالنسبة لي رواية اين عمري اللي عملتها ماجدة برضه من الحاجات اللي رسيت في دماغي لكن ازاي يتراح له ازاي دا اللي مكنتش عارفة الطريق ازاي الحقيقة انا يمكن قلت الحكاية دي قبل كده بس اقولها مرة تانية عشان اقول مين اللي قدمني بداية اللي قدمني رمسيس نجيب هو اللي عرفني على احسان عبد القدوس قبل رمسيس الصحفي الكبير محمد تبارك الله يرحمه لان انا كنت بحس عندي رغبة ان انا اغير من نفسي اشوف مثلا ماجدة عاملة اين عمري اقول ايه انا نفسي ابقى كده دي مثل قدامي انا عايزة أقلده او عايزة ابقى زيه لغاية لما وعدني انه هيعرفني على رمسيس نجيب ورحت له المكتب هم لاقيين عندي ان انا عايزة ابقى حاجة يعني كنت عملت رابعة العدوية ومجموعة من الافلام عملتها خارج مصركنت عايزة اعمل حاجة تغيير لان اللي كانوا معايا في نفس الفترة كانت نجلاء، ميرفت مجموعة كده حسيت انهم سبقوني شوية فعملت وقفة قلت لابد اعمل تغيير في حياتي كان على ايد رمسيس نجيب عرفني على احسان عبد القدوس
محمد صلاح: عملتي وسقطت في بحر العسل.
نبيلة عبيد: هو رشحها لي عايزة اقولك ان كل روايات احسان عبد القدوس اللي انا عملتها بترشيح منه لكن فيه حاجتين اتنين جولي من برة اللي هي العذراء والشعر الابيض وانتحار صاحب الشقة اما باقي الافلام او الروايات بمعنى اصح اللي انا خدتها منه كنت بقعد اقول الرواية دي هو اللي بيرشحها لي هو اهم نقطة في حياتي احسان عبد القدوس
محمد صلاح: تفتكري الاستاذ احسان من اللي عبروا بشكل جيد عن قضايا المراة هل شدتك هذه النوعية ولا شدتك طريقة الكتابة والمعالجة واسم احسان عبد القدوس وقتها ؟
نبيلة عبيد: لا انا وعيي ان انا بتفرج على حاجة مقتنعة بيها مليونين الميه حاجة انا مصدقاها بتتقال مصدقاها ومقتنعة بيها يعني انا لو مطرحها هقول ايه هعمل كده وهتصرف كده وهقول كده
محمد صلاح: بتعيشي القصة جامد من الاول ؟
نبيلة عبيد: ما هو انت لما تقول حاجة مصدقها ومقتنع بيها خلاص يعني زي احداث اين عمري يعني لما اضرب لك المثل اللي كان بالنسبة لي احداث اين عمري اللي بنشوفها كلها اه البنت تعمل كده وتتصرف كده ويحصل ، الافلام اللي قبل كده اقدرواحد قدم المراة وغاص فيها تماما كان احسان عبد القدوس
محمد صلاح: تفتكري الاستاذ احسان ككاتب سياسي على مستوى رفيع جدا هل رواياته خدت شكل سياسي عشان يقدر يغوص اكتر في قضايا المجتمع وقضايا المراة ولا كان بيكتب بشكل مباشر عن المراة ؟
نبيلة عبيد: هو طالما غاص وكتب بالشكل اللي احنا قريناه وشفناه في المراة وفي المجتمع اذن هو كاتب سياسي طبعا
محمد صلاح: الراقصة والسياسي مثلا يعني كان فيه موقف يتعلق بعلاقة مسئول براقصة تفتكري الرقابة في الوقت دا كانت متساهلة انها تعدي موضوع زي دا ؟
نبيلة عبيد: هو مفيهوش حاجة يعني لو كان فيه حاجة كانت الرقابة قالت ان وحيد حامد كتب الموضوع دا خد شهر واكيد طبعا عرضه على الرقابة ورحت مكتب الانتاج عند ابراهيم شوقي وقعد قراه في ساعة وماسمعتش ان الرقابة اتعرضت قالت دا فيه حاجة كده ولا كده بالعكس دا من انجح الافلام
محمد صلاح: طبعا لانه في زمن سابق كان حتى تناول مسئول في أي فيلم مسالة صعبة مش كده ولاّ ايه ؟
نبيلة عبيد: اه بس هو ماقدموش بطريقة ممكن يكون وارد في حياتنا لكن ماتتعرضلهاش الرقابة وممكن انا ما اذكرش ان فيه حاجة اتعرضت لها الرقابة خاصة بالراقصة والسياسي بالعكس دا من انجح الاعمال اللي اتعملت
محمد صلاح: هو الرقابة لما تتصدى لفيلم او تعمل عليه مشاكل يبقى مش من انجح ممكن يكون من انجح برضه لان الرقابة شايفة ان فيه بعض الاموراللي بتعترض عليها ؟
نبيلة عبيد: قصدي انه مكانش فيه حجز او حجر للابداع اللي كان عند وحيد أو كان في الرواية يقولوا انه فيه محاذير دا لا دا اه حط دا ما اذكرش انه كان فيه حاجة من النوع ده
محمد صلاح: دلوقت الرقابة بقت اكثر انفتاحا بقينا نشوف موضوعات يعني من 10 ، 15 ، 20، 30 سنة لما كنا نفكر انه ممكن تناقش او تنطرح على الناس كان يبقى خيال فهل تفتكري ان الفنانين قدروا يستغلوا المناخ دا بشكل كويس ؟
نبيلة عبيد: يعني هوان انت تسيب اعمالك وتسيب شغلك من غير ما تحجر عليه قوي او من غير ماتقيده قوي دا لابد يبقى فيه انما اذا تجاوزت او اذا كانت حاجة ضد حاجات بتهدد امن البلد ضد حاجات ما يتسمحش بيها اكيد هنا بيبقى فيه محاذير لكن لما يكون حاجة انت بتطرحها وشايف ان دي حاجة لازم تتشاف ولازم تتعرف ولازم الناس تبقى على علم بيها ما انت ماتقدرش تطرح حاجات وتبقى حاجات بتخبيها على المجتمع بتاعك لكن لو فيه حاجات تهم اوتضراكيد أي حاجة الرقابة بتقف لها او فيه حاجات زيادة عن اللزوم اعتقد ان الرقابة في المعقول وحاجات انت لازم تطلع عليها وتعرفها ومجتمعك وجيلك والناس دي كلها بتبقى على علم بها ليه لا
محمد صلاح: انت حصل لك قبل كده مشكلة مع الرقابة ؟
نبيلة عبيد: لا خالص ولا حتى في البوابة التانية مؤخرا ماصدفناش ان حد قال ان الرقابة قالت على العمل حاجة او انه كان فيه انتقادات الى اخره لانه حاسين ان احنا ماشيين في السليم يعني انا بحب كل حاجة تبقى واضحة ومظبوطة والناس على علم بيها لكن الى حد كبير ببقى عقلانية يعني
محمد صلاح: هنتكلم على البوابة التانية لكن خليني اسالك هل احنا بالفعل عندنا فيلم سياسي ولا عندنا فيلم اجتماعي بيستخدم بعض المصطلحات السياسية ؟
نبيلة عبيد: يعني هو كان فيه فترة من الفترات كانت بتستخدم الرموز فيها
محمد صلاح: صلاح ابو سيف استخدمها كذا مره طبعا في بداية ونهاية ؟
نبيلة عبيد: اه كان فيها بعض الرموز ولكن اعتقد دلوقت المسائل تفتحت اكتر وبقى فيه حرية اكبر ان انت تعرض وتقول اللي انت عاوزه بانفتاح اكتر وتوسع اكتر
محمد صلاح: ايه رايك في افلام العشوائيات انت عارفة قصدي ؟
نبيلة عبيد: اه طبعا .. والله بص هقولك على حاجة هي الفترة الاخيرة دي كان فيه افلام كتيرة وحقيقي الواحد بيصدم لما بيشوف الواقع دا ، دا واقع موجود كتير قوي لكن لازم تعرضه وتقول احنا عندنا دا ولازم بتقول شايفين بيجرى ايه وشايفين حصل ايه وشايفين وشايفين ولكن لابد انك انت تدور في الاخر لحلول مش هتسيبهم على طول عايشين في العشوائيات بالشكل اللي احنا بنشوفه دا انا لما اعدي على الكوبري وبشوف وراكب معايا حد
محمد صلاح: عالطريق الدائري عاليمين كده وانت طالعة رهيب
نبيلة عبيد: اه.. فاسمع حد راكب معايا العربية بيقول دا في كذا وكذا وجوه بقى يعني يصعب عليك نفسك ان فيه ناس عايشة بالشكل دا يعني قلب الواحد يتوجع ان فيه ناس يعني لازم يتلقى لها حل
محمد صلاح: ايوهبس اللي بيعملوا السينما دي بيبقى وجهة نظرهم بيحذروا المجتمع وبيكشفوا اللي محدش كتيريعرفه وان الفن مش المفروض يقدم حلول
نبيلة عبيد: لا لازم يقدم حلول ولازم من خلال الحلول دي لازم الدولة يبقى لها دور لازم دي ناس ماتتسابش كده ابدا وبعدين دي اجيال الي طالعة هيطلعوها ازاي الاجيال دي لو اتسابت وبعدين انت هنا لما تطرح الحاجات دي والافلام دي بتتشاف مش فيه ناس بتروح تتفرج عليها الناس دي كمان لازم يبقى لها دورفي الحلول دي احنا كمتفرجين لما اروح انا تفرج والاقي العالم دي عايشة ازاي ممكن يكون من منطلق فكرة عندي اروح انا اقدمها اعملها تجاههم اتعامل مع أي جهة من الجهات اللي هي ممكن تتدخل للمساعدة يكون لي نظرة يكون لي رؤية مقدرش اسيب العالم دا عايش بالطريقة دي من غير مايكون لي دور كفنانة او كفنان يكون لي دور في مساعدة الاخرين اللي احنا اللي احنا بنشوفهم وبنسمع عنهم
محمد صلاح: بتتكلمي في السياسة جامد
نبيلة عبيد: اطلاقا ..دا احساس
محمد صلاح: احساسك سياسي ..قوليلي انت تحبي اكتر تعملي فيلم سياسي سياسي ولا فيلم اجتماعي اكتر؟
نبيلة عبيد: على حسب السياسي بيقول ايه على حسب الموضوع بيقول ايه لو فيه رسالة ولو فيه حاجة ماهو السينما اولا واخيرا ايه دي رسالة طب لوانا اتعرض عليا فيلم ايا كان سياسي او اجتماعي الرسالة في الاخر بتقول ايه انا هقدم ايه هقول ايه هو دا هدفي
محمد صلاح: احنا بنتكلم في البرنامج الجزء القبل الاخيرعن البوابة التانية لكن انا سمعتك في رمضان بتقولي لعمروعبد الحميد في اذاعة الشرق الاوسط في برنامج معانا على الفطار بتنفي ان المسلسل سياسي هي السياسة فيها مشكلة ؟
نبيلة عبيد: لا انا قلت هواجتماعي انساني وفيه جزء سياسي في الاخرلانه هو في الاول عندها مشاكلها الجامعة مشاكل الارض وبعدين بعد كده بييجي الولد الل بيتاخد وبيروح في منطقة يعني صعب الرجوع زي الحاجات اللي حصلت في المسلسل وبعدين انما فيه جزء سياسي ان هو راح في منطقة صعب الوصول لها يعني منطقة بينا وبينهم فيه محاذير كتيرة ان الولد دخل هناك مع صاحبتي وكلنا عارفين وكل حاجة لما بتروح هناك وتخش تشوف الناس الي عايشة هناك دول عايشة ازاي اكيد دخلنا في سكة السياسة الناس اللي عايشة تحت الحصار بيعيشوا ازاي ايه الجو اللي هم عايشين فيه ايه الحياة فاذا بقى فيه جزء سياسي انا رايحة للولد في المنطقة اللي فيها سياسة
محمد صلاح: لما اشتغلت مع يوسف شاهين عملت الاخر ، فيلم الاخربيتكلم عن ظاهرة التطرف اللي كانت في وقت دا منتشرة في العالم ازاي فكرت في المشكلة وازاي قدرت تتعاملي مع يوسف شاهين؟
نبيلة عبيد: هو كان بالنسبة لي حاجة بتراودني جدا وكنت لما اقابله اقوله انا هموتك لو ما اشتغلتش معاك هموتك يعني بهزار وهويحب الطريقة دي انا كنت حريصة عايزة اشتغل معاه باي طريقة هو الاول عرض عليَ اليوم السادس وبعدين محصلش نصيب وبعدين عرض عليَ الاخر انا كنت مبسوطة قوي سعيدة جدا جدا وعايزة اعرف التعامل مع يوسف ازاي هو بسيط دا ولكن لو الواحد عرف مفاتيحه يقدر يوصله بسهولة هو طبعا كمخرج، مخرج عالمي يعني محدش يقدريقول يوسف شاهين دا اللي اخد افلامنا وعرضها في الخارج لف بيها مهرجانات وكان والحاجات دي كلها كان علىَ ان انا لازم اكسب من كل دا بمعنى انه ما بيحبش ايه ما يتعملش ..بيحب ايه يتعمل واعتقد ان انا لما اشتغلت معاه يعني هو عادة هو بيقصرعليهم في طريقة الاداء الحمد لله ان انا لما كنت بقوم وبؤدي مالقتوش مثلا فرض عليىَ حاجة معينة تتعاد بطريقة معينة ..لا..مافرضهاش الحقيقة فدي حاجة من الحاجات اللي كنت حريصة ان انا احتفظ بشخصيتي انا .. في الاداء .. مواعيده تحترم جدا جدا جدا انه هو ما بيحبش يروح واحد بعديه يروح طب ايه اللي يمنع ان انا اكون قبليه هما خوفوه مني قالوله لا دي نجمة بقى وعايزة تيجي متاخرة وعايزة معرفش ايه وطول ما هي قاعدة ..مالاقاش دا خالص لقاني اول يوم متواجدة لقاني احيانا كنت اجي على حساب نفسي انا شخصيا يعني انا لازم اكون في البلاتوه الساعة 7 انا اكون من الساعة 4 او 3 صباحا بين ايدين الماكيير بيعملي الماكياج عشان اروح قبل هو ما يوصل عشان لما ييجي الجو ما يبقاش متوتر يبقى هو relax لان انا عايزة استفيد منه انا مش داخلة عشان اعانده انا داخلة عشان استفيد منه
محمد صلاح: كلميني عن الأخر في حكاية التطرف؟
نبيلة عبيد: دي ظاهرة كلنا اتفاجئنا بس هو كان واعي جدا لها وقدمها هو يمكن اول واحد قدم التطرف مظبوط ولا حد تاني قدمه
محمد صلاح: من أيام الأقمر لهشام ابو النصر في الثمانينات كان حذر من الظاهرة ؟
نبيلة عبيد: اه بس حصل قى عند "جو"وضح ازاي هي منتشرة ووضح ا زاي هي موجودة ان متواجدة في كل حتة حذر من دا فهودا كان اول مرة احس الاحساس دا وانا بقرأ مكنتش حاساه قد ما شفته على الشاشة وقد ما كان هو بيصور حاسة بكل اللي هو قاصد يعمله ويوصله للناس
محمد صلاح: خليكي معايا عشان لسه الكلام مخلصش
فاصل
محمد صلاح: وبنتكلم في السياسة مع الفنانة نبيلة عبيد عندنا راي كده في مسيرتك وفي افلام السياسة والمجتمع للدكتور رفيق الصبان تيجي نشوفه ؟
نبيلة عبيد: ياريت
محمد صلاح: نشوف الدكتور رفيق الصبان .
فاصل
رفيق الصبان - الناقد الفني: دور المراة في السينما المصرية هقولك ايه مش مسالة انه دور كبيرالمراة هي اللي صنعت السينما المصرية يعني لما بنبص لتاريخ هنلاقي ان بهيجة حافظ وفاطمة رشدي وعزيزة اميروامينة محمد واسيا داغر هما اللي عملوا السينما المصرية وبعد ذلك شبت على قدميها وبقيت السينما المصرية اللي نعرفها والحقيقة انه التاريخ بيعيد نفسه دلوقت السينما المصرية معتمدة جدا جدا على مواهب شابة من الستات زي كاملة ابو ذكري و زي ساندرا نشأت وزي ايناس الدغيدي وزي منال الصيفي كلهم بيقدموا لنا افلام على مستوى جيد جدا واعمال كتير تثيرالاعجاب في أي حتى تتوجد فيها ومش بس على مستوى كتابة السيناريو برضه على مستوى الاخراج على مستوى المونتاج على مستوى التصوير المراة دورها يتنامى ويتعاظم بالنسة للسينما المصرية اكتر واكتر .....
السيدة نبيلة عبيد عملت قفزة في تقديم المراة على الشاشة المصرية بمعنى ايه ..؟ بمعنى قبل سطوع نجم نبيلة عبيد كانت السينما المصرية تعتمد على تقديم المراة دائما المراة الضعيفة المراة المظلومة طبعا كانت سيدة الشاشة فاتن حمامة هي اللي كانت تمثل هذه البنت المسكينة اللي تحتاج الى العطف تحتاج الى الحماية الى جنبها كان في شادية كان في ماجدة وحتى مريم فخر الدين كانت تمثل برضه المراة البسيطة الناعمة المستسلمة التي تقودها الاقدارالتي لا تصنع قدرها بنفسها وانما مياه الحياة هي اللي تجرفها..لما جت نبيلة عبيد قدمت صورة تانية تماما للمراة صورة المراة الناضجة الواثقة من نفسها اللي تعرف طريقها في الحياة واللي تعرف تاخد حقها بايدها الحقيقة ان نبيلة كانت عمالة تفتش على السكة اللي تقدرتعبر بيها عن هذه الصورة الجديدة للمراة المختلفة تماما عن الصورة اللي قدمته السينما المصرية من التلاتينات خلال الاربعينات وحتى منتصف الخمسينات والستينات وجدت في قصص احسان عبد القدوس ووجد احسان عبد القدوس في نبيلة عبيد المترجم الحقيقي للشخصيات اللي كان بيرسمها لقصصه يعني جت له هدية من السماء لانه كانت اغلب بطلات احسان هما من النساء الناضجات الكبيرات الواعيات تماما تماما اللي فاهمين الحياة واللي يواجهوا الحياة بصلابة وبقوة وبشخصية .. احسان وجد في نبيلة هي البوق الحقيقي اللي بيترجم عن افكاره وعن اللي بيريد ان يقوله ونبيلة رات في اديب احسان المية اللي تقدر تعوم فيها على راحتها واللي تثبت قدرتها العالية سواء في الاداء سواء في التمثيل او سواء في تقمص الشخصيات انا اعتقد ان هذا اللقاء اللي بين نبيلة واللي بين احسان رسم صورة جديدة للمراة المصرية في السينما المصرية مختلفة تماما عما سبق وكانت مقدمة لبعد ذلك لكثير من النجمات انهم يسيروا او يعملوا في نفس الدرب
فاصل
محمد صلاح: الاستاذ الدكتور رفيق الصبان وتعليقه على مسيرة الفنانة نبيلة عبيد في افلام المراة عندك تعليق؟
نبيلة عبيد: لا اطلاقا .. هو قال الي انا يمكن مقدرش اقوله عن نفسي كويس هو ترجمه الحقيقة
محمد صلاح: طب عندي سؤال ازاي فيلم المراة وقضايا المجتمع خد بُعد يتعلق بالمراة ضد الرجل مثلا دا ظهر في المراة والساطور لسعيد مرزوق والغرقانة مع محمد خان وعتبة الستات مع علي عبد الخالق انت كنت شايفة انه المجتمع المراة فيه حقوقها مهضومة حاولت انك تلعبي دور في ان المراة تحصل على بعض الحقوق اصل احنا عمالين نتكلم على حقوق المراة؟
نبيلة عبيد: اه هو في ال3 افلام اللي انت قلتهم دول المراة والساطور هي انسانة عادية طبيعية لكن لما صادفها الشخص دا دا كذاب عامل 3 باسبورتات مزورة حاول يعتدي على بنتها وياها كان سئ في المعاملة في التصرفات يعني مكنش انسان معاها كان حيوان فهي حتى ساعة لحظة لما خبطته بالساطور هي مكانتش عايزة دا هو كان حاطط جنبه السكينة وبيقشرالتفاح وبياكل هي خافت من اسلوبة معاها وسلوكه الغيرانساني ومع انه حاول الاعتداء على بنتها ومعاها هي بصفة خاصة فاول ما حصلت لها الحكاية دي بتاعة الانتقام هي في اللاوعي هي في الاشعور هي مكانتش قاصدة انا تعمل كده لان محدش يعالج المشكلة بمشكلة افظع واكبر ما بنقولش لكل واحدة انها ممكن تتصرف التصرف اللي عملته
محمد صلاح: هي كانت في اللاوعي ، انت كنت في الوعي كنبيلة عبيد يعني ، يعني انت كنت واعية انك بتقدمي نوعية من الافلام عشان خاطر تنصفي المراة في المجتمع ؟
نبيلة عبيد: في الحالة دي هي اللي عملته حتى الست الشخصية الحقيقية اللي هي قتلته فعلا لما بيحققوا معاها قالت لهم لو دلوقتي هعمل اللي حصل احنا مابنقولش دا يعني احنا مش مع الانتقام ..لا انا مش مع دا لكن هي واحدة الضغوط النفسية القاسية وشفت انت كان مقعدها في الصحرا هي وبنتها وبيعمل فيهم عمايل هي وبنتها لا تطاق ولا تحتمل فاول ماعملت كده هي كانت في اللاوعي مكنتش طبيعية ابدا ابدا دا كان على المراة والساطور ، في الغرقانة كانت برضه بتمر بضغوط وضغوط قاسية جدا جدا جدا عليها ماهو لازم بص الضغوط القاسية دي قوي قوي قوي هي اللي بتفجر العكس على طول لو كانت دي ست بتتعامل معاملة سوية او مع زوج زي اللي احنا شفناه في الغرقانة انت شفت شخصية الزوج كان عامل ازاي لو هي بتعامل معاملة كويسة مش هتقدر تعملي غلطة انما الضغوط والقهر والتعذيب والحاجات دي كلها وانا ضد الانتقام للانتقام , لكن بتبقى حالة اللاوعي واحدة مش حاسة انها
محمد صلاح: ممكن بنطبقه على المجتمع يعني بنقول ان الضغوط اللي تتعرض لها المراة بشكل عام يمكن ان تفرز ؟
نبيلة عبيد: ممكن ماهي دي من المجتمع المراة والساطور دي مش من ضغوط المجتمع المعاناة اللي كانت بتعيشها مع جوزها دي ضغوط واستحملت استحملت استحملت بس كانت الكارثة الكبرى ان بنتها وبعدين هي والحالة الفظيعة اللي هي فيها دي ضغوط مجتمع ولو اني ضد ومش مع الانتقام بالانتقام انا مش معاه لا لا لا فيه أي وسيلة تانية ولكن لانها قصة حقيقية كان لازم ناخدها زي ماهي ونطرحها زي اللي حصل فيها
محمد صلاح: لما عملت العمة نور لاقى المسلسل ترحيب كبير قوي من فئة الاطفال والكبار شوية زائد الشباب انت كنت واعية انك بتقدمي المسلسل دا في الفترة دي للفئة العمرية دي ؟
نبيلة عبيد: للمجموعة اللي كانوا حواليا والشباب الصغيرين دا انا كنت حاسة ان دا هيلفت النظر لكن مكنتش فاكرة انه هيلفت كمان نظر الاطفال الصغيرة اللي قد كده يعني انا لما اكون في مطعم وطفلة مع مامتها وتروح تقولها تعالي انتي نور اهه فانا مكنتش واعية انه هيبقى كده قوي انه وصل للحاجة اللي مكنتش اتوقعها يعني لكن انا كنت عارفة انه الشخصيات اللي كانت حواليا شخصية "هطة" دي كانت شخصية حية جدا جدا فيه كده في الحياة البنت المريض بمرض السرقة وهي مش محتاجة اي حاجة المجتمع اللي هي نور نفسها عاشت فيه مع اخواتها والحالة اللي هما فيها والشباب اللي ما بيشتغلش والشباب اللي عنده ضغوط والحاجات دي كلها انا كنت حاسة انه اه هيعمل حاجة بس مش هوصل للاطفال الصغيرين فبقى الناس يقولوا
محمد صلاح: البوابة التانية اللي اتعرض في شهر رمضان اللي فات فيه قناة فضائية اعتقد اردنية عملت استطلاع راي ومنحته المركز الاول ما بين كم رهيب للمسلسلات اللي عرض خلال شهر رمضان قوليلي رد الفعل على المسلسل كان ازاي ؟
نبيلة عبيد: يعني هما لما قالولي انا كنت سعيدة جدا جدا لما رحت وبدينا نتلقى المكالمات والتليفونات يعني مثلا من ضمن الحاجات فيه حد من فلسطين قال احنا كان عندنا حصار وكنا قاعدين في البيوت فكنا قاعدين مرابطين للمسلسل باقي بقى البلاد لبنان سوريا كل البلاد الي كانت بتتبع العمل كان صداها حلو لانهم عايشين قضية ملموس حاسينها عايشين واقع بيشوفوه بيحسوه بيقروا عنه بيتفجوا عليه في التليفزيون فحسيت ان احنا قدمنا عمل له صداه والناس مقتنعة بيه واحنا ماغصناش في تفاصيل غيرطفل اللي هو محتجز في السجون الاسرائيلية فانا واحنا بنحضر حاسة ان احنا بنعمل عمل حلو حاسة ان انا بعمل عمل محترم مشرف لما دا صاه بقى كده يعني يمكن اقدر اقولك ان انا بديت من بعدها انام مرتاحة شوية ارتاح داخليا لان انا كنت مصابة بالقلق والتوترالشديد جدا قلقانة جدا جدا جدا فبديت شوية اهدى ما اصحاش الصبح من النوم بالانزعاج اللي كنت فيه لاني لسه محسيتش بردود الافعال يعني مثلا نقد للي مع واللي ضد ..اه انا بعمل عمل المقابل بتاعه مع وضد دي مش مزعلاني
محمد صلاح: لازم نتقبل القد السلبي او النقد الايجابي
نبيلة عبيد: اه طبعا ..فلقيت نفسي بعد التكريم دا لقيت نفسي بعد ما اصحى الصبح من النوم ما بفتحش على الانزعاج اللي كنت ببقى عليه قبل كده انا كنت بفتح على الانزعاج وتوتر فيه ايه مكتوب ايه حصل ايه فيه ناس بتاخد الكلام دا كده ، انا ..لا .. اتعودت الكلمة اللي هتصلح مني تعلمني الكلمة اللي بتوجعني تعلمني اشوف الغلط فين دا حسيت اني بقوم مرتاحة الى حد ما فريحتني شوية دا تكريم او استفتاء الدول العربية كلها دا ريحني الفترة اللي فاتت
محمد صلاح: انت حساسة للنقد ؟
نبيلة عبيد: اه..
محمد صلاح: ازاي يعني ، يعني لو حد تناولك بالنقد وكان حاد قوي وتناول شخصك يعني بتتضايقي بتزعلي بتبقي متاثرة ؟
نبيلة عبيد: لو انت بتكلم عن الشخصية قول فيها ما يحلو لك وانا هتعلم يعني انا اذكر في بداياتي مكنتش اعرف يعني ايه نقد خالص وكنت عاملة لسه فيلم اسمه ولا يزال التحقيق مستمرا ولا اعرف يعني ايه مهرجان كان وقتها مهرجان اسكندرية وكان وقتها كمال الملاخ الله يرحمه ورحت وانا معرفش يعني ايه احتفال واطلع على المسرح واخد جايزة دا معرفوش معنديش الوعي بيه ابدا ابدا ولكن اللي فضلت هنا وقاعدة هنا لغاية النهاردة كان فيه ندوة وقام سامي السلاموني وقال المثلث اللي هو الزوج والزوجة والعشيق وقعد يوصف المسلسل دا ووصفني ان انا واقفة معاهم ضلع من الاضلاع وكان دا يمكن اول فيلم هعمله بعد توقف بعد " وسقطت في بحر العسل " لاحسان عبد القدوس النقد دا حسيت انه وعاني على حاجة غايبة عني تماما بالليل لما رجعنا هو كان قاعد ورحت لغاية عنده وقلت له انا مش عارفة اشكرك ازاي وانت وعتني على النقد قاللي دا لازم وقاللي شوية حاجات كده برضه فضلوا عندي في المخزون كده تجاه النقد انت انقد وقول انا كذا وكذا وكذا لكن ماتجيش تحاسبني انا على السنين اللي بمر بيها ازاي فين دا طب ما انت بتكبر هو انا بس اللي بكبر انا بس اللي بكبر تيجي تحاسب على سُنة الحياة ازاي ..؟ انا بكبر وانت بتكبر وكل العالم دا ، حاسبني في الدور حاسبني في الشخصية حاسبني عملت كويس ولا لا حاسبني ماسكة الدور من الاول للاخرالمشهد الفلاني جل منها معملتوش كما يجب الحاجات دي كلها حاسبني فيها دا اللي يخليني يضايقني بقى مش كده نتكلم في الحاجات اللي تصقل مني وتعلمني لان انا فنانة مش قليلة يعني لما تيجي تضعف مني وتقول كذا وكذا وكذا لا..انا مش قليلة عشان يتقال فيا كده دي الحاجات اللي تاثر وتخليني احس انه لا دا مش موضوعي دا بيتكلم في عمري محدش يتكلم في العمر محدش يتكلم في السن نهائيا ماسمعتهاش لكن كلمني في الدور، الدور دا مكانش لازم تعمليه الدوردا كان كذا انما معلومة بتقولها للقارئ عشان تعلمه بان انا سني كذا فالنقد بالنسبة لي ان انت تصلح مني انما تنقدني في سني انا في عمري
محمد صلاح: طب خليكي معايا لسه الكلام مخلصش
فاصل
محمد صلاح: ممكن انقد ؟
نبيلة عبيد: اه اذا نقدك يصلح مني انا
محمد صلاح: زي ما انت قلت في اجابتك على السؤال اللي فات ركز على الجوانب الانسانية ما ركزش على الابعاد السياسية للقضية طبعا القضية الفلسطينية كانت موجودة عبر الحلقات الحصار وطريقة تعامل الاسرائيليين مع الشعب الفلسطيني حتى التعامل بين الادارة المصرية والادارة الاسرائيلية لكن كان التركيز اكتر على الجانب الانساني ليه ؟
نبيلة عبيد: علشان احنا نعلم تماما دور مصر تجاه القضية الفلسطينية .. احنا كلنا نتمنى انها تتحل مين ما بيتمناش انها تتحل لكن العمل ده بيوري دورمصر تجاه القضية الفلسطينية ودورها اللي العالم كله بيشيد بيه من وقت ما بدأت المشكلة لغاية النهاردة مصر واقفة بدليل ان اسم البوابة التانية دي هي مصر بالنسبة لفلسطين
محمد صلاح: انا نقدت وكان عادي .. معانا أراء لبعض المشاهدين على المسلسل تيجي نشوفها
فاصل تقرير
مشاهد 1: فنانة لها بصمة في الشاشة سواء في السينما أو في التليفزيون،من الفنانات اللي بتقدم رسالة هادفة للجمهور بتساعد ناس كتيرفي بعض المواقف اللي بنتعرض لها في حياتنا وبتعرض قصص واقعية من حياتنا الطبيعية فأنا من أشد المعجبين بفنها
مشاهد 2: أنا عن نفسي بحب أدوارها كلها لأنها من الفنانات اللي بتؤثر في المشاهد فلا جدال عليها
مشاهد 3: فنانة عظيمة وفنانة مشهورة وفنانة لها تاريخ كبير في السينما ومسلسلتها حقيقي جميلة وهادفة وما نقدرش ننسى أفلامها الجميلة يعني تاريخها معروف فنانة كبيرة ومش محتاجة كلام خالص
مشاهد 4: الفنانة نبيلة عبيد فنانة محبوبة للشعب وفنانة جميلة جدا ومن ساعة ما وعينا على الدنيا وإحنا عارفين نبيلة عبيد بأدوارها الكويسة وعملت أدوار كتير ومشهود لها
مشاهد 5: مسلسل نبيلة عبيد في شهر رمضان جميل جدا أمتعتنا الناس كلها اتفرجت علية وعجبهم جامد جدا
فاصل
محمد صلاح: قولي لي مسلسلات رمضان بقت بتتسوق بالأبطال والبطلات بمعنى إنه معدش مهم بقى الموضوع والورق إحنا عندنا مسلسل لنبيلة عبيد عندنا مسلسل لنادية الجندي عندنا مسلسل ليحيى الفخراني .. لنور الشريف وهكذا ؟
نبيلة عبيد: أنا هكلمك عن نفسي أنا يعنيني الموضوع أولا
محمد صلاح: أنتي عملتي مسلسل اهتميتي بيه أنا بتكلم عن التسويق على 40 ، 50 مسلسل شفناهم أترشوا في رمضان اللي فات على كل القنوات أنا بقول إن نجم يتبنى مسلسل فخلاص عرفنا سكته حيتعرض هيتعرض
نبيلة عبيد: لازم يكون بيدورعلى الورق أولا وأخيرا لأن أنا من العمة نور لغاية البوابة التانية أتعرض عليا مجموعة من الأعمال لكن ما لفتش نظري غير البوابة التانية عشان أرضى أعملة .. مهم أوي بالنسبة للنجم أو أنا بصفة خاصة مقدرش إلا لازم أكون مهتمة بالورق أوي ، قعدنا في الورق بتاعنا سنتين لأن الورق ده هو الأساس اللي حنقف عليه وحنبني عليه
محمد صلاح: لكن العرض والتسويق معدش بيهتم بالورق ؟
نبيلة عبيد: أنا معرفش أنا بهتم بالورق أنا بكلمك عن نفسي
محمد صلاح: أنا مش بتكلم في التمثيل أنا بتكلم في التسويق؟
نبيلة عبيد: في التسويق دلوقتي بقوا واعيين جدا للورق يعني فيه اعمال اتقدمت وقال لك لازم يتشاف منها كذا حلقة قبل ما يشتروها
محمد صلاح: طب هقولك على ظاهرة اخرى تتعلق بنجمات السينما اللي بيمثلوا ادواركتيرايجابية الشخصيات المثالية اللي بيتصرفوا اللي هي دايما البطلة ما بتغلطش اللي حتى لو غلطت عندها المبرر دا انت معايا في الملاحظة دي ؟
نبيلة عبيد: هو ملحوظ في فترة من الفترات ولكن تعالى عندنا هنا في البوابة التانية طب ماهي غلطت هي اخطات انها ماراحتش قعدت في ارضها هي سابت ارضها وسابت الناس تستولى عليها وسابت الناس تحط ايدها عليها وعايزين يخدوها منها لمجرد أنها أرض ما أتلوثتش بالكيماويات عشان يستفيدوا منها ما ده غلط من الغلطات اللي هي غلطتها تداركت بقى بعدين لما الأرض رجعت لها قالت أنا هروح أقعد في أرضي ومش حسيبها
محمد صلاح: أنا بتكلم عن الشخصية الشريرة اللي الناس ممكن تكرهها هل النجمات بقت بتخاف تقدم الشخصية دي؟
نبيلة عبيد: أنا شخصيا أحب أعمل النوع ده
محمد صلاح: الناس في العمة نور حبتك وفي البوابة التانية تعاطفوا معاكي جامد
نبيلة عبيد: أنا مع الشخصيات اللي هي من دم ولحم وملموسة في الحياة ، طب أنا في النهاربتنرفز وقبل مااجي متنرفزة كذا مرة وأمبارح كان عندي مشكلة وبكرة يمكن يكون فيه حاجة تانية الحاجات دي لازم تكون موجودة هي اللي بتعمل مصداقية عن الشخصية اللي أنت بتقدمها عند الناس إنما ملكش دعوة بحكم الناس عليها أيه أنت بتقدم شخصية مش بالضرورة الناس كلها تحبني أنا بقدم شخصية بالكويس والوحش فيها
محمد صلاح: قوليلي أيه أخبار ضحكتك ؟
نبيلة عبيد: ما بتتطلعش
محمد صلاح: زي ضحكتها ما كانت مجلجلة أتكلمت معانا بكل صراحة في مسيرتها الفنية وكمان أتكلمت كتير في السياسة قالت الفنانة نبيلة عبيد كلامها كان كلام جميل كلام معقول أكيد كان كلام مسئول خلص الكلام سلام