مفيد فوزى: أسعد الله مساءكم بالطمأنينة أمل كل إنسان على أرض مصر على ربوة جبل في إيطاليا أو لنقل على تبس جبل يرقد بيت كاتب القصيدة الإيطالى العظيم ألبرتو مورافيا الذى ارتبطت حياته بحفنة من أفلام عاشت حتى الآن منها سرقة الرايات ومنها الكونيز في البحيرة أتذكر إن أنا كنت في روما ودبر لنا هذا اللقاء الأستاذ محمد إمام الذى كان مستشارا في السفارة المصرية للإعلام في تلك الليلة كانت هناك مجموعة نادرة من الفنانين والفنانات الإيطاليات كانوا بيحتفلوا بنجاح فيلم لكلوديا كاردينال واسم الفيلم للمدينة وجوه 5 تلك الليلة طرح ألبرتو مورافيا قذيفة سؤالا شديد الأهمية سألهم واحنا قاعدين ليه الممثلة بتمثل ليه المغنى بيغنى ليه الكاتب بيكتب ليه المخرج بيخرج ليه صانع الموسيقى بتستهويه الموسيقى إلى حد الاستعباد ليه السؤال مكون من كلمتين لكن أظن أنه من أصعب الأسئلة أتذكر وأنا دبرت إن أنا أحط هذا الكلام على ورق وأنا من جيل مهم بالنسبة له الورق لأنه خارطة طريق رد الكاتب بيير مارسيل وهو ناقد قال ليه بنقد لأضع يدى على مواطن الجمال في الفيلم خصوصا الأدوار غير التقليدية سئلت كلوديا كاردينال بتمثلى ليه فقالت ينتبنى مرض الكساح إذا امتنعت عن التمثيل ، قيل لصوفيا لورين بتمثلى ليه قالت أنا أمثل إذن أنا أتنفس إذا انقطع التمثيل كفت الرئتين عن القيام بدورهم ، قال تساسا القبرصى وهو موسيقى أكتب مزيكا لأنى أصطاد العزف من زقزقات العصافير على الأغصان فنان إيطالى مغمور كان موجود شاب عاوز ينجح ويبقى له قيمة قال أنا لا أحلم مجرد حلم أتمنى أن أفكر في الصعود لقامة سيجنى جواتيه هو طبعا لسه صغير إنما نفسه يبقى زى سيجنى جواتيه أردت بهذه المقدمة حينما أطرحها على نجمتنا المتألقة اللي بتتنقل بين شخصية وأخرى ومن رمز إلى آخر تكاد تنصهر فيه لكنها تبقى بكل ثباتها هي في تقديرى كقطعة صلصال تتشكل في أكثر من صورة وتجسد أكثر من شخصية إلهام شاهين لماذا تمثلى فاصل عبارة عن لقطات لبعض أعمال الفنانة إلهام شاهين فاصل إلهام شاهين: يمكن لو حضرتك سألتنى السؤال ده وأنا في بداياتى بالتأكيد إجابتى هتبقى مختلفة عن دلوقتى في بداياتى هقول وأنا وجه جديد إن أنا بمثل لإنهم اكتشفوا إن أنا موهوبة فقالوا لي انتى إحساسك حلو بتعرفى تحسى كويس فممكن تبقى ممثلة كويسة ده من خلال دراساتى بالمعهد العالى للفنون المسرحية مفيد فوزى: ده في البداية إلهام شاهين: في البداية لكن ما تسألنى دلوقتى أقول لك إن أنا بمثل لإن أنا مهمومة بالإنسان مهمومة بالنفس البشرية النفس البشرية دى حالة معقدة جدا مليئة بالمتناقضات مفيد فوزى: أنا بسميها قارة إلهام شاهين: حقيقى ، فيها الخير والشر والأبيض والإسود والحب والكره وأحيانا الحقد والكراهية والطيبة مفيد فوزى: في آن واحد إلهام شاهين: والإنسانية مش بتبقى في آن واحد لكن مفيد فوزى: بتبقى مراحل إلهام شاهين: تقلبات ما اقدرش أقول مراحل لإن مفيش حد بيبقى لفترة كاملة بنفس الحال يعنى ممكن تلاقينى من شهر أنا في حالة مثلا من الهدوء ، من السلام ، من الطمأنينة وممكن تلاقينى في الشهر اللي بعده أنا في حالة من التوتر والقلق وقلة النوم وخايفة من بكرة كل فترة بتمر علينا حسب معطيات الحياة مفيد فوزى: دى لها علاقة بالأبراج يعنى تفتكرى إلهام شاهين: مش بصدق قوى في حكاية الأبراج مفيد فوزى: بالضبط إلهام شاهين: لإن أنا برج الجدى وأعرف زميلات كثير صديقات حتى من بره الفن من برج الجدى مختلفين قوى عن بعض معطيات الحياة والتجارب الحياتية بتأثر في تجارب الواحد بتخليه يختلف ويتنقل من حالة لحالة ، لحالة ، لحالة وأنا مؤمنة إن الإنسان حاجة حلوة قوى يعنى جواه حالة جميلة لكن فيه أشياء يمكن متكسبات بياخدها من الحياة حسب ظروفه في الغالب هي بتغير في شخصيته مفيد فوزى: السعادة يا إلهام هل هي بتيجى من داخل الإنسان وللا بتحسى إن فيه أشياء وافدة زائرة من الممكن أن تثير هذه السعادة والأفضل إيه إلهام شاهين: أصل السعادة دى مسألة نسبية أنا ممكن ألاقى سعادتى مثلا في إن أنا بسعد الآخرين حتى لو الآخرين دول ما أسعدونيش مش كل حد كده يعنى كل واحد بيلاقيها في حاجة يا إما حاجة وافدة يا إما حاجة من جواه احنا مش زى بعض احنا مختلفين قوى مفيد فوزى: أنا سمعت بيتقال إن أصعب أنواع السعادة هي السعادة التي تنتظرها من الآخرين فظيعة لإنك انت تبقى قاعدة في حالة انتظار لقطرة سعادة وإن الإنسان من الداخل من الممكن إن سعادته يصنعها بنفسه إذا استطاع إلهام شاهين: أنا عن نفسي أقدر أقول إن السعادة بالنسبة لي لو قدرت أسعد الآخرين لكن أنا ما بتنظرش حاجة أبدا من الآخرين مفيد فوزى: ما بتنتظريش سعادة زائرة إلهام شاهين: ما بنتظرش حاجة متبادلة يعنى إن أنا عملت لك فانت لازم تعمل لي عشان أنا أبقى سعيدة مفيد فوزى: إن مذهب منهج يعنى العطاء دون انتظار الرد إن كان العطاء بقى إسعاد الآخرين إلهام شاهين: آه ممكن لكن هو عطاء أنا بحب أدى للناس بحب أشوف السعادة في عيون الآخرين بتدينى طاقة إيجابية يعنى لما بشوف حد سعيد بيدينى طاقة إيجابية لما بشوف عينين فرحانة بتلاقينى في الحالة دى مفيد فوزى: هل لو قلت لماذا تمثلين يبقى الإجابة لكى أعطى من نفسي فنا للآخر يسعده إلهام شاهين: بالتأكيد يهمنى إن أنا أسعد الآخر أسعد الإنسان عموما أعبر عنه ، أحرك فكره ، أحرك مشاعره أفيده أقول له رسالة أعلمه حاجة وبعدين كل دور ممكن الناس تاخد منه حاجة حتى الأدوار اللي فيها شر بنطلع برسالة منها مفيد فوزى: آه عشان كده بقى الشر آخد منه أنا يعنى زى ما بيقولوا في علم السيناريو خيط ، سألت مرة الأستاذ نجيب محفوظ قلت له أستاذ نجيب عايز أسألك سؤال مهم فهو وطى كده وقال لي إسأل قلت له ليه كل بطلاتك موممسات مفيش ولا واحدة شريفة قال لي ما هي شريفة لجوزها يعنى ما تمثلش عندي قماش دراما إنما المومس حياتها هتنتصر في النهاية نصر أكتوبر لكن في نهاية الأمر فيها تقلبات الزمن وحركة الزمن وفيها الحياة نفسها وجهة نظرك فيما يقوله نجيب محفوظ إلهام شاهين: دايما الشخصيات العادية اللي هي بتمثل الأغلبية مفيهاش دراما يعنى لن تضيف شئ للناس خلاص ما انت عارف الست الكويسة اللي قاعدة وعايشة من يوم ما اتولدت مع أهلها وبعدين اتجوزت جوزها وقاعدة تربى عيال مفيش دراما في حياتها ومفيش رسالة معينة ممكن تتقال لإن ده عادى انت شايفه وشايفه كثير لكن الشخصيات غير العادية اللي هم مش كثير في الحياة لكن تقدر تقول من خلالهم رسالة ما هي لو جواها شر ما هي لو هي منحرفة هتشوف الشر ده عمل فيها إيه في حياتها هتشوف ازاى انقلب عليها أو ازاى فيه حد مد لها إيده فاتغيرت فبقت حاجة ثانية فبشكل غير مباشر بيعلمك الخير إنك لو لقيت حد ممكن تساعده ممكن تقف جنبه مفيد فوزى: إذن نجيب محفوظ إن القماشة دى إلهام شاهين: رؤية سليمة مفيد فوزى: رؤية سليمة طيب لما أقول لك علشان خاطر الناس تفهم إلهام شاهين: ما هو ما احنا كان عندنا مثلا الست أمينة متجوزة سيد أحمد لا كانت محترمة جدا لا هو مش كل بطلاته لكن هو بيركز أحيانا على النوعية دى من الانحرافات لإن هو عاوز يقول رسالة من خلالها مفيد فوزى: انتى لما بتحسى إن القبلات بين زوج وزوجة في فيلم أظن إنه أمر مشروع وللا أنا غلطان إلهام شاهين: على فكرة احنا عندنا في السينيما المصرية غير في السينيما الأمريكية أو في السينيما الأوروبية احنا بنحاول نوحى بده بتلاقى مثلا الراس دخلت في الراس وبعدين يقطع الكادر انت تأكدت إن ممكن تكون حصلت البوسة بس هي ممكن ما تكونش حصلت حقيقى يعنى احنا نعتمد على الإيحاء أكثر من الفعل لإن برضه عندنا حتة يعنى هي فيه حتة كده عندنا مفيد فوزى: لما تحسى إن فيه شاب بيتحرش بفتاة ويحاول فك ضفائرها مش ده واقع في العمل الفنى إلهام شاهين: آه طبعا وواقع في الحياة مليان كمان في الحياة طبعا مفيد فوزى: يعنى عايز أقول إيه مش أمر شاذ في الدنيا ولا في الفن إلهام شاهين: بالعكس ده انت تسمع عن كم حوادث التحرش تسمع عن كم بقى مرعب مفيد فوزى: لو تتذكرى في أحد أفلامك زوجة آمنة والرجل محترم وبعدين سافر راح الكويت والتقى هناك بالسكرتيرة وحبها وحصلت أحداث هائلة إلهام شاهين: ده مسلسل قصة الأمس مفيد فوزى: تمام أنا برضه عايز أقول إيه إلى أي مدى واقعية هذه الأشياء وأنا قلت هذه النماذج ليه هادفا إلى الترويج للفن مهما كانت الصور لأن الشرف المطلق رهان على المستحيل يعنى مش ممكن أبدا هتتعمل أفلام فيها بيت عادى وزوجة وزوج عادى عايشين حياة مفيهاش دراما إلهام شاهين: إيه اللي هيفيد الناس مفيد فوزى: إيه اللي هيفيد الناس هو ده السؤال إلهام شاهين: آه مفيد فوزى: فيه عبارة بتتردد باستمرار إن بيتقال فيها باستمرار إن لكل حرية في التناول سقف في اللغة وفى المشاهد هل ده ضد الإبداع فهمينى عشان ده مهم قوى الناس تعرفه وأنا حرصت وأنا بقابلك إن أنا ألجأ إلى ما يمكن أن يسمى بشرح المنهج الإنسانى لا أنا عندي تحريض إنك تشتمى فلان ولا علان إلهام شاهين: أنا عارفة الحاجات دى عشان كده أنا حبيت يعنى إن أنا ألتقى مع حضرتك مفيد فوزى: وعشان كده أنا بقول لك هل فيه سقف للحريات إلهام شاهين: آه يعنى مثلا في الأفلام الأمريكية ممكن الممثلة تطلع عارية تماما عارية تماما تشوف كل أجزاء جسمها لا ده مش ممكن يحصل في عمل مصرى أو عربى مفيد فوزى: بدليل إنك بتقولى إن البوسة بالإيحاء إلهام شاهين: آه طبعا فيه مبادئ وقيم فيه تقاليد اجتماعية مش ممكن نقول إن دى حرية إبداع لا ففيه حدود لكن مثلا لما واحدة لابسة مايوه في بحر هو في مكانه في مكانه لكن مش هتجيب مثلا مايوه وبتتمشى في الشارع وتقول أنا حرة لكن انتى المايوه جوه البحر بتعومى فيه ده شئ مشروع محدش يقدر يقول لها حاجة وده موجود في الحياة كل الناس بتنزل بمايوه في البحر لكن لو مشيت بمايوه في الشارع تبقى كارثة فطبعا مفيش حرية بلا سقف حسب كل بلد وظروفها مفيد فوزى: طيب ولغة الحوار إلهام شاهين: ولغة الحوار طبعا محكومة ، محكومة جدا يعنى الخروج عن الآداب العامة والألفاظ الخارجة لا ده غير مسموح ده مش حاجة مكتوبة ده ميثاق شرف بداخلنا احنا الفنانين يعنى ده مش حاجة مكتوبة لنا على الورق إن قولوا إيه وما تقولوش إيه بس احنا المفروض إن احنا بنرتقى بأذواق الناس حتى لو الألفاظ الخارجة دى بتتسمع في الشارع وده العادي في المجتمع أو في خناقة أو كذا احنا مش المفروض إن احنا ننقل الواقع بحذافيره مفيد فوزى: طيب فيه بحبحة في بعض الإعلانات لدرجة إن ممكن الأطفال يرددوا ده في إعلان لما ينضرب أب ويعنى حاجات مش عايز أذكرها إلهام شاهين: دى بتتعمل بطريقة كوميدى يعنى مش مؤثرة قوى يعنى انت ممكن تاخدها وتضحك على إنه حاجة funny مفيد فوزى: لما تبقى على لسان الأطفال مفيهاش مشكلة من وجهة نظرك إلهام شاهين: يعنى أصل المشكلة لو حجمنا قوى المسألة يا أستاذ مفيد الأطفال كل جيل بييجى أكثر من اللي قبله منفتح جدا على العالم يعنى أنا ما بقعدش أبدا على النت ولا بقعد أطلع من على اليوتيوب ولا عندي فيس بوك ما عنديش الكلام ده لإنى ما اتعودتش عليه من صغرى فما بحبوش يعنى أقرأ المقالة في الجورنال لكن ما أفتحش على النت أطلعها أنا دى لكن مثلا الأطفال الصغيرة عندي في العيلة ولاد أخويا وولاد أختى ما بيسيبوش الجهاز ده من إيدهم من وهم عندهم 4 سنين الطفل قاعد على الجهاز ده فإذا هو ما شفش ده حتى في الحاجات المصرية انت مفتوح على العالم كله هيشوف ، هيشوف وبقى عنده وعى قدرة على إنه يستوعب إيه الصح وإيه الغلط والحاجات دى ممكن يشوفها ويتتريق عليها مش شرط إنه يقلدها يعنى مش كل حاجة هيشوفها نقول احنا خايفين على الأطفال لحسن يقلدوا عندهم وعى مفيد فوزى: تفتكرى في الزمانات القادمة ممكن تطلع شركة الهداية مثلا وتعمل أفلام خالية الدسم طبعا فاهمة يعنى إيه خالية الدسم تفتكرى تنجح وتهتم بالحياة وتاخد أنماط ونماذج من البشر هل تفتكرى هتنجح هل هذه الدراما تصل إلى القلب إلهام شاهين: يعنى إذا مجردة من كل مضمون وقاعدين بنقول وعظ الوعظ ده ممكن حد يطلع يقول وعظ لكن إن انت هتجيبه في الفيلم كده بشكل مباشر مش هتقبله انت لما تحب توصل فكرة في الفيلم لازم السيناريست يكون ذكى جدا إنه هو ما بيديش لك الملحوظة بشكل مباشر يعنى له أسلوب إنه يوصلها لك ويدخلها جواك ومشاعرك تنفعل معاها وعقلك يفكر فيها لكن لو قلتها له بشكل إن أنا بقول محاضرة محدش هيسمعنى ولا هيهتم فاصل عبارة عن جزء من مسلسل قصة الأمس فاصل مفيد فوزى: أخونة الفن إلهام شاهين: أنا أطلب لو الإخوان فعلا أنا أسمع إن هم عندهم تمويلات كبيرة وعندهم فلوس كويسة قوى إن لو عايزين يخدموا المجتمع ويخدموا الفن يخشوا ينتجوا أفلام زى الناصر صلاح الدين مثلا للأستاذ يوسف شاهين ، زى فجر الإسلام وإسلاماه مفيد فوزى: يعنى يتجهوا اتجاه إلهام شاهين: أفلام تاريخية محترمة مفيد فوزى: أو دينية إلهام شاهين: آه زى رابعة العدوية اتعملت ، زى الشيماء أخت الرسول يفهمونا الدين بجماله يعنى سواء أفلام عن الدين الإسلامى ، أفلام عن الدين المسيحى ، حتى عن الدين اليهودى يعنى احنا ممكن نبقى أعداء لإسرائيل لكن احنا مش ضد الدين اليهودى بالعكس أنا عايزاهم يعرفوا الناس قصة حياة سيدنا موسى وقصة حياة سيدنا عيسى وقصة حياة سيدنا محمد بالشكل الجميل اللي فيه التسامح مفيد فوزى: هل في عالمنا العربى ممكن نلجأ إلى تصوير حياة الأنبياء إلهام شاهين: آه ليه لا مفيد فوزى: أنا بقول يعنى هل تعتقدى هل نحن نملك أن نناقش حياة الأنبياء وللا ده أمل إلهام شاهين: أنا شفت مسلسل إيرانى بيناقش قصة حياة سيدنا يوسف وهى بلد إسلامية وشفت مثلا مسلسل عجبنى جدا قصة حياة السيدة مريم العذراء في مسلسل إيرانى وكنت سعيدة بها سعادة وعرفت حاجات ومعلومات كانت مهمة جدا مفيد فوزى: وهذه إيران خدى بالك إلهام شاهين: وهذه إيران وبلد إسلامية في كل شئ مفيد فوزى: والشيعة بقى إلهام شاهين: بالضبط اللي احنا بنقول إن هم كمان أصعب من المسلمين مفيد فوزى: هل تعتقدى بتتمنى أفلام دينية أتصور إنك تتمنى فيلم كان يرد على الفيلم إلهام شاهين: آه يا ريت مفيد فوزى: المسيء للرسول إلهام شاهين: أنا لسه كنت هكمل على فكرة أنا ما بسميهوش فيلم هم ناس مختلة عقليا قاعدة في إيدها كاميرا وبتهزر بتهزر وبعدين ده مقتطفات وبعدين أنا قريت إن اللي كانوا بيعملوه ما كانوش بيتكلموا خالص عن الرسول عليه السلام وإن دول بيهزروا عن وقت الجاهلية كان الناس قبل الأديان ما تدخل كان شكلهم ازاى يعنى قبل 2000 عام أنا قريت كده الله أعلم كانت نيتهم إيه لكن اللي عمل الدوبلاج هم اللي أضافوا اسم الرسول عليه السلام واسم شخصيات زوجاته وكده طبعا ده شئ مسيء ومسف وحقير وتافه وغبى وأنا حاسة إنها ناس عبيطة هي ناس مختلة عقليا جواها أمراض نفسية عشان تصور يعنى أنا مش عارفة كان إيه اللي في دماغهم يعنى إن هم عايزين يسيئوا للدين الإسلامى عايزين يعملوا فتنة طائفية بين الأديان وبعضها عايزين يعملوا فتنة بين دول مفيد فوزى: ليه التوقيت يعنى لو فكرتى كده ليه التوقيت إلهام شاهين: مفيش شئ مقصود مفيد فوزى: أنا هقول لك طرح كده ويعنى إلهام شاهين: بس يوم 11 سبتمبر بالذات وعايزين يقولوا إن دى شخصية المسلمين عايزين يقولوا إن احنا إرهاب وإن احنا عقلنا مفيد فوزى: ولماذا لا يمكن أن يكون من المنافس الشرس لأوباما يود إحراجه أمام العالم الإسلامى فتحصل مثل هذه الأشياء فلما يتقتل سفير في ليبيا ويحصل انقطاع عام للسفارة يعلن للعالم إن أوباما لن يستطع أن يحمى البعثات الدبلوماسية في العالم وبالتالي الانتخابات تكون سلسلة لما لا إلهام شاهين: ما هو السياسة دى كلها لعبة قذرة وبشعة وأنا مش عارفة إيه دخل السفارات بالموضوع يعنى أنا لغاية دلوقتى مش قادرة أفهمها أولا الفيلم مش إنتاج أمريكى الحكومة الأمريكية مالهاش دخل به خالص والسفراء مالهم يعنى الفيلم هم كاتبين إن أنتجه واحد إسرائيلى أنا مش عارفة ازاى مطرود من مصر وساب الديانة وبقى من ديانة إسرائيل مفيد فوزى: يعنى احنا وقعنا في الفخ إذن احنا دخلنا الفخ إلهام شاهين: طبعا مفيد فوزى: كان تقديرك إيه في نجاح وبراءة عادل إمام وهو أول تعبير قاله فاكره كويس قوى قال إن انتصارى في البراءة هو أيضا رد لإلهام شاهين كان إيه تقديرك إلهام شاهين: بص أنا كنت متأكدة على فكرة إن هو هياخد براءة لإن هو مفيش قضية هو هتبقى كارثة لو احنا هنتحاسب على أدوارنا يعنى لو أنا دلوقتى عملت فيلم دينى لسه بنقول عايزين أفلام دينية وعملت واحدة من الكفار فاللى من الكفار دى هتسيئ للدين وهتسيئ كافرة هيحاسبونى على إنى كافرة عملت أنا دلوقتى واحدة بتقتل هتحاسبنى تقول لي قتلتى عملت مدمنة مخدرات وللا تاجرة مخدرات هتقول لي إنتى مدمنة وللا تاجرة مخدرات يعنى فيه شئ مش منطقى يعنى الفنان عادل إمام عمل دور واحد بيدعى أنه متدين هل لا يوجد في الحياة واحد بيدعى أنه متدين هو لم يقدم متدين حقيقى عشان تقول له دى مش صورة المتدين الحقيقى بنقول أنه بيدعى أنه متدين يعنى أنا أعمل دور واحدة في أي مجال بس كدابة مفيد فوزى: الهام تعتقدى ده عبارة عن إيه المستقبل لهذا الفن بيبقى مخرف وللا ما عندوش مش فاهمان وللا ناقص الذهنية تفتكرى إيه إلهام شاهين: هم كلهم مع بعض يا أستاذ مفيد يعنى بصراحة ال3 مع بعض مفيد فوزى: يعنى خلاط إلهام شاهين: لإن ده تخريف انت هتحاسب الناس على دور يعنى انت هتخلط الفن بالواقع كارثة مفيد فوزى: برضه لازم نبقى أمناء في مصر الرقابة محترمة يعنى أنا الهجوم اللي كان على سيد خطاب أنا لا أدرى سببه لا أعرف لماذا سيد خطاب من الذين يعنى في يوم من الأيام كان في البلد دى فيه مصطفى درويش إلهام شاهين: طول عمرها محترمة وبعدين احنا عندنا جهات يعنى هم لازم يحترموا التخصص فيه جهات ، فيه رقابة ، فيه وزارة ثقافة مسئولة عننا فيه نقابات مسئولة عننا فيه نقاد بيكتبوا عننا وبنحترم آراءهم من حقك تنقد وممكن فيلم ما يعجبكش مهما كان اسم النجم بس بتأدب ، بحضارة مفيد فوزى: مش ملاحظة إن فيه بعض النجمات غازلن التيار الإسلامى وأنا بقولها بشكل شديد التهذيب إيه رأيك لما قريتى الكلام ده أنا لا أخشى الصعود الإسلامى أنا لا أخشى التيار الإسلامى يا ستى معلش ما احنا أوكى محترمين رأيك إنما إيه فكرة الإعلان الفن فن وللا أنا غلطان في المعنى الفن فن إما إنك بتطلعى فنانة تجسدى دور أو تقعدى في البيت إنما إيه فكرة إن أنا لا أخاف التيار الإسلامى يعنى نوع من الغزل الصريح الرزيل المنافق هل ده يعنى يليق بالفنانة إلهام شاهين: في كل مجال يا أستاذ مفيد هتلاقى الإنسان الصادق والإنسان الكداب والإنسان المنافق والإنسان الخواف يعنى فيه واحد ممكن يقول كلام ده خوف أحسن حد يتعرض له أحسن حد يضايقه كل واحد حسب شخصيته وفيه إنسان مواجه وجريئ أنا بيعتبرونى مواجه وجريئ إنه بيقول رأيه وخلاص أيا كان بس بقول رأيى بتحضر بتهذب بدون إساءة لأحد أنا أقول أنا مش معاهم أنا مش مع فكرة فكرك لا يناسبنى بس أقول بأدب لكن ما أتطاولش وما أنافقكش حتى لو انت بقيت في الوضع الأقوى أنا ما اعرفش أنافق يعنى ما اعرفش لا أكدب ولا أعرف أنافق خالص معروف عنى كده طول عمرى فأنا مش قادرة أعيب على حد لإن فيه من هو ممكن يكدب وفيه من هو تعود على النفاق وفيه من هو الحقيقة خايف مفيد فوزى: لو جاءت لك جارة جنبك في البيت اللي انتى ساكنة فيه أو صديقة وقالت لك خلاص أنا مش قادرة أعيش ههاجر بما تنصحيها يهمنى قوى أعرف وجهة نظرك إلهام شاهين: هقول لها لا وإوعى واحنا مش هنسيب بلدنا لحد كإن أصل اللي بيقول كده بيحسسنى كإننا بقينا محتلين واحنا بنهرب من هذا الاحتلال دى بلدنا ومحدش يقدر ياخدها مننا فأنا برفض ده تماما وبنصح كل اللي حوالى مفيش حاجة اسمها تسيب بلدك انت مش ضيف دى مش ترانزيت جاى فترة وتمشى دى بلدك دى الأساس أصعب حاجة على الإنسان إنه يلاقى وطن ، وطن حقيقى يعنى سهل إنك تروح بلد ثانية وتشتغل فيها مفيد فوزى: أصل ممكن يقولك الشخص اللي هيهاجر تقول لك مثلا أنا حاسة بغربة إلهام شاهين: هقول لك الحق مفيد فوزى: اتفضلى إلهام شاهين: احنا دلوقتى كلنا حاسين بغربة واحنا جوه بلدنا ودي أصعب على الإنسان من إحساسه بالغربة وهو بره البلد بس احنا حاسين بغربة يعنى فيه ناس غريبة فيه آراء غريبة فيه أحداث غريبة يعنى الكلام عن الإسلام يقول لك إيه فيه مذيعة طلعت على الشاشة بالحجاب كده الإسلام دخل مصر طب ما هي جيلان حمزة كانت مذيعة من 20 سنة بالحجاب وكانت موجودة مش فيه فنانات كثير بيمثلوا بالحجاب ومحترمات وبيعملوا أدوار وبطولات فيه عفاف شعيب وفيه صابرين وفيه حنان ترك وفيه غيرهم وغيرهم ، وغيرهم ما هو فيه كثير محجبات لإن ده موجود في الحياة فبالتالي حتى مش محجبات وتعمل دور تعمله بالحجاب يعنى هند صبرى في أحلى الأوقات عملت شخصية بالحجاب هي أصلا مش محجبة ، معالى زايد كانت عاملة مسلسل بالحجاب اللي كان مع الفنان نور الشريف حضرة المتهم أبى يعنى عادى يعنى إيه دلوقتى فيه مذيعة طلعت بالحجاب الإسلام دخل مصر أمال احنا إيه بقى لنا قرب ال 2000 سنة مسلمين أمال احنا كنا إيه قبل كده يعنى هو الإسلام هبط فجأة بعد الثورة فيه شئ غريب فيه كلام أنا لما بسمعه بتخض أقول الله أمال احنا كنا قبل كده إيه ما احنا طول عمرنا مسلمين يعنى بنصلى بنصوم بنزكى بنعمل خير بنسافر بنحج بنعمل عمرة كلنا كل اللي بيقدر يعمل حاجة بيعملها كويسة للخير فاصل مفيد فوزى: إلهام أنا بحب قوى في حسين كمال الله يرحمه أنه مخرج تفاصيل بحب في محمد خان أيضا عنايته بالتفاصيل هسألك عن تفاصيل صغيرة لما سمعتى شتيمتك ذات يوم مين أول فنانة كلمتك وقالت أنا قلقت عليكى إلهام شاهين: أنا الحقيقة مع الأسف أنا كنت مسافرة لما اشتمت كنت بره مصر كنا في رحلة علاجية أنا وأختى العزيزة وصديقتى يسرا فما سمعتش عرفت إن فيه حد بيشتمنى بس ما حدش جرؤ يقول لي الألفاظ اللي اتوجهت لي خالص مفيد فوزى: لكن مين اللي بلغك مين أول حد بلغك إلهام شاهين: الحقيقة عرفت من هالة سرحان قالت لي إلهام عندك فكرة إن فيه واحد بيشتمك وبتاع انتى والفنانين هي قالتها لي كده بيشتم الفنانين وبيشتمك من ضمن مفيد فوزى: مين شخصية عامة كانت قلقة من هذا السباب إلهام شاهين: يعنى أنا أغلب الناس اللي أنا أعرفهم يعنى أنا عرفت من هالة لإنها قالت لي أول ما تنزلى أنا عايزاكى تردى على هذا الكلام لكن أنا كل النجوم والنجمات اتصلوا بى يعنى مثلا الفنانة نجلاء فتحى كانت منفعلة جدا لما كلمتنى وازاى وكثير ، كثير ، كثير من النجمات الفنانة شمس البارودى فنانتنا المعتزلة مفيد فوزى: كلمتك إلهام شاهين: آه طبعا مفيد فوزى: قالت لك إيه إلهام شاهين: قعدت تهدينى بالقرآن وبالأحاديث وإن أنا ما ازعلش وإن أنا أصبر وإن ربنا اللي هيجيب لي حقى وإن الله يدافع عن الذين آمنوا وقعدت قالت لي الحقيقة كلام جميل هي والفنان حسن يوسف مفيد فوزى: مين شخصية كان من رأيها إنك ما ترديش وما تدخليش في هذا النفق إلهام شاهين: يسرا وهى معايا قالت لي إوعى تردى ما ترديش مفيد فوزى: مين شخصية نصحتك إنك تعملى بلاغ للنائب العام إلهام شاهين: بصراحة ده قرار أنا خدته مفيد فوزى: انتى شخصيا إلهام شاهين: آه مفيد فوزى: مين سمعتى إنه متعاطف معاكى وما توقعتيش مطلقا إنه يكون متعاطف إلهام شاهين: فيه كثير اتصلوا بى من شباب الثورة وقالوا لي انتى عارفة احنا كنا زعلانين منك لإن يعنى كان عندنا شوية تحفظات على آراء انتى قلتيها بخصوص الثورة بس احنا دلوقتى معاكى ونسينا أي حاجة ومعاكى تماما والله واحد قال لي بكانى قال لي احنا مستعدين نموت علشانك قلت له لا بعد الشر المسألة أنا مش داخلة معركة ولا حد يموت ربنا يديكوا طولة العمر ويخيلكوا لشبابكوا ولأهاليكوا لكن حسيت انفعال فظيع أحمد عزمى لإن أنا مثلت مامته فكلمنى كإن واحد اتقال على مامته كده فحالة الثورة اللي كان فيها ثورة عارمة كثير الحقيقة من فنانيننا كله كان مستاء الفنان عزت العلايلى كان مستاء الفنان عادل إمام كان مستاء الفنان محمد صبحى كان مستاء كل زمايلى ليلى علوى كانت زعلانة جدا وقعدت تقول لي احنا جنبك احنا معاكى انتى عايزة إيه يسرا بتكلمنى كل نص ساعة بتطمئن على مفيد فوزى: امتى قررتى إنك تقفلى الموضوع ده إلهام شاهين: أنا من أول ما طلعت في البرنامج مع هالة أول ما رجعت أنا ما كنتش عارفة حجم اللي بيتقال فيه راجل بيشتمك انتى والفنانين لكن إيه اللي بيوجه لي محدش جرؤ فعلا أنا زعلت ولمت ناس كثير طب قولوا لي قلت لي معلومة بتتشتمى قل لي بيتقال كذا ، كذا أو قولى لي بيتقال كذا ، كذا محدش قال لي لكن لما فوجئت في برنامج هالة وهى حست إن أنا فعلا مش عارفة من كلامى مش عارفة حجم اللي بيتقال فقالت لي انتى ما تعرفيش فعلا قلت لها لا أنا مسافرة وأنا لا بدخل على النت وبقعد أدور على اليوتيوب أنا ما بحبش ما بحبش هذا الجهاز أصلا وأنا هناك ما عنديش قنوات مصرية يعنى ما كانش عندنا غير قناة العربية بنشوف الأخبار فلما نزلت لي على الشاشة قالت لهم طب نزلوا لها بقى على الشاشة تشوف ولو جزء صغير أنا كان قلبى هيتوقف وزعلت حقيقى في لحظتها من الكلام قلت لها معقول ، معقول تنزلى لي حاجة زى كده إيه ده مش مصدقة إن الكلام ده اتقال على كده في التليفزيونات كده وعلنا يعنى أنا من أكثر المرات اللي أنا جاء لي تشوك ( chock ) في حياتى يعنى جاء لي صدمة وبعدين مش عارفة أتماسك الناس يقولوا لي انتى بكيتى أنا ما بكيتش دموعى ما نزلتش أنا ما اعرفش أبكى كإلهام أنا ممكن أبكى في دور بس كإلهام أنا ما أعرفش أبكى لكن أنا من الانفعال يعنى عارف بقى فيه دموع متحجرة في عينيه لكن مش بكاء بس من الانفعال إن أنا منفعلة جدا ومش حابة أطلع كده أدام الجمهور يعنى ده كمان موترنى يعنى أنا حاسة إن صوت ضربات قلبى من الغيض طالع في المايك مفيد فوزى: ما الفرق عندك بين الشجاعة والتهور إلهام شاهين: لا الشجاعة الصدق ما هو الصدق في الزمن ده بيسموه شجاعة لكن التهور إنك تغلط في حق الآخرين بحكم إنك شجاع يعنى ده تهور لكن ما هياش شجاعة مفيد فوزى: هل دفعتى في حياتك ثمنا باهظا من أجل شجاعتك الأدبية في كثير من المواقف إلهام شاهين: مش في كثير من المواقف الأيام دى بس لكن شئ مسيء جدا لي الحقيقة ولصورة لإن هو كمان بيطلق عليه داعية يعنى ده يخوفنى على بكرة ويخوفنى على المستقبل اللي جاى ويخوفنى على الشباب والأولاد اللي طالعين فشيئ يسيء للبلد يعنى هذا الشخص أساء للإعلام لإن فيه ميثاق شرف إعلامى وأساء للدين الإسلامى لإن كل تعاليم الإسلام ترفض الإهانة لأي إنسان أنا مش عشان فنانة لأي عيلة معدية في الشارع مش من حقك إنك انت تسيء لها القرآن كان بيصف الرسول بيقول وإنك لعلى خلق عظيم ربنا سبحانه وتعالى قال على الرسول عليه الصلاة والسلام وإنك لعلى خلق عظيم والرسول عليه الصلاة والسلام قال إنما بعثت لكى أتمم مكارم الأخلاق يعنى الرسول بيحثنا على الأخلاق وقرآننا اللي هو قانوننا في الحياة بيحثنا على الأخلاق فلما ييجى واحد قلبا وقالبا إنه بيدرس دين أو هو داعية إسلامى وكل ما يفعله ويقوله يتعارض مع مبادئ الإسلام فأنا أقول له أنت تشوه صورة الإسلام فده يحزننى إنه بيشوه صورة الإسلام بيشوه صورة مصر لإن مصر مش كده مصر مش كده ولا أخلاق المصريين كده ولا أخلاق المصريين تتاخد كده وترمى المحصنات وتتكلم كده عن النساء مش معقول يعنى أسأت لبلدك وأسأت لدينك وأسأت لمهنتك اللي انت بتشتغلها وأسأت للإعلام لإن فيه ميثاق شرف إعلامى وأسأت الحقيقة لصورتنا أدام العالم لإن فيه ناس بتاخد صورة سيئة عننا مفيد فوزى: صورتنا أمام العالم إلهام شاهين: بالضبط
