اتجاهات

مسعد أبو ليلة : أعزائي المشاهدين أهلا بحضراتكم إلى حلقة جديدة من برنامج اتجاهات في 25 يناير كان العالم يتحدث عن ثورة رائعة بيضاء وحدث المصريين جميعا من خرج منهم ومن لم يخرج إلى الميدان ولكننا الآن في وضع مختلف تماما بسبب خلافاتنا رغم أن خلافاتنا بسيطة أحيانا لكننا من هواة تعميقها نحن الآن في منطقة ما بين الثورة والفوضى ، بين الانتقال إلى سلطة مدنية أو إسقاط الدولة ، بين التظاهر السلمي المطلوب وبين التآمر الواضح والعنف المقصود ، بين مطلب المصريين ومطالبهم المشروعة وصناعة الصدام الذي يصل لحد المؤامرة ، بين محاولة العبور الآمن وبين دفع مصر إلى بحور الضياع ، كثير من أبناء الشعب بدأ يسأل عن عائد الثورة وهل كان ينبغي أن يدفع المصريين فاتورة من أجل الخلاص من نظام فاسد لقد انتهت معركة الانتخابات البرلمانية فاز من فاز وخسر من خسر الذين فازوا لم يتصوروا فوزًا بهذا الكم والذين خسروا لم يتوقعوا خسارةً بهذا الحد الجميع فائز فائزًا كان هو مصري بالتأكيد هو يريد الخير لبلاده لكن هناك أعباء ضخمة تنتظر كلا من الأغلبية والجالس في مقاعد البرلمان ، بالتأكيد علينا أن نبدأ صفحة جديدة تتوحد فيها إرادتنا لأننا أمامنا تحديات كثيرة لا يستطيع فصيل واحد مهما كانت قدراته أو تيار واحد مهما كانت خبراته أن يتحمل أعبائها بمفرده ليس أمامنا سوى الحوار والتوافق ولم نعد نملك طرف الاختلاف أو إضاعة المزيد من الوقت أعزائنا المشاهدين دعونا نرحب بضيفنا المهندس باسم محمد كامل عضو مجلس الشعب عن حزب مصر الديمقراطي في أحد الأحزاب الممثلة للكتلة المصرية باش مهندس باسم أهلا بحضرتك ، وبداية نقول لحضرتك مبروك لعضوية مجلس الشعب وموفق إن شاء الله ، نلقاكم بعد الفاصل
فاصل
عبارة عن بعض لقطات لثورة 25 يناير
مسعد أبو ليلة : أهلا بحضراتكم مرة ثانية وحديثنا متواصل مع حضراتكم ومع المهندس باسم محمد كامل ، باش مهندس باسم طالعت معنا هذه اللقطات وتعيدنا بالذاكرة لأحداث ثورة 25 يناير بتفكرك بإيه هذه اللقطات ؟
م . باسم محمد كامل : بتفكرنا بلحظات من أجمل اللحظات في تاريخ مصر المصريين كلهم أثبتوا إن هم موجودين وإن هم مهتمين ببلدهم الشباب المصري اللي كان دائما متهم إن هو شباب سلبي وشباب ضائع وشباب مش مهتم غير بالكرة والأغاني وكل ما هو تافه وكل ما هو غير مجدي وغير إيجابي أثبت إن هو على الرغم من إنه بيحب الكرة وعشاق للكرة وزى الألتراس ، على الرغم إن هم بيحبوا الأغاني وبيحبوا عمرو دياب وبيحبوا عبد الحليم وبيحبوا أم كلثوم إنما شباب إيجابي وبيحبوا بلدهم ، على الرغم إن هم ما بيقرؤوش كتب وقاعدين على الإنترنت وعلى الفيس بوك إنما هم مثقفين وعارفين تاريخ بلدهم وبيخلقوا مستقبل جيد ، الشباب اللي الناس طلعتهم من حساباتها واحنا رايحين نعالجهم هم اللي كسبوا الرهان .
مسعد أبو ليلة :وبالتأكيد أنت تقصد تافه طبعا بعيدا عن الفن وعن الرياضة تقصد الأمور التافهة أيضا
م . باسم محمد كامل : الأمور اللي هي غير إيجابية
مسعد أبو ليلة :ده صحيح ، باش مهندس باسم ونحن على مقربة يعنى ونحن على مسافة أيام معدودة ونحتفل جميعا بثورة 25 يناير بسألك كحزب المصري الديمقراطي وأنت ممثل له هل ستشاركون في هذا الاحتفال بهذه المناسبة؟
م . باسم محمد كامل : الحقيقة ده كان سؤال مطروح بقى له فترة احنا كان عندنا اجتماع الهيئة العليا للحزب امبارح كان ده من ضمن الأسئلة اللي فيه احنا هنعمل إيه يوم 25 يناير الحقيقة السؤال كان مطروح لإن فيه دعوتين ؛ دعوة اسمها إن يوم 25 يناير هو الذكرى الأولى لثورة 25 يناير فوجب علينا أن نحتفل بها والدعوة الثانية بتقول إن مفيش ثورة حصلت احنا هننزل يوم 25 يناير عشان نستكمل الثورة ونستكمل ما بدأناه ، الحقيقة هي الإجابة كانت يعنى مش أبيض واسود الإجابة كانت بينهم لازم نعترف إن الثورة اللي حصلت يوم 25 يناير كان لها إنجازات ولها إخفاقات ؛ إنجازات زى ما أنا دائما بحب إني أقول من أهم إنجازات ثورة يناير إن الشعب المصري حطم الخوف وحطم السلبية وأصبح شعب عنده أمل حطم اليأس احنا على مدار ال30 سنة اللي فاتت كنا سلبيين وخايفين ويائسين
مسعد أبو ليلة :ويسعى دائما لتحقيق حريته وإرادته
م . باسم محمد كامل : في ال30 سنة اللي فاتوا
مسعد أبو ليلة :لا يعنى إن هو أصبح ...
م . باسم محمد كامل : أصبح الآن غير مفيش خوف ، إيجابي ، عنده طموح وعنده أمل لإن هو عارف إن اللي هو عايزه يقدر يحققه في الأول كان يقول مفيش فائدة دى انتصارات معنوية صحيح إنما انتصارات مهمة جدا وده أهم انتصار حققته ثورة 25 يناير إن هي غيرت جوانا حاجة مهمة جدا ، المكاسب الثانية إن احنا النهاردة بقى فيه حاجة اسمها مجلس الشعب شئنا أم أبينا هو باختيار الناس ، رضينا أو ما رضي ناش عن الآيات الديمقراطية اللي تمت بها الانتخابات سواء كانت بنسبة 100 % أو أقل من كده إنما حصل انتخابات ديمقراطية بتعبر بدرجة أو بأخرى عن الشعب المصري ده إنجاز احنا ما شفنا هوش في خلال ال30 سنة اللي فاتوا فهو فيه إنجازات
مسعد أبو ليلة : شفنا مشاركة إيجابية من الشعب
م . باسم محمد كامل : على الرغم برضه الناس نزلت عشان خاطر ال500 جنيه الغرامة آه أنا بأؤكد إن فيه ناس نزلت عشان ال500 جنيه الغرامة بس الأغلبية العظمة نزلت عشان حست إن بقى لها دور دى بلدهم وإن هم نازلين عشانها ، كل دى إنجازات حصلت ، على الجانب الآخر لا لغاية كده لا دى مش ثورة لغاية كده ده إصلاح إنما احنا لما بنتكلم عن الثورة ، الثورة كانت بتقول عيش ، حرية ، عدالة اجتماعية النهاردة وأنا قاعد معاك الشوارع كلها في مصر واقفة علشان مفيش بنزين مش ممكن النهاردة بعد الثورة لمدة سنة لسه بنعانى من مشاكل هي نفسها اللي كنا بنعانى منها في عهد مبارك بس بصورة أسوأ بقى فيه إعلام دلوقتى
مسعد أبو ليلة : لا خلينا واحدة واحدة هل هذه الأزمات
م . باسم محمد كامل : أستأذنك أكمل الجملة علشان ينتهي الكلام
مسعد أبو ليلة : ما هو عشان البنزين انته تعدى على نقطة ثانية
م . باسم محمد كامل : لا مش هروح لنقطة ثانية ، لغاية النهاردة بيبقى فيه كلام بيتقال إن الثوار والثورة هي السبب في مشكلات في المجتمع زى الغاز ، زى الاقتصاد ، زى البنزين في حين إن المتظاهرين اللي كانوا في ميدان التحرير طول ما هم كانوا في ميدان التحرير أو في شارع قصر النيل مثلا كان الإعلام كله بيتكلم على إن الناس قافلين الميدان وموفقين عجلة الإنتاج وموفقين حياة الناس لما الشباب مشيوا وفضل الكردون بتاع الجيش قافل الشارع محدش بيتكلم عليها بيقول إن احنا قافلين شارع قصر النيل ومخليين عيشة الناس مرارا مع إن هي هي الحالة طيب ما تفتحوا الطريق وتخلوا الأمن موجود يعنى أمنوا لهم مكان وافتحوا الطريق في حين إن هم قافلين الطريق محدش بيشتكى فأنا عايز أقول إن الثورة لسه ما حققتش
مسعد أبو ليلة :هو أكيد المواطن هيشتكى لو فيه تعطيل لمصالحه أيا كان المصدر انت تتفق معى في هذا مفيش حد سائق تاكسي بيعبر ما احنا بنركب معاهم يعنى يعبر عن وقف الحال أي وقف حال أيا كان مصدره
م . باسم محمد كامل : أنا عايز بس أكمل ده حاصل النهاردة الميدان مقفول أو جزء من الميدان مقفول في حين إن الأيام اللي فاتت دى اتقفل السكة الحديد واتقفل الطريق الزراعيأنا طبعا برفض ده تماما مع احترامي طبعا لأن الشعب من حقه إنه يعتصم ويتظاهر في أي وقت وفى أي مكان بما لا يخل بمصالح الناس ، الناس دى لما عملت ده لأنهم ما كانوش لأهداف ثورية أو مش ثوار ما اتسلطش عليهم الضوء إن دول بيوقفوا عجلة الإنتاج مع إن السكة الحديد وقفت يعنى الصعيد كله اتقفل وإسكندريةكلها اتقفلت لما قفلوا في قبلي ولما قفلوا في بحري ما اتسلطش عليها الإعلام زى ما سلط في الميدان اللي هو 100 متر في 100 متر لما اتقفل أنا عايز أقول إن فيه توجه إن الثوار بيعملواضد الدولة وده مش حقيقي عايز أقول إن الإعلام ما اتصلحت بالأسلوب الكافي فيه طبعا تطور رائع بدليل إن أنا قاعد مع حضرتك النهاردة بنتقد الإعلام اللي أنا بتكلم فيه ،فيه تطور رائع حصل إنما تطور شكلي لسه عايز ين أكثر من كده بكثير جدا
مسعد أبو ليلة : الشكل عندنا يعنى معناها الصوت والصورة والديكور والحاجات دى لكن انت بتقول مضمون دلوقتى
م . باسم محمد كامل : أنا عايز أقول حاجة ده تطوير إصلاحي
مسعد أبو ليلة : ما فيه تطور في المضمون أهه
م . باسم محمد كامل : كان ينفع مبارك لو هو كان موجود كان ينفع هيعمل اللي إحنا بنعمله ده يدينا الفرصة دى ، ده تطوير إصلاحي مش تطوير جذري لسه بدري قوى ولازم نعترف يعنى لازم منظومة الإعلام تعترف إن لسه بدري إن هي توصل للكمال لإن إحنا لو قلنا إن النهاردة بقينا 100 % خلاص إحنا هنرجع
مسعد أبو ليلة : يعنى أنا عايز أقول منظومة الدولة كلها
م . باسم محمد كامل : طبعا
مسعد أبو ليلة :يعنى لا منظومة الإعلام ولا منظومة الشرطة ولا منظومة الاقتصاد
م . باسم محمد كامل : كده أنت بتكمل بقية كلامي
مسعد أبو ليلة :طيب ما هو كان النظام منظومة منهارة فإحنا دلوقتى ثورة قامت وأصبحنا نخطو بخطى الثورة وإنجازات الثورة بتحقق رويدا رويدا في خطوات يعنى قدر لها أن تسير في هذا المسار بمشاركة شعبية لا ننكرها ، إعلان دستوري ، استفتاء شعبي والعجلة تدور إنجاز شعبي من خلال برضه البرلمان كما تفضلت حضرتك ونحن سائرون
م . باسم محمد كامل : الإجابة بقى على سؤال إحنا هنشارك يوم 25 يناير مع الثوار حتى نستكمل ما حققناه في يوم 25 يناير 2011 الأهداف التي لم تحقق وفى نفس الوقت إحنا من حقنا إن إحنا نحتفل ونفخر
مسعد أبو ليلة :وفى نفس الوقت الاحتفال لإن فيه إنجازات حققت الاحتفال بالإنجازات اللي حققت
م . باسم محمد كامل : نفتخر بما تحقق في 25 يناير إلا إن إحنا ما يحق لناش قوى إن إحنا نحتفل لإن فيه ثمن دفع كبير قوى في الثورة دى ، فيه دم ، فيه شهداء ، فيه مصابين ، هاخد من كلام حضرتك إن الشعب المصري كثير منه قدم معاناة جامدة جدا أنا أعتقد إن حضرتك تقصد المعاناة الاقتصادية ووقف الحال أنا عايز أقول لأهلي وناسي
مسعد أبو ليلة : وكان ضحى بدمه قبل كده
م . باسم محمد كامل : آه أنا عايز أقول لأهلي وأواسيهم إن اللي كان بيقبض 10 قروش نتيجة وقف الحال بقى بيقبض 5 واللي ساب شغله دى كلها تضحيات كبيرة جدا أنا أحييهم وأواسيهم على ده لكن عايز أقول له إن لك قريبك أخوك أو ابن عمك أو جارك أو في الشارع اللي وراءك فقد عين أو أصيب أو فقد عينيه الاثنين أو فقد ابنه أو أخوه أو فقدت زوجها أو فقدت أبوها أظن تضحيتك مهما كانت لا ترقى إلى حجم تضحية الناس دى لازم بقى عارفين إن إحنا مهما قدمنا احنا ما قدمناش حاجة توصل لمستوى التضحية اللي الناس دى قدمتها يعنى لما نقول احنا تعبنا أو احنا ضحينا أو احنا قدمنا نبقى عارفين إن احنا مهما قدمنا ما قدمناش حاجة ، الحروب في أي دولة لما بيموت عندها مليون شهيد وبتنتصر في الحرب بتحتفل وأول ناس بيحتفلوا هم أهالي الشهداء وبيقى الدم اللي بذل في سبيل هذه الحرب دم فرحة ما بنبقاش زعلانين إنما لو أنا دخلت معركة ومات لي واحد بس وأنا خسرت المعركة دى أنا بزعل على الواحد ده أكثر ، فعشان كده لما نحقق كل أهداف الثورة هيبقى من حقنا كلنا إن احنا نحتفل وأول ناس هتحتفل معانا هم أسر الضحايا وأسر الشهداء
مسعد أبو ليلة :إذن يا باش مهندس ذكرت حاجتين يعنى احتفال بما تم من إنجازات وبذكرى الثورة في حد ذاتها وأيضا تطعم هذه الاحتفالية بالمطالبة باستكمال هذه المطالب وباستكمال مسار الثورة مش كده ؟
م . باسم محمد كامل : صحيح
مسعد أبو ليلة : طب إذن تصورك للاحتفال أو كيف يكون الشكل الذي تظهر بيه مصر وشعب مصر أمام نفسه أولا وأمام العالم في ذكرى ثورة عظيمة ؟
م . باسم محمد كامل : طيب ، أنا أرفض تماما طبعا كل مظاهر البهجة والابتهاج في هذا الاحتفال علشان الشهداء زى ما قلت الناس دى بذلت دمها في سبيل غايات محددة لم تتحقق بعد فما يحق لناش إن احنا نحتفل إنما الاحتفاء واجب أول حاجة لازم نحتفي بها هي أسماء الشهداء فيه اقتراح جميل جدا أن تتلى أسماء الشهداء كلهم في ميدان التحرير ، الاحتفال يتم إن الناس تعمل مسيرات سلمية تجوب كل شوارع مصر تعرف الناس إيه اللي تم من إنجازات الثورة وإيه اللي لسه ما تمش الثورة لما حصلت ما حصلتش عشان احنا كنا 10 آلاف ولا 20 ألف نزلنا ميدان التحرير ، الثورة حصلت وتحولت المظاهرات لثورة لما نزل مليون ونزل في يوم من الأيام 10 مليون في ميادين التحرير في كل العواصم والمحافظات الناس هي اللي عملت الثورة مش مجموعة صغيرة ولا مجموعة الشباب احنا لازم الناس دى اللي فقدت إيمانها بالثورة تدريجيا نرجعها معانا ونبقى كلنا في معسكر واحد نقول لهم إن الناس اللي دخلت مجلس الشعب منكم وبكم ، نقول لهم إن الناس اللي قاطعت الانتخابات عندها وجهة نظر ، الناس اللي شاركت عندها وجهة نظر
مسعد أبو ليلة :بس استوقفتني عبارة حضرتك قلتها نجوب الشوارع وتطالب بطريقة سلمية يعنى برضه كلمة مطلقة يعنى أنهى شوارع كيف تكون هذه التجمعات وكيف يكون تأمين هذه التجمعات وكيف نحافظ على سلمية ورونق هذه التجمعات الاحتفالية ، المفروض إن هي احتفالية حتى لو كان فيها مطالب ما هي احتفالية لإن مناسبة ونحتفل بها دون أن نضمن أن نؤمن هذا المسار نؤمنهم نفسهم أو نؤمن أن يضم وسطهم مندسون أو سميها زى ما تسميها بحيث إن هم حتى ما يشوهوه همش ما يشو هوش الصورة اللي هم قاصدين إنها تكون كويسة وحضارية ؟
م . باسم محمد كامل : طيب خليني أرجع بالذاكرة
مسعد أبو ليلة :لإنى لما أكون أجوب شوارع بصورة مطلقة يعنى عايز تكون أكثر تحديدا
م . باسم محمد كامل : طيب أنا طبعا ما عنديش شبه تفاصيل الناس هتمشى في أنهى شوارع امتى وازاى بس هرجع أجاوب على سؤال حضرتك
مسعد أبو ليلة : لا يعنى أقصد أقول هل كده هتكون عشوائية وللاه تكون منظمة
م . باسم محمد كامل : طبعا هتبقى منظمة
مسعد أبو ليلة :أعتقد إن الشئ المنظم حضاري يعنى
م . باسم محمد كامل : طبعا أنا بس عايز أقول إن في 25 يناير لما نزلنا المسيرات اللي اتحركت يوم 25 يناير ووصلت في النهاية لميدان التحرير ما قامت بأي عمل تخريبي على الرغم من إننا وصلنا لعدد أنا ما عنديش حصر دقيق من 50 إلى 100 ألف اللي اتحركوا من ميادين مختلفة وتوجهوا كلهم لميدان التحرير العنف أو الفوضى أو الهرج اللي حصل كان من العنف اللي جاء من الشرطة
مسعد أبو ليلة : ما هو ما كانش حد عارف بقى إن دى ثورة وهتنجح ويتربص بها المتربصون ومن يحاول إفساد ده
م . باسم محمد كامل : فالثوار نفسهم لما تحركوا يوم 25 وفيما تلاها من فاعليات لم يكن هناك أي عنف إلا من إما أجهزة الشرطة الرسمية أو بعد كده سلاح البلطجية اللي كان بينزل دائما عشان يواجه الثوار غير كده ما كانش فيه عنف ، ما كانش فيه بلطجة ، ما كانش فيه اعتداء على المواطنين أو المحلات أو الأماكن العامة بعد كده الأحداث اللي بقت تحصل بقى فعلا كل مسيرة بتحصل بقى فيه ناس بتندس فيها شئنا أم أبينا بقى الثوار ما لهمش كارنيهات لا فيه كارنيه ولا ختم
مسعد أبو ليلة :لا بس فيه لجان تأمين
م . باسم محمد كامل : تمام
مسعد أبو ليلة :أنا أعمل حاجة أأمن نفسي وأحافظ على صورتي قبل أي حاجة عشان ما محدش يتهمه بإنه ما هو العاطل بيبقى مع الباطل زى ما ببقول المثل أنا دلوقتى هيأت مناخ لأفعال أنا أأباها أصلا كثائر من الثوار بس أنا اللي إديت المناخ لأعمال هي بقى أعمال عنف ، أعمال تخريب تشوه من قام بهذه المطالب بهذه يعنى المظاهرة السلمية زى ما سيادتك تفضلت يبقى أنا قبل ما أعمل حاجة أأمنها كان فيه لجان بتنظم وكان فيه لجان شعبية وبتنظم
م . باسم محمد كامل : حضرتك بتوصى إن الناس تأمن المظاهرات وللا متخوف فقط من إن المظاهرات تتحول إلى عنف
مسعد أبو ليلة : لا ده احنا بنطرح الكلام يعنى مع حضرتك
م . باسم محمد كامل : أنا بأكد لحضرتك إن مفيش مجموعة هتنظم مسيرة إلا لما يبقى عندها مجموعة بتنظم المسيرة دى وبتقول القواعد الأساسية لأي مسيرة إن هي مسيرة سلمية نضال إن احنا نثبت إن الثوار بتوع 25 يناير ما كانوش من الفضاء مش جاؤوا ومشيوا زى ما بيتقال كثير في الإعلام إن الثوار بتوع 25 يناير خلاص مش موجودين كما لو إنهم كانوا ملائكة جاؤوا من السماء أو كائنات فضائية هم الثوار اللي موجودين ، هم اللي هيتحركوا ، هيعملوا قواعد اللي هيخرج عنها هم اللي يلفظوه أتمنى إن الجيش إذا كان ببقول إن هو عايز يحتفل يبقى موجود بكثافة بيأمن هذه المسيرات ، بيأمن الأماكن العامة احنا هندعمهم وهم يدعمونا إن احنا نحمى الأماكن دى وما يحصلش أي اعتداء على أي مكان عام ولا نهدد سلم وأمان أي مواطن في مصر
مسعد أبو ليلة : دعنا نتواصل مع حضرتك يا باش مهندس باسم بعد أن نجرى هذا الاتصال مع سيادة اللواء عبد الرافع درويش الخبير الاستراتيجي سيادة اللواء عبد الرافع مساء الخير
ل . عبد الرافع درويش : السلام عليكم ورحمة الله أهلا يا أستاذ مسعد تحياتي لك ولضيفك الكريم وبنأمل من الله الأمن والأمان لمصرنا الحبيبة اللي احنا يعنى كجيل أكتوبر لإن احنا حاربنا في أكتوبر و 67 و 73 هم بيكملوا الرسالة الجميلة والثورة الجميلة اللي طلع بها شباب مصر اللي هم في عينينا وأولادنا وأخواتنا اللي احنا شايلينهم على دماغنا إلى إن هم برضه كانوا أساس من أسس التغيير في مصر للأحسن وبعد ما خلصوا في التحرير فوجئنا بهم في حاجة جميلة جدا إن هم بينظفوا مكانهم وبيلونوا وبيدهنوا عاوزين نرجع ثاني
مسعد أبو ليلة : يعنى المظاهر دى وقف أمامها العالم طويلا بالإعجاب
ل . عبد الرافع درويش : ده اندهش بها العالم
مسعد أبو ليلة : واندهش ازاى ثوار ينظفوا مكانهم يعنى
ل . عبد الرافع درويش : ما هي المظاهرات حصلت في انجلترا يعنى كانوا بيقولوا لبعض be Egyptian يعنى خليك مصري لأن كانت روح متحضرة وروح الشباب الحلو الثائر بس هم
مسعد أبو ليلة : إذن كيف نأخذ هذه الروح وهذا المسلك الحضاري في ذكريات الثورة في 25 يناير القادم وكيف تكون الاحتفالات مناسبة لهذا الحدث الكبير من وجهة نظر حضرتك ؟
ل . عبد الرافع درويش : ده مش حدث صغير ده حدث كبير هز العالم وزلزله وفكرنا بعد حرب 73 المخابرات الأمريكية كلها تغيرت فاحنا النهاردة غيرنا العالم كله بالشباب الحلو ده فاحنا عاوزين نبدأ بالروح الحلوة اللي كانت موجودة مع الشباب بتوعنا الحلوين اللي هم قاموا بهذه الثورة المباركة البيضاء النظيفة تستمر هذه الروح لأن هم اللي المفروض يتصدوا لأي مندس في وسطهم عشان يحافظوا على ثورتهم عشان يحافظوا على سمعتهم وبعدين في نفس الوقت معلش هي الثورة ما كانش لها رأس ، ما كانش لها قيادة فهذه القيادة لو كانت موجودة كانت مشت الأمور أحسن من كده فاحنا دلوقتى هم يجتمعوا برضه على رأى واحد ، يجتمعوا على قيادة موجودة هذه القيادة توجههم للي جاى ما أخدوش مواقع مثلا في مجلس الشعب زى ما احنا عارفين احنا بنوصى إن هم ياخدوا 30 موقع أو 30 كرسي في مجلس الشعب
مسعد أبو ليلة : المجلس الاستشاري أوصى بهذا
ل . عبد الرافع درويش : وبعدين ياخدوا كمان خبرة في المحليات عشان لما يوصلوا لمجلس الشعب كمان يبقى عندهم الثورة والخبرة يجمعوا بين الاثنيين أما دلوقتى مابنبكيش على اللبن المسكوب ونقول الدستور أولا خلاص المرحلة دية انتهت احنا عاوزين الشباب الطاهر النقي بتاعنا ده اللي هو الامتداد والكروموزومات الحلوة اللي موجودة في الشعب المصري تمتد لإن احنا ما عندناش تغريب احنا شعب أساسا يعنى شعب مسالم ، شعب آمن ما ينفعش إن احنا ندخل في وسطنا مين هيحارب مين شعب هيحارب جيش وللا شعب هيحارب شرطة ما هي الشرطة منين ما هي الشرطة من الشعب والجيش من الشعب احنا عاوزين نبقى حاجة واحدة ونورى العالم كله أسطورة جميلة في احتفالات 25 يناير القادمة بتقول يا مصر احنا موجودين المصريين أهمه العالم كله نبقى احنا القدوة بتاعتهم
مسعد أبو ليلة : سيادة اللواء كيف ترى الوصول بانتخابات حرة ونزيهة ومعبرة وتسفر عن برلمان بنسميه برلمان الثورة كتحقيق لهدف من أحد أهدافهم ؟
ل . عبد الرافع درويش : أولا الشعب قال كلمته أيا كان اللي حصل احنا خلاص دلوقتى الشارع قال كلمته واختار احنا نقبل بهذا الاختيار ونجعلها نقطة بداية مضيئة وعلى التيار الإسلامي اللي هو فاز واحنا بنحترمه كلنا يتفضل يقود هذه السفينة إلى بر الأمان بنقط مضيئة ويبقى قدوة للشباب علشان الشباب يتمسك به ويتداخل معاه إنما ما نرجعش ناخد في مجريات أمور ثانية ونلاقى نفسنا بنرجع لميدان التحرير ثاني وبنبوظ الاحتفال وبنبوظ صوت مصر منظر مصر في العالم كله احنا العالم دلوقتى كله خايف ييجى مصر بالاستثمارات بتاعته علشان القلق اللي احنا فيه طب نضرب لهم مثل إن احنا بلد الأمن والأمان علشان الاستثمارات دى تيجى ما هي الاستثمارات دى علشان نشغل الناس علشان الناس تشتغل الناس تبدأ تبنى في مصر ثاني احنا عاوزين بناء قوى جدا
مسعد أبو ليلة : ولتكن الاحتفالات دعوة لعودة الاستثمار قويا كما كان
ل . عبد الرافع درويش : بالضبط
مسعد أبو ليلة : والسياحة كذلك
ل . عبد الرافع درويش : السياحة كمان معلش بعد إذن حضرتك السياحة أنا لسه جاى من إسكندرية خطرت لي فكرة كويسة قوى مع الدكتور خالد المنيسى كان بيتكلم فيها ترعة المحمودية دى ناس كانوا جاؤوا لها زمان وكانوا عاوزين ينظفوها ويعملوا على الناحيتين حضارة جميلة جدا ويعملوا متحف يقرأ قصة حياة إسكندرية وقصة إسكندرية من أولها لآخرها وجندول يمشى في المياة زى في إيطاليا كده يا ريت بقى التفكير الجميل ده نبدأ كلنا نفكر
مسعد أبو ليلة : أفكار جميلة وغيرها من الأفكار إن شاء الله نسعد بتحقيقها شكرا سيادة اللواء باش مهندس باسم هل لك من تعليق ؟
م . باسم محمد كامل : لا أنا بس عجبنى الكلام
مسعد أبو ليلة : طب إذن سيادة اللواء تحدث عما يجب أن تكون عليه الاحتفالات تعكس يعنى هذه الصورة الحضارية التي قامت بها الثورة المصرية والثوار المصريين والشعب المصري ده يخليني أسأل حضرتك رد فعلك أو تعقيبك أو رأيك عما تتناوله المواقع الإليكترونية فيس بوك وتويتر وغيرها من دعوة البعض إلى الاعتداء على المؤسسات والمنشآت العامة ، الاعتداء على أقسام الشرطة ، الاعتداء على الجيش والمؤسسات يعنى كيف ترى أو كيف تقرأ هذه التجاوزات ؟
م . باسم محمد كامل : أنا طبعا ما أعرفش مين اللي ببقول كده يعنى الأول خلينا نتفق يعنى مين اللي ببقول ده وبيقوله ليه يعنى أنا شخصيا ما أعرفش
مسعد أبو ليلة :لو نقول مبارك قال اللي انت بتشوفه
م . باسم محمد كامل : آه ما أنا هقول لحضرتك برضه رأيي لو شفنا 25 يناير 2011 احنا لما نزلنا كان الكلام إن هي مظاهرة سلمية وكلمة سلمية دى هي الأساس يعنى احنا كنا بندرس علم اسمه علم التغيير السلمي يعنى ازاى تغير سلميا ، ازاى نغير النظام الحاكم الديكتاتوري المستبد بطريقة سلمية وده علم يعنى الموضوع مش بييجى كده ازاى نقنع مواطن بسيط إن هو ينزل يشارك في عمل إيجابي ونقول له ما تخافش لإن انت مش هتتعرض إنك تعمل حاجة غلط ومحدش هيعتدى عليك زى ما كنا بنعمل مثلا في الوقفات الاحتجاجية ضد الطوارئ أو ضد التعليم وفاة خالد سعيد الناس كانت بتنزل تقف على الكورنيش يمسكوا المصحف أو الإنجيل يقرؤوا فيه أو يدعوا لخالد سعيد أو يدعو للضحايا ده كان عمل بنقول للناس اتعلم إنك تبقى إيجابي وتنزل من غير ما تضايق حد وتعبر عن حاجة وتقنع الناس الثانية إن هي تشارك زيك وتبقى إيجابية زيك هو ده فكرة التغيير السلمي ببساطة ، النهاردة اللي ببقول احنا لما نزلنا ما كانش هدفنا إن احنا ننزل نعتدى على الشرطة في 25 يناير الشرطة هي اللي اعتدت على المتظاهرين وحصل العنف إنما الشرطة لو كانت سابت الناس بفكر في السيناريو ده حتى لو الشرطة كانت من الذكاء يومها أنها لو سابت الطريق للثوار وراحوا ميدان التحرير وسابوهم في ميدان التحرير كان إيه اللي هيجرى كانت هتبقى مظاهرة وكنا هنتجمع ونقعد شوية كانت أي إجراءات إصلاحية كان عملها الرئيس المخلوع وقتها كانت الناس هتوافق وتمشى إنما العنف ولد عنف والعنف ولد دم
مسعد أبو ليلة : برضه ما جاوبتنيش كيف تقرأ مثل هذه الدعوات التحريضية أيا كان مصدرها
م . باسم محمد كامل : النهاردة احنا بنؤكد إن احنا لازم ننزل في مسيرات سلمية مظاهرات سلمية اعتصام سلمى نرفض العنف
مسعد أبو ليلة : إذن هل تضم رأيك دلوقتى مع وزير الداخلية اللي صرح بإن أي مساس بمنشآت أو خروج عن أو تجاوز يبقى في حق الممتلكات الخاصة أو العامة أو ما شابه سيقابل بعنف هل تؤيد هذا ؟
م . باسم محمد كامل : ده كلام منطقي يعنى خلينا نتفق برضه يعنى أنا لو ضابط شرطة والقائد بتاعى أو القيادة بتاعى أو الدولة أو المرتب اللي أنا باخده عشان أحمى مبنى لما ألاقى ناس جايين يدخلوا المبنى ده بالعنف أقول لهم اتفضلوا عشان أنا أبقى كويس يعنى ده كلام مفهوم مش عايزين نقول كلام حتى علشان نكسب تعاطف من شباب الثوار كلام يخالف ضميرنا في النهاية ضابط الشرطة بيؤدى وظيفته واحنا مش ضد لا فرد الشرطة ولا ضد ضابط الشرطة ولا الداخلية إجمالا احنا ضد الممارسات السلبية والسيئة في جهاز الشرطة ما احناش ضد الجهاز وما احناش ضد الأفراد احنا نفسنا جهاز الشرطة يشتغل ويبقى قوى وينشط لإن قوة جهاز الشرطة ده في النهاية لمصلحتي أنا كمواطن ولمصلحتي أنا كثائر أنا عايز لما أعمل مظاهرة أعمل مظاهرتي في حماية أفراد جهاز الشرطة أنزل أعمل مظاهرة وأمشى في الشارع أتظاهر والشرطة ماشية جنبي بتحمينى أنا ده غاية المراد أنا مش نازل ضد الشرطة أما بقى فكرة إن احنا هنروح نحتل المبنى الفلانى لا ده فيه أكثر من كده بقى ده احنا نروح على وزارة الدفاع ونروح مش عارف ده كلام طبعا لا يرقى إلى مستوى العقل والمنطق ولا يرقى مستوى إن احنا نجادله حتى
مسعد أبو ليلة : باش مهندس يعنى بسألك عن التجربة الانتخابية وهل يعنى كنت تتوقع الفوز بهذه النسبة بالنسبة يعنى للكتلة وبالنسبة للحزب المصري الديمقراطي ؟
م . باسم محمد كامل : طبعا واحنا بنخطط في بداية الحملة الانتخابية فيه أصوات تشاؤمية وفيه أصوات تفاؤلية إنما كان دائما فيه صوت العقل اللي هو ما بين الاثنين والمقاعد اللي احنا حصلنا عليها كانت بدرجة كبيرة جدا قريبة
مسعد أبو ليلة :تشاؤم يعنى من النتيجة ؟
م . باسم محمد كامل : أفندم
مسعد أبو ليلة :من النتيجة مش كده ؟ وللا التشاؤم بقى من قيام ومن إجراء العملية الانتخابية ككل ؟
م . باسم محمد كامل : لا احنا داخلين في الانتخابات نقول احنا هنحصل على 200 مقعد واللي يقول لك احنا مش هناخد غير مقعدين
مسعد أبو ليلة : ما هو ده بالنسبة للنتيجة
م . باسم محمد كامل : آه بالضبط
مسعد أبو ليلة : لكن كان هناك متشائمون يعنى من قيام يعنى أو إجراء الانتخابات أصلا
م . باسم محمد كامل : لا محدش كان شغال في العملية الانتخابية والعملية السياسية وكان ببقول إن الانتخابات مش هتتم لإن القوى السياسية مصلحتها إن الانتخابات تتم المجلس العسكري كجهة حاكمة للدولة في هذا الوقت من مصلحتها إن الانتخابات تتم ، الشعب من مصلحته إن الانتخابات تتم ففكرة إن الانتخابات مش هتتم كان خوف ما لوش مبرر الحقيقة
مسعد أبو ليلة : لا الخوف ده كان ناتج من الوضعية اللي كانت موجودة ، الأمن يعنى بعد الأحداث اللي حصلت
م . باسم محمد كامل : آه طبعا عند حضرتك حق وده جزء إيجابي جدا يحسب للمجلس العسكري جهاز الجيش والشرطة في تأمين الانتخابات إنما هو يؤخذ عليهم بناحية سلبية هم لما أرادوا بقرار سياسي إن هم يأمنوا مصر قدروا يأمنوها فالانفلات الأمني في الفترة اللي فاتت ال10 شهور اللي فاتوا هم يسألوا عليه لإن هم احنا كنا بنظن إن هم مش قادرين بيعملوا أقصى ما في جهدهم ومش قادرين لكن هم طلعوا قادرين
مسعد أبو ليلة : مش هنخش في قصة بقى
م . باسم محمد كامل : يسألوا عليه
مسعد أبو ليلة : لا يعنى مثلا عملية منظمة زى الانتخابات مش هقارنها برضه يعنى احنا بناخد وندى مع بعض في الكلام
م . باسم محمد كامل : آه طبعا
مسعد أبو ليلة : مش هنقارنها برضه بمسألة تداخل يعنى يختلط الحابل بالنابل والسيئ مع الصالح هتبقى الاشتباك صعب
م . باسم محمد كامل : التأمين أعلى بمراحل من اللي كان بيتم في الاستقرار والأمن والأمان بناع مبارك يعنى لما كانوا بيقولوا احنا في عهد الاستقرار كان في الانتخابات بيموت بالعشرات وده كان شئ طبيعى ما كناش بننزعج لما نلاقى مات هنا 10 ومات هنا 2 ومات هنا 5 وفى النهاية مات 30 أو 40 واحد في الانتخابات ما كناش بننزعج يعنى كان إجراء عادى احنا الانتخابات عدت المرة دى بمنتهى الهدوء والسلام احنا طبعا بنجيي اللي عمل ده سواء شرطة أو جيش ونظموا الأمور بدرجة كبيرة جدا وبنجيي القضاء اللي أشرف على الانتخابات على الرغم من كمية سباب كبيرة جدا
مسعد أبو ليلة : ويتحملوا برضه بعض التجاوزات والكثير من الضغوط
م . باسم محمد كامل : طبعا احنا أول مرة بنعمل انتخابات لازم نتفق يعنى أنا سامع بأذني موظف في لجنة الفرز موظف ببقول والله فين أيام مبارك باللفظ كده كنا بنروح نزور وناخد الفلوس ونمشى إنما دول كان بقى لهم يومين بآيتين في لجنة الفرز عشان يخلصوا النتيجة فبالنسبة لنا احنا أول مرة نعمل انتخابات دى الحقيقة يعنى
مسعد أبو ليلة : طبعا ده على سبيل التهكم يعنى إذن باش مهندس باسم بسألك شكل البرلمان وأنت أحد أعضائه الآن شكل البرلمان القادم وكيف يكون فاعلا بعيدا عن البرلمانات السابقة اللي احنا عهدناها كيف يكون يعنى ما هي أولويات طرحكم في البرلمان ككتلة أو كحزب مصر الديمقراطي وكيف يعنى تؤمن في هذا البرلمان أن يكون فاعلا قائما بواجباته من حيث الرقابة على الحكومة ، الأداء الحكومي و أيضا التشريع ؟
م . باسم محمد كامل : طبعا أول حاجة هيبقى فيها كلام هي فكرة الدستور دى المعضلة الأولى اللي هنشتغل عليها وأعتقد إن المجلس ده لو أطال الله في بقائه المدة كاملة 5 سنين هيبقى أهم حاجة عملها هي الدستور اللي هيعملها في أول يوم هي أهم حاجة هيعملها في بقية ال5 سنين أنا بس عايز أؤكد في مقدمة حضرتك بتقول هيبقى فيه حزب أغلبية وفيه معارضة الكلمة مش دقيقة لإن في السابق حزب الأغلبية هو الحزب الحاكم في اللقطة دى حزب الأغلبية هو مش الحاكم يعنى في النهاية لسه المجلس العسكري بيقر إن مجلس الشعب مش من حقه يعمل الحكومة فهتفضل الحكومة حكومة المجلس العسكري وهنفضل كلنا معارضة يعنى أغلبية وأقلية في مجلس الشعب احنا بقينا كلنا المعارضة احنا صوت الشعب اللي بيراقب الحكومة أيا كان بقى إنما لو بعد فترة بسيطة بعد تعديل الدستور أصبح من حق الحزب الأغلبية أن يكون هو من يشكل الحكومة ووصلنا إلى إن الدولة تصبح برلمانية فهنا هيبقى حزب الأغلبية في مجلس الشعب هو الحزب الحاكم اللي هيشكل الحكومة وباقي الأحزاب هي أحزاب معارضة فكرة بقى التحالفات اللي بتتم النهاردة التحالفات اللي كانت قبل الانتخابات كان اسمها تحالفات انتخابية شئنا أم أبينا يعنى أنا تحالفت معاك عشان نخش الانتخابات دى مع بعض مش بالضرورة إطلاقا إن أنا لما يبقى فيه قانون عايزين نمرره في مجلس الشعب إن رأيي يبقى زى رأيك على سبيل المثال احنا في الكتلة فيه حزب التجمع وحزب مصر الديمقراطي وحزب المصريين الأحرار ، حزب المصريين الأحرار حزب رأسمالي ، حزب التجمع حزب اشتراكي ، واحنا حزب ديمقراطي اجتماعي ، حزب وسطى لما نكون بنتكلم على حاجة تخص العدالة الاجتماعية أكيد يعنى رأى الحزب الاشتراكي هيبقى غير رأينا غير رأى المصريين الأحرار بما إنه حزب رأسمالي لما نكون بنتكلم على حاجة زى الضرائب والضرائب التصاعدية أكيد الرأي الرأسمالي غير الرأي الاشتراكي إنما لما نكون بنتكلم على قضايا فساد وقضايا محاكمة اللي عملوا بلاوى قبل كده ، لما نكون بنتكلم على قوانين الصحة ، قوانين التعليم أكيد هيبقى الموضوع مش هنتختلف فيه لا إسلامي ولا ليبرالي ولا يساري يعنى كلنا هنبقى مع بعض في بعض القضايا فأنا أقصد إن في مجلس الشعب لما نتكلم على تحالفات انتخابية هي انتهت مع أول يوم في الانتخابات إنما يبقى إن التنسيق قبل الدخول فيه تنسيق بيجرى النهاردة ، فيه اتصالات بين كل الأحزاب يعنى لو عملت ماسورة كده حطيت فيها كل الأحزاب في العمود الرأسي والعمود الأفقي تتلاقى كل الأحزاب اتصلت بكل الأحزاب مع اختلاف التوجهات بتاعتها لإن داخلين على حاجة اسمها رئيس لمجلس الشعب ووكلاء لمجلس الشعب ووكلاء اللجان ورؤساء اللجان كل الكلام ده ما ينفعش حزب أغلبية أن يستأثر به لإن المفروض المرحلة اللي جاية يحكمها أو في مجلس الشعب 70 ، 80 % في المناصب اللي زى دى بتيجى بالتوافق
مسعد أبو ليلة : هو التوافق اللي إن شاء الله نأمله سواء في مجلس الشعب توافق على وضع الدستور ، التوافق على المرحلة القادمة إن شاء الله في مستقبل مصر والتوافق أيضا على احتفالية جميلة يوم 25 يناير في ذكرى الثورة العظيمة اللي بينهض بها مصر وتوافق أيضا على تذكر الشهداء الأبرار والمصابون اللي مهدوا لنا الأرض ومهدوا الطريق نحو ديمقراطية ونحو مستقبل باهر لمصر باش مهندس باسم محمد كامل عضو مجلس الشعب عن الحزب المصري الديمقراطي أحد الأحزاب الممثلة للكتلة المصرية شكرا جزيلا ونلقاكم دائما على خير في اتجاهات إلى اللقاء