حديث المدينة

مفيد فوزي: أهلا بحضراتكوا.. تقدم يوما ما مسيرة كانت في يناير الغليان، تقدم المسيرة وهو الوزير والأستاذ الجامعي، كانت تهتف بإسقاط النظام وكانت مكونة من مجموعة كبيرة من أساتذة من أعضاء هيئة التدريس وطلاب الدراسات العليا، حين مرت المظاهرة أمام مجلس الشعب هتفوا بما فيهم الوزير والأستاذ الجامعي " باطل...باطل...باطل" وقد ألححت عليه الظهور ولكنه اعتذر وقال لقد ظهرت مرة أو اثنين ولست أريد على الإطلاق متابعة الظهور أمام مشاهديك، ولأن هذا ربيع تكاثر الأبطال فهو يرفض أن يكون بطلا على شاشة، أتحاور مع عقل علمي هادئ كان يوما ما وزير للنقل ثم خرج من الوزارة ليس بإرادته، أما و أن أصبح الرأي العام قائدا وليس منقادا وأصبح واعيا وليس مضللا فقد أقنعت الأستاذ الدكتور عصام شرف بضرورة التحاور، ليس من أجل نبش الماضي أو الخربشة أو أو ....أو إمتاع حضراتكوا بحكايات مسلية، بل من أجل الغد، أتصور أنها القضية الأولى الآن بالنقاش والتحاور خصوصا أن الصخب قد يعوق البناء ولي من المعقول أن تبدأ ثورة شباب فيها كل الحمية وكل العافية ثم أن نكتشف أن مصر مهلهلة ، لابد من البناء لآبد من الحوار عن الغد
فاصل
مفيد فوزي: د. عصام شرف..ليه انا ألححت عليك بضرورة الظهور مع انك عقل علمي هادئ، مش هاقولك احكي لي حكايات، مش هيبدو من كلامك أي درجة من درجات التشفي، فقط انت كفاءة مصرية لما سبت الوزارة هنا وبرده بين قوسين مش عايز أسألك متى دخلت ولماذا خرجت عشان تروي بعض التفاصيل، أنت ذهبت إلى دبي وقابلتك في دبي، لقد كنت مستشارا للناس في دبي في منطقتك، منطقة النقل، لماذا ترفض هل هو تكاثر الابطال هل هذا ربيعه
د. عصام شرف: انا حسيت ان انا كنت من اكثر فترات حياتي توترا لما يحدث لكني في داخلي كنت سعيد جدا اني حسيت ان الواحد ممكن يكون بيعمل لوجه الله والوطن بعيدا عن أي صخب
مفيد فوزي: هل اندهشت
د. عصام شرف: لالا مما حدث انا دائما أقول فيما حدث "أنا لا اندهش الا ممن يندهش"، لأنه اللي حصل في الحقيقة هو تراكمات معينة ووصلت بينا لكده وممكن نبقى نتكلم فيها، لكن اللي عايز اقوله: عندما يأتي الطلب من الاستاذ مفيد فوزي فيبقى من الصعب الواحد يرفض الظهور واتمنى ان اكون عند حسن الظن
مفيد فوزي: ربنا يخليك، د. عصام هذا الرأي العام الآن لم تصنعه النخبة ولكن صنعه شباب التحرير الذي باستشهاده كتب صيغة جديدة للحياة، هل كنت ترى مقدمات لهذه الشرارة
د. عصام شرف: شوف حضرتك طالما نتحدث عن الحدث الأعظم اللي حصل ده فخلينا نبص له دايما كماضي وحاضر ومستقبل، انا هاتكلم مع حضرتك في الماضي كيف حدث، انا متهيألي وقد اكون مخطئ وانا احب في البداية بس اقول لحضراتك هذه قناعات وتصورات لي وقد أكون مخطئ وكثير من اللي انا قلته انا اتعلمته من أساتذة لي انما ربنا سبحانه وتعالى اكرمني بأن انا استطيع ان احلل واستخلص اللي انا شايفه، فأنا متهيألي انه كان في مشاكل زي أي بلد وهناك كان في كتيبة من المناضلين من النخبة اللي في الحقيقة كانوا بيقولوا، المناضلين دول ممكن يكونوا شعراء أو سيناريو أفلام أو كاريكاتير أو إعلاميين أو مذيعين أو محاورين، هؤلاء المجموعة من المناضلين ثبتوا على آراء وابتدوا يكتبوا فيها أو يقولوها أو يوعوا الناس بها، يمكن انا جيلي كنا بنتبسط لما نلاقي الناس دي موجودة، انا في بعض الشخصيات لما اصحى الصبح يكونوا حواليا باطمئن، الشباب بقى خد الكلام ده وانفعل به اكثر مننا وكان الشباب رأس الحربة، يعني انا أقصد أنه كان في مجموعة من النخبة كان لها دور كبير جدا في توعية الناس ببعض الأمور وايضاحها ، ممكن الآراء صح أو غلط انما هو ده اللي حصل ثم جاء الشباب لياخد الكلام ده ويحطه كراس حربة وفي صورة بداية التواجد أو بداية ظاهرة ميدان التحرير
مفيد فوزي: يعني تريد أن تقول أيضا ان هناك ربما فيلم دفع الناس للوعي، سيناريو أثار عند الناس اليقظة، حوار حرك أشياء كثيرة، برامج ظهرت أة عرف الناس انها ستظهر ولكنها اختفت في لحظة غامضة غير مفهومة كانت وراء التساؤل
د. عصام شرف: هذه اللحظات الغير مفهومة قد تكون أدت الى شئ نم الفزع الفكري عند بعض الناس لأنه برده الناس عندها وعي، ليه هذا البرنامج اختفى، ليه هذا الشخص ابتدا يهمش وهكذا، دي كلها طونت حالة من الوعي
مفيد فوزي: انا لو سألت حضرتك عن ثورة 19، ثورة 5، ثورة يناير 2011، تقدر في عبارة واحدة تقولي هاجس ثورة 19 كماتراها انت كقارئ تاريخ
د. عصام شرف: هاقول لحضرتك حاجة ثورة 19 مفيش شك كانت ثورة نابعة من الشعب وادت الى خلق روح جديدة مفيش شك
مفيد فوزي: دي ثورة 19
د. عصام شرف: 52 انا كان عندي ساعتها 12 يوم انما هي طبعا الجيش كان له القيادة ثم للشعب
مفيد فوزي: اذا هي ثورة جيش لكن ثورة 19 كانت ثورة شعب، ثورة يناير 2011
د. عصام شرف: هي ثورة شعب 100 % فيها جميع الطوائف
مفيد فوزي: ليه حضرتك حافظت على كلمة انها ثورة شعب وليس ثورة شباب وانا باقول الكلام ده محاولة لفهم المصريين
د. عصام شرف: الشباب كانوا راس الحربة وهما تأثروا بمجموعة من الشعب في الحقيقة دول ابطال، النخبة الي انا اتكلمت عليها، تأثروا بها جد وانفعلوا بها وخدوها ولازم نحي الشباب على هذه الجرأة وهذا التعامل والتكنولوجي والكلام ده كله ، ثم من اليوم اللي دخلوا فيه ميدان التحرير تحولت تاني إلى ثورة شعب حقيقية، الشعب انضم لهم
مفيد فوزي: هل حضرتك شايف كمحاولة أيضا لفهم المصريين إن صبر الإنسان المصري يحمل جينات الثورة، سؤالي واضح
د. عصام شرف: أيوه ، الشعب المصري هاقول لحضرتك حاجة يعني ايه اللي حصل بالضبط انا متهيألي كده انها خلقت واقع جديد، ده بلا رجعة في واقع جديد، وكل ما اتمناه في الحقيقة ان هذا الواقع، واقع جديد في صورة ايه؟ في صورة ان مصر داخليا اتوحدت بصورة أو أخرى، مصر خارجيا صورتها تحسنت جدا واوعى تخاف من المستقبل اذا استمرينا على اللحمة دي وان احنا متكاتفين لن الخارج مستعد يتعاون لأقصى الحدود معانا في ظل صورة جديدة لمصر، فأنا أخشى من انه يحصل مش عاوز عن قصد لكن خلينا نحدد اكتر فكرة المطالبات الحالية
مفيد فوزي: انا جاي لها، هل شايف حضرتك ان هذه الاحتجاجات الفئوية هل كثرتها قد تجنح الى درجة من الفوضى
د. عصام شرف: هو 100 % ممكن بس الأول نفسرها، انا باقول ايه ان المطالبات اللي حضرتك شايفها دي في الحقيقة لها صبغة اجتماعية، هناك نوعين من الاخلاقيات الناس اللي طلعت دي بتحركهم وهي سمات العدل والرحمة يعني الناس الي طلعت دي ممكن تقول طالعين لحاجتين، العدل لأنهم حسوا انه مفيش عدل ، تباين في الاجور والمرتبات والكلام ده كله، ثم الجانب الثاني ان الناس دي عانت من ظلم وقسوة من بعض من يديرون الأمر فانفجروا
مفيد فوزي: ولكن الاحتجاجات ملأت الشوارع
ما هو انا باقول لحضرتك ليه وانا رسالتي برده انه ارجو ان نحكم نفس الصفتين دول العدل والرحمة على غيرنا لأن ارجو ان هذا الاستمرار
مفيد فوزي: كيف نميز د. عصام بين المحتج عن حق وهناك فئة كبيرة من هؤلاء وبين المحتج لأي شئ آخر، انا اتذكر انه في أسوان على سبيل المثال بعد السيول وزعت شقق على الناس، بعض الناس حطوا أسمائهم وسط جزء من منظومة فساد مضى ولا نريد أن نعود اليه، لكن أخشى ولا أريد نفاق الشارع بأن اقول ان دول ناس على حق ولازم ياخدو، لأن دول كلهم يطالبون بفلوس، هل لديك معلومة ان البلد ممكن تلبي طلبات دول واللا المسألة بالتعقل
د. عصام شرف: تاني ارجع اللي حصل شيء جبار شيء هائل ، مثل هذه الأشياء الهائلة بتحمل دايما في طياتها الرغبة في تحقيق كل شيء بأسرع ما يمكن فدي رغبة طبيعية
مفيد فوزي: هناك خسائر قد حدثت
د. عصام شرف: بالتأكيد
مفيد فوزي: ولكن المكسب القومي أهم ، موافق معايا
د. عصام شرف: بالضبط 100 %
مفيد فوزي: انا عندي قناعة ان هذا المكسب القومي أكبر من هذه الخسائر ولكن اسمح لي افتح قوسين واقول، علينا ان نستعيد عافيتنا المالية والقومية والنفسية
د. عصام شرف: تمام، انا هاقولك حاجة انا اتمنى من كل قلبي بكرة كل الناس والحياة تمشي عادي ولكن زي ما قلت لحضرتك أي ثورة بتحمل جواها هذا، اعادة خلق قنوات حوار معاه
مفيد فوزي: ألم تعد مكتئبا الآن
د. عصام شرف: اقل بكتير طبعا
مفيد فوزي: قد كنت تقول لي عبارة لا أنساها ونحن في الامارات عندما التقينا على فنجان قهوة، قلت لي بالحرف الواحد "انا أعاني من اكتئاب وطني" وكانت دي اول مرة في حياتي باسمع هذه العبارة ولما سألتك عبر لي معناها قلت لي الجسور مقطوعة بين حكومات وشعب هل ما زلت تعاني من هذا
د. عصام شرف: لا لا متهيألي قلت أوي وده اللي انا باقوله القضية الآن كيف نعيد اكتشاف الشعب المصري ونخلق قنوات اتصال ولازم هتاخد وقت استرداد الحالة دي، وانا دايما باقول في الحالة دي احنا عندنا كتابين ، كتاب جيمس بريستيد "فجر الضمير": اللي بيقول ان مصر هي فجر الضمير ثم كتاب الدكتور احمد عكاشة"ثقوب في الضمير" لأنه حصل خلل في القيم والمنظومة الاخلاقية،الي حصل ده بيقول أولا اننا بنتجه بسرعة جدا الى ان احنا نسد الثقوب دي
مفيد فوزي: هاسألك سؤال، الشروخ الصغيرة اللي وصفتها لي انها تحولت الى حفر كبيرة، مذاكر انا كلامك على فكرة ومهم جدا، هل انت على وشك ان تفتح شروخا صغيرة بالاحتجاجات الفئوية قد تفتح فتحات
د. عصام شرف: أي شيء ممكن يساء استخدامه واستغلاله ويكبر لكن انا باراهن على قيمة الشعب المصري ان هذه الرغبة في الاصلاح السريع جدا جدا يقابله بعض الصبر
مفيد فوزي: للغد حتى لا تتسع هذه الفتحات ما الذي ينبغي ان نفعله
د. عصام شرف: أولا لازم يكون وده اللي بيحصل، ان يكون هناك قرارات أو توجهات واضحة جدا تحمل في طياتها من يحملها للناس يكون على درجة عالية من الثقة يقوم الناس تصدقه وتصبر، الحالة الموجودة في الحقيقة جسر الثقة المفقود ما زال له بواقي ، فأنا متهيألي انه الناس تبدأ تشوف هل هناك قرارات، يعني لما نبص للقوات المسلحة ثم للمجلس الأعلى مفيش قرار الا بيتجه نحو الأفضل فخلينا بحجم الثقة في اللي حصل
مفيد فوزي: دورنا احنا ايه بقى كناس كشعب الناس اللي بتتفرج علينا ايه المعاني اللي تاخدها من حضرتك للفهم للغد وانا مصر اني اقول كلمة الغد 100 مرة في البرنامج لأنه ليس ضروري على الإطلاق البحث عما كان
د. عصام شرف: أول حاجة انا متهيألي هناك صفة واحدة هي الصبر قليل من الصبر اللي خلاكو تصبروا كل ده قليل من الصبر وضعوا الثقة فيمن يتولون الأمر
مفيد فوزي: بلاش كلمة الصبر دي يا دكتور
د. عصام شرف: ليه
مفيد فوزي: سمعتها رديئة
د. عصام شرف: لا أبدا والله انا أقصد لازم يبقى في خلينا نسميها فترة سماح، ما دام وثقتم في الضمانة والحماية اللي حصلت فنصبر قليلا
مفيد فوزي: أصل الناس ما عادت لديها قيمة الصبر
د. عصام شرف: هاقول حضرتك اصل كلمة الصبر يعني لما بنقول بنصبر على الشدائد لأني باثق في الله سبحانه وتعالى
مفيد فوزي: ده معنى جميل، عرف انا باقول لحضرتك ده ليه لأنه احيانا بابقى بالعربية رايح مشوار ألاقي مظاهرة في المهندسين فأسأل خير، انا مش شايف لها لا أعلام ولا حاجة، يقولك لا يا فندم دول طابعين ورق لطلب شقة والطلب بجنيه، كل واحد عايز شقة، قعدت اتسائل وده على امتداد الوادي من اين؟ من أين تأتي الدولة بشقق لهؤلاء وهل كل هؤلاء مظلومون هذا هو السؤال
د. عصام شرف: مانا قلت لحضرتك اللي حصل يخلي أي حد يقول دي فرصة ذهبية وفرصة جيدة طبعا للمظلوم أولا انه ياخد حقه والمنتفعين والغير مستحقين ودول موجودين في أي ظرف، انا عايز ارجع تاني للجزئية دي يا أستاذ مفيد انه انا مش عاوز امسك سيف على اللي حصل ده انه شيء طبيعي ولكن دلوقت الرسالة للناس فكروا في انه اللي حدث ده شيء عظيم جدا يتبناه ويتولاه ناس أمناء جدا فلا مفر إلا من الانتظار والتعاون في الحقيقة وعلى الجانب التاني لابد يكون في حوار لاعادة اكتشاف الشعب المصري
مفيد فوزي: كيف تفسر الحالة الحالية، اتهامات، بلاغات للنائب العام، مستندات، تطلعات، كله ضد كله، اتهامات لا تنتهي، كيف تفس هذه الحالة، ليه تنهدت
د. عصام شرف: لأنه دي مزعلاني انما في نفس الوقت زي مابقول لحضرتك مثال الميزان اللي كفته خوف والكفة التانية طلبات واحساس بالظلم، عندما انكسر الخوف نتيجة ثورة كل الحاجات دي طلعت فجأة بصورة تكاد تكون غير منظمة فكل واحد عنده احساس بالظلم
مفيد فوزي: النيابة العامة ، لا شيء أكثر حصنا من النيابة العامة
د. عصام شرف: وهما شغالين انما دي ثورة شعب فضروري هذه الاندفاعات موجودة، يعني لنه مثلا ظلم لإعلامي كبير لما تكون هناك محاولة لتهميشه، دي ظلم في ظلم تاني انه انسان بياخد مئات وفي نفس المؤسسة انسان تاني بياخد مئات الآلاف ده ظلم
مفيد فوزي: احنا دلوقت بنتكلم عن الملايين
د. عصام شرف: هذا احساس بالظلم في واحد تاني احساسه بالظلم انه خد شهادة بنفس الدرجة وواحد تاني يمكن اتعين بنفس الماهية لكن بدرجة..، اذا الاحساس بالظلم م لازم نربطه بالقيمة الكبيرة، هناك كل واحد عنده احساس بالظلم، أي حد ممكن يكون صح أو يكون غلط، فهذا الاحساس بالظلم انطلق هياخد وقته ومع المصداقية المستمرة هيقل، انما انا باكرر انه كثير من الظلم كان عندهم احساس بالظلم ولكنه كان مكبوتا فلما جت الفرصة خرج كله مع بعضه، من حق أي واحد ان يشعر بالظلم اذا كان هناك شخص آخر بياخد 5 جنيه اكتر منه
مفيد فوزي: اما باسال ليه يا دكتور عصام عشان في نهاية الأمر يدرك الناس ببساطة انه ظاهرة الاتهامات ربما يبقى فيها اتهامات كيدية
د. عصام شرف: طبعا
مفيد فوزي: ربما يبقى فيها التشفي
د. عصام شرف: كتير من الناس اتمنى ان تكون الاتهامات الموجهة اليهم تكون خاطئة وارجو من الناس لأنه ان تتهم برئ ده شيء عظيم جدا عند ربنا، انه واحد متهم أو مدان ومتقدرش تكتشفه دي اقل بكتير أوي من انك تتهم برئ ولذلك دي كلها رجاءات معنوية للناس اللي وقفوا جنب الثورة ، الناس اللي استحملوا وقعدوا أسبوعين تلاتة باقل القليل أرجو انكوا تحطوا هذه المعاني وانتوا بتقدموا اتهامات وانتوا بتحاولوا تاخدو حقكوا في حدود ما تتصوروا ، اصبروا شوية عشان في الآخر احنا داخلين على مستقبل مختلف تماما
مفيد فوزي: ألا تعتقد ان مثل هذا الكم الهائل الذي أغرق على رأس النيابة العامة يمكن ألا يجعلنا نلتفت للغد
د. عصام شرف: انا أمنيتي الآتي أنه لو الشعب المصري مثلا 84 مليون، واحد في المليون في الميه يعني رقم قليل قوي دول يتولوا دراسة الماضي وما حدث فيه ونسيبهم والباقي كله يتجه للمستقبل ولذلك مهم أوي ان نستعيد الثقة وتثق الناس فيمن يتولون شأن الماضي مهما كثر هيعدوا متفرغين له 100، ألف، ألفين واحد والباقي تبقى كل شغلتهم تبقى المستقبل
فاصل
مفيد فوزي: عندي شعور عايز اقوله لك ولازم تقولين انا باعتقد انه ميدان البتحرير ده كان المروع القومي الحقيقي في مصر
د. عصام شرف: ده خيمة الوطن، حضرتك حضرت لي المحاضرة في جامعة المستقبل لما كنت باتكلم على الحلم وباقول ان الحلم حق مشروع وبعدين ابتديت باقول اللعبة اللي يمكن تحقق لنا حلمنا، اللعبة دي كانت دايما باضرب بها المثل لما كنت اجيب انا واولادي التلاتة غطا وكراسي ونعمل خيمة ونقعد مع بعض وكانوا سعادة بالغة بالرغم انه ممكن تاني يوم نكون هنوديهم الملاهي او نجيبلهم لعبة لكنهم كانوا يتمتعوا جدا بالعبة دي واثارني الموضوع ده ولقيت ان ده بيتكرر مع حفيداتي بيتبسطوا جدا بها، فايه اللي حصل اعتقد انه شيئ انساني بحت بيحسوا بالتلاحم والقرب والدفء المعنوي وقلت اتمنى ان الخيمة بتاعة عصام وكريم ومحمد وحازم تبقى هي خيمة الوطن حيث ان الوطن يتجمع تحته
مفيد فوزي: انت معندكش بنات
د. عصام شرف: عندي حفيدات
مفيد فوزي: دكتور عصام شرف ما الأولويات الآن أمام د. عصام شرف أستاذ هندسة الطرق لبناء مجتمع، هل هو تعليم جيد، هل هو علم وأبحاث، على فكرة انا فاكر جيدا لما كنت تقولي انك تحلم ان يكون العلم قضية رأي عام
د. عصام شرف: تمام، الأول وقد أكون مخطئ كل واحد له نموذج معين نموذج فكري في التعامل مع القضايا النموذج الفكري بالنسبة لي هو هرم قاعدته المصالحة ثم الاصلاح ليأتي الصلاح، يعني في أي قضية مينفعش ندخل على الاصلاح سواء كان سياسي أو اقتصادي أو اجتماعي قبلها لازم نتصالح ودي قضية مهمة جدا بالنسبة لي
مفيد فوزي: فسر للناس يا دكتور يعني ايه التصالح
د. عصام شرف: يعني ان احنا نلتف حول، حضرتك قلتلي بناء، بناء الطريق والمباني ده شئ هيتعمل هيتعمل وانشاء الله هتشوف مصر جديدة
مفيد فوزي: لا ده انا استخدمت كلمة بناء طرق المستقبل
د. عصام شرف: البناء الحقيقي هو بناء الوعي أو اعادة اكتشاف الوعي المصري أو عودة الوعي زي توفيق الحكيم، عودة الهوية، ايقاظ الثقافات ده اللي انا اقصده نلتف حوالين قيم جديدة، لا شك ان هناك ثقوب في الضمير فالخطوة الأولى لازم نسد الثقوب دي
مفيد فوزي: قبل التعليم
د. عصام شرف: قبل أي حاجة لازم نلتف
مفيد فوزي: المصالحة
د. عصام شرف: المصالحة ولذلك اذا سمحت لي نداء انا قلته في محاضرة سنة 97 وانا آسف اني باقول انا، انما كنت اقول انه لازم علماء اجتماع ياخدو دور رئيسي في المرحلة الجاية، علماء الاجتماع هما بيقولك انت رايح فين
مفيد فوزي: الحقيقة يا دكتور عصام برده ليس من الضرورة اني اقولك الكلام ده لكن الخلاصة ان اساتذة العلوم الانسانية كانوا مهمشين على مائدة اصحاب القرار
د. عصام شرف: ده خطأ فادح
مفيد فوزي: يعني انا مثلا باعرف وصحح لي انه الرئيس الامريكي لديه مجموعة هائلة من العلماء يعطونه الفكرة ويمدوه بإيه الاكتشافات القادمة وايضا اساتذة في علم الاجتماع والنفس يحددون له طبيعة الرؤية في المجتمع
د. عصام شرف: بالظبط، شوف ده كلام رائع احنا عاوزين نوصل للصلاح، يعني ايه صلاح يعني ايه ان بلدنا تبقى جميلة وانها تبقى قوية، في الحقيقة البلد حتبقى قوية او جميلة بناء على رضا الانسان يعني ان يكون المواطن راضي، عنده جودة الحياة، ودي لا تعني بس انه هو ما يتسجنش ، لا يعني يبقى عنده نقل سليم وصحة سليمة وتعليم سليم، الذي يحدد هذه الرؤية الانسانية يجب ان يكون خبير في العلوم الانسانية ولذلك باقول دورهم في عملية المصالحة دي هام جدا، نيجي بعد كده للإصلاح وانا ارجو بالترتيب ده، سياسي ثم اجتماعي ثم اقتصادي، الاقتصادي ده ييجي تحصيل حاصل عندما يكون عندك اصلاح اجتماعي والناس واحساسهم بالعدالة
مفيد فوزي: بدون قطع كلام حضرتك وبمناسبة الاصلاح الاجتماعي، مات سيد عويس الرائد الاجتماعي العظيم وهو ينادي في كتاب خصصه لهذا الموضوع اسمه "هتاف الصامتين" ما هو هتاف الصامتين، هؤلاء الذين يكتبون الكلمات وراء السيارات والعربات وكلها كلمات تريد الحياة، مات سيد عويس وهو يكتب للناس" الشكوى للأضرحة" لم يجد أمامه أحدا يشكو له فذهب يشكو للأضرحة عايز اكتر من كده هذا أحد علماء الاجتماع في بلدي
د. عصام شرف: ده قمة
مفيد فوزي: وانت تعرفه جيدا فأنا عايز اقول ان هذه الكتابات كان يحي حقي يقول ان المصري بتاع البسبوسة لما يمسك السكينة ويخبط بها كان يستحث الرزق من الله فانا عايز اقول انه هذه الفئات اللي بتشكي للضريح واللي بيكتب ورا العربية، هذه الفئات كانت مهمشة وكانت معذبة
د. عصام شرف: انت عارف حضرتك المهمش ايه كانت المعاني ولذلك الواحد دايما يقول المعنى قبل المبنى فلازم ان نعيد المعاني لحياتنا، يعني ايه وطن، يعني ايه هوية وخلي بالك اذا سمحت لين ما حدث الثورة كراس حربة شباب وخلفها هذه النخبة والمناضلين الافاضل اللي احنا في الحقيقة لازم نحيهم ونحطهم برده في قمة المشهد
مفيد فوزي: خليني أمر على سؤال مهم كيف ترى ملامح حزب الشباب
د. عصام شرف: ما دام نتكلم عن المستقبل فهو 3 شئون ، الشأن السياسي والشأن الاجتماعي والشأن الاقتصادي، الشباب لعبوا دور مهم جدا في الشأن السياسي
مفيد فوزي: ايه ملامح حزب ليهم ايه جوهره ايه مناداته، هو انا عايز اوصل في النقاش مع حضرتك الى قواعد ثابتة لفكر معين
د. عصام شرف: يعني انا اتمنى ان الشباب اللي قدر انه يكون راس حربة لما حصل ويحوله الى طاقة لازم يكون له دور سياسي والدور السياسي ضروري هيكون في صورة أحزاب أو تجمعات سياسية ولكن يكونوا حذرين جدا من الابطال اللي فقست سريعا كده فلازم في الحقيقة وانا مش خبير اجتماعي يجب بكل صورة وبكل قوة وبكل قدرة نستطيعها ان نحافظ على نقاء وصفاء وبهاء ما حدث
مفيد فوزي: دكتور عصام كيف نبرهن على اننا نستطيع العودة لحيوية السياحة في البلد وقد خسرنا كثيرا ولازم اقول ولكن المكاسب القومية اكبر
د. عصام شرف: السياحة هي احد روافد الاقتصاد المصري مفيش شك ولذلك انا مش هاتكلم على السياحة وحدها ولكن انا باتكلم عامة على الاقتصاد المصري احنا منقلقش لأنه وانا باقولها وارجو انك تصدقني انه بلاد العالم كلها تحب مصر، الواحد في خروجه بره مصر دولة عريقة جدا والناس بتحب مصر وفي فترة من الفترات يمكن خلافنا مع الحكومات، صدقني لما تستقر الامور هيحصل تعويض تام، انا جالي مكالمات من زملاء في دول الخليج يقولوا احنا عاوزين نييجي نستثمر في مصر
مفيد فوزي: كنت على وشك أسألك هل نحن الآن في حالة ماسة لإعادة ثقة لكي يأتي المستثمر الأجنبي ليضخ فلوسه في مصر
د. عصام شرف: هاقول لحضرتك حاجة، اذا كان على مقياس الثقة في مصر وفي آليات العمل فيها قبل 5 يناير 5 من 10 فالآن هي 7 من 10 وبكره وبكره ده مش بعيد بعد شهرين تلاتة هيبقى 10 من 10
مفيد فوزي: سؤال صريح لا يحتمل التردد بتراهن على ايه
د. عصام شرف: أنا بارهن على استعادة الهوية للمواطن المصري، استعادة الوعي، هذا هو اللي بيخلق ثقة الناس فينا، ان الناس دي هتتصرف معاك ازاي، اقول لحضرتك حاجة اللي شايف المستقبل هو مستقبل يلعب فيه العمل الأهلي دور كبير، العلم هو محوره، الشباب هو راسه
مفيد فوزي: هل تعتقد ان المجتمع المدني ممكن ينمو اكتر
د. عصام شرف: بالتأكيد لأن المجتمع المدني كان عليه قيود
مفيد فوزي: لما ييجي النهاردة واحد زي د. عبد العزيز حجازي قد كان منشغلا بشدة في الفترة الماضية بإيجاد مجتمع مدني وكان حريصا على ان المجتمع المدني ده ياخد مساحته وحقيقته، هل ممكن انه في مجتمعات مدنية تاهم مش عايز اقول في حملة تبرعات انما تساهم في ضخ ثروة حقيقية لهذا المجتمع
د. عصام شرف: ما هو عشان كده باقول ان المجتمع المدني محور عمله العلم وراس الحربة بتاعته الشباب، حضرتك النهاردة لما تيجي نتكلم حتى على الشأن الاجتماعي يمكن استكمالا لسؤال سابق أنا لا اتصور ان هذه الطاقة بالذات من الشباب لا تنمق ولا تؤطر داخل عمل سياسي لأنه بدون تواجدهم الفعلي في الكيانات السياسية دى لن يستطيعوا ان يحققوا الاصلاح الاجتماعي ولا الاصلاح الاقتصادي، انا متخيل ان الشباب اللي عمل بالنتورك والانترنت وشبكات التربيط دي هو اللي ممكن يساعدنا في محو الأمية، هو اللي ممكن يساعدنا في تكوين شبكات عان الصحة العامة، هةو اللي ممكن يساعدنا عشان اعادة القيم الخافتة، اذا فكرة الجمعيات الأهلية واحتوائها للشباب والاحزاب وغيره مش معنى ان الناس هتصرف انما ممكن ان تستنفر الهمم
مفيد فوزي: طيب في انتخابات قادمة والشعب المصري فراز، هل تثق في ان الوجوه اللي بتطلع على الشاشات تقدم نفسها وتقدم خدماتها الى حد الدليفري، هل تعتقد ان هؤلاء اللي فيهم ليس صادقا 100 % قد يسقطون من منخل التقدير
د. عصام شرف: آه طبعا لأن الشباب ، مش الشباب الشعب أو خليني اقول معلش هو طبعا ميدان التحرير ده مجرد رمز لكن في ميادين أخرى كتير في مصر ممكن تسمى "ميدان التحرير –شرطة" بس انا بآخد ميدان التحرير كرمز، ما حدث في ميدان التحرير ايقظ حاجات كتيرة جدا منها عملية الفرز، الشباب
مفيد فوزي: أسألك بأمانة بالغة هل الدولة قبل 25 يناير كلها باطلة
د. عصام شرف: لا طبعا
مفيد فوزي: ده مهم ، مهم الناس تعرفه
د. عصام شرف: لا لا على الاطلاق بل ان هناك ناس قد يكون طالتهم بعض الاتهامات انا ما زلت أكن لهم كل الاحترام واتمنى ان تكون الاتهامات دي باطلة، أصل الشعب اللي ثار كان من سنة واحدة لم يثور اذا في شيء بيحرك الأمور، فيعني لا يمكن ان يكون الحاضر الا امتدادا للماضي والمستقبل امتدادا للحاضر فإذا ما يحدث هذا الشيء الجميل اللي حصل طبعا في ناس كويسة جدا ولا يمكن يكون ما حدث كله باطل 100 %
مفيد فوزي: استأذنك هل يمكن ان يتكون لدينا ما يسمى بالفيوتشرولوجي هل الرؤية المستقبلية يمكن ان تكون لدى علماء وقد همش العلماء، قد كانت هناك وزارة ديل وزارة بحث علمي ديل لوزارة، ألا تتطلع معي الى ان العلم سيكون له مجاله، انا اريد بكل هذا النقاش ان اضع يدي على ملامح الغد
د. عصام شرف: شوف هاقول لحضرتك وحضرتك شرفتني في المحاضرة وكنت باقول هناك فرق كبير بين الغيب والمستقبل ودي ثنائية الناس ساعات بتخلط بينهم، الغيب هو علم الله يدير به الكون ولا نستطيع ان نتدخل فيه أما المستقبل فهو صناعة انسانية بحتة
مفيد فوزي: لازم أسألك وانت أكثر الناس دراية ودي معلومة مكناش نقدر نقولها بالصراحة المطلقة، ميزانية اسرائيل في العلم اد ايه
د. عصام شرف: آه طبعا كنسبة من اجمالي الناتج المحلي بتاعها ادنا مثلا 10 مرات أو اكتر
مفيد فوزي: انا باسألك وانت كنت وزير، كنت تتمنى تبقى وزير بحث علمي
د. عصام شرف: انا في الحقيقة فكرة الوزارة دي دايما غائبة عني تماما
مفيد فوزي: طب في نص سطر كده انت ليه خرجت من غير ابحار في الماضي
في نص سطر لأنه مكنش يصح ان انا استمر
مفيد فوزي: في نظر نفسك
د. عصام شرف: وفي نظر الناس التانية
مفيد فوزي: يعني انت اقلت ولا استقلت
د. عصام شرف: لا انا مجتش في التشكيل
مفيد فوزي: بس خلاص كمل يا فندم، العلم
د. عصام شرف: آه ولذلك أكر شكل المستقبل له سمات ان نكون بلد غنية مفهاش فقر مفهاش جهل انما كيف نحقق هذا، كيف نشتغل في الشأن السياسي والاجتماعي والاقتصادي، انا باقول الحكومة موجودة انما لازم يبقى في دور ازيد لعمل الجمعيات الاهلية، دور رائد للعلم، دور اقوى بكثير للشباب
مفيد فوزي: هاقف عند "دور رائد للعلم" ماذا تريد في منظومة العلم غير المال، طبعا نمرة 1 المال رغم انني ادرك ان بترول هذه البلد في عقول رجالها الشرفاء اللي عندهم المعرفة، ايه تاني عاوزه أكيد ميزانية في الأول
د. عصام شرف: أقول لحضرتك لوانا النهاردة قلت هازود ميزانية البحث العلمي 10 مرات فهيكون الناتج مهواش 10 أمثال الناتج من ده
مفيد فوزي: ليه
د. عصام شرف: لأنه لازم ترتب البيت من الداخل، يعني دلوقت محتاجين زيادة في الميزانية 100 % لكن عندما تتعامل مع أي مؤسسة يجب ان يكون التعامل على المستوى التالي: الجانب المؤسسي، الهيكل فيها ثم الجانب البشري ثم الجانب التقني فانت قبل ما تزود ميزانية رهيبة 10 / 15 مرة يجب يكون في ترتيب في الداخل، أولا الترتيب ده في المؤسسات المسئولة عن العلم والتعليم والبحث العلمي والاهم من ده كله ان يكون المناخ العام مشجع لهذا، المناخ اللي هو البشر
مفيد فوزي: ما الفرق بين ادارة شركة وادارة وطن
د. عصام شرف: هي الادارة لها سمات معينة
مفيد فوزي: دكتور عصام انا بحب فيك المباشرة متعملش تمويهات ولا مقدمات لأن المشاهد اللي بيشوفك عايز خلاصة ما لديك
د. عصام شرف: ادارة شركة انت تقدر تتكلم عليها ساعين تلاتة، يومين وتحلل الكاش ان والكاش أوت والكلام ده كله لكن الوطن لما تتكلم عليه 10 دقايق ولا تستدعي فيها شجون وقد يكون هناك دموع يبقى في شيء غلط، إدارة وطن متجيش بالمعادلات فقط، إدارة وطن هي إدارة معاني في النهاية وليس ادارة مباني، المباني دي ادوات انما في الآخر الوطن هو معاني فاذا سمحنا في الشركات بنقول بندير رؤوس أموال أما في الوطن أنت بتدير إذا سميناها رؤوس معاني
مفيد فوزي: الله ورؤوس المعاني ليست شيئا سهلا
د. عصام شرف: طبعا وإذا استمريت في الحديث عن الوطن بإخلاص ولم تبكي فأنت ليس مواطن صالح
مفيد فوزي: الملاحظ وبأمانة كاملة أن المجتمع الآن في حالة غريبة جدا ، في حالة تخوين أحيانا، ويكاد يصبح هناك ناس عملاء من العهد البائد وهكذا يتصورون ان من قال كلمة عن مبارك فهو من العهد البائد وهناك من يعتقد أن هؤلاء أيضا ان كان لهم وفاء فهم من أعداء الثورة ، وأشيد اذا أذنت لي بالقوات المسلحة حين اجتمع المجلس الأعلى للقوات المسلحة مع رؤساء التحرير حين قال بالحرف الواحد " لا نسمح باختلاق حكايات عن الرئيس السابق ونحن نشيد ونتذكر ولا ننسى إنجازاته ونتذكر جيدا أخطاؤه" هذا المعنى ونحن نتطلع لما اسميته بحالة الصفاء بين كل المصريين، كيف تجده؟ هل هناك شيء اسمه عدو الثورة ومع الثورة وفاء لمبارك يمكن ان يحسب عليه، فهمني بالظبط
د. عصام شرف: نمرة واحد أنا لا يمكن ان اتخوف ممن يؤمن برأي مخالف لي ، فكرة الآخر، لكني أخاف ممن يتلون
مفيد فوزي: انت ضد المتلونين
د. عصام شرف: احترم اللي ما زال ثابت على مواقفه ومؤمن بها، ارجع الحتة اللي حصلت في الحقيقة ونتيجة التأخير، يعني انا مثلا المظاهرة اللي شاركت فيها اللي حضرتك ابتديت بها الناس قالولي ليه؟ انما في بعض الأحوال يا أستاذ مفيد بعض الأحداث يكون فيها الحياد حيود
مفيد فوزي: يعني ايه حيود
د. عصام شرف: يعني الحياد مهواش عادل يعني مثلا لما آجي اقولك القضية الفلسطينية ميصحش فيها الحياد، لو قلت انا على الحياد مينفعش
مفيد فوزي: على فكرة هيمنجواي له رأي جميل أوي يقولك الحياد موت للأشياء
د. عصام شرف: شوف ازاي، في الحالة الأولى يمكن انا لايمكن ان اكون واحد وكانت مظاهرة طالعة من هيئة التدريس الا ان يكون لي موقف فأنا خدت موقف
مفيد فوزي: أو تشف ما
د. عصام شرف: والعياذ بالله لا لا اصل لما يكون السقف بتاعك مصر تتقلص امامها أي شخصيات، فالحاجة التانية انه تكون الفرجة وزي ما باقولها الحياد حيود والفرجة فجور
مفيد فوزي: بمعنى ايه الفرجة
د. عصام شرف: انك تقف تتفرج كده على اللي بيحصل لازم يكون لك موقف، فأنا كان موقفي ان ما حدث هو ثورة ويجب ان نتعامل معاها وثورة عظيمة يجب ان نتعامل معاها من هذا المنطلق، فأنا في الحقيقة لما مشيت في المظاهرات كان 99% من الهتافات اللي كنت اسمعها انا غير راضي عنها عندما كانت تمس شخص الرئيس وهيبة المنصب
مفيد فوزي: هل كنت تستنكف هذه الاهانات ان دي ليست من الشعب المصري
د. عصام شرف: آه انه احنا في الحقيقة الاساتذة كنا ألف أو ألفين في الأول وابتدت تزيد في ناس كتير طلعت ومتعرفش ايا كان في المظاهرة دي أو غيره ومع اتفاقي واختلافي مع السيد الرئيس حسني مبارك فهو صاحب منصب رفيع وفي مصر و ارجو تاني ان تستلهم يعني ايه مصر، لو حد شاكك مفيش حدث في العالم حصل وتم الاهتمام به على هذا المستوى من أول أمريكا لغاية بلاد اللي لسه بتاكل البشر
مفيد فوزي: من هم أعداء الثورة خلينا نعمل تعريف وتحديد
د. عصام شرف: اللي هما يحولوها الى مهاترات في الكلام يعني انا قلت كده وانت قلت كذا، يعني عاوز اقول ايه ان أي واحد هيحاول ان تكون بطولته على إضفاء دور له في الماضي فهذا عدو الثورة، أي واحد سواء متفق، مختلف، هتف ، مهتفش، أما آمن بأن المستقبل أفضل ويعمل له فهو ده مع الثورة
مفيد فوزي: يقول الدكتور عصام شرف الوزير والأستاذ الجامعي أن الحياد حيود والفرجة فجور