مفيد فوزي: عايز أقول لحضراتكو أولا أنا فين، لإن لما تعرفوا أنا فين حتعرفوا طبيعة الحوار الذي سأجريه الآن ، أنا في مجمع المعامل البحثية وده مبنى مهم جدا في كلية الزراعة، المجمع ده تبرع من حاكم الشارقة الدكتور سلطان القاسمي وبمساهمة أيضا من جامعة القاهرة هذا المجمع، المجمع ده عرفت كده معلومة بسيطة صغيرة لكن أد الداهية لأن عرفت إن المكان ده هو الي رفض عينة القمح الروسي، وفي هنا أجهزة زي الجهاز اللي ورايا ده ب 3 مليون دولار، ده قيمته ايه ؟ قيمته أنه يستطيع أن يتبين المبيدات اللي جوا أي شيء يخش الدم يعني يقدر يعرف واحد في الألف من الملليجرام، شيء خطير جدا، أنا سعيد إني في مكان علمي وسعيد إن أنا وسط هذه المعامل ولذلك الموضوع اللي بنطرحه شديد الأهمية في كل ما يتعلق بحياتنا ويمكن احنا مش واخدين بالنا ، أنا سمعت معلومات لأول مرة باسمعها عن الزيوت العطرية سواء الناس اللي بتاكلها أو بتشربها أو بتدهن بها جسمها وعرفت معلومة غريبة جد إن في انجلترا في شيء اسمه زيت الشبت اللي هو النبات الطبيعي العادي و أهميته الخطيرة أنه يعالج المغص عند الأطفال فاصل مفيد فوزي: دكتور عمرو مصطفي فهمني الزيوت العطرية يعني ايه؟ د. عمرو مصطفى : الزيوت العطرية بتبقى مستخلصات زيتية طبيعية موجودة في النباتات في أجزاء مختلفة مفيد فوزي: زي ايه؟ د. عمرو: زي زيت النعناع مفيد فوزي: النعناع ده معلوماتي عنه إني باحط منه في الشاي د. عمرو:: كويس ممكن بقي الريحة بتاعة النعناع ده أساسا مركبات كيميائية عبارة عن زيت طبيعي جوه بيتم استخلاصه وممكن يبقى منتج منفصل لوحده مفيد فوزي: يعني أنا الشاي اللي باشربه عليه زيت نعناع؟ د. عمرو: النعناع نفسه اللي حضرتك حطيته الأخضر جواه نسبة بسيطة جدا جدا من زيت طبيعي موجود جوا النعناع ومسئول عن الريحة بتاعته مفيد فوزي: امتى يبقى خطر؟ د. عمرو: لو أنا استخلصت الزيت ده من النعناع...حادي حضرتك مثال الكيلو نعناع يطلع حوالي 2 الى 3 جرام زيت ، فتخيل لو أنا اخدت نص معلقة زيت نعناع بيؤدي الى مشاكل صحية خطيرة جدا جدان في أوربا بيقولوا ممنوع إن الأطفال أقل من 6 سنوات يستخدموا زيت النعناع مفيد فوزي: وهو في في هذه البلد في مصر أمهات بيستخدموا زيت النعناع للأطفال؟ د. عمرو: ممكن لو حاجة متوفرة ومفيش وعي مفيد فوزي: بيستخدموه في ايه؟ د. عمرو: في اعتقاد طالما انا باحط النعناع للأطفال لو عندهم مغص يبقى لو عندي زيت ممكن استخدمه بالتالي احنا لازم نقولهم ممنوع منعا باتا لو كان متوفر زيت النعناع لو طبيعي ممنوع ان انا اشربه ولا آكله ،واكتر حاجة بيستخدم في حاجتين على مستوى العالم ،اما دهان مفيد فوزي: دهان للجلد، ليه؟ د. عمرو: حسب بعض الحالات المرضية ، ادي حضرتك مثال: مرضى السكر أحيانا الدورة الدموية عشان توصل للأطراف بيبقى صعب مفيد فوزي: في الرجلين وبتنمل د. عمرو: فبالتالي في بعض أنواع الزيوت الطبيعية وتستخدم تحت إشراف أطباء لو هو دهن بنسبة بسيطة وعمل مساج أو عمل تدليك ممكن تخلي الدورة الدموية أسهل انها توصل للأطراف مفيد فوزي: الكلام ده اجتهادي واللا علمي؟1 د. عمرو: لا علمي مفيد فوزي: لأن أنا عمري ما سمعت طبيب باطنة بيعالج السكر بيقول انك انت تستخدم الزيت ده في الدهان عشان خاطر الأطراف تضخ فيها الدماء، هل ده شيء شائع في المجتمع؟ د. عمرو: هو مش شائع بس طالما الزيوت دي بدأت تتوفر يا ريت تتم تحت اشراف طبي عشان نبقى في أمان مفيد فوزي: من فضلك تقولي متوفرة فين الزيوت دي ، هل هي عند الصيدلي واللا عند العطار؟ د. عمرو: في عطارين كتير جدا عندهم الزيوت دي متوفرة مفيد فوزي: يعني انا اروح للعطار اقوله ايه ؟ د. عمرو: لو انا طلبت زيت نعناع ، برتقال، ليمون بتبقى موجودة مفيد فوزي: الناس في المناطق الشعبية بتروح الأماكن دي وتجيب منها .. ممكن آه وممكن لأ ولكن احنا بنقول ايه حتى لو لقيت الزيوت دي متوفرة.. وانت راجل لابس البالطو الأبيض وعلمي قلت ممكن آه وممكن لأ دي مطلع أغنية ممكن تقولها نانسي عجرم انما هنا لأ لازم تجزم هل ده بيحصل ولا لأ د. عمرو: ما أقدرش أجزم مفيد فوزي: علمي ما تقدرش تجزم بالمعلومة ؟ د. عمرو: طبعا لأ، حضرتك بتسألني سؤال هل كل الناس بتستخدم؟ ما اقدرش اجزم مفيد فوزي: مش ضروري كل الناس، بس عايز اعرف مين الطبقات اللي بتستخدم ده عشان اللي بيشوفونا؟ د. عمرو: ده متوفر في اكتر من مكان يعني لو متوفر عند العطار أو في بعض المحلات بتاعة الكيماويات بتتباع الزيوت دي وهل هي طبيعي واللا صناعي مفيد فوزي: طب الناس اللي بتروح تشتري عطور بمبالغ ضئيلة، تلاقي قزازة ضخمة وتمنها 12 جنيه، هل دي عطور حقيقية د. عمرو: لأ طبعا دي مركبات كيميائية مخلقة بتضاف على بعض وتديلك الريحة اللي انت عايزها عشان كده هي رخيصة مفيد فوزي: هل لها خطورة د. عمرو: آه طبعا ، المفروض عدم ملامستها للجلد ممكن تعمل التهاب في الجلد ومع الوقت ممكن امتصاصها يزيد جوا الجلد ويؤدي لبعض الأمراض لأني باستخدمها استخدام يومي مفيد فوزي: كلمة اللافندرات يعني ايه؟ يقولك ده لافندر د. عمرو: في زيت اسمه لافندر ده طبيعي جاي من النبات مفيد فوزي: في حاجات بتتباع ب10 جنيه د. عمرو: ما هو ده يبقى مخلق مفيد فوزي: ده له خطورة د. عمرو: طبعا أي حاجة مخلقة مش طبيعية، ده انا باقول الطبيعي لو تم استخدامه دون إشراف أطباء له خطورة فما بال حضرتك لو استخدمت الصناعي مفيد فوزي: طب زيت الشبت ده اللي في انجلترا يعني الشبت بتاع انجلترا زي مصر د. عمرو: يمكن بتاع مصر كمان احلى ممكن ياخدوه من عندنا لأن ممكن تكون نسبة الزيوت فيه أعلى مفيد فوزي: ياخدوه من عندنا د. عمرو: آه طبعا، هما بيعملوا ايه هناك بقى؟ أبحاث علمية بيتحط زيت الشبت بتركيزات منخفضة جدا جدا عل بعض المنتجات وعارفين ايه ده تم دراسته في ابحاث مفيد فوزي: عندنا هنا احنا في ناس بتخلط بشكل عشوائي اللي هما ما يمكن أن يسموا بتجار تحت السلم بيبيعوا هذه الزيوت وهذه العطور د. عمرو: العطور تحتاج الى رقابة اكتر لأن العطور 99% منها لما اشترى حاجة ب 10، 12 زي ما حضرتك قلت، تخيل بقى قزازة 100 مللي تكلفة الزيت مع الكحول مع الزجاجة مع الربح بتاع البائع ازاي يبقى 12 جنيه، تبقى دي مركبات مخلقة ، صناعية، لازم ما تلمسش جلدي ولو كنت مضطر استخدمها أرشها على هدومي مفيد فوزي: الأستاذ الدكتور بهاء مدكور هو أستاذ في كلية الهندسة وبيدرس كهرباء قوى ، الدكتور بهاء كانت اهتماماته في الأول هندسيا كانت الموتورات وانتقل من الموتورات الي هي آلات إلى موتور الجسم وموتور الحياة، دكتور بهاء انا شفته زمان بس شفته كمصور يحبس الجمال في فرخ من ورق بالعدسات ويكاد يكون د. بهاء مدكور أشهر مصور في مصر، د. بهاء عنده اهتمامات غريبة جدا بالزيوت بينصحني في التليفون أوعى تاخد بالك من الزيت الحار ، خلي عنيك على زيت الزيتون، أقوله يا دكتور بيقولي زيت الدرة، يقولي باقولك زيت الزيتون عنده معلومات كثيرة ولو الكاميرا جابت الكتب اللي قدامه دي حتكتشف انه عنده حاجة عن الأعشاب عند قدماء المصريين وعنده كتاب كامل عن الثوم الذي يحبه كثيرا وعنده حاجة عن الزيوت، اذا الرجل قارئ وأنا كان نفسي اعرف ايه اللي نقله من الموتورات الحديدية كأستاذ في كلية الهندسة الى موتور الجسم ، أسمع الحدوتة يا دكتور لأن التغيير ده أكيد وراه شيء د. بهاء: أنا ابتديت سنة 94 كنت مكلف أو متطوع لإصلاح ساعة الجامعة مفيد فوزي: ساعة الجامعة انهين، ساعة جامعة القاهرة،اللي بتدق دي د. بهاء: هي ما كنتش بتدق ايامها سنة 94، هي بطلت تدق أو اتلخبطت من 67 معرفش ايه العلاقة مفيد فوزي: من 67 إلى 94 مكنتش بتدق ومحدش انتبه د. بهاء: لأ منتبهين بس مش لاقيين حد تخصصه الساعات، أنا غاوي تصليح كل حاجة في الدنيا بما فيها الساعات فالدكتور عميد الكلية أيامها مفيد فوزي: الله يعني انت مصور جيد وأيضا تفهم في الساعات د. بهاء: تقدر تعتبرني ساعاتي مفيد فوزي: كمان د. بهاء: حقيقة يعني، اللي حصل انه اللي اختارني عميد الكلية لأنه كنا زملا في نفس الغرفة فعميد الكلية رئيس الجامعة بيقوله بقى ساعة الجامعة واقفة وانتوا كلية الهندسة مش عارفين تصلحوها، فقالهم عندنا واحد اسمه بهاء لو ده مصلحهاش ما حدش حد حيعرف يصلحها، فقعدت متطوع اشتغل فيها من 90 ل 94 مفيد فوزي: يعني انا ابص عليها كده وخلاص بتلف د. بهاء: بتلف مفيد فوزي: لكن مفيش الدقات اللي احنا متعودين عليها د. بهاء: الدقات دي الحقيقة مع مر الزمن ضعفت لأن الدرعة اللي بتضرب، الشواكيش والحاجات دي ضعفت مفيد فوزي: حتى دقات الساعة ضعفت مع مر الزمن يا دكتور د. بهاء: هو الغريبة إن الساعة دي وقفت في 67 انما في ساعة تانية بتاعة قصر المنيل كان طلب مني برده أحاول أصلحها رحت وضيعت لي ييجي اسبوع فيها طالع نازل مفيد فوزي: انت عندك مغامرات مع الساعات، ايه اللي نقلك الى موتور الجسد د. بهاء: اللي نقلني بقى إني في أحدا لأيام كنت طالع الساعة دي وطلعت 3 أو 4 مرات وكنت شامم ريحة غريبة ماهتمتش بيها، طبعا أنا عارف إنها ريحة البطاريات لما بتكون بايظة وتتشحن زيادة بتطلع غاز خطير جدا اسمه ثاني أكسيد الكبريت وده أخطر غاز لما بيبححثوا عن البترول ، أول ما يفتحوا بير البترول كل الناس بتبعد لغاية ما يقيسوا هذا الغاز لأنه بيجيب جلطة مفيد فوزي: مجرد شمه د. بهاء: آه طبعا، مش بيعدموا في أمريكا بالغاز، أحد طرق الإعدام واحد يشمه يموت، بعديها بسنين اتعرفت على واحد بيشتغل في البترول قالي ده كويس ان انت بتشوف ده ممكن يجيب عمى مباشر لو شميته بيجيب جلطة في العين مفيد فوزي: ثاني أكسيد الكبريت، الزيوت عندك كتاب هنا مين اللي عامل الكتاب ده د. بهاء: انا عندي كذا كتاب في الموضوع ده بس اللي ابتداني في الزيوت أول ما طلعت من العناية المركزة واحد صديق لي رحمه الله أوصاني قالي خد الكتاب ده اتسلى فيه فاداني كتاب اللي هو " أوميجا ثري فينومينا" دلوقت كل حاجة تلاقي أقراص أوميجا ثري، فا أوميجا ثري ده طلع اللي هو الزيت الحار أو زيت بذر الكتان مفيد فوزي: ده بيستخدم كتير في حياتنا في مصر واللا غلط استخدامه د. بهاء: هو صح وغلط مفيد فوزي: ليه د. بهاء: صح لأنه ده حاجة عظيمة جدا ومن أيام الفراعنة الناس بتستخدمه مفيد فوزي: بنحطه عل الفول د. بهاء: لكن علاجيا على الجبن القريش أحسن مفيد فوزي: يعني الفول اللي بآكله الصبح مثل الملايين اللي بيشوفنا يفضل نحط عليه الزيت الحار د. بهاء: أكيد لأنه حتى لو عندك قولون عصبي حيمنع أي مضايقة مفيد فوزي: لو عندي سكر د. بهاء: لو سكر من النوع التاني ممكن ، خطورته الآتي أنه هو بالعربي بيسموه عديد عدم التشبع يعني هو ناقصه ذرات هيدروجين مفيد فوزي: يعني ايه د. بهاء: هو في التركيبة الكيماوية بتاع الزيوت، هي الزيوت هي الدهون اسمها أحماض دهنية، اكتر زيت ممكن تلاقيه بسيط غير مشبع هو الزيت الحار أو زيت بذر الكتان، الزيت ده ناقصه 6 ذرات هيدروجين لو سبته في الحرارة والضوء ومع وجود الأكسجين بيتفاعل معاه، بيسموه بالبلدي زيت مزنخ، كنا زمان أول حاجة نعملها لما نشتري الزيت نشمه، احنا النهاردة فقدنا حاسة الشم، أنا آخر عهدي بزيت الذرة من حوالي 10 سنين بطلته خالص مفيد فوزي:ليه ما هو لازم يعرفوا د. بهاء: مانا مش عاوز اعمل مشاكل مفيد فوزي:مش مشاكل هل الكلام ده اجتهاد واللا معلومة د. بهاء: معلومة، حاجة بسيطة جدا، دلوقت طيف تحصل على الزيت؟ يا عن طريق العصر البارد يا عن طريق التسخين، الذرة تحتوى على 4% زيت، جيب شوية درة كده ناشفين ما هو لو مبلولين حيطلعوا ميه، وحاول تطلع منهم زيت، مستحيل تطلع منهم زيت على البارد، اختراع لعبة الزيوت دي، يعني احنا كان زمان عندنا في مصر زيت بذرة القطن اللي هو زيت أبو الهول الذهبي ، بذرة القطن فيها 50% زيت حتى لما تمسك البذرة تدوس عليها تطلع زيت بس دلوقت لو القطن مرشوش أخاف من البذرة دي مفيد فوزي:زيت الزيتون ايه قيمته د. بهاء: هو في 3 أنواع من الزيوت مهمة للإنسان : أوميجا 3 ، أوميجا 6 ، أوميجا 9 ، أويجا 3 اللي هو الزيت الحار أو فصيلة من الزيوت الأب بتاعها الزيت الحار مفيد فوزي:يعني انا لما اروح السوبر ماركت باقوله فين زيت الزيتون ؟ يقولي اهه، انت تنصح الناس بزيت الزيتون د. بهاء: بس يكون معصور على البارد ومكتوب بوضوح انه معصور على البارد مفيد فوزي:هل المعلومة العلمية دي بتكتب على القزازة د. بهاء: بتكتب بس هما بيتفادوها بكلام ملاوع مفيد فوزي:ملاوع ازاي ؟ على فكرة انت راجل قديم يا يا كتور بهاء، الملاوعة دي كلمة انتهت من قاموس هذا العصر، الملاوعة بقى في ايه د. بهاء: اقولها بالانجليزي، بيكتب ايه "فيرجن" يعني بكر وبعدين يكتبلك "اكسترا فيرجن" طب ما هو مفيش بكرين، لكن ليه الكدب مفيد فوزي:هل هي ملاوعة تجارية د. بهاء: تجارية لأنه بيهرب من كلمة معصور على البارد، أنا كل القص المكتوبة على الزيت دي مش عاوزها أنا عايز أطمئن هو معصور على البارد واللا لأ مفيد فوزي:طب انت بتاكل ايه، الزيت بتجيبه منه د. بهاء: الحكاية سهلة أوي أنا باروح الساحل الشمالي اجيب من مزارع هو بيعصر عنده مفيد فوزي:تروح الساحل الشمالي عشان تجيب زيت من الراجل هناك د. بهاء: مانا مابشتريش قزازة باشتري كمية مفيد فوزي:فهمني الأخ "الثوم" ده انت شايف فيه ايه د. بهاء: انا برده من الحاجات اللي اتعلمتها بعد ما عييت بقيت ادور على الأكل الصحي ، شطبت كل أنواع الأكل وابتديت أبنيهاه من جديد قلت لحمة لأ شطبت اللحمة الى يومنا هذا وبعد 6 شهور شطبت الفراخ فبقيت بآكل أسماك فقط ومش أي أسماك مفيد فوزي:طب ما تغششني بتاكل أسماك ايه د. بهاء: أنا باشتري الماكريل الرخيص من الجمعية ابو 10 جنيه بالكتير مفيد فوزي:ده أفضل سمك د. بهاء: أفضل أنواع السمك في العالم لأنه في أعلى نسبة أوميجا 3 يليه السالمون وده يليه في الأهمية مفيد فوزي:يعني انت بتاكل بس جبنة وسمك د. بهاء: جبنة قريش ، ماباكلش غير جبنة قريش وأي خضروات وأي فواكه مفيد فوزي:لكن اللحمة وداعا والفراخ وداعا د. بهاء: من زمان من 16 سنة مفيد فوزي:دكتور بهاء انت بتنصح بالتوم في ايه؟ د. بهاء: أنا عمري ما كنت بآكل توم لأنه الدلع بتاعنا ريحته وحشة، طلع انه اهم حاجة في التوم الريحة مفيد فوزي:ريحة قاتلة د. بهاء: ما هي مسألة تعود مفيد فوزي:انت بتاكله حي كده، أنا لي صديق أكيد تعرفه علي السمان على فطاره فصين توم متقطعين ويحطهم على الفول، أنا مقدرتش أعمل الحكاية دي د. بهاء: ليه مفيد فوزي:عشان الريحة قاتلة د. بهاء: الريحة لو تاخد معاه بقدونس ممكن يحلها أو زيت حار، في الكتاب بيذكر حاجة غريبة قوي بيقولك لو عندك طفل مايحبش التوم حطهوله في الجزمة تحت الشراب كده فيدوس عليها وبين قوسين كتب نقصد الجزمة دي مش غلطة مطبعية وبعد 10 دقايق شم ريحته في نفسه يعني ريحة التوم دخلت من الجلد السميك الى نفس الإنسان، معنى كده انها تخللت ، انا باقول ان الزيوت العطرية بتتخلل جسم الانسان انا باسمي التعبير بتاعي ده كأنه أصبح شفاف بالنسبة للروائح والعطور دي مش محتاج الدورة الهضمية دليل ان ريحة التوم طلعت من كعب الرجل للنفس يعني دخلت الدورة الدموية مفيد فوزي:يعني يجب يا دكتور ان أي زيوت تتحط على الجسم تكون تحت اشراف طبيب ، هل حضرتك بتستشير الطبيب د. بهاء: اذا الزيوت مركزة ده خطير مفيد فوزي:العطرية د. بهاء: الزيوت العطرية لازم تكون مخففة وبتخفف بزيت اللوز وأنواع أخرى عشان تستعمل على الجلد لكن ممكن تحط على الجلد زيت زيتون فاصل مفيد فوزي:هل انت شايف ان الزيوت ممكن الدهان بها في حالات التوتر العصبية د. عمرو: هو على مستوى العالم بينصحوا بها في حالتين رقم 1 التوتر والقلق وبعض الحالات النفسية وبعض الآثار الجانبية بس بشرط، رقم 1 لا تستخدم مركزة لازم تضاف على زيوت أخرى زي زيت الزيتون أو زيت اللوز مفيد فوزي:وهي الناس حتعرف منين د. عمرو: رقم 2 لازم يكون تحت اشراف الطبيب، لازم الطبيب نفسه يكون عنده خبرة في استخدامها مفيد فوزي:دكتور عمرو هل أطباء الجلد ينصحوا بهذا الكلام د. عمرو: والله أطباء الجلد اللي دارسين" أروما ثيرابي" آه ممكن ينصح مفيد فوزي:ايه " أروما ثيرابي" د. عمرو: ده اللي هو استخدام الزيوت العطرية عن طريق الدهان أو الاستنشاق في بعض حالات التوتر أو القلق بس لازم يكون تحت إشراف طبيب مفيد فوزي:هل الاستنشاق بدرجة أكبر ممكن يبقاله أضرار شديدة د. عمرو: بالتأكيد مفيد فوزي:زي ايه د. عمرو: حاقول لحضرتك، الاستنشاق ده بيتم عن طريق الأنف في جوه مراكز احساس بتدي اشارات بتروح للمخ ممكن المخ يدي تنبيه لأجزاء جوا الجسم، دي مع كتر استعمالها ممكن يكون لها آثار جانبية، بالتالي يقولك لو حيتم استنشاق زيت عطري تحت اشراف طبيب الحد الأقصى نقطة واحدة على كوب ماء مغلي مرة واحدة في اليوم مفيد فوزي:استنشاق العطور الطبيعية، انا واحد من الناس عاشق للعطور، لكن طبعا ماروحش اشتريها ب 10 جنيه يعني مخلطة، هل هذا الاستنشاق الدائم للعطور ، العطور جزء من جمال الحياة، هل ده له أضرار د. عمرو: بالتركيزات اللي بنستخدمها لأ مفيد فوزي:في ناس تقولك انا عندي الاسانس، ايه الاسانس د. عمرو: يعني الزيت الخام من غير كحول، لكن في نقطة هل الاسانس ده هو طبيعي واللا لأ، يعني ممكن اشتري الاسانس الخام حاجة غالية جدا وممكن حاجة ارخص فبياخدو الاسانس يحطوا عليه زيت وممكن حضرتك متعرفش يعني حتى الاسانس نفسه ممكن ميكونش 100 % طبيعي مفيد فوزي: يعني افهم من كده ان في عمليات غش لا حدود لها في هذه العملية د. عمرو: كل ما اتمناه انه يكون في رقابة صحية اكتر مفيد فوزي:ما هي الرقابة حتكون ازاي يا دكتور عمرو وانت قلتلي لازم يبقى في تحليل عندك د. عمرو: عندنا أو في أي معمل متخصص ممكن ناخد عينات عشوائية من أي محلات عشان ده ممكن يأثر على أي حد بطريقة غير مباشرة مفيد فوزي:فضل يكلمني الدكتور عمرو مصطفى الباحث عن خطوة الزيوت العطرية جت الأستاذة فرح حيتة وقالت لي إن الزيوت العطرية جميلة للغاية لتحسين الحالة، في فن الحياة نناقش الأمر ، الراجل الباحث المحترم قالي مصيبة الزيوت العطرية حضرتك بتقولي جميلة الزيوت العطرية، فهميني هذا التناقض أ. فرح : أولا هي بترجع لحاسة الشم ، فلو أنا مثلا متضايقة واشم زيوت عطرية جميلة حالتي المزاجية تتحسن مفيد فوزي:ده بيقول أنه لو زادت عن حدود معينة أ. فرح : لأ طبعا الدكتور بيتكلم مظبوط كده، هو الفكرة إن الزيوت العطرية لوحدها ما تنفعش لازم تتخفف تقريبا 10 نقط من الزيت على عش زيت اللي هو الزيت الحامل سواء بقى زيت زيتون مفيد فوزي:حضرتك ايه اللي دخلك هذا العالم وانت سيدة بيت محترمة مالكيش في المسائل دي أ. فرح : حصلتلي حالة غريبة شوية، ضعف في الدورة الدموية الايدين والرجلين دايما ساقعة اوي في الشتا مفيد فوزي:ده طبيعي في الشتا أ. فرح : لأ كان زيادة كان ممكن لونهم يتغير وجت دكتورة روسية متخصصة في العلاج الطبيعي وابتدت تعملي مساج بالزيوت العطرية وهي اللي حببتني وعلمتني مفيد فوزي:كانت بتعملك مساج على الايدين أ. فرح : على الجسم كله وكل مرة كانت بتغير أنواع الزيوت مفيد فوزي:هي كانت طبيبة أ. فرح : هي متخصصة علاج طبيعي وفاهمة في الزيوت وده تخصصها مفيد فوزي:هل استريحت أ. فرح : جدا والحمد لله دلوقت معنديش ضعف الدورة الدموية خالص، الكلام ده من 15 سنة واكتر مفيد فوزي:هل الزيوت العطرية لها هذه الفاعلية في حياة الناس أ. فرح : طبعا ، هو أول من تعامل مع التدليك أو التداوي بالزيوت العطرية كان الفراعنة، النهاردة المصريين اهملوا أوي الحتة دي ، لكن في في الهند في الصين بيعملوا تداوي بالزيوت العطرية للاسترخاء للحالة المزاجية مفيد فوزي:بالشم واللا عن طريق الدهان أ. فرح : بالشم والتدليك مفيد فوزي:هل اعمل تدليك لنفسي أ. فرح : لا لا صعب الإنسان يدلك لنفسه مفيد فوزي:هل التدليك هو المساج أ. فرح : مشابه بطرق مختلفة، كل بلد ولها .. يعني في الصين يعتمد على مراكز الطاقة في جسم الإنسان مفيد فوزي:زي ا أ. فرح : سمه "شياتسو" يعتمد على أماكن معينة في الجسم يبتدي يتعامل معاها ويضغط عليها مفيد فوزي:زي ايه مراكز الطاقة أ. فرح : عندنا في جسمنا باللغة الهندي اسمه تشاترات مراكز الطاقة هما 7 ، في الصين يسموها الأكوا كانشر اللي هي الماكن اللي بيحطوا فيها الأبر الصينية، أنا عجبتني اوي الحكاية وابتديت أذاكر على النت واتفرج واشوف وعرفت اد ايه الزيوت ممكن تغير من حياة الانسان، يعني النهاردة أنا عندي أرق في انواع زيوت معينة استعملها بالليل سواء على المخدة، سواء في الفواحة تخلي الواحد ينام زي البيبي الصغير مفيد فوزي:من غير منومات أ. فرح : لا أنا ضد المنومات دي تعمل خلل في الجسم ولو الإنسان اتعود عليها تبقى خطر مفيد فوزي:يعني الزيوت دي ممكن توصل لحالة نعاس أ. فرح : طبعا تعمل حالة من الاسترخاء في زيوت مهمة جدا للاسترخاء مفيد فوزي:النوم ده مش هو عبارة عن إشارات تصدر من المخ للإنسان بالاسترخاء أ. فرح : في بعض الناس ما يقدروش ، المخ يفضل شغال، حتى لو نام يبقى مش مستريح فيقوم الصبح مرهق مفيد فوزي: يعني انشغال المخ بشيء أ. فرح : طبعا يسبب قلق مفيد فوزي:في كاليفورنيا سألت ما الذي يمكن أن يختصر عذابات حقن الأنسولين، هل ممكن أن في يوم من الأيام تتغير؟ قالولي من الممكن كحلم طبي أن يصبح الأنسولين عن طريق الشم، هل حاسة الشم يا دكتور لها هذا الوزن في جسم الإنسان د. بهاء مدكور: طبعا دي أهم حاسة لأنه على ما يقال الأنف فيه ألف حساس ، دول بيشموا 10 آلاف نوع من الروائح، زي في اللغة العربية عندنا 28 حرف تقدر تكتب بيهم ملايين الكلمات، فمجرد تركيبات مع الحاجات دي بتقرا كمية روايح مختلفة فهو الشم بييجي كده ويقال كمان إن الحيوانات لسه قاريها تحضيرا لهذا البرنامج مفيد فوزي:انت حضرت قبل ما تييجي د. بهاء: آه طبعا لازم أذاكر مفيد فوزي:والله شيء قيم ، أنا سعيد إن المصدر اللي باتكلم معاه حضر، على فكرة الدكتور عمرو مصطفى أيضا حضر لقيته شايل أوراق د. بهاء: عشان نفيد الناس أنا معايا أوراق وكتب والكمبيوتر ، الفكرة إن التوم من أحد أهم الحاجات فيه الريحة، انا ابتديت آخد أقراص توم عشان مفهاش ريحة وفرحان بيها وبعدين جابتلي حساسية فقلت خلاص جسمي مش قابل التوم فقلت أبطلها مفيد فوزي:فهمني من قراءاتك هو الجسم بيتبرمج على حاجات معينة ويملك إنه يرفض ويغضب، كان مرة دكتور الجلد الشهير محمد الحفناوي قالي ان أحيانا الجلد يثور ويغضب د. بهاء: ده بالضبط اللي حصللي، صوابعي اهه مفهاش أثر لأي جروح ولا حاجة، انا قعدت لمدة 10 سنين 3 صوابع من كل يد تنشف وتتشقق وتننزل دم فماشي ب6 بلاستر، حاجة تعقد لما تييجي تسلم على واحد غريب مفيد فوزي:وبعدين د. بهاء: طلعت حاجة من أحد الأعراض اللي بيعالجها الزيت الحار ، لما ابتديت آخد زيت حار اكتشفت بعد 6 أشهر وانا مش واخده عشان ده واخده عشان القلب والحاجات دي، لقيت ان معنديش حاجة في ايديا خالص مفيد فوزي:وكان السبب الزيت الحار د. بهاء: طبعا آه، طبعا زيت الزيتون المعصور على البارد مفيد فوزي:يعني زيت زيتون اللي باجيبه ده مالوش قيمة د. بهاء: مش مهم اجيبه منين المهم لما أشمه الاقي زيتون وإلا يبقى حد لعب فيه مفيد فوزي:هو انا يا دكتور عند الراجل حافتح القزازة واشمه قبل ماشتري، انا باترجاك تدرك انه في بعض العادات النفسية والذهنية في المجتمع المصري ما تملكش الإنسان اته يتحقق من شيء د. بهاء: ما هو مابيحاولش، يعني انا بطلت زيت الدرة ليه؟ اشتريت قزازة لقيتها مفدوغة لجوه ، انا ما حبش اشتري حاجة مطبقة، بس حسيت الضغطة دي وكأن الأكسجين اللي جوه استهلك، خدتها البيت وفتحتها جنب ودني سمعت تنفيس لقيت انه فعلا لقيتها مزنخة، محدش عايز يشم حاجة، على فكرة في قاعدة بسيطة جدا في الزيوت اللي حتاكلها لازم يبقى لها طعم وريحة واذا ماكنش يبقى حد لعب فيها في المعمل وشالها ، باختصار لو اقلك السبع خطوات اللي يتم فيها عصر الزيوت على الساخن بتبتدي بتسخينها على 200 درجة مئوية وبعدين في وسط الخطوات السبعة دي بيدوبها في مادة اسمها هكسين وده أحد مركبات البترول وأي حاجة لها علاقة بالبترول يبقى ربنا يستر، وبعدين تسخين عند 150 درجة وبعدين بيحطلها مواد لما لونها يبقى أسود تزيل اللون مفيد فوزي:المفيد يا دكتور د. بهاء: أي زيت يكون معصور على البارد، أي زيت مش معصور على البارد بيعملوا فيه العمايل السوده دي، وآخر مرحلة بيعدي في بخار محمص زي محطات الكهربا عند 250 درجة مئوية عشان ينقيه ففي الآخر يجيلك زيت عديم اللون والطعم والرائحة فاصل مفيد فوزي:أنا أحيانا يأتيني التوتر من هذه الحياة الغريبة التي نحياها فألجأ الى منوم أعشاب، السؤال وانت راجل بتشتغل في معامل هل هذه المنومات فيها كيماويات د. عمرو: الأعشاب في حد ذاتها كتر استعمالها مش صح مفيد فوزي:انصحني ليه لأن في ناس كتير بتستخدمها د. عمرو: لأن مش كل حاجة في الأعشاب تنفع ، في بعض أعشاب باستخلص منها أدوية تحت إشراف صيدلي وتم دراسة عليها وحياخد المركب المفيد في حالة معينة مفيد فوزي:أيوه يعني كلمة منوم أعشاب دي كلمة كده هوائية مش حقيقية د. عمرو: لأ لأن أولا ممكن أقولها بطريقة تانية، الأعشاب دي هل نقية هل مكنتش مرشوشة قبل كده مفيد فوزي:ما هو انا ماليش دعوة باللي حصل انا باخد الحبة د. عمرو: الحبة اللي من الصيدلية آه ده مفيش مشكلة، انما متخدش أعشاب مجرد حد نصحك مفيد فوزي:لأ أنا باقول هذه الحبة فيها كيماويات د. عمرو: لأ دي طبيعية مفيد فوزي:طب لما تحب تروج لقيمة الأعشاب في حياتنا كما يأتي في الكتب وعن قدماء المصريين أن الأعشاب المصرية لها الكثير من الفوائد هل ده بعض التجار بيلعبوا به للربح ويدخل الأعشاب في شكل زيوت ويخلطوها ويبيعوها للناس د. عمرو: أعشاب لو أنا لقيت زيوت حد باعها حد استخلصها عند عطار عند غيره، أنا مقدرش انصح به لازم تكون من مكان موثوق فيه ومعترف من قبل الجهات المسؤلة في الدولة مفيد فوزي:وغير كده د. عمرو: لأ مقدرش استخدمه، وأي شخص من وجهة نظري يستخدمه يبقى هو يتحمل الآثار، أنا لوضريت نفسي اللي باع لي الحاجة دي حيستفيد ايه انا اللي باضر نفسي ، أنا مقدرش استخدم حاجة إلا تحت إشراف طبيب متخصص مفيد فوزي:انا مصدقك لأن أنا باتكلم من جوه معمل بحثي معندوش حاجة اسمها التساؤل وكل شيء خاضع للمعادلة العلمية مفيد فوزي:صديقاتك المكتئبات بيستخدموا ايه أ. فرح : حضرتك تقصد أنواع الزيوت، أول حاجة اللافندر وده في ميزة حلوة أنه ممكن يستعمل للاسترخاء وممكن يستعمل لتحسين الحالة المزاجية بالنهار ، بص على الطيارات واحنا مسافرين مفيد فوزي:الحالة المزاجية أ. فرح : آه طبعا مفيد فوزي:والله يا أستاذة فرح الدكتروة مها راداميس اللي هي متخصصة في التغذية بتقول وصححي لي اذا كان غلط، بتقول ان قطعة صغيرة من الشوكولاتة بتغير الحالة المزاجية للإنسان أ. فرح : آه طبعا ، الشوكولاتة مفيدة جدا بس متكترش منها، ولو في ناس بيمروا ببعض الأزمات النفسية الشوكولاتة فعلا بتساعد، بس مش مفترض الإكثار منها مفيد فوزي:فهميني حاسة الشم وحياة الإنسان أ. فرح : حاسة الشم أقوى الحواس عند الإنسان يعني البيبي لما يتولد أول ريحة بيميزها هي ريحة أمه، الولد الصغير لما يعيط أول لما أمه تشيله بيحس بالأمان وفي نصيحة دلوقت بره بيعملوها أنه لو الأم خارجة حاجة من ملابسها تبقى موجودة جنبه لو قلق مجرد أنه يشمها يشعر بالأمان مفيد فوزي: من المعلومات اللي عرفتها أن العطر لما يترش على الجلد فترات طويلة يؤثر سلبا على الجلد، وأنت تعلمين علم النساء أن النساء يستخدمن العطور على جسمهم أ. فرح : لو العطر راقي ومكوناته كويسة عمره ما يعمل أي التهاب لكن لو العطر ده كله كحول شيئ طبيعي يعمل التهاب لذلك في ماركات عالمية تلاقيها أغلى من ماركات تانية، وبعدين في حاجة حضرتك لو تبص لدهان الجسم بالعطور ده من أيام الفراعنة والملكات زي كليوباترا، مين اللي لسه ماسك في الحتة دى بقى؟ السودانيات، هما عندهم حفرة كده تبه غرف السونا وعليه خشب زي ملة السرير كده وبيحطوا تحته أخشاب عطرية زي الصندل وبيسموها الدلكة ما شاء الله تشوفهم كده بيبرقوا وريحتهم حلوة مفيد فوزي:دلوقت الناس بطلت تغسل ايديها بالصابون وبتغسل ايديها بنوع من المطهرات أ. فرح : دي مطلوبة جدا لأن في فيروسات كتير مش مفروض حد يسلم على أى حد بسهولة مفيد فوزي:حضرتك عندك ولاد أ. فرح : نعم مفيد فوزي:دي هواية حياتك يعني وهبتيها أ. فرح : لأ لأ أنا بس حبيتها مفيد فوزي:سؤال شخصي هل تتكسبين من هذا الشيء أ. فرح : لأ خالص مفيد فوزي:يعني انت مجرد بتبحثي ومشيت في هذا الخط أ. فرح : بانصح صحابي واتعلمت من ناس صينيين، كل بلد أسافرها لازم اخش كده في الخبايا مفيد فوزي:سافرت الصين أ. فرح : لأ بس لي أصحاب كتير من الصين وبيجيلي منها حاجات كتير أوي، وكل بلد أسافرها اروح محلات البدي شوب والأروما ثيرابي وانام جوه المحل اقعد اشوف كل ما هو مفيد وكل ما هو طبيعي مفيد فوزي:معنديش أسئلة أخرى للأستاذة فرح غير أنها استهوتها الزيوت والعطور وعملتها على مستوى شخصي بحت لا هو الهدف منه الكسب ولا حتى إضافة علمية ولا شيء أكتر من انها عن حاسة الشم اللي هي أهم حاسة بالنسبة للإنسان وظفت هذا الجهد. لمشاهدة الحلقة كاملة " فيديو "
