انا مندهش .. من ساعة حلقة باسم يوسف ما خلصت امبارح والفيس والتويتر ملهاش سيرة غير عن الحلقة .. طبعا م الاول كده .. عايز اقول ان باسم يوسف مزوّدها جامد جدا في " الأباحة " .. والإيحاءات الجنسية عنده مبقتش إيحاءات .. بقت فيلم " بورنو " .. ع المفتشر .. مع انه لو استغنى عنها ، مش حيجرى حاجة ابدا .. ولا عدد مشاهدينه حيقل .. لكن عدد اللي بيحبوه أكيد حيزيد.
اما عن الحلقة واللي جه فيها فردود الفعل الغاضبة " أوفر " أوي .. اللي حط صورته ع الفيس وكتب اتفوووووه .. واللي قال عليه اخواني واللي يقول عميل وبيقبض .. واللي بيطالب بمحاكمته عشان أهان الجيش واتريق ع السيسي .. وكلام كبير جدا مالهوش محل م الإعراب غير حاجة واحدة بس .. اللي نحبه ونقدسه متجيش جنبه .. واللي كنا مش بنحبه " طلع دين امه " وقول عليه ما قاله مالك في الخمر .. شرشرحه .. انشالله حتى تقلعه " اللباس " .. انما لحد السيسي .. قف .. وستوب وجزمة قديمة في بقك.
وده الغلط بعينه .. ولو حنقضّيها كده .. الرمز لا يُمس ولا نيجي ناحيته غير بالكلام الحلو .. يبقى ورحمة امي ما احنا نافعين .. فيها ايه لما باسم ينتقد " حنيّة " السيسي في الكلام اللي خلّت ستات البلد بتعشقه عشق ؟ .. والرجالة كمان بالمرة نازلة فيه حب وغرام .. وفعلا المسألة بقت سخيفة وخرجت عن حدود المعقول .. فإيه المشكلة يعنى انه يقول رأيه في حالة الهيام الشديدة دي من الجنسين؟ .. حتكّبروا المسألة وتقولوا بيتريق ع الجيش والكلام الكبير ده .. وان الجيش طافح الدم في الشارع وسي باسم بيتمسخر بيه وبرجالته ؟ .. كده يبقى خرجنا عن منطق الأمور .. ومن دلوقتي مادام 90% من الشعب عايز السيسي .. يبقى مش حيقبل يتقال عليه وعنه تلت التلاتة كام .. وبكده يبقى باى باى يا حلوة .. ويا ثورة ما كانت على بالي!
اما عن رأيه ان اللي حصل في 30 يونيو انقلاب .. هو حر .. ماغيره كتير جدا شايفينه انقلاب .. يتفلقوا ولا يولعوا بجاز .. بس منمنعوش يقول رأيه .. يا سلام .. ما بلال فضل هارينا مقالات من النوع ده وسي الافندي اللي اسمه عمرو حمزاوي وغيره وغيره .. هى جات على باسم يوسف ؟ .. واحد يرد : اصل باسم اشهر بكتيييير م الاتنين .. وتأثيره عالمي وممكن جدا برأيه ده .. يقلب علينا امريكا والغرب تاني .. واحنا ما صدقنا انهم سكتوا عننا شوية.
.. واسمحوا لي اقولكم ده كلام فارغ وكلام ناس على راسها بطحة .. ثم ايه يكون باسم يعني عشان يبقى مؤثر للدرجة دي وممكن يلعب في دماغ الغرب او يقلبهم علينا .. ما طظ فيه وفيهم .. يا سلام .. زعلانين منه اوي انه بيقول ان اللي حصل انقلاب ؟ .. طيب ماتردوا عليه زي الرجالة كده وبعين قوية : ايوه انقلاب .. انقلاب الشعب كله بما فيه الجيش على اوسخ نظام حكم البلد منذ عهد الفراعنة .. انما حنخاف ونقلق من واحد زي باسم - راح او جه – مذيع وجرىء حبتين او تلاتة .. بيعبّر عن رأيه ورأى ناس غيره .. حنخاف من ايه .. وحنخاف ليه .. اللي عملناه عملناه ومقتنعين به .. واللي مش أد الدح ميقولش أح " سوري في الكلمة " .. حنلف وندور ونجيب المصحف ونحلف انه مكنش انقلاب .. يبقى احنا عارفين انه انقلاب وساكتين وبنستعبط .. قادرين نقولها
وصباعنا في عين التخين انها ثورة رائعة وعظيمة والجيش حمى بلده من برك دماء وحرب أهلية .. كان ممكن تخلينا زي سوريا .. كل يوم يموت مننا 200 واحد .. يبقى نقولها وبصوت عالي واللي مش عاجبه ياكل " ... " !
عايزين نفوق يا ناس .. ثورتين ايه ونيلة ايه اللي عملناهم .. واحنا مش طايقين كلمة ولا نص كلمة على الفريق السيسي .. وهو لسه مبقاش رئيس .. ياليلة سودا .. ده لو بقى رئيس مصر حتنفخوا اللي يقرب منه ولا يقول عليه كلمتين ميعجبوش .. والله العظيم كده نبقى احنا بنهزر .. ومش نافعين .. واقولها تاني ورحمة امي مش نافعين .. ولو اخدنا بالجزمة بعد كده محدش يقوللي .. مش اجنا اللي ننضرب على قفانا .. لا وحياة امك انت وهو .. ان مكناش نسترجل ونعرف يعني ايه كل واحد حر يقول رأيه من غير قلق ولا خوف .. مش حيبقى ضرب قفا وبس .. فاهمين .. عشان كده بقول نسترجل .. وبلاش نبقى زي توفيق عكاشة واللي ميتسماش احمد موسى .. الاولاني ابن مجنونة يقولك انا مفجر ثورة 30 يونيو .. والتاني ابن هبلة وعامل ثورجي وفاكر اننا نسينا هو كان ايه وبيشتغل ايه ومع مين ، وازاى ممكن يوطي يبوس جزمة امن الدولة عشان يسامحوه انه مجبش النهارده تقرير عن واحد صاحبه اتكلم معاه كلمتين وميعرفش ان البعيد ندل وعميل وخاين.
ياتكم القرف " عكاشة وموسى" .. انتوا وكل اللي شكلكم .. ياللي عاملين ثورجية .. وانتوا شوية زبالة .. خليتوا واحد " مهرج " زي باسم يمسح بيكم الارض!