اللي يعرف الكلمتين اللي مكانهم النقط بين القوسين حياخد جايزة كبيرة اوي .. حيسافر اسبوع كامل على حسابي لبور سعيد وينزل في اجدعها فندق هناك ويشوف الرجالة اللي على حق لمّا يعبروا عن قرفهم من رئيس دولتهم ويرفضوا الكلمتين الاونطة اللي زي عدمهم ، واللي قال ايه كان بيحاول يطيّب بيهم خاطرهم .. فعمل بالمثل القائل : جه يكحلها عماها .. مع مثل تاني ينطبق على مرسي : اش تعمل الماشطة في الوش العكر .
ولو مش عاجباه الجايزة دي .. عندي جايزة تانية .. شريط " بيور " محدش خدشه لعم الشيخ حازم صلاح ابو اسماعيل في مؤتمر امبارح وسط جموع غفيرة من مريديه ومؤيديه و " دلاديله " وهو بيعلن الحرب صراحة وجهرا على كل من تسوّل له نفسه انه يخرج على الرئيس مرسي او يطالب بإسقاط شرعيته .. بعد ان اكتشف بعبقريته الفذة المخطط الجهنمي اللي جبهات المعارضة بتعمله .. وهو ان الشرطة تخلع.. تقوم الناس تنادي على الجيش : انزل .. انزل .. أحسن البلد حتضيع .. وميزة الشريط ده انه يزيل الكآبة من النفوس وحيخلّي اللي يشوفه يموت من الضحك .. وحيفتكر الراجل القصير الرفيع اللي مش باين من الأرض اللي كان في مسرحية الهمجي.. ومحمد صبحي بيحذره انه حيضربه والراجل يرد عليه : متقدرش .. وحيتخيل كمان فار بيترعب من القطة قام عايز يعمل دكر على الاسد .. والاسد لو بس " كح " حيفرمه بضفر رجليه.
اسمعوا عم الشيخ حازم صلاح ابو اسماعيل قال ايه : لو الناس المعارضين لمرسي فاكرين اننا ساكتين ليهم عن ضعف .. يبقوا أغبياء .. لازم يعرفوا اننا لو حبينا ننزل الشارع .. مش حيلاقوا متر مربع يقفوا فيه .. من النهارده وبقولها بعلو حسي .. الشارع لنا احنا لوحدنا .. " من غير ماجدة الرومي .. السافرة صاحبة الأغنية " .. من النهارده عايزكم يا جماعة الخير اول ما تسمعوا النداء تلبوا على طول .. وعشان محدش يقول عننا اننا متزمتين .. فقد اتفقت مع الجماعة ان الإشارة حتكون بأغنية عمرو دياب : تعالى تعالى تعالى .. ياحبيب العمر تعااااالى .. اول ماتسمعوها عبر إذاعتنا الداخلية والخارجية وعبر الأقمار الصناعية تنزلوا على طول .. واثناء التجمع والتجمهر حنذيع عليكم عبر الميكروفونات اغنية شادية في فيلم " المرأة المجهولة " : وديني مطرح ماتوديني .. اى مكان وياك يرضيني .. عشان تعبر تماما عن السمع والطاعة والتسليم لقائد المسيرة اللي لو عطست بس ، حتقعد كل اللي بيقولوا عن نفسهم ثوريين في بيوتهم.
احنا مكبرين دماغنا وبنقول خلّيهم يتسلوا بدل القعدة في البيوت من غير شغل .. يقوموا يفتكرونا مش قادرين عليهم .. ياخي " أحه " .. ده احنا عالم صايعة يابا .. لسه محدش شاف العين الحمرا اللي على حق .. يوم الاتحادية دي كانت بروفة على خفيف .. ويوم ماكسرنا مقر جريدة الوفد ده كان هزار .. ويوم ماوزير الداخلية احمد جمال الدين ماعمل فيها دكر وراح قسم الدقي عشان يحمي رجالته .. بتليفون مني لمرسي .. طيّر امه بره الوزارة .. لسه التقيل ورا ياجماعة .. ولسه اللي عاملين فيها ثوار ماشوف حقيقتنا لمّا نغضب ونعبر عن غضبنا.
... كلام كتير اوي اهبل وعبيط قاله ابو اسماعيل .. والحقيقة انا مش عارف جاب القوة دي كلها منين .. وهو منظر .. وساعة الجد يجري زي الفار .. وانا بس عايز افكره – مع اني يومها كنت ضد اللي حصل – لمّا راحوا الخليفة المأمون عند مقر وزارة الدفاع ايام المشير طنطاوي .. وعلى رأى احمد شفيق في 5 دقايق انفض الجمع وكل واحد بقى يدور على خرم يستخبى فيه .. ولا يوم ماراحوا اسكندرية عشان يحموا عم الشيخ المحلاوي ويؤدبوا أهل الاسكندرية .. قام الاسكندرانية علّموهم الأدب بجد وخلوهم يجيبوا واطي ويطيروا زي الدبان من رشة بيروسول .. وفاكر يومها وانا بتفرج على التليفزيون .. الاسكندرانية ودعوهم وهما بيقولوا : مع السلامة مع السلامة .. مع السلامة ياولاد " ... ".
ايه ياعم حازم صلاح ابو اسماعيل .. ان كنت ناسي .. افكرك .. فاتح صدرك ع الأخر على ايه .. محمي بمرسي وجماعته عشان بتدافع عنه وعن شرعيته .. ؟ .. ان كان مرسي يقدر يحمي نفسه .. يبقي يحميك او " يحمّيك في كنكة " يابعيد .. ياعم روح وانت اخرك " بقين " وساعة الجد .. امك في العشة ولا طارت .. صدقني .. المسألة مسألة وقت .. طال الزمن او قصر .. مش حيكون لكم وجود .. سبحان الله .. الثورة قامت عشان تخرجوا من جحوركم ونشوفكم على حقيقتكم سواء انتم او الإخوان .. وعلى رأى المثل : تعرف فلان ؟ اعرفه .. عاشرته ؟ لأ .. تبقى متعرفوش .. وادينا عرفناكم على حقيقتكم .. شوية جهلة .. اغبياء .. معندكوش دم .. وتستاهلوا اللي حيحصل لكم وعن قريب أوي ان شاء الله.
لسه قبل ما اكتب المقال شفت على " الموجز " شيخ سلفي اسمه الشيخ فوزي السعيد من اتباعك ياعم ابو اسماعيل .. بيقول ايه بقى ؟ .. بيقول ان لو الرئيس مرسي يوم الاتحادية سمح لهم بالتسليح وانهم ينزلوا مسلحين كانوا علمونا الأدب على حق .. لكن مرسي الله يجازيه خير قال لنا : بلاش سلاح دلوقتي .. خليه بعدين .. وقته جي .. محدش يقلق .. انا بس عايزكم ترعبوهم وتسحلوهم وتمسحوا بكرامة اللي خلفوهم الأرض .. كبروفة مصغرة للي ممكن يحصل لهم بعد كده لمّا نمرر قانون الضبطية القضائية وتنزل مليشياتنا متسلحة ميت فل وعشرة .. ودبّح يا جدع في كل اللي مش عاجبه كلامنا وبيقول علينا وحشين وكخه.
الراجل اللي اسمه السعيد " ربنا يتعسك دنيا واخرة " بيقولها بالفم المليان وببجاحة منقطعة النظير : لو مرسي سمح لنا يوم الاتحادية بالتسليح .. كان حيبقى الوضع مختلف .. وكان كل واحد بعد كده حط لسانه في بقه وانكتم خالص .. بس أديني بقولها وبيقولها عمنا وراجلنا وشيخنا ابو اسماعيل .. كل اللي حصل ده هزار وحاجة ببلاش كده .. واللي جي اخطر بكتير .. واللي مش مصدق .. ينتظر وحيشوف.
أدي كلام عم الشيخ السعيد .. وأدي كلام عم الشيخ حازم ابو اسماعيل .. مين بقى بعد ماقرا المقال عرف الكلمتين اللي مكانهم 3 نقط بين القوسين عشان ياخد الجايزة؟!