أيام رمضان غير باقي أيام السنة، كلنا بنبقى عايزين نعمل كل يوم أكل أحلى من اليوم اللي قبله، وعلشان ماتتعبيش في التفكير والاختيار، "بص وطل" هتقدّم لك كل يوم عزومة كاملة من العصير للسحور.. على سفرة النهارده هيكون موجود مشروب التمر باللبن وسلطة الجرجير وشوربة الفراخ بالكريمة ولازانيا باللحمة والجبنة وبودينج الموز وجوز الهند، وعلى السحور بنقدّم لك بيض بالخضراوات..
عصير التمر باللبن عصير التمر باللبن المقادير: كوب تمر منزوع البذر كوب ميه دافية كوب لبن الطريقة: 1- انقعي التمر في الميه الدافية لمدة ساعة، وبعد كده اضربي التمر بالميه بتاعته في الخلاط مع اللبن لغاية ما الخليط يتجانس تماما، وبعد كده صفّي العصير وحطّيه في الثلاجة وعند التقديم صبّيه في كاسات التقديم وزيّنيه بالمكسرات المفرومة.
سلطة الجرجير سلطة الجرجير المقادير: 2 حزمة جرجير 3 ملعقة كبيرة عصير ليمون 2 ثمرة طماطم مقطّعة شرائح 2 ثمرة بصل مقطّعة شرائح 2 ثمرة خيار مقطّعة شرائح 1⁄4 ملعقة صغيرة شطة 1⁄4 كوب زيت زيتون 1⁄2 كوب عين جمل 3 ملعقة كبيرة خل ملح وفلفل أسود المقادير: 1- اغسلي الجرجير كويس، وخدي الأوراق بتاعته واخلطيها مع قطع الطماطم والخيار والبصل وعين الجمل وسيبيهم على جنب. 2- هاتي برطمان وحطّي فيه الزيت والخل وعصير الليمون والملح والفلفل الأسود والشطة، واقفليه كويس ورجّيه لمدة دقيقتين، وبعدين وزّعيه على طبق السلطة، وقدّميه.
شوربة الفراخ بالكريمة شوربة الفراخ بالكريمة المقادير: 2 شريحة فراخ بانيه مقطّعة مكعبات صغيرة 4 قطع مشروم مقطّعة قطع صغيرة 1⁄2 ملعقة صغيرة زنجبيل طازج مفروم 3 كوب شوربة فراخ 2 ملعقة كبيرة زبدة ثمرة بصل مبشورة كوب كريمة لباني ملح وفلفل أسود ملعقة كبيرة دقيق فص ثوم مفروم الطريقة: 1- سيّحي الزبدة على النار، وشوّحي فيها البصل والثوم والزنجبيل لحد ما يبقى لونهم دهبي، وبعدين ضيفي مكعبات الفراخ وقلّبيهم مع بعض على النار لحد ما الفراخ تستوي. 2- ضيفي على الخليط الشوربة والملح والفلفل وقلّبيهم مع بعض على النار وسيبي الخليط يغلي شوية، وبعد كده قلّلي درجة الحرارة وسيبيه على نار هادية لمدة 10 دقائق. 3- ضيفي الكريمة على الشوربة وقلّبيهم مع بعض على النار شوية، وبعد كده ارفعيها من على النار واغرفيها في أطباق التقديم وزيّنيها بالبقدونس الأخضر.
لازانيا باللحمة والجبنة لازانيا باللحمة والجبنة المقادير: باكيت شرائح مكرونة لازانيا جاهزة للطهي مقادير صوص اللحمة: 3⁄4 كيلو لحمة مفرومة 1⁄4 كيلو مشروم مقطّع قطع صغيرة 1⁄4 ملعقة صغيرة بابريكا (فلفل أحمر مطحون) 2 ملعقة كبيرة صلصة طماطم كوب عصير طماطم بصلة متوسطة مفرومة ملح وفلفل أسود ملعقة كبيرة زبدة 1⁄2 كوب ميه مقادير الحشو: 1⁄4 كيلو جبنة موتزاريلا مبشورة 1⁄2 كوب جبنة رومي مبشورة 1⁄4 كوب بقدونس مفروم 1⁄4 كيلو جبنة بيضاء ملح وفلفل أسود 2 بيضة مخفوقة مقادير البشاميل: 1⁄2 كوب دقيق 4 ملعقة كبيرة زبدة ملح وفلفل أسود 4 كوب لبن بيضة الطريقة: 1- لتحضير خليط اللحمة، سيّحي الزبدة على النار، وبعد كده شوّحي فيها البصل لغاية ما يذبل، وبعد كده ضيفي عليه اللحمة المفرومة وقلّبي الخليط على النار، لغاية ما اللحمة المفرومة تنزّل الميه اللي فيها، وبعد كده قللي درجة الحرارة عليها وسيبيها على نار هادية لغاية ما تتعصّج، وبعدين تبّليها بالملح والفلفل والبابريكا، وضيفي عليها قطع المشروم، وقلّبيهم مع بعض شوية وبعدين ضيفي عصير الطماطم والصلصة والميه، وسيبيهم على النار لمدة 20 دقيقة أو لغاية ما الطماطم تتسبّك شوية. 2- لتحضير الحشو، اخلطي البيض مع الجبنة البيضا والجبنة الرومي والموتزاريلا والملح والفلفل الأسود والبقدونس، وسيبيهم على جنب. 3- لتحضير البشاميل، هاتي حلة وحطّيها على النار وسيّحي فيها الزبدة وخلّيها تسخن كويس، وبعد كده ضيفي عليها الدقيق وقلّبيه لحد ما يبقى لونه دهبي، وبعد كده ضيفي اللبن بالتدريج مع التقليب المستمر على نار هادية لغاية ما الخليط يتقل معاكي ويبقى بالقوام اللي إنتي عايزاه، وبعد كده ارفعيه من على النار وتبّليه بالملح والفلفل. 4- هاتي صينية الفرن وافردي فيها طبقة خفيفة من البشاميل، وبعد كده افردي شرائح المكرونة عليها، وبعدين حطّي عليها نصف كمية خليط الجبنة، وبعدين افردي طبقة من خليط اللحمة المفرومة وطبقة من البشاميل، وبعد كده غطّيها بطبقة من شرائح المكرونة، وبعدين افردي عليها طبقة من البشاميل وباقي كمية خليط الجبنة واللحمة، وبعد كدة غطّيها بشرائح المكرونة. 5- اخلطي باقي البشاميل مع بيضة وقلّبيهم مع بعض كويس، ووزّعيهم على المكرونة بحيث تغطّيها كويس، وفي الآخر رشّي طبقة من الجبنة الموتزاريلا، ودخّلي الصينية في الفرن وسيبيها لمدة 30 دقيقة أو لغاية ما وش الصينية يحمرّ.
بودينج الموز وجوز الهند بودينج الموز وجوز الهند المقادير: 8 ثمرة موز مقشرّة ومقطّعة شرائح 1⁄2 كوب جوز هند مبشور 1⁄2 كوب كريمة لباني 3⁄4 كوب لبن الطريقة: 1- اخلطي اللبن مع الموز والكريمة وجوز الهند كويس، وبعدين صبّي الخليط في أطباق التقديم ودخّليهم الثلاجة لحد ما يبرد، وبعدين قدّميه.
صينية البيض بالخضراوات للسحور.. صينية البيض بالخضراوات المقادير: 5 بيضة ثمرة بطاطس مقطّعة لمكعبات صغيرة ثمرة فلفل أخضر مقطّعة شرائح رفيعة ثمرة فلفل أحمر مقطّعة شرائح رفيعة ثمرة بصل أخضر مقطّعة شرائح 2 ملعقة كبيرة زيت زيتون 1⁄2 كوب بقدونس مفروم ثمرة جزر كبيرة مبشورة مكعب زبدة صغير ملعقة صغيرة زعتر ملح وفلفل أسود الطريقة: 1- ادهني مكعبات البطاطس بزيت الزيتون والملح والفلفل الأسود ورصّيها في الصينية ودخليها فرن ساخن لحد ما تبقى مقرمشة، وبعدين شوّحي البصل والفلفل الملون والجزر في الزبدة على النار، وبعد كده تبّليهم بالملح والفلفل الأسود والزعتر وقلّبيهم مع بعض لمدة دقيقة على النار. 2- شيلي الخليط من على النار وضيفيه لصينية البطاطس وقلّبيهم مع بعض كويس. 3- اخفقي البيض مع شوية ملح وفلفل في طبق، وبعد كده صبّي البيض المخفوق في الصينية، ورشّي على الوش شوية جبنة موتزاريلا، ودخّلي الصينية في الفرن لمدة 15 دقيقة، وبعدين طلّعيها وقدّميها. وبكده خلصت عزومة النهارده.. مستنيين تجرّبي وتقولي لنا إيه رأيك.. واستنينا بكرة إن شاء الله مع عزومة جديدة.. نتمنى لكم صوما مقبولا وإفطارا شهيا بمشيئة الله.. سلام،،،