أنا شاب عندي 25 سنة وخاطب من سنتين فتاة عندها 20 سنة وبنحب بعض بجد، بس المشكلة إن خطيبتي حساسة جدا، من أول يوم خطوبة ومش بتعدي أي حاجة، وده بيخلينا نضيّع وقت كتير في الزعل.. وهي كمان من النوع اللي بتجادل كتير وده بيضايقنى جدا، وهي بتقول لي: "إني بأعدي للناس بس مش باعرف أعدي لك حاجة، رغم إنك مش بتبقى عاوز تزعّلني"، وأنا فعلا بحب أسعدها بس خايف تعيّشني في نكد بعد الزواج.. وهي حاولت تتغير علشاني بس للأسف واضح إن ده طبع هيفضل معاها على طول، وأنا مش عارف أعمل إيه.. آسف للإطالة وأرجو الإفادة.
Divo.s7s
صديقنا العزيز.. شكرا على ثقتك في موقعنا، الحقيقة إن سنتين خطوبة فترة طويلة، والانفصال بعدها مش هيكون سهل، خصوصا على إنسانة حساسة زي ما بتقول، بس خلينا نفكر سوا! يا ترى إنت بتحب خطيبتك؟ يعني هي دي الست اللي إنت عاوزها تبقى أم ولادك وتقوم من النوم كل يوم تلاقيها جنبك على السرير؟ ولا مش فارق هي أو أي ست تانية والمسألة جواز وخلاص؟ إجابتك هي اللي هتحدد، لأنك لو بتحبها وعاوز دي بالذات، لازم تفهم إن الإنسان كائن متطور، وإن مافيش حاجة اسمها طبع، دي أسطوانات إحنا حافظينها والحقيقة إنها مش حقيقية بالمرة، لو غيّرت تفكيرها هتغيرها، وده ممكن يتعمل بشوية شغل وتعب وقراية واستشارات، وكلام معاها وشوية مواقف.. وحط في الاعتبار إنها 20 سنة، يعني لسه في أواخر المراهقة وماوصلتش للنضج الكافي، وسن الرشد له عامل وبيغيّر في شخصية البني آدم، فعلى سبيل المثال: المراهق طول الوقت بيشوف الدنيا يا أبيض يا أسود، خير أو شر، مافيش درجات، وعلامة من علامات النضج إنها تبدأ تستوعب الدرجات دي ومساحات الرمادي اللي في الدنيا، وده في حد ذاته مش هيخليها حساسة زي الأول، فهل من الممكن إنك تصبر وتستحمل معاها لغاية ما الحياة تسوّيها على نار هادية؟ هل هي كشخصية تستاهل تعبك ده وحساسيتها هي عيبها الوحيد؟ لازم تفكر كويس لأن فيه عيوب تانية ممكن تكون أبسط كتير، لكن ممكن تكون مقرفة أكتر في الحياة اليومية، زي إنها تكون مهملة مثلا، أو طماعة، أو كذابة! وفيه من ده كتير.. الحساسية مشكلة لها كمان طرفين، يعني لو إنتم عايشين في بيت واحد وبدأت تعرفها كويس وتفهمها، مع الوقت هتعرف الحاجات اللي بتضايقها وهتحاول تتجنبها، فتلاقي المشكلة اختفت.. زائد إن كل الستات عموما بيكون عندهم فترة كل شهر، الهرمونات بتفرض عليهم حالة نفسية معينة بيغلب عليها العصبية والحزن، ودي في الغالب هتلاقيها في كل الستات، بس مع العشرة بتقدر تحدد الأيام دي ولما تيجي بتحاول تتجنبها أو تتجنب النقاش والخناق معاها لغاية ما تعدي العاصفة. كل الكلام ده لو كنت لسه باقي عليها، أما لو مش فارق معاك أي ست والسلام، فممكن تسيبها وتدوّر على واحدة فرفوشة بطبعها ومبهجة، بس ربك العالم بقى ممكن يبقى عيبها إيه؟ ما هو لازم يكون فيها عيب، الكمال لله وحده، وربنا يوفقك.