أنا مش عارفة أبدأ الموضوع منين، بس اللي أعرفه إني مخنوقة أوي ومش بالاقي راحتي غير لما أفضفض معاكم.. مشكلتي إن أنا بنت عندي 20 سنة وزي أي بنت بتحب وتتحب، أنا مرتبطة بشاب من سني في الكلية، هو كان زميلي وكنا أصحاب أوي في أول علاقتنا، لغاية ما اعترف لي إنه بيحبني، والكلام ده من أيام سنة أولى، وكنا كويسين أوي في أول علاقتنا، كنت فاكرة إن فيه درجة تفاهم بيننا عالية أوي وماكانش فيه خناق خالص، هو شاب زي أي شاب أكيد كان له علاقات قبل ما يعرفني، وهو قال لي على كل ده وأنا قبلت ده لأنه كان صريح معايا زي ما أنا كنت صريحة معاه. بس حسيت بعد كده إن البني آدم اللي أعرفه بدأ يتغير؛ تدريجيا ظهرت شخصية سي السيد اللي عايز يتقال له حاضر من غير نقاش، وأنا علشان أحافظ على اللي ما بينا كنت باقول له حاضر، لأني مش باشوفها إنه بيفرض رأيه عليّ وخلاص، كنت باشوفها من ناحية إنه بيخاف عليّ وعايزني أبقى أحسن واحدة في الدنيا، وبعدين حصلت له ظروف في سنة تانية والظروف دي خلّته يعيد السنة وأنا نجحت وبقيت في سنة تالتة دلوقتي.. مشكلتي إني غيورة جدا وعارفة إن ده عيب فيّ، بس والله حاولت أصلّحه ماعرفتش أبقى واحدة تانية غيري، وهو بيتضايق من الموضوع ده، بس هو اللي بيخليني أغير لأن علاقاته بالبنات عادية، وقال لي ما دام إنتي مرتبطة بيّ ومرتبطة باسمي ماتكلميش ولاد خالص ولا تسلمي عليهم بالإيد وأنا عملت ده علشان مايزعلش مني.. ومشكلته إن هو وبنات خالته واخدين على بعض أوي وده مش بيعجبني، لأن بتحصل حاجات قدامي ولما باكلمه في التليفون بيضايقني، ويقول لي إحنا متربيين مع بعض وإحنا كده من زمان وإن يوم ما أتجوز مش هينفع أتجوز واحدة منهم، مع العلم إن أهله كان قاريين فاتحته هو وبنت خالته قبل كده.. ولما أنا ظهرت أقنع أهله إنه عايزني وإنه مش عايز حد غيري، والحمد مامته بتحبني أوي وأنا بحبها أوي لأنها كتير بتيجي عليه علشاني، وأنا معتبراها أمي التانية، بس أنا باحس إنه لما بيتجمع بيهم لازم بعديها نتخانق على أهون سبب، وده بيحسسني إنه مش تفكيره وإنه فيه حد مكبرها في دماغه وده بيضايقني كتير.. أنا دلوقتي مشكلاتي بقت كتير أوي، أول مشكلة فيهم إن ماما شوية ترضى بعلاقتي بيه وشوية لأ، علشان السنة اللي فرقت، وباحس إن ماما لما بتتعب بيبقى من الموضوع ده، مع إن ساعات كتيرة أوي بتطمن عليّ برة ما دام أنا معاه. المشكلة التانية إني غيورة أوي ومش عارفة أعمل إيه فيها، علشان أنا عارفة إن ده سبب مشكلتي معاه، وحاسة كمان إننا طول ما إحنا مع بعض بنبعد عن بعض ومش بنقرّب؟ مشكلتي التالتة إنه هو مش بيشوف المشكلة غير من ناحيته هو وبس، ومش بيدي نفسه فرصة إنه يشوفها من ناحيتي، ولما أعمل اللي في دماغي علشان ده لازم اللي يتعمل يقول لي الواحدة اللي مش بتحترم كلمة اللي معاها قبل الجواز عمرها ما هتحترمه بعد الجواز. بجد ساعات كتيرة باحس إني عايزاه وساعات كتير لأ، وباحس إني من غيره مش هاقدر أعيش، وساعات كتير باحس إني لما أبقى بعيدة عنه هابقى مرتاحة أكتر، مش عارفة أنا عايزة إيه. أنا عارفة إني طولت عليكم بس بجد جوايا إحساس نفسي أتكلم فيه مع حد، ومالاقيتش غيركم إنتم، يا ريت تساعدوني لأني بجد دماغي تعبت من كتر التفكير.. شكرا.
fares_romansia
صديقتي الجميلة.. الارتباط أيام الجامعة بقى ظاهرة منتشرة جدا، بس مش معناها إنه صح، مفيش مانع إنه يكون فيه اختلاط أو صداقة قوية، أو حتى إعجاب وارتياح وحب بين شخصين، لكن ده مش بيدي للعلاقة قوة وجمال إنها تكون علاقة شرعية وحقيقية زي الخطوبة أو الزواج، فخدي بالك، ساعات بنتخدع بفكرة الاندماج مع شخص وبنبدأ نديه حقوق مش له بحجة الحب والارتباط، ومش بنكتشف إن كل دي كانت أوهام غير لما بنصطدم بالمشاكل. بأي حق يعمل "سي السيد"؟! وبأي حق عاوزك تقولي نعم وحاضر دون نقاش؟! وليه بتسمعي كلامه؟! ولما هو عاوزك أحسن واحدة في الدنيا، ليه ماحاولش يكون أحسن واحد في الدنيا وينجح هو كمان في الكلية؟! ولا إنتي المفروض تبقي أحسن واحدة في الدنيا، وهو مش مهم يكون إيه؟! وأي ظروف دي اللي تبرر فشله؟! بالنسبة لموضوع الغيرة فهو مترتبط بفكرة ثقتك في نفسك، ومرتبط كمان بفكرة ارتباطه بواحدة من بنات خالته، وعشان كده إنتي بتغيري منهم تحديدا، وأفتكر هو بيكون متعمّد أحيانا يثير غيرتك دي، بس السؤال الأهم: لما مامته عارفاكي ومامتك عارفة وهو كان قاري فاتحة قبل كده، ليه مش بيتقدم لك؟ أكيد مامتك بتفكر في السؤال ده زيي وبتفكر في الظروف اللي خلته يعيد السنة، وهل هي قوية فعلا كمبرر لفشله ولا هو مش حاسس بمسئولية ناحية ارتباطه، ده هو أساس كل المشاكل، حتى هزاره الزيادة مع بنات خالته معناه إنه لا يبالي لمشاعرك ولغيرتك، ومايفرقش معاه زعلك. صديقتي مامتك قلقانة عليكي، وإنتي كمان خايفة وقلقانة على نفسك وعلى قلبك، لكن مش عاوزة تعترفي عشان سرقاكي السكينة وفرحانة بالحب، ومش عاوزة تصدقي إنك ممكن تكوني اخترتي شخص غلط، ومش قادرة تتقبلي فكرة الفشل، وعشان كده ماشية في طريق مش باين له آخر. مشكلتك الأولى والتانية والثالثة والرابعة حلهم في إيديكي.. ماتديش حد أكتر من حقه، عشان مامتك تبطل تقلق، لازم الشاب ده يشيل نصيبه من مسئولية علاقتكم قدام الناس كلها، خليكي واثقة في نفسك، وهو كمان لازم يطمّنك كفاية عشان تبقي واثقة فيه، عشان تحلي مشكلة الغيرة، خليه هو يحترمك قبل الجواز ويتقدم لك الأول عشان يبقى فيها جواز من أصله، وخلي بالك الولد اللي بيقول كده، عادة مش بيحترم البنت اللي بتمشي معاه قبل الجواز! وأهم من ده كله فكري كويس واعرفي إنتي عاوزة إيه، إنتي لسه في أول الطريق وسنك صغير، عاوزة تشتغلي ولا تتجوزي؟ عاوزة الولد ده يبقى أبو ولادك وشريك رحلتك، ولا إنتي فرحانة بالحب وخلاص؟ شايفة مستقبلك معاه؟ تفتكري بعد 10 سنين من دلوقتي هيكون شكلكم إيه؟ وهاتبقوا فين؟ وبتعملوا إيه؟ فكري واختاري حياتك ومستقبلك بإيدك.
