أنا بجد مش عارفة أبدأ منين، ومش عارفة أصلاً إذا كنت ظلمت ولا اتظلمت.. أنا اتعرفت على ولد من النت، وارتبطنا بعد 4 شهور من تعارفنا، واتفق معايا إنه هيتقدم رسمي في شهر 7 اللي جاي، وكنا بنشوف بعض عادي. هو بيحبني جداً، ومامته كمان بتكلمني؛ بس المشكلة إن مرتّبه مش كبير أوي؛ يعني المفروض إنه يدوّر على شغل أحسن؛ بس هو بيقول وبيسكت. المهم واحدة صاحبتي قالت لي: المفروض البنت تشوف اللي قُدّامها شاريها قد إيه؛ فاقترحت عليّ أقول إني جاي لي عريس، وكان الغرض والله إني أشوف ردّ فعله مش أكتر.. لقيته بيقول لي: ماتقلقيش أنا هاكلّم العريس ده عشان يبعد عنك!! قلت له: إزاي يعني؟ قال لي: إنتِ هتجيبي لي رقمه، وأنا هاكلّمه. أنا بصراحة استغربت ردّ فعله، وهو قال لي: لو عاوزاني كلميني.. المشكلة إني عارفة ظروفه من الأول؛ بس ردّ فعله ده غيّرني أوي، وإحنا دلوقتي بقالنا فترة مش بنكلم بعض، وهو فاكر إني قبلت العريس، اللي هو مش موجود أصلاً. أنا مش عارفة أنا ظلمته معايا، ولا هو اللي كان المفروض يكون شاريني أكتر من كده؟ يعني أنا ببعدي كنت صح ولا غلط؟