السلام عليكم.. أنا أختي عندها 23 سنة ومتجوزة من 10 شهور، وعندها بنوتة وعندها مشاكل كتير مع جوزها، وجوازها كان جواز تقليدي عن طريق واحدة صاحبة ماما وجم البيت وحصل قبول وتمت الخطوبة وسافر بعديها بشهر.. وهو طول فترة الخطوبة كان إنسان كويس جدا ومتفاهم وحنين وكريم، لكن لما اتجوزوا لقيت كل حاجة عكس ما كانت في الخطوبة، يعني بيزعل من أقل حاجة وبيتضايق من حاجات تافهة بتحصل منها، يعني مثلا لو حد بص لها وهي جنبه في العربية بيزعل منها ومواقف تافهة كتير..
وهي بالرغم من إنها مش غلطانة بس بتراضيه عشان تمشّي حالها، وهو لما بيزعل منها مابيقولهاش هو زعلان ليه بس بيغير طريقة معاملته ليها وبيفضل مخاصمها باليومين وبيعند معاها، يعني مثلا مايرضاش يجيبها عندنا وكمان كتير كان بيزعق لها قدام أهله واتخانقت معاه كتير بسبب الطريقة دي..
وتقول له أنا مش باتعامل بالطريقة دي ولازم تغيّر طريقتك معايا يقول لها أنا راجل ودي طريقتي وده أسلوبي ومش هاتغير، وكان بيزودها معاها ويعند أكتر ويتريق عليها قدام أهله وهي قاعدة علشان يغيظها، بالرغم من إننا كويسين أوي معاه وزعلت منه وسابت له البيت ومشيت ولما جت لنا حكت لنا على كل حاجة عملها فيها من إهانة ليها ولينا وهو جه هو وأخته عشان يصالحوها وتروح معاهم، بس بابا وماما زعقوا له كتير ومارضيتش تروح معاه..
وبعديها بيومين جاب باباه وجوز أخته وجم علشان يصالحوها ورحت معاها بعد ما اعتذر لبابا كتير قدام الرجالة، بابا وافق وقال لها تروح معاه وجوزها قال لها إنه هايتغير ويبقى إنسان تاني، وفي الوقت ده كان باقي له أسبوع على إجازته ويسافر تاني وبقي كويس جدا في الأسبوع ده، لكن قبل ما يسافر كان عايزها تقعد عند باباه ومامته في البيت.
بس هي ماكانتش موافقة ولا إحنا كمان بس هو أصر واضطرت تقعد علشان ماتحصلش مشاكل تاني، بس مارتاحتش هناك وجت عندنا وزعل منها 3 شهور ماكانش بيكلمهاعشان كسّرت كلامه بعد ما سافر، وحتى لما اتصالحوا مابقاش بيكلمها على النت زي الأول وهي حاسة إن المسافة بينهم بتكبر وهي على طول بتعيط..
وبصراحة أنا فكرت إن ممكن يكون معمول لهم عمل، لأن هو حكى لنا أيام الخطوبة إنه كان متقدم لواحدة بس لما لقاها مش محترمة مارتبطش بيها وكمان أهله ماوافقوش عليها، وهي كانت بتجري وراه بس هو قال لنا إنه مادلهاش فرصة وقطع علاقته بيها.
ولقينا مكتوب على باب شقتها حسبي الله ونعمة الوكيل، فأنا فكرت إني أوديها لشيخ وكنت عايزة أعرف هل نمشي في سكة العمل دي ولا لأ، أصل بنت خالتي كان عندها مشاكل مع جوزها وطلع معمول لها عمل وهي دلوقتي كويسة جدا معاه.. محتاجة ردكم في أسرع وقت وأنا آسفة إني طوّلت عليكم، بس أنا حسيت إن كان في مشاكل كتير أصعب من دي وإنتم لقيتوا لها حل.. أرجوكم أفيدوني.
crazy.girl
صديقتنا العزيزة .. مع الأسف الشديد إنتي بتخلطي الأمور ببعض، أولا فكرة العمل دي فكرة خرافية، وفي الغالب لو لجأتي لحد هيكون مشعوذ أو دجال لكن مش شيخ ولا رجل دين أبدا.
وأنا شايفة تصديقك ليها فيه قلة إيمان بربنا، حاولي تقري سورة البقرة كاملة وسورة يس، مش قراءة وبس، قراءة وفهم وتمعن لما يقوله ربنا سبحانه وتعالى في كتابه الكريم، هتعرفي إن لا قدرة تعلو فوق قدرة الله، وعلى رأي أمي لما كنت أسألها وأنا طفلة عن الأعمال فترد ببساطة وتقول: "العمل عمل ربنا".
وصحيح إحنا مؤمنين إن فيه عالم للجن لكن مافيش أي دليل على الاتصال بين عالمنا وعالمهم، وفي الغالب لو ده حقيقي كانوا اللي بيسخّروا الجان قدروا يخلوهم أغنياء مثلا أو.. أو.. لكن هتلاقي الدجالين والمشعوذين اللي بيشتغلوا في الحاجات دي أغلبهم شحاذين بيستنوا الناس الجهلة والمغفلة عشان ينصبوا عليهم باسم الدين.
وبنت خالتك اللي مشاكلها اتحلت، أكيد مشاكلها اتحلت لأن السبب وراء المشاكل انتهى، ربنا برضه اللي بيقول فيما معناه وجعلنا لكل شيء سببا، والمشاكل اللي بين أختك وجوزها لها أسباب، وأول أسبابها إن مافيش تفاهم بين الاتنين، وإنه معظم الوقت هما بعيد عن بعض وفي سفر وغربة، وماحدش عارف العلاقة الخاصة بينهم أخبارها إيه.
بين الزوج والزوجة علاقة مركبة فيها كتير من المشاعر والجوانب اللي ماحدش يعرفها غيرهم، ومن رأيي إن أختك محتاجة فعلا لخبير، لكن خبير مُجرّب ويا ريت يكون حد قريب وموثوق فيه، مامتك أو ست لطيفة من ستات العيلة تكون شاطرة وناجحة في حياتها تقعد معاها وتفهمها إزاي تتعامل مع جوزها وتكسبه..
لأن الرجالة في أغلب الأوقات بيكونوا زي الأطفال سهل إرضاؤهم بس صعب السيطرة عليهم، أو ممكن هي تراسل "بص وطل" وتبعت مشكلتها بنفسها توضح فيها كل جوانب المشكلة عشان نقدر نساعدها.
طبعا شكرا ليكي على حرصك وخوفك على أختك وحياتها، وإنك بعتي لنا الرسالة دي، بس فعلا الحل لمشاكل أختك مش هيكون غير عند أختك نفسها وجوزها، ولا تقولي شيخ ولا تحاولي تتدخلي، لازم هما اللي يغيروا من نفسهم عشان وضعهم يتغير للأحسن.. وشكرا.
