السلام عليكم.. أولاً أنا عاوزة أقول لكم إني باثق فيكم جدا ونفسي تساعدوني. أنا كنت بحب شخص ومتعلقة بيه جدا لدرجة إني ماعرفش أعيش من غيره؛ هو محترم جدا وساعدني كثير إني أبقى أحسن وأتحجب وألتزم بالصلاة، وبعدين جه في يوم قال لي مش هينفع نكمل مع بعض؛ عشان إنتي بتتعلقي بيّ وأنا خايف مانكملش!! أنا السبب لأني غيورة جدا وهو بيشتغل في مجال ليه معجبين كتير، وأنا كنت باغير وأعمل مشاكل وسبنا بعض، وقال لي مش هينفع نتكلم تاني، أنا بقى عملت حوار وتعبت ودخلت المستشفى، صاحبتي قالت له بس كبرت الموضوع وكدبت أوي عليه. كانت نفسيته وحشة وصمم ييجي لي المستشفى، بس أنا خرجت وهو اكتشف كدب صاحبتي وبيقول إني أنا كمان كدابة وعملت معاها الحوار ده، وقال لصاحبتي أنا مش هاكمل مع واحدة كدابة ومش عاوز أشوف وشها ولا أسمع صوتها. ساعدوني أقنعه إزاي إني ماليش ذنب وإني ماكدبتش عليه، أرجوكم ساعدوني أنا هاتجنن.. نفسي يصدّقني ويعرف إني مش كدبت عليه لو حتى بعد كده مايكلمنيش، بس يصدّق إني مش كدبت عليه، ساعدوني.. لكم مني جزيل الشكر. miss_mansoura
صديقتنا العزيزة.. رسالتك دمها خفيف؛ لأنها بتثبت إن فعلا الكذب مالوش رجلين، وبتثبت إنك مش كذابة شاطرة، علشان مابتعرفيش تكذبي كويس، يعني إنتي في رسالتك قلتي: "سبنا بعض وقال لي مش هينفع نتكلم تاني، أنا بقى عملت حوار وتعبت ودخلت المستشفى".. يعني بتعترفي إنك عملتي حوار التعب والمستشفى، والحقيقة يا صديقتي إنه ماكتشفش كذب صحبتك، ده اكتشف كذبك إنتي؛ لأن في الحقيقة صاحبتك ماكنتش أكثر من رسول بينكم، ونقلت له اللي أنت طلبتيه منها تنقله عشان تحنن قلبه عليكي وترجّعه ليكي.
بس يا صديقتي الحنية مش بتتشحت، إزاي تقنعيه إنك مالكيش ذنب؟ الموضوع ده صعب؛ لأن صاحبتك مالهاش مصلحة إنها تكذب، ولأن الحقيقة أنكم إنتم الاثنين كذابين فعلا، الحل الوحيد إنك تقنعيه إنك مش كذابة هو إنك تبقي صادقة معاه، وعشان تبقي صادقة معاه لازم تبقي صادقة مع نفسك الأول.
ليّ صديقة كانت دايما تقول لي أنا مش عارفة ليه الناس بتكدب "It needs too much work"، وده حقيقي الكذب بيحتاج شغل كثير أوي علشان تغطي عليه، مع إن الصراحة سهلة وواضحة زي الشمس، ومش محتاجة تثبتيها لأن هي كده فعلا.
عارفة إمتى هيصدقك؟ لما تقولي له الحقيقة كاملة، وهي أنك بتحبيه ومش قادرة تعيشي من غيره وأنك فعلا كذبتي وعملتي الحوار ده عشان يرجع لك وإنك ماكنش قصدك تكذبي قد ما كان قصدك ترضيه وتقربيه منك، واعترافك بالكذب وصدقك في التوبة عنه وإنك مش هتكذبي عليه تاني هو اللي هيحدد إذا كان هيصدقك ويرجع لك ولا لأ.
صديقتي.. الطريقة الوحيدة عشان تخلي أي حد يصدقك هو إنك تقولي الصدق، لكن لو بتدوري على طريقة تخليه يصدق بيها "حوار"، فده هيحتاج شغل كثير منك لأن الكذب زي ما قلنا مالوش رجلين.
وصدقك مع نفسك كمان لازم يخليكي تعيدي تفكير في العلاقة دي واللي ممكن تكون غيّرتك للأحسن، لكن في الوقت نفسه لازم إنك تسعي تخليها علاقة في النور عشان متأذكيش أكتر ما بتفيدك.. وفقك الله إلى طريقة الهداية.
