أنا بحب واحد أووووي وهو بيحبني بس أنا مش باعمل له اللي هو عايزه؛ مثلاً يعني إحنا مع بعض بقالنا 8 شهور وما خرجناش ولا مرة ومش باتصل به كتير، مرة كل يومين تلاتة بس بيكون غصب عني وكنت بكلمه مرة كل أسبوع أو أسبوعين وكنت باقول له ما تتصلش أنت عشان ما يحصلش مشكلة، المهم إحنا سبنا بعض من شهر ورجعنا تاني بس حاسة إنه زعلان عشان حوار الخروج وكده، مع العلم إن دي أول علاقة في حياتي عشان كده مش عارفة أتصرّف معاه وأرضيه إزاي؟؟ يا ريت تقولوا ليّ أعمل إيه عشان نرجع مع بعض زي الأول وأوصل له إزاي إن كل ده غصب عني؟؟ بحبه أوي صديقتي العزيزة.. مرة كنت في ندوة وكانت بتتكلم عن البنات ومشاكلهم، وبعدين الدكتورة اللي كانت بتحاضر في الندوة دي قالت حاجة جميلة أوي قالت: إن معظم مشاكل البنات بتكون في طريقة التربية؛ لأن الأم بتربي بنتها على فكرة إنها أميرة أو سندريلا لازم تكون جميلة وهادية ومؤدبة، وده ما فيش مشكلة فيه، لكن المشكلة إنها بتربيها على إنها تستنى الفارس اللي هييجي يخطفها على حصانه الأبيض أو يبوسها البوسة اللي تنجيها من الموت زي في حدوتة "سنو وايت والأقزام" وبعد كده تبدأ الحياة، بس المشكلة في مجتمعنا إنه لما بييجي الفارس ساعات كتير ما بيطلعش فارس ولا حاجة، والبوسة إياها بدل ما تفوّق الأميرة بتنيّمها وبتخلّيها تغمّض عينيها عن عيوبه الكتيرة، وأحيانا عن مستقبلها ودراستها وشغلها، ولما بتصحى البنت بتلاقي الفارس راح واخد معاه كل حاجة، والبنت بتكون ضعيفة؛ لأنها ما عملتش حاجة لنفسها تقويها لو هو مش جنبها. في مشكلة سابقة أنا قلت لصاحبتها إنتِ أميرة مستنية أمير، ولكل بنت باقول لها لازم تفكري في نفسك كأميرة مستنية أمير، بس أميرة مش مجرد لقب لكن بعلمك وشخصيتك وأخلاقك وطموحك وعزة نفسك، وأنا شايفاكِ أميرة فعلا بكرامتك وعزة نفسك وأخلاقك اللي فرضتيها على الشاب اللي ارتبطي به. فالتزمتِ بأنكم ما تتقابلوش وإنه ما يتصلش بيكِ واحترمتِ أهلك وقيمك اللي علّموها لك. لكن هو ما حترمش ده رغم إنكم بقالكم شهور ما فكرش في الارتباط بيكِ رسمياً، بل بالعكس تحفظك وأخلاقك خلوه زهق وبِعد عنك لفترة.. صديقتي... فهل دي أخلاق أمير؟ أنتِ بتسألي إزاي ترضيه وإزاي ترجعي علاقتكم تاني. صديقتي لو إنتِ عاوزة ترضيه وترجعي علاقتكم فهو ما خلاش ليكِ أي طريقة غير إنك تبدئي في التنازلات، فهل هتقبلي تتنازلي وتتهاوني في حق نفسك من أجله؟ افعليها لو شعرتِ أنه ذلك الأمير الذي يستحق كل تنازلاتك وسيحترمها ويُقدّرها.. وإن لم تشعري بذلك فابتعدي عنه ودققي في اختياراتك المقبلة؟!!
