النهارده هنعمل براونيز بصوص الشيكولاتة بناء على طلب بعض أصدقائنا اللي بعتوا لنا علشان يعرفوا طريقته.. يا ريت تجرّبوه وتقولوا لنا رأيكم فيه. براونيز بصوص الشيكولاتة المقادير: 2 بيضة 3⁄4 كوب دقيق 4 ملعقة كبيرة زبدة ملعقة صغيرة فانيليا 1⁄4 ملعقة صغيرة ملح كوب عين جمل مجروش ملعقة صغيرة بيكينج باودر 1 1⁄2 كوب شيكولاتة خام 1⁄4 كوب سكر الطريقة: 1- سيّحي الشيكولاتة في حمام مائي ساخن، وضيفي عليها الزبدة مع التقليب لغاية ما تسيح تماما. 2- اخلطي الفانيليا والملح والبيكينج باودر والسكر مع الدقيق. 3- اضربي البيض كويس بالمضرب، وضيفي عليه خليط الدقيق تدريجيا، مع الاستمرار في التقليب باستخدام ملعقة خشب. 4- ضيفي الشيكولاتة السايحة على الخليط ده، واستمرّي في التقليب تدريجيا لحد ما كل المكونات تتجانس. 5- بعد كده ضيفي عين الجمل المجروش، وقلّبيهم كويس مع بعض. 6- هاتي الصينية أو القالب اللي هتعملي فيه، ويفضّل إنها تكون قالب مستطيل، وادهنيه بالزبدة، وافردي فيه طبقة خفيفة من الدقيق، وصبّي خليط البراونيز فيها، ودخّليه الفرن على درجة حرارة 180. 6- بعد ما البراونيز يستوي، طلّعيه، وقطّعيه شرائح، وممكن تزيّنيه بصوص الشيكولاتة عند التقديم.. وبالهنا والشفا.
وبكده تكون خلصت وصفتنا النهارده.. نتمنّى إنكم تجرّبوها وتبعتوا تقولوا لنا رأيكم فيها.. وكمان لو عندك أي وصفة عايزة تعرفيها ممكن تبعتي لنا.. وإحنا هنقدّمها لك في أقرب وقت..