أولاً.. أحب أحيي "بص وطل" جداً اللي كل مرة بيجيب حاجات حلوة كتير، والباب ده كمان تحفة، أنا بحبكم أوي أوي، يا رب تفضلوا كده زي ما إنتم حلوين على طول... أنا النهارده جايبة لكم طريقة عمل "كيكة بصوص الشيكولاتة" تحفة، وعلى فكرة الوصفة دي أنا مجرّباها، وبصراحة طلعت تحفففففففففففة وكمان سهلة جداً... تعالوا نشوف الطريقة مع بعض.. المقادير: كوب سكر كوب زيت كوب ماء 4 ملاعق كبيرة لبن بودرة 4 ملاعق كبيرة كاكاو خام 2 بيضة باكو فانيليا كوب دقيق باكو بيكينج باودر الطريقة: 1- أول حاجة نضع كوب السكر وكوب الماء وكوب الزيت والكاكاو واللبن والفانيليا في الخلاط، ونضربهم مع بعض لحد ما يبقوا متجانسين ويدوبوا كلهم والسكر يدوب، وكمان ممكن تحطي المكونات دية شوية شوية علشان ما تبقاش كتيرة على الخلاط ويدوبوا كويس. 2- بعد كدة ناخد من الخليط ده كوباية كاملة ونخليها على جنب لوحدها. 3- نجيب بيضتين ونكسرهم على باقي الخليط اللي في الخلاط ونضربه تاني كويس. 4- نحط الخليط اللي ضربناه مع البيض في وعاء بلاستيك ونضيف عليه كوباية الدقيق والبيكينج باودر، ونعجنهم مع بعض جامد بالملعقة. 5- بعد كده نصب العجينة في الصينية وندخلها الفرن لحد ما تستوي (العجينة بتبقى سايلة شوية). 6- أوّل ما العجينة تستوي وتخرجيها من الفرن، بنجيب كوباية الصوص اللي كنا سيبينها على جنب وبنصبها على وش الكيكة وبنسيبها شوية. 7- بعد ما الكيكة تبرد ممكن نحطها في الثلاجة، بس أنا بصراحة مش بحطها أنا كمان بحب أكلها والصوص لسه دافي شوية.. وكلي بقى وادعي ليّ، وميرسي ليكم كتير على تعليقاتكم الجميلة. وفي النهاية أسرة "قمر 14" تحب تشكر "داليا" على الوصفة الجميلة دي.. ونتمنى إنكم تجرّبوها وتعجبكم.. وتبعتوا تقولوا لنا رأيكم إيه.. ولسه مستنيين وصفاتكم الجامدة جداً.. ويا ريت تبعتوها على لينك.. ورينا شطارتِك..
