السلام عليكم ورحمة الله.. أنا عندي 16 سنة، أنا عارفة إني لسه صغيرة على الحب والكلام ده؛ بس مش عارفة أعمل إيه. الحكايه بدأت من 3 سنين مع واحد قريبي وجاري في نفس الوقت، حسيت إن فيه حاجة من ناحيته.. وأنا كمان حبيته مع الأسف، وماكنتش عاوزة حاجة من دي دلوقتي خالص، وهو إنسان محترم جدا وبيخاف عليّ؛ ده اللي عرفته من كلامي معاه.. بعد سنتين تقريبا من النظرات حصل إننا اتكلمنا على النت، وهو مايعرفش أنا مين. إحنا بنتكلم على النت في حدود جامد؛ لأن أنا مش بنت من بتوع اليومين دول كل همها الموبايل والأولاد واللبس والكلام الفاضي؛ ده أنا هدفي حاطاه قدامي؛ إني عاوزة أكون حاجة في المجتمع وأنا داخلة على ثانوية عامة؛ فمش عاوزة أشغل دماغي في الحاجات دي؛ لأن مستقبلي أهم. أنا الحمد لله متقربة من ربنا، وعارفة ربنا كويس جدا، وأنا كمان متضايقة من كلامي معاه لأني حاسة إن ده بيغضب ربنا؛ مع إنه كلام في حدود وكلام عام. أرجوكم تساعدوني جدا لأني بصراحة عاوزة أنساه.. يمكن في الصيف عشان فيه فراغ وكلام على النت يبقى الموضوع صعب؛ لكن لما يكون فيه مذاكرة هاشغل نفسي.. أنا عاوزة أعرف إزاي أنساه وأتغلب على كل الحاجات اللي جوايا. yasmen