أنا بحب بنت معايا في الكلية، وحاولت كتير أعبّر لها عن حبي ليها، وجيت في مرة وقّفتها قالت لي: قل لي إنت عايز مني إيه. قلت لها: أنا بافكّر فيكِ كتير.. طبعاً الكلام ده كله حصل بعد ما كُنت بالمّح لها الأول، وباحسسها إني مهتمّ بيها، وأنا من ناحيتي حسيت إنها ممكن توافق، وتحس بيّ. المهم بعد ما قلت لها إني بافكّر فيها كتير، لقيتها ضحكت وبصّت في الأرض ومشيِت وسابتني.. بعد كده حاولت أكلّمها تاني، قعدت تفهّمني إنها مش فاكرة. المهم قلت لها تاني إني معجب بيكِ، قالت لي: طب إنت عايز ردي يبقى إيه؟ قلت لها لو أعرف ماكنتش سألتك. المهم قعدِتْ تستعبط، وعملت مش فاهمة.. أنا سيبتها المرة دي ومشيت؛ بس أنا مش عارف أعمل إيه تاني معاها؛ مع إن نظراتها ليّ باحسّ إنها متقبلة؛ بس مش عارف إيه اللي مخلّيها تعمل كده. مش عايزة تعبّر لي عن مشاعرها غير كده، أنا قلت لها طب قولي لي آه ولا لأ، عشان أرتاح.. مش عايزة تدّيني ردّ.. أنا تعبان بجد، ونفسي حد يساعدني. cheetos