السلام عليكم... أولاً أحب أحييكم على الموقع الهايل ده؛ لأنه بجد فيه حاجات كتير بتعجبني جدا جدا، ربنا يوفّقكم إن شاء الله. مشكلتي بقى إني بحب وبحب أوي أوي كمان، بحب حد بيموت فيّ، وأهله عارفين ومامتي كمان، مش بنتقابل كتير عشان إحنا متفقين إن ده غلط و و و..... وكل حاجة ماشية تمام، ومافيش خناق، وطِباعه زي طباعي، هادئ ومؤدّب، وعارف ربنا كويس جدا. فاضل لي سنة واحدة في الكلية اللي هي المكان الوحيد اللي باشوفه فيه، إحنا مابنتقابلش كتير؛ يعني ممكن تبقى مرة كل شهرين ولاّ حاجة. وأنا قرّرت إن بعد ما الكلية بتاعتي تخلص مش هنتقابل خالص، عقلي بيقول لي كده بس قلبي مش مطاوعني، خايفة يحصل حاجة تخلّيه يبعد عني، وخصوصا إن الكلية بتاعته خمس سنين مش أربعة زيي، يعني ممكن أي بنت تلِف عليه وتِشغله زي ما باشوف وأسمع من ناس كتير.... دي أول حاجة قلقاني جدا مع إني واثقة فيه، بس كل ما حُبّي ليه بيزيد كل ما باخاف عليه، وعلى حبنا أكتر.
تاني حاجة لما سألته عن الخطوبة وهو ناوي إيه؟!! قال إنه مش عايز يخطب ويفضل خاطبني 3 سنين مثلا، هو عايز بالكتير أوي يخطب سنة، معنى كلامه إنه مش عايز يخطب بعد ما يخلص!!! واللي مضايقني في الحكاية دي إني هاضطر أخبي على بابا فترة أكبر وده بيضايقني؛ فأنا اقترحت عليه إن مش لازم خطوبة، بس على الأقل يكلِّم بابا ويفهِّمه علاقتنا دي، وهو وافق.. بس مش عارفة الاقتراح ده صح ولّا إيه؟ أنا باخاف زيادة عن اللزوم صح؟